Aposetolo 1

1Teofilo e, arave omopa buka voa Iesu sa leiape aeata satiriaraiape etau foromai la ara uka kekese leipe, soa areve oarehōva soa#Luk 1:1–4 2itiiti Ualare sa arero kauri voa fareōvi pataipe soa. Arero fareōvi patai vei leipe soa, are Arahoha Lareva ve siahu ita are haikaea ovōpe lea aposetolo karu la o mei satiriaraiape. 3Áre hehea leipe soa ve aite voa, are makuri ata lei, areve maea la erero muiaiape o kofa leita peise rauapo ita; sare forty ve iri voa ere arero ofae eavaiape, aea are Ualare ve basileia vei laua sukavaiape. 4Are ere ita fareho kokoruka erero o kere mō ōpe, Ierusalema levi kiripaia, a—, arave Oa sa evera otoare ōpe meru etau, e arave ape o sa ero satiriaraia lea etau vei, tai ao.#Luk 24:49 5Ipi Ioane ma sa bapatiso leiape, a—, mea sare fafareso ve aite voa ero Arahoha Lareva sa bapatiso leiti roi.#Mat 3:11; Mak 1:8; Luk 3:16; Ion 1:33

Iesu kauri voa pataipe

6Soka ere farehoria kokoruka arero lalasi lei mō ōpe, Papuvita e, a mea soa voa basileia la Israela la ata miarai roi ei? 7A—, are erero mō ōpe, Lea sare sare aeata soasoa arave Oa ve siahu voa sisea, e lea la ore leiti vei usoso kasirau. 8A—, Arahoha Lareva sa ero tai foreraita lea mea e siahu ovi, aea e ara vei vavavi itoro ari roi, Ierusalema voa aeata Iudea, Samaria ita ve soa foromai voa, aeata tetetete mearovaeka ve itua‐tao itua‐tao voa.#Mat 28:19; Mak 16:15; Luk 24:47–48 9Are lea o mei, ere fofoisaiape soa arero ovi patei, mea‐e sa arero ereve ovo ita ovi sasaukōpe.#Mak 16:19; Luk 24:50–51

10Are pataiape soa, ere kauri voa misilei ofae i a’, puta sea mopaita heavita oraka ereve maea maria voa hōvakao forera pōvi, 11auka mō ōpe, Galilea karu e, e kauri voa misilei pepeipeta ipi levea? E ita pea kauri voa fareōvi pataita lea Iesu, are aite soa ata faukai roi mea faitora voa pataita lea mai feare.

Iudasi ve ipaisa vita

12Lea mea aposetolo karu ere Olive Raepa kiripi Ierusalema voa ata keroripe; lea oti soa isei isei Ierusalema voa usoso Sabati sare voa teraita ve ára feare. 13Ere karikara voa oropi, ere pepeiape lea uvi ve arori lalava voa pataipe. Ereve rare meha: Petero, aea Ioane, aeata Iakobo aea Anderea ita, Filipi aea Tomasi ita, Batolomeo aea Mataio ita, Iakobo Alefeo aea Simona Selote karu, aea Iuda Iakobo.#10:2–4; Mak 3:16–19; Luk 6:14–16 14Lea karu foromai veveu vei kokorukaiape, aea uamori hea ita farehoria, aea Iesu ve lou Maria aea areve maraiosu ita ta reha.

15Soka sare hea aite voa Petero kokorukaita karu ve aru voa itoipe; ere karu usoso 120 feare. Are mō ōpe, 16Paumarehari e, Safu Karoro okofa reha, Arahoha Lareva Davida ve ape sa evera moipe o ipi Iudasi, Iesu la fasaia karu la taravi kavaia lea vita vei. 17Are ta ereitave firu karu leipe, ipi Iesu arero haikaea ovōpe ereita ita fareho tivi leiti vei.

18Are leitia lea kaiae vei are moni ovi mea itua la itaea lei ovaita. Lea oti voa are sosorokapi putei, ére haea horou pisiri foreraita.#Mat 27:3–8 19Ierusalema karu foromai lea fari la mapi, lea oti ereve elore uri rare Akeledama la aravaita, lea o ve eite Ovo ve oti. 20Ipi Salamo buka voa mea o uka la eaea,

Areve uvi meara leitia,

karu aea lōvoa levi pavaia.

O aeata meha,

Areve tivi oti karu haria la lei ovaia.#Sal 69:25; 109:8

21Lea vei ereita heavita farakeka la haikaeai, ereita ita fareho Papuvita Iesu opi ata itoia la ore lei vavavaita vita, ereitave maeapavora farakeka aea Papuvita sa ereita ita fareho meiape soa savori voa, 22soa Ioane sa arero bapatiso leipe soa itiiti arero ereita voa fareōvi pataia lea sare voa.#Mat 3:16; Mak 1:9; 16:19; Luk 3:21; 24:51 23Soka ere heavita orakoria la eli ovōpe, Iosefa Barasabasi la aravōpe, areve rare aea ta Iusto, auka Matiasi ia. 24Lea mea ere Ualare la loki lei mō ōpe, Papuvita e, a karu foromai ve haiiri ore fae. Mea heavita orakoria voa, a haikaea ovaita lea vita farakeka la muiaia, 25are aposetolo ve tivi leiti vei; ipi Iudasi kaiae lei, lea tivi la kiripi areve elore kaiae oti voa soea pea. 26Ere ereukaro feai fasi, are Matiasi voa forea, aea aposetolo eleven voa arero farehoria la topiarōpe reha.

Currently Selected:

Aposetolo 1: TQO1983

Highlight

Copy