ꤗꤢꤞꤢꤧ 7
7
ꤒꤢꤩ꤬ꤟꤢꤩꤙꤢꤪ꤭ꤟꤢꤩꤙꤛꤢ꤬ ꤢꤨ꤭, ꤒꤢꤩ꤬ꤒꤣꤧ꤬ꤔꤢꤩ꤬ꤞꤢꤦꤙꤢꤪ꤭ ꤒꤣꤧ꤬ꤔꤢꤩ꤬ꤞꤢꤦꤙꤛꤢ꤬ ꤢꤨ꤭
(ꤜꤢꤨꤊꤢ꤬ ꤆:꤃꤇-꤃꤈, ꤆:꤄꤁-꤄꤂)
1“ꤟꤢꤩꤙꤢꤪ꤭ꤟꤢꤩꤙꤛꤢ꤬ ꤢꤨ꤭, ꤒꤣꤧ꤬ꤔꤢꤩ꤬ꤞꤢꤦꤙꤢꤪ꤭ꤒꤣꤧ꤬ꤔꤢꤩ꤬ꤞꤢꤦꤙꤛꤢ꤬ ꤒ꤫ꤢꤧ꤬ ꤢꤨ꤭ ꤒ꤫ꤢꤧ꤬ꤗꤢꤩ꤬ ꤔꤤ꤮꤯ ꤡꤢꤪꤗꤣꤧ꤬ꤚꤢꤧ꤬ ꤊ꤫ꤢꤦ꤬ ꤗꤢꤩ꤬ꤜꤣꤧ꤭ꤊꤢ꤬ꤋꤛꤢ꤭ꤏꤢꤦ꤬ ꤞꤢꤧꤊꤣꤧ꤭ꤋꤛꤢ꤭ ꤞꤤ꤭ ꤟꤢꤨꤔꤣꤧ꤬ ꤕꤢ꤭꤯ 2ꤗꤢꤩ꤬ꤒꤢꤩ꤭ꤟꤢꤩꤚꤣꤧ꤬ ꤡꤢꤪꤗꤣꤧ꤬ꤚꤢꤧ꤬ ꤊ꤫ꤢꤦ꤬ ꤗꤢꤩ꤬ꤜꤣꤧ꤭ ꤊꤢ꤬ꤋꤛꤢ꤭ꤏꤢꤦ꤬ ꤔꤢꤧ꤬ ꤟꤢꤨ ꤔꤢꤧ꤬ ꤟꤢꤩꤙꤢꤪ꤭ꤟꤢꤩꤙꤛꤢ꤬ ꤢꤨ꤭, ꤔꤢꤧ꤬ ꤒꤣꤧ꤬ꤔꤢꤩ꤬ꤞꤢꤦꤙꤢꤪ꤭ꤞꤢꤦꤙꤛꤢ꤬ ꤢꤨ꤭ ꤔꤣꤧ꤬ ꤕꤢ꤭꤯ ꤔꤢꤧ꤬ ꤗꤢꤩ꤬ ꤢꤨ꤭ ꤔꤢꤧ꤬ ꤟꤢꤩ ꤢꤨ꤭ ꤙꤢ꤮ ꤒꤢꤩ꤭ꤔꤣꤧ꤬, ꤡꤢꤪꤗꤣꤧ꤬ꤚꤢꤧ꤬ ꤊ꤫ꤢꤦ꤬ ꤗꤢꤩ꤬ ꤜꤤ꤭ꤊꤢ꤬ꤋꤛꤢ꤬ꤏꤢꤦ꤬ ꤊꤣꤧ꤭ꤜꤢ꤭ꤒꤢꤩ꤬ ꤔꤢꤧ꤬ ꤙꤢ꤮ ꤔꤣꤧ꤬ ꤕꤢ꤭꤯#ꤗꤢ꤬ꤊꤢꤨ ꤄:꤂꤄
3“ꤢ꤬ꤚꤝ꤫ꤤ꤬ꤢ꤬ꤚꤝꤢ꤭ ꤥ꤬ꤖꤢꤧ ꤘꤣ ꤞꤤ꤭ ꤕ꤫ꤥ꤬ꤠ꤫ꤢꤧ꤬ ꤖꤚꤢꤩ꤬ꤛ꤫ꤢꤦ꤬ꤢꤩ꤬ꤒꤢꤩ꤬ꤖꤢꤨ ꤒꤣ꤬ꤖꤚꤢꤩ꤬ ꤢ꤬ ꤕꤣꤧꤞꤢꤩ꤬ꤕꤜꤢꤪ꤬ꤊꤢꤨ꤭ ꤖꤢꤧ ꤚꤣꤧ꤬ ꤞꤤ꤭ ꤗꤢꤧꤓ꤫ꤣꤧ꤬, ꤗꤢ꤬ꤔꤢꤧꤚꤣꤧ꤬ ꤞꤢꤪ꤬ꤊꤜ꤫ꤢꤪ꤬ ꤒꤣ꤬ꤊꤜ꤫ꤢꤪ꤬ ꤥ꤬ ꤡꤣꤧ ꤘꤣ ꤞꤤ꤭ ꤕꤣꤧꤞꤢꤩ꤬ꤕꤜꤢꤪ꤬ꤊꤢꤨ꤭ ꤡꤣꤧ ꤚꤣꤧ꤬, ꤞꤤ꤭ ꤗꤢꤧꤓ꤫ꤣꤧ꤬ ꤚꤣꤧꤘꤢꤦ꤬ ꤊꤣꤧ꤭ꤢꤨ꤭ ꤒꤥ꤬ ꤗꤢꤩ꤬ꤒꤢꤩ꤭? 4ꤙꤣꤧ ꤞꤢꤪ꤬ꤊꤜ꤫ꤢꤪ꤬ ꤥ꤬ ꤡꤣꤧ ꤘꤣ ꤞꤤ꤭ ꤕꤣꤧꤞꤢꤩ꤬ꤕꤜꤢꤪ꤬ꤊꤢꤨ꤭ ꤢ꤬ꤋꤢꤩ꤭ꤔꤣꤧ꤬, ꤞꤤ꤭ ꤡꤝꤢꤟꤢꤩꤒ꤫ꤥ꤬ ꤞꤤ꤭ ꤕ꤫ꤥ꤬ꤠ꤫ꤢꤧ꤬ ꤒꤣ꤬ꤖꤚꤢꤩ꤬ ꤔꤢꤧ, ‘ꤠꤢꤧ꤭ ꤒꤣꤧ꤬ꤋꤝꤢ ꤓꤢꤩ꤬ꤊꤢꤧ꤭ ꤕ꤫ꤢꤩ꤬ ꤔꤢꤧ꤬ ꤢ꤬ꤚꤝ꤫ꤤ꤬ꤢ꤬ꤚꤝꤢ꤭ ꤥ꤬ꤘꤣ ꤔꤢꤧ꤬ ꤕꤣꤧꤞꤢꤩ꤬ꤕꤜꤢꤪ꤬ꤊꤢꤨ꤭ ꤔꤣꤧ꤬,’ ꤟꤢꤩꤔꤣꤧ꤬ꤗꤢ꤬, ꤢ꤬ ꤔ꤫ꤤ꤬ꤡ꤫ꤢꤧ꤬ ꤔꤢꤧ꤭ ꤟꤢꤧ꤭? 5ꤖꤚꤢꤩ꤬ ꤢꤧꤡꤢꤪꤢꤧꤒꤢꤩ꤬ ꤢ꤬ꤔ꤫ꤢꤩ꤬ ꤞꤤ꤭꤮ ꤖꤛꤢꤓꤢꤩ꤬ꤊꤢꤧ꤭ ꤚ꤫ꤣꤧ꤬ꤜꤣ ꤞꤢꤪ꤬ꤊꤜ꤫ꤢꤪ꤬ ꤥ꤬ ꤘꤣ ꤞꤤ꤭ ꤕꤣꤧꤞꤢꤩ꤬ꤕꤜꤢꤪ꤬ꤊꤢꤨ꤭ ꤔꤣꤧ꤬, ꤒꤢꤦꤚꤣꤧ꤬ ꤞꤤ꤭ ꤗꤢꤧꤓ꤫ꤣꤧ꤬ꤜꤥ꤭ꤚꤢꤧ ꤚꤣꤧ꤬ ꤞꤤ꤭ ꤒꤣꤧ꤬ꤋꤝꤢ ꤓꤢꤩ꤬ꤊꤢꤧ꤭ ꤡ꤫ꤢꤧ꤬ ꤕ꤫ꤢꤩ꤬ ꤢ꤬ꤚꤝ꤫ꤤ꤬ꤢ꤬ꤚꤝꤢ꤭ ꤥ꤬ ꤘꤣ ꤞꤤ꤭ ꤕ꤫ꤥ꤬ꤠ꤫ꤢꤧ꤬ ꤢ꤬ ꤕꤣꤧꤞꤢꤩ꤬ꤕꤜꤢꤪ꤬ꤊꤢꤨ꤭ ꤣꤧ꤭ꤔꤣꤧ꤬ ꤖꤢꤧ꤯
6“ꤡꤢꤪꤗꤣꤧ꤬ꤚꤢꤧ꤬ ꤢ꤬ꤒꤢꤩ꤬ ꤒꤣꤧ꤬ꤟꤢꤩ꤬ ꤔꤣꤧ꤬ ꤘꤣꤧ ꤒ꤫ꤢꤧ꤬ ꤔꤢꤧ ꤓꤝꤤ꤬ꤒꤣꤧ꤬ꤟꤢꤩ꤬ ꤒ꤫ꤢꤧ꤬ꤗꤢꤩ꤬, ꤠꤤ꤭ꤒꤢ꤭ ꤕ꤫ꤢꤩ꤬ ꤒ꤫ꤢꤧ꤬ ꤜ꤫ꤢꤪ꤬ꤞꤢꤩꤜ꤫ꤢꤪ꤬ꤖꤚꤥ꤬ ꤒꤣꤧ꤬ꤟꤢꤩ꤬ ꤘꤣ ꤓꤢꤧꤒꤣꤧ꤬ꤟꤢꤩ꤬ ꤢ꤬ꤕꤣꤧꤞꤢꤩ꤬ꤑꤢꤩ꤭ ꤔꤣꤧ꤬ ꤒ꤫ꤢꤧ꤬ꤗꤢꤩ꤬, ꤞꤤ꤭ ꤊꤢꤩ꤬ ꤠꤤ꤭ꤒꤢ꤭ ꤕ꤫ꤢꤩ꤬ ꤢ꤬ ꤟꤢꤩꤔꤣꤧ꤬ꤗꤢ꤬ ꤢ꤬ ꤊ꤫ꤢꤦ꤬ ꤛ꤫ꤤ꤬ꤒꤣꤧ꤬ꤖꤚꤢꤪꤊꤢꤧ꤭ ꤜꤢꤪ꤭ ꤕꤢ꤭, ꤓꤥ꤭ꤕꤢ꤭ꤚꤣꤧ꤬ ꤢ꤬ ꤊ꤫ꤢꤦ꤬ ꤢ꤫ꤢ꤬ ꤊꤢ꤬ꤋꤛꤢ꤭ ꤞꤤ꤭ ꤕꤢ꤭꤯”
ꤊꤝꤤ꤭ ꤜꤢ꤭ꤋꤢꤧ꤭, ꤗꤢꤧꤕꤢꤨ꤭ ꤜꤢ꤭ꤋꤢꤧ꤭, ꤘꤢꤪ꤬ ꤜꤢ꤭ꤋꤢꤧ꤭
(ꤜꤢꤨꤊꤢ꤬ ꤁꤁:꤉-꤁꤃)
7“ꤊꤝꤤ꤭ ꤗꤣꤧ꤭ ꤜꤢ꤭ꤋꤢꤧ꤭, ꤞꤤ꤭ ꤊ꤫ꤢꤦ꤬ ꤔ꤫ꤤ꤬ꤙꤢꤩ꤬ ꤕꤢ꤭! ꤗꤢꤧꤕꤢꤨ꤭ ꤗꤣꤧ꤭ ꤜꤢ꤭ꤋꤢꤧ꤭, ꤞꤤ꤭ ꤊ꤫ꤢꤦ꤬ ꤗꤢꤧꤓ꤫ꤣꤧ꤬ ꤕꤢ꤭꤯ ꤘꤢꤪ꤬ꤗꤣꤧ꤭ ꤜꤢ꤭ꤋꤢꤧ꤭ ꤊꤣꤧ꤬ꤘꤢ꤭ꤔꤣꤧ꤬, ꤡꤢꤪꤗꤣꤧ꤬ꤚꤢꤧ꤬ ꤊ꤫ꤢꤦ꤬ ꤙꤢꤗꤥ꤭ ꤕ꤫ꤢꤩ꤬ꤘꤢꤦ꤬ ꤞꤤ꤭ ꤕꤢ꤭꤯ 8ꤗꤢꤩ꤬ꤒꤢꤩ꤭ꤟꤢꤩꤚꤣꤧ꤬ ꤜꤢꤪ꤭ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤊꤝꤤ꤭ꤒꤢꤩ꤬ ꤒꤣꤧ꤬ꤟꤢꤩ꤬ꤔꤣꤧ꤬, ꤢ꤬ ꤊ꤫ꤢꤦ꤬ ꤔ꤫ꤤ꤬ꤙꤢꤩ꤬ ꤕꤢ꤭, ꤚꤣꤧ꤬ ꤜꤢꤪ꤭ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤗꤢꤧꤕꤢꤨ꤭ ꤒꤢꤩ꤬ ꤒꤣꤧ꤬ꤟꤢꤩ꤬ꤔꤣꤧ꤬, ꤢ꤬ ꤊ꤫ꤢꤦ꤬ ꤗꤢꤧꤓ꤫ꤣꤧ꤬ ꤕꤢ꤭, ꤚꤣꤧ꤬ ꤜꤢꤪ꤭ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤘꤢꤪ꤬ ꤊꤣꤧ꤬ꤘꤢ꤭ ꤒꤣꤧ꤬ꤟꤢꤩ꤬ꤔꤣꤧ꤬, ꤡꤢꤪꤗꤣꤧ꤬ꤚꤢꤧ꤬ ꤊ꤫ꤢꤦ꤬ ꤙꤢꤗꤥ꤭ ꤕ꤫ꤢꤩ꤬ ꤜꤢꤨ꤭ ꤕꤢ꤭꤯
9“ꤘꤣ ꤞꤤ꤭ꤊꤜꤢꤩ꤭ꤔꤣꤧ꤬ ꤞꤤ꤭ꤖꤢꤨ ꤊꤢꤩ꤬ ꤊꤝꤤ꤭ꤢꤩ꤬ ꤞꤤ꤭ ꤏꤢꤩ꤬ꤢꤩ꤬ ꤟꤢꤩꤚꤣꤧ꤬ ꤞꤤ꤭ ꤘꤣꤧꤢꤩ꤬ ꤛꤢꤩ꤬ꤞꤤ꤭ ꤔꤢꤧ ꤜ꤫ꤢꤪ꤬ ꤔꤣꤧ꤬ꤗꤢ꤬ ꤢ꤬ ꤥ꤬ꤔꤢꤧ꤭ ꤒꤣ꤬ꤖꤚꤢꤩ꤬ꤖꤚꤢꤩ꤬ ꤟꤢꤧ꤭? 10ꤒꤥ꤬ꤗꤢ꤬ꤔꤢꤧ ꤞꤤ꤭ꤖꤢꤨ ꤊꤢꤩ꤬ ꤊꤝꤤ꤭ꤢꤩ꤬ ꤞꤤ꤭ꤒꤢꤩ꤭ꤟꤢꤨ ꤟꤢꤩꤚꤣꤧ꤬ ꤞꤤ꤭ ꤘꤣꤧꤢꤩ꤬ ꤛꤢꤩ꤬ꤞꤤ꤭ ꤔꤢꤧ ꤚ꤫ꤢꤨ꤬ꤔꤣꤧ꤬ꤗꤢ꤬ ꤢ꤬ ꤥ꤬ꤔꤢꤧ꤭ ꤒꤣ꤬ꤖꤚꤢꤩ꤬ꤖꤚꤢꤩ꤬ ꤟꤢꤧ꤭? 11ꤞꤤ꤭ ꤗꤢ꤬ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤗꤢꤨꤗ꤫ꤢꤧ꤬ꤚꤤ꤬ꤡ꤫ꤢꤧ꤬ ꤒꤣꤧ꤬ꤟꤢꤩ꤬ ꤖꤢꤧ ꤒꤣꤧ꤬ꤘꤢꤦꤚꤣꤧ꤬ ꤞꤤ꤭ ꤞꤤꤑꤢꤩ꤭ ꤘꤣꤧꤢꤩ꤬ ꤞꤤ꤭ꤖꤢꤨꤞꤤ꤭ꤜꤣꤧ꤬ ꤒꤣꤧ꤬ꤟꤢꤩ꤬ ꤔꤢꤧ ꤒꤢꤩ꤬ꤘꤣ ꤢ꤬ꤚꤢꤧ ꤒꤣꤧ꤬ꤟꤢꤩ꤬ ꤡꤣꤧ ꤊꤢꤩ꤬ꤟꤢꤩꤚꤣꤧ꤬, ꤒꤣꤧ꤬ꤔꤢꤩ꤬ꤗꤢꤧꤗꤣꤧ꤭ ꤜꤢ꤭ꤋꤢꤧ꤭ ꤞꤤ꤭ꤖꤢꤩ꤭ ꤘꤣ ꤗꤢꤪꤋꤢꤨ꤬ ꤣꤧ꤭ꤒꤣ꤬ꤖꤚꤢꤩ꤬ꤔꤣꤧ꤬, ꤢ꤬ ꤊ꤫ꤢꤦ꤬ ꤘꤣꤧ ꤒꤢ꤭ꤒꤢꤩ꤬ ꤗ꤫ꤢ꤬ꤔꤤꤔꤢꤧ꤬ ꤕ꤫ꤢꤩ꤬ ꤡꤣꤧ ꤒꤢꤩ꤬ꤚꤢꤧ ꤒꤣꤧ꤬ꤟꤢꤩ꤬ ꤔꤢꤧ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤊꤝꤤ꤭ꤓꤢꤧ꤬ ꤜꤢꤨ꤭ ꤔꤣꤧ꤬ꤒꤣꤧ꤬ꤟꤢꤩ꤬ ꤕꤢ꤭꤯ 12ꤗꤢꤩ꤬ ꤕ꤫ꤢꤩ꤬ ꤢꤨ꤭ ꤟꤢꤨ ꤞꤤ꤭ ꤞꤤꤛ꤫ꤢꤦ꤬ ꤔꤢꤪ꤭ꤗꤢꤩ꤬ ꤢꤨ꤭ ꤔꤢꤧ ꤞꤤ꤭ꤔ꤫ꤢꤩ꤬ ꤔꤣꤧ꤬ ꤔꤤ꤮꤯ ꤗꤢ꤬ꤗꤢꤩ꤬ꤒꤢꤩ꤭ꤟꤢꤩꤚꤣꤧ꤬ ꤜꤢꤪ꤭ ꤋꤢꤨ꤭ꤗꤢꤪꤎꤢꤧ ꤢ꤬ ꤒꤢꤩ꤬ꤞꤝꤢꤒꤢꤩ꤬ꤞꤢꤧ꤬ ꤔꤢꤧ ꤖꤚꤢꤩ꤬ꤖꤚꤥ꤬ ꤒꤣꤧ꤬ꤟꤢꤩ꤬ ꤢ꤬ ꤒꤢꤩ꤬ꤟꤢꤩꤊꤢꤧ꤭ꤍ꤫ꤥ꤬ ꤒꤣꤧ꤬ꤟꤢꤩ꤬ꤔꤣꤧ꤬, ꤢ꤬ ꤞꤤꤛ꤫ꤢꤦ꤬ ꤟꤢꤩ ꤢ꤬ꤍ꤫ꤥ꤬ꤜꤣꤧ꤬ꤏꤢ ꤔꤣꤧ꤬ꤗꤢ꤬ ꤣꤧ꤭ꤔꤣꤧ꤬ ꤟꤣꤧ꤯”
ꤊꤜꤢꤧꤔꤣꤧ꤭ꤙꤥ꤭
(ꤜꤢꤨꤊꤢ꤬ ꤁꤃:꤂꤄)
13“ꤡꤝꤢꤔꤥ꤭ ꤜꤢ꤭ꤋꤢꤧ꤭ ꤘꤣ ꤜꤥ꤬ꤊꤣꤧ꤬ꤘꤢ꤭ ꤢ꤬ꤤ꤬ ꤔꤣꤧ꤬ꤒꤣ꤬ꤊꤢꤨ꤭, ꤗꤢꤩ꤬ꤒꤢꤩ꤭ꤟꤢꤩꤚꤣꤧ꤬ ꤜꤥ꤬ꤊꤣꤧ꤬ꤘꤢ꤭ꤜ꤫ꤢꤧ꤬ ꤣꤧ꤭ꤒꤣ꤬ꤊꤢꤨ꤭ꤔꤣꤧ꤬ ꤔꤢꤧ ꤊꤜꤢꤧꤜ꤫ꤢꤧ꤬ ꤣꤧ꤭ꤒꤣ꤬ꤙꤥ꤭ꤔꤣꤧ꤬ ꤢ꤬ ꤞꤢꤨ꤭ꤡꤝꤢ ꤢꤨ꤭ ꤘꤣ ꤒꤢꤩ꤬ꤞꤣꤧ꤭ ꤒꤣꤧ꤬ꤡꤢꤨ꤬ꤖꤚꤢꤩ꤬ ꤢ꤬ꤜ꤫ꤢꤩ꤬ꤥ꤬ ꤚꤣꤧ꤬ ꤢꤨ꤭ ꤡꤝꤢ ꤔꤥ꤭ꤚ꤫ꤥ꤬ꤔꤥ꤭ꤢꤩ ꤔꤢꤧ꤬ꤡꤣꤧ꤯ 14ꤗꤢ꤬ꤔꤢꤧꤚꤣꤧ꤬ ꤜꤥ꤬ꤊꤣꤧ꤬ꤘꤢ꤭ ꤢ꤬ꤤ꤬ ꤣꤧ꤭ꤒꤣ꤬ꤊꤢꤨ꤭ ꤔꤢꤧ ꤊꤜꤢꤧꤤ꤬ ꤣꤧ꤭ꤒꤣ꤬ꤙꤥ꤭ ꤘꤣ ꤢ꤬ ꤞꤢꤨ꤭ꤡꤝꤢ ꤢꤨ꤭ ꤘꤣ ꤒꤢꤩ꤬ꤞꤣꤧ꤭ꤖꤚꤢꤩ꤬ ꤒꤣꤧ꤬ꤡꤢꤨ꤬ꤖꤚꤢꤩ꤬ ꤣꤧ꤭ꤔꤣꤧ꤬ ꤊꤣꤧ꤬ꤛꤢꤧ꤭ ꤗꤢꤧꤓ꤫ꤣꤧ꤬ ꤕꤣꤧ꤬ꤒꤤ꤮ ꤔꤢꤧ꤬ꤡꤣꤧ ꤜꤢꤨ꤭꤯”
ꤞꤢꤪ꤬ꤞꤢꤩ꤬ ꤔꤢꤧ ꤢ꤬ꤗ꤫ꤢꤪ꤬
(ꤜꤢꤨꤊꤢ꤬ ꤆:꤄꤃-꤄꤅)
15“ꤚꤢꤪ꤬ꤚꤣꤧ ꤜꤢ꤭ꤋꤢꤧ꤭ ꤞꤤ꤭ꤔ꤫ꤢꤩ꤬ ꤔꤢꤧ ꤖꤚꤢꤩ꤬ꤊꤜꤝꤢ꤬ ꤜꤣꤧ꤬ꤟꤥ꤭ ꤢ꤬ꤔ꤫ꤢꤩ꤬ ꤟꤢꤨ ꤖꤚꤢꤩ꤬ꤖꤚꤥ꤬ ꤔꤣꤧ꤬ꤒꤣꤧ꤬ꤟꤢꤩ꤬ ꤔꤤ꤮꤯ ꤢ꤬ ꤊꤜꤝꤢ꤬ꤟꤢꤧ꤭ ꤜꤣꤧ꤬ꤟꤥ꤭ ꤢ꤬ꤔ꤫ꤢꤩ꤬ ꤟꤢꤨ ꤞꤤꤗꤤ꤬ ꤘꤣ ꤢ꤬ ꤞꤤꤘꤥ꤭ꤞꤤꤍꤢ꤬ ꤔꤣꤧ꤬ ꤒꤣꤧ꤬ꤘꤢꤦꤚꤣꤧ꤬ ꤛꤢꤩ꤬ꤞꤤ꤭ ꤢ꤬ꤞꤤꤕꤜꤢꤪ꤬ꤊꤢꤨ꤭ ꤔꤣꤧ꤬ꤗꤢ꤬ ꤢ꤬ ꤗꤢꤨꤗ꤫ꤢꤧ꤬ꤚꤤ꤬ꤡ꤫ꤢꤧ꤬ ꤞꤢꤧꤡꤣꤧꤔꤢꤧ ꤓꤝꤤ꤬ꤗꤤ꤬ ꤔꤣꤧ꤬ ꤡꤣꤧ꤯ 16ꤘꤣ ꤛꤢꤩ꤬ꤞꤤ꤭ ꤗꤢꤩ꤬ ꤒꤢꤩ꤬ꤗꤢꤨꤗ꤫ꤢꤧ꤬ ꤢ꤬ꤋꤝꤢ꤬ꤢ꤬ꤋꤛꤢ꤭, ꤞꤤ꤭ ꤞꤤꤑꤢꤩ꤭ ꤡ꤫ꤢꤧ꤬ ꤔꤢꤧ ꤛꤢꤩ꤬ꤞꤤ꤭ ꤗꤢ꤬ ꤖꤚꤢꤩ꤬ꤊꤜꤝꤢ꤬ ꤟꤢꤧ꤭ꤜꤣꤧ꤬ꤟꤥ꤭ ꤢ꤬ꤔ꤫ꤢꤩ꤬ ꤒꤣꤧ꤬ꤟꤢꤩ꤬ ꤖꤢꤧ꤯ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤡꤝꤢꤗꤢꤧꤕꤢꤨ꤭ ꤙꤢ꤬ꤢꤩ꤬ ꤎꤢ꤬ꤕꤛꤤꤞꤢꤩ꤬#7:16 ꤊꤣꤧ꤬ꤛꤢꤧ꤭ ꤒꤣꤧ꤬ꤟꤢꤩ꤬ꤟꤢꤩ꤬ ꤢꤩ ꤔꤢꤧ ꤓꤢꤧꤓꤢꤦ꤭ꤞꤢꤩ꤬ ꤘꤣ ꤞꤢꤪ꤬ꤏꤢꤧꤗ꤫ꤢꤪ꤬ꤜ꤫ꤥ꤬, ꤊꤢꤩ꤬ꤗ꤫ꤢ꤬ꤒꤥ꤬ꤚꤣꤧ꤬ ꤢ꤬ ꤡꤝꤢꤗꤢꤧꤕꤢꤨ꤭ ꤙꤢ꤬ꤢꤩ꤬ ꤊꤣꤧ꤬ꤘꤝꤤꤞꤢꤩ꤬ ꤘꤣ ꤞꤢꤪ꤬ꤏꤢꤧꤗ꤫ꤢꤪ꤬ꤜ꤫ꤥ꤬ ꤔꤣꤧ꤬ꤗꤢ꤬ ꤢ꤬ ꤥ꤬ ꤔꤢꤧ꤭ ꤟꤢꤧ꤭? 17ꤟꤢꤨꤔꤣꤧ꤬ꤟꤣꤧ, ꤞꤢꤪ꤬ ꤘꤣ ꤢ꤬ꤚꤢꤧ ꤔꤣꤧ꤬, ꤢ꤬ ꤊ꤫ꤢꤦ꤬ ꤞꤢꤩ꤬ꤓꤢꤧ꤬ ꤘꤣ ꤢ꤬ꤚꤢꤧ꤯ ꤗꤢ꤬ꤔꤢꤧꤚꤣꤧ꤬ ꤞꤢꤪ꤬ꤗ꤫ꤢꤪ꤬ ꤘꤣ ꤢ꤬ꤚꤢꤧꤒꤥ꤬ ꤔꤣꤧ꤬, ꤢ꤬ ꤊ꤫ꤢꤦ꤬ ꤞꤢꤩ꤬ꤓꤢꤩ꤬ꤖꤢꤧ ꤞꤢꤪ꤬ꤞꤢꤩ꤬ ꤘꤣ ꤢ꤬ꤚꤢꤧꤒꤥ꤬ ꤖꤢꤧ꤯ 18ꤞꤢꤪ꤬ꤗ꤫ꤢꤪ꤬ ꤘꤣ ꤢ꤬ꤚꤢꤧ ꤔꤣꤧ꤬, ꤢ꤬ꤞꤢꤩ꤬ꤓꤢꤩ꤬ ꤡ꤫ꤢꤧ꤬ ꤞꤢꤪ꤬ꤞꤢꤩ꤬ ꤘꤣ ꤢ꤬ ꤗꤢꤨꤗ꤫ꤢꤧ꤬ ꤒꤥ꤬꤯ ꤓꤥ꤭ꤚꤣꤧ꤬ ꤞꤢꤪ꤬ꤗ꤫ꤢꤪ꤬ ꤘꤣ ꤢ꤬ ꤗꤢꤨꤗ꤫ꤢꤧ꤬ ꤔꤣꤧ꤬, ꤢ꤬ ꤞꤢꤩ꤬ꤓꤢꤩ꤬ ꤡ꤫ꤢꤧ꤬ ꤞꤢꤪ꤬ꤞꤢꤩ꤬ ꤘꤣ ꤢ꤬ꤚꤢꤧꤒꤥ꤬꤯ 19ꤜꤢꤪ꤭ ꤞꤢꤪ꤬ꤗ꤫ꤢꤪ꤬ ꤘꤣ ꤢ꤬ ꤞꤢꤩ꤬ꤓꤢꤧ꤬ ꤢ꤬ꤚꤢꤧꤒꤥ꤬ ꤒꤣꤧ꤬ꤟꤢꤩ꤬ꤔꤣꤧ꤬, ꤢꤨ꤭ ꤊ꤫ꤢꤦ꤬ ꤕꤢ꤭ꤒꤢꤦ꤭ꤊꤢꤧ꤭ ꤜꤢꤨ꤭ ꤕꤢ꤭ ꤚꤣꤧ꤬ ꤢꤨ꤭ ꤊ꤫ꤢꤦ꤬ ꤠꤤ꤭ꤔꤥ꤭ꤊꤢꤧ꤭ ꤜꤢꤪ꤭ ꤜꤢꤨ꤭ ꤘꤣ ꤗꤤ꤬ꤊꤢꤨ꤭ ꤕꤢ꤭꤯#ꤗꤢꤞꤢꤧ ꤃:꤁꤀, ꤜꤢꤨꤊꤢ꤬ ꤃:꤉ 20ꤗꤢꤩ꤬ꤟꤢꤨꤔꤣꤧ꤬ꤚꤣꤧ꤬ ꤞꤤ꤭ ꤊ꤫ꤢꤦ꤬ ꤞꤤꤑꤢꤩ꤭ ꤡ꤫ꤢꤧ꤬ ꤖꤚꤢꤩ꤬ꤊꤜꤝꤢ꤬ ꤜꤣꤧ꤬ꤟꤥ꤭ ꤢ꤬ꤔ꤫ꤢꤩ꤬ ꤣꤧ꤭ꤒꤣꤧ꤬ꤟꤢꤩ꤬ꤔꤣꤧ꤬ ꤔꤢꤧ ꤢ꤬ ꤒꤢꤩ꤬ꤞꤢꤩ꤬ꤓꤢꤧ꤬ꤖꤥ꤭ꤓꤢꤧ꤬ ꤔꤣꤧ꤬ꤒꤣꤧ꤬ꤟꤢꤩ꤬ ꤖꤢꤧ꤯”#ꤗꤢꤞꤢꤧ ꤁꤂:꤃꤃
ꤠꤢꤧ꤭ ꤞꤤꤑꤢꤩ꤭ꤔꤢꤪ ꤞꤤ꤭ ꤒꤣꤧ꤬ꤋꤢꤧ꤮ ꤒꤥ꤬
(ꤜꤢꤨꤊꤢ꤬ ꤁꤃:꤂꤆-꤂꤇)
21“ꤜꤢꤪ꤭ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤢꤩ ꤠꤢꤧ꤭ ꤔꤢꤧ, ‘ꤙꤢꤧ꤬ꤡꤢꤩ꤬꤮ ꤙꤢꤧ꤬ꤡꤢꤩ꤬’ ꤔꤣꤧ꤬, ꤢ꤬ ꤔꤥ꤭ ꤔ꤫ꤤ꤬ꤜꤢꤪ꤭ ꤘꤣ ꤗꤢꤪꤋꤢꤨ꤬ ꤓꤣꤧ꤭ꤜ꤫ꤢꤩ꤬ꤊ꤫ꤢꤩ꤬ꤊꤢꤨ꤭ ꤕꤝꤢ꤭꤮ ꤒꤣ꤬ꤖꤚꤢꤩ꤬ ꤗ꤫ꤢ꤬ꤒꤥ꤬꤯ ꤢ꤬ ꤔꤥ꤭ꤔ꤫ꤤ꤬ ꤖꤢꤧꤒꤢꤦ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤗꤢꤩ꤬ꤒꤥ꤭ꤗꤢꤩ꤬ꤙꤢꤩ꤬ ꤠꤢꤧ꤭ꤖꤢꤩ꤭ ꤘꤣ ꤗꤢꤪꤋꤢꤨ꤬ ꤒꤣ꤬ꤖꤚꤢꤩ꤬ ꤢ꤬ꤞꤤꤕꤜꤢꤪ꤬ ꤔꤣꤧ꤬ꤒꤣꤧ꤬ꤟꤢꤩ꤬ ꤖꤢꤧ꤯ 22ꤏꤢ꤮ ꤗ꤫ꤢꤪ꤬ꤔꤣꤧ꤭ ꤘꤣꤧꤡꤢ꤭ ꤕꤢ꤭ ꤒꤣ꤬ꤔꤣꤧ꤭ꤔꤣꤧ꤬, ꤊꤣꤧ꤬ꤛꤢꤧ꤭ ꤊ꤫ꤢꤦ꤬ ꤟꤢꤧ꤭ ꤟꤢꤩꤜꤥ꤭ꤓꤢꤧ꤬ ꤚ꤫ꤥ꤬ꤢꤩꤜꤥ꤬ ꤜꤢ꤭ꤋꤢꤧ꤭ ꤕꤢ꤭ ꤚꤣꤧ꤬ ꤢ꤬ ꤊ꤫ꤢꤦ꤬ ꤟꤢꤩ ꤜꤢ꤭ꤋꤢꤧ꤭ ꤔꤢꤧ, ‘ꤙꤢꤧ꤬ꤡꤢꤩ꤬꤮ ꤙꤢꤧ꤬ꤡꤢꤩ꤬, ꤕꤢꤩ꤬ ꤟꤢꤩꤏꤥ꤬ꤘꤥ꤬ꤔꤢꤧ꤭ ꤕ꤫ꤢꤩ꤬ ꤢꤨ꤭ ꤟꤢꤨ ꤡꤢꤪꤗꤣꤧ꤬ꤚꤢꤧ꤬ ꤢ꤬ꤛ꤫ꤢꤧ꤬ꤛꤥ꤬ ꤟꤢꤩꤏꤥ꤬ ꤕ꤫ꤢꤩ꤬ ꤕꤢꤩ꤬ ꤔꤣꤧ꤬ ꤔꤢꤧ ꤔꤢꤧ꤬ꤗꤝꤤ꤭, ꤓꤥ꤭ꤚꤣꤧ꤬ ꤕꤢꤩ꤬ ꤠ꤫ꤢꤩ꤬ꤓꤢꤩ꤬ꤊꤢꤧ꤭ ꤜꤥ꤭ꤔꤢꤩꤜꤥ꤭ꤔꤢ꤬ ꤒꤣꤧ꤬ꤟꤢꤩ꤬ ꤔꤢꤧ ꤔꤢꤧ꤬ꤗꤝꤤ꤭, ꤓꤥ꤭ꤚꤣꤧ꤬ ꤕꤢꤩ꤬ ꤘꤣꤧꤜꤥ꤭ ꤒꤢꤩ꤬ꤋꤥꤒꤣꤧ꤬ꤊꤜꤤ ꤒꤣꤧ꤬ꤟꤢꤩ꤬ ꤔꤢꤧ ꤔꤢꤧ꤬ꤗꤝꤤ꤭ ꤔꤣꤧ꤬ ꤢ꤬ ꤢꤩꤜꤥ꤬ ꤟꤣꤧ, ꤠꤢꤧ꤭ꤟꤢꤩꤒ꤫ꤥ꤬꤯’ 23ꤙꤣꤧꤔꤣꤧ꤬ ꤢ꤬ꤋꤢꤩ꤭ꤕꤢ꤭ ꤠꤢꤧ꤭ ꤊ꤫ꤢꤦ꤬ ꤟꤢꤩꤜꤤ꤭ꤏꤢꤦ꤬ ꤛꤢꤩ꤬ꤞꤤ꤭ ꤔꤢꤧ, ‘ꤠꤢꤧ꤭ ꤞꤤꤑꤢꤩ꤭ꤔꤢꤪ ꤞꤤ꤭ ꤒꤣꤧ꤬ꤋꤢꤧ꤮ ꤒꤥ꤬꤯ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤗꤢꤩ꤬ ꤒꤢꤩ꤬ꤗꤢꤨꤗ꤫ꤢꤧ꤬ꤚꤤ꤬ꤡ꤫ꤢꤧ꤬ ꤞꤤ꤭꤮ ꤓꤢꤩ꤬ꤡꤝꤢ ꤒꤣꤧ꤬ꤖꤢ꤭ꤊꤢꤧ꤭ ꤛꤢ꤬ ꤔꤢꤧ ꤠꤢꤧ꤭꤯’”#ꤓꤢꤨ꤬ꤞꤢꤩꤓꤢꤧ꤬ ꤆:꤈
ꤖꤚꤢꤩ꤬ ꤤ꤬ꤏꤢꤪꤓꤢꤧ꤬ꤟꤤ꤬ ꤞꤤꤔꤣꤧ꤭
(ꤜꤢꤨꤊꤢ꤬ ꤆:꤄꤇-꤄꤉)
24“ꤟꤢꤨꤔꤣꤧ꤬ꤚꤣꤧ꤬ ꤊꤣꤧ꤬ꤛꤢꤧ꤭ ꤒꤣ꤬ꤖꤚꤢꤩ꤬ꤖꤚꤢꤩ꤬ ꤘꤣ ꤢ꤬ ꤔ꤫ꤤ꤬ꤟꤥ꤭ ꤠꤢꤧ꤭ꤜꤢ꤭ꤠꤢꤧ꤭ꤍ꤫ꤥ꤬ ꤚꤣꤧ꤬ ꤢ꤬ ꤔ꤫ꤤ꤬ꤘꤢ꤭ ꤋꤚꤝꤢ꤭ꤗꤢꤩ꤬ ꤟꤢꤨ ꤠꤢꤧ꤭ ꤟꤢꤩ ꤔꤣꤧ꤬ ꤟꤢꤩꤔꤣꤧ꤬ꤗꤢ꤬, ꤢ꤬ ꤞꤢꤧꤟꤣꤧ ꤔꤢꤧ ꤊꤣꤧ꤬ꤛꤢꤧ꤭ ꤕꤜꤥ꤭ꤖꤢꤩ ꤒꤣ꤬ꤖꤚꤢꤩ꤬ ꤤ꤬ꤏꤢꤪꤥ꤬ ꤢ꤬ꤟꤤ꤬ ꤘꤣ ꤜ꤫ꤢꤪ꤬ꤋꤢꤨ꤬ ꤔꤣꤧ꤬ ꤟꤣꤧ꤯ 25ꤊ꤫ꤢꤩ꤬ꤡꤢꤦ꤭ꤘꤢꤨ꤬ꤟꤢꤧ꤭ ꤓꤣꤧ꤭ꤘꤢꤨ꤬ꤓꤢꤧ꤬ꤙꤢ꤭, ꤊ꤫ꤢꤩ꤬ꤜꤣꤧ꤬ꤞꤢꤩ ꤜꤣꤧ꤬ꤜꤢꤧ꤭ꤘꤢꤨ꤬ ꤟꤢꤧ꤭ꤙꤢꤩ꤬ ꤟꤤ꤬ꤣꤧ꤭ ꤒꤣꤧ꤬ꤘꤢꤦꤚꤣꤧ꤬ ꤢ꤬ ꤜꤣꤧ꤬ꤋꤢꤦꤒꤥ꤬, ꤗꤢꤩ꤬ꤒꤢꤩ꤭ꤟꤢꤩꤚꤣꤧ꤬ ꤢꤨ꤭ ꤤ꤬ꤏꤢꤪꤓꤢꤧ꤬ ꤢ꤬ ꤘꤣ ꤜ꤫ꤢꤪ꤬ꤋꤢꤨ꤬꤯ 26ꤗꤢ꤬ꤔꤢꤧꤚꤣꤧ꤬ ꤊꤣꤧ꤬ꤛꤢꤧ꤭ ꤒꤣ꤬ꤖꤚꤢꤩ꤬ꤖꤚꤢꤩ꤬ ꤘꤣ ꤢ꤬ ꤔ꤫ꤤ꤬ꤟꤥ꤭ ꤠꤢꤧ꤭ꤜꤢ꤭ꤠꤢꤧ꤭ꤍ꤫ꤥ꤬ ꤚꤣꤧ꤬ ꤢ꤬ ꤊꤢꤩ꤬ ꤔ꤫ꤤ꤬ꤘꤢ꤭ ꤋꤚꤝꤢ꤭ꤗꤢꤩ꤬ ꤊꤣꤧ꤭ ꤟꤢꤨ ꤠꤢꤧ꤭ ꤟꤢꤩꤔꤣꤧ꤬ ꤒꤥ꤬ ꤟꤢꤩꤔꤣꤧ꤬, ꤢ꤬ꤞꤢꤧꤔꤢꤧ ꤊꤣꤧ꤬ꤛꤢꤧ꤭ ꤒꤣꤧ꤬ꤔꤢꤩ꤬ꤕꤜꤥ꤭ꤒꤣꤧ꤬ꤔꤢꤩ꤬ꤖꤢꤩ ꤊꤣꤧ꤭ꤢꤨ꤭ ꤒꤥ꤬ ꤒꤣ꤬ꤖꤚꤢꤩ꤬ ꤤ꤬ꤏꤢꤪꤓꤢꤧ꤬ꤥ꤬ ꤢ꤬ꤟꤤ꤬ ꤘꤣ ꤟꤢꤩ꤬ꤞꤥ꤭ꤋꤢꤨ꤬ ꤔꤣꤧ꤬ ꤟꤣꤧ꤯ 27ꤊ꤫ꤢꤩ꤬ꤡꤢꤦ꤭ꤘꤢꤨ꤬ꤟꤢꤧ꤭ ꤓꤣꤧ꤭ꤘꤢꤨ꤬ꤓꤢꤧ꤬ꤙꤢ꤭, ꤊ꤫ꤢꤩ꤬ꤜꤣꤧ꤬ꤞꤢꤩ ꤜꤣꤧ꤬ꤜꤢꤧ꤭ ꤟꤢꤧ꤭ꤙꤢꤩ꤬ ꤟꤤ꤬ꤣꤧ꤭ ꤚꤣꤧ꤬ ꤢ꤬ ꤜꤣꤧ꤬ꤒꤢ꤭ꤖꤚꤢꤪ꤬ ꤜꤢꤪ꤭ꤜ꤫ꤢ꤬ꤒꤣꤧ꤬ꤊꤜꤤ꤬ ꤖꤢꤧ꤯”
ꤛꤢꤩ꤬ꤏꤛꤢꤨ ꤒꤣꤧ꤬ꤚꤣꤧ꤭ꤖꤚꤥ꤬ꤖꤚꤢꤧ꤬
28ꤙꤣꤧ ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨ ꤟꤢꤩꤓꤥ꤭ꤟꤣꤧ ꤒꤢꤩ꤬ꤣꤧ꤭ꤒꤣꤧ꤬ꤟꤢꤩ꤬ ꤢ꤬ꤋꤢꤩ꤭ꤔꤣꤧ꤬, ꤊꤣꤧ꤬ꤛꤢꤧ꤭ ꤙꤢꤩꤗꤢꤨ꤬ ꤘꤣ ꤢ꤬ ꤔ꤫ꤤ꤬ꤟꤥ꤭ ꤜꤢꤨ꤭ ꤒꤢꤩ꤬ꤤ꤬ꤞꤝꤢꤤ꤬ꤞꤢꤧ꤬ ꤣꤧ꤭ꤒꤣꤧ꤬ꤟꤢꤩ꤬ꤔꤣꤧ꤬, ꤢ꤬ ꤋꤛꤢꤛꤢꤦ ꤜꤢꤪ꤭ꤕꤜꤤ꤭ ꤡꤣꤧ꤯#ꤗꤢ꤬ꤊꤢꤨ ꤁:꤂꤂, ꤜꤢꤨꤊꤢ꤬ ꤄:꤃꤂ 29ꤗꤢꤩ꤬ꤒꤢꤩ꤭ꤟꤢꤩꤚꤣꤧ꤬, ꤢ꤬ ꤤ꤬ꤞꤝꤢꤤ꤬ꤞꤢꤧ꤬ ꤞꤢꤧꤊꤣꤧ꤭ꤟꤢꤨ ꤖꤚꤢꤩ꤬ꤤ꤬ꤞꤝꤢ ꤒꤢꤩ꤬ꤞꤝꤢꤒꤢꤩ꤬ꤞꤢꤧ꤬ ꤢ꤬ꤞꤢꤚꤢ ꤔꤣꤧ꤬ꤒꤣꤧ꤬ꤟꤢꤩ꤬ ꤤ꤬ꤞꤝꤢ ꤔꤣꤧ꤬ ꤒꤥ꤬꤯ ꤢ꤬ ꤤ꤬ꤞꤝꤢ ꤞꤢꤧꤡꤣꤧꤔꤢꤧ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤥ꤬ ꤔꤢꤧ ꤢ꤬ ꤒꤣꤧ꤬ꤚꤣꤧ꤭ꤏꤝꤢ꤬ꤏꤢꤪ꤭ ꤒꤣ꤬ꤖꤚꤢꤩ꤬ ꤤ꤬ꤞꤝꤢ ꤔꤣꤧ꤬ ꤡꤣꤧ꤯
Currently Selected:
ꤗꤢꤞꤢꤧ 7: eky-Kali-MM
Highlight
Share
Copy
Want to have your highlights saved across all your devices? Sign up or sign in
Wycliffe USA
