ꤗꤢꤞꤢꤧ 8
8
ꤛꤢꤩ꤬ꤏꤛꤢꤨ ꤛ꤫ꤢꤧ꤬ꤥ꤬ꤗ꤫ꤢꤩ꤬ ꤊꤣꤧ꤬ꤛꤢꤧ꤭ ꤒꤢꤩ꤬ꤏꤢꤩ꤭ꤗꤢꤨꤗ꤫ꤢꤧ꤬ ꤘꤣ ꤖꤢꤜꤥ꤬ ꤒꤣ꤬ꤖꤚꤢꤩ꤬
(ꤗꤢ꤬ꤊꤢꤨ ꤁:꤄꤀-꤄꤅, ꤜꤢꤨꤊꤢ꤬ ꤅:꤁꤂-꤁꤆)
1ꤙꤣꤧ ꤢ꤬ ꤥ꤬ ꤘꤣ ꤏꤥ꤬ꤚ꤫ꤢ꤬ꤜꤥ꤬ ꤚꤣꤧ꤬ ꤢ꤬ ꤤꤒꤢ꤭ꤜꤢꤧ꤬ ꤢ꤬ꤋꤢꤩ꤭ꤔꤣꤧ꤬, ꤊꤣꤧ꤬ꤛꤢꤧ꤭ ꤒꤣꤧ꤬ꤟꤢꤩ꤬ ꤋꤚꤝꤢ꤭ꤕꤜꤢꤨ꤬ꤋꤚꤝꤢ꤭ꤖꤢꤩ꤬ ꤊꤣꤧ꤭ꤜꤢꤪ꤭ ꤜꤢꤨ꤭ꤋꤛꤢ꤭ ꤢꤩꤜꤥ꤬꤯ 2ꤊꤣꤧ꤬ꤛꤢꤧ꤭ ꤒꤢꤩ꤬ꤏꤢꤩ꤭ꤗꤢꤨꤗ꤫ꤢꤧ꤬ ꤘꤣ ꤖꤢꤜꤥ꤬#8:2 ꤒꤢꤩ꤬ꤏꤢꤩ꤭ꤗꤢꤨꤗ꤫ꤢꤧ꤬ ꤘꤣ ꤖꤢꤜꤥ꤬ꤔꤣꤧ꤬, ꤒꤣꤧ꤬ꤟꤢꤩ꤬ꤟꤢꤩ꤬ ꤚꤣꤧ꤬ ꤢꤨ꤭ ꤢꤩ ꤔꤢꤧ “ꤒꤢꤩ꤭ꤏꤢꤩ꤭ꤓꤝꤢ꤭ꤒꤢꤨ” ꤒꤣ꤬ꤖꤚꤢꤩ꤬ ꤟꤢꤧ꤭ ꤘꤢꤧꤍꤢꤦ꤬ꤜꤢꤧ꤬ ꤘꤣ ꤜꤢꤨ꤭ꤕꤣꤧꤞꤢꤩ꤬ꤑꤢꤩ꤭ ꤚꤣꤧ꤬ ꤢ꤬ ꤟꤢꤩ ꤜꤢꤨ꤭ ꤔꤢꤧ, “ꤙꤢꤧ꤬ꤡꤢꤩ꤬, ꤔꤢꤧ꤬ ꤊꤢꤩ꤬ ꤞꤤꤕꤜꤢꤪ꤬ꤥ꤬ ꤛ꤫ꤢꤧ꤬ꤥ꤬ꤗ꤫ꤢꤩ꤬#8:2 ꤜꤤ꤬ꤓꤢꤩ꤭ꤞꤢꤪ꤬ꤖꤢ ꤟꤢꤩ ꤔꤢꤧ ꤛ꤫ꤢꤧ꤬ꤥ꤬ꤗ꤫ꤢꤩ꤬ ꤗꤢ꤬ ꤗꤢꤩ꤬ꤕꤜꤤ꤭ꤖꤥ꤯ ꤢ꤬ꤍ꤫ꤥ꤬ꤜꤣꤧ꤬ꤏꤢ ꤗꤢ꤬ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤒꤢꤩ꤬ꤏꤢꤩ꤭ ꤥ꤬ꤟꤢꤨꤔꤣꤧ꤬ ꤒꤣꤧ꤬ꤟꤢꤩ꤬ꤔꤣꤧ꤬, ꤢꤨ꤭ ꤙꤢꤩ꤬ ꤔꤢꤪ꤭ꤡꤝꤢ ꤥ꤬ꤒꤣꤧ꤬ꤖꤢ꤭ ꤜꤢꤨ꤭꤯ ꤙꤣꤧ ꤛꤢꤩ꤬ꤞꤤ꤭ ꤒꤢꤩ꤬ꤏꤢꤩ꤭ ꤕꤜꤤ꤭ꤖꤥ (ꤛ꤫ꤢꤧ꤬ꤥ꤬ꤗ꤫ꤢꤩ꤬) ꤊꤢ꤬ꤟꤣꤧ ꤢ꤬ꤋꤢꤩ꤭ꤔꤣꤧ꤬, ꤢ꤬ ꤡꤝꤢꤒ꤫ꤣ꤬ꤊꤢ꤬ꤒ꤫ꤣ꤬ ꤊꤣꤧ꤭ꤔꤢꤧ ꤢꤨ꤭ ꤗꤢ꤬ ꤢ꤬ꤔ꤫ꤤ꤬ ꤟꤣꤧ, ꤢ꤬ ꤡꤢꤪꤙꤢꤨ꤬ꤡꤢꤪꤙꤢꤩ꤭ꤓꤢꤧ꤬ ꤡꤢꤪꤗꤣꤧ꤬ꤚꤢꤧ꤬ ꤗꤢ꤬ ꤢ꤬ꤔ꤫ꤤ꤬ ꤟꤣꤧ꤯ ꤕ꤫ꤢꤩ꤬ ꤠꤢꤧ꤭ ꤒꤢꤩ꤬ꤏꤢꤩ꤭ꤣꤧ꤭ ꤟꤢꤩꤔꤣꤧ꤬ꤗꤢ꤬, ꤔꤢꤧ꤬ ꤛ꤫ꤢꤧ꤬ꤡ꤫ꤢꤧ꤬ ꤖꤢꤧ꤯”
3ꤙꤢꤧ꤬ꤡꤢꤩ꤬ ꤙꤢꤪꤟꤢꤧ꤭ ꤢ꤬ꤊꤢꤨꤋꤢꤨ꤬ ꤚꤣꤧ꤬ ꤢ꤬ ꤒꤥ꤬ꤙꤢꤩ꤬ꤓꤥ꤭ ꤜꤢꤨ꤭ ꤚꤣꤧ꤬ ꤢ꤬ ꤟꤢꤩ ꤜꤢꤨ꤭ ꤔꤢꤧ, “ꤠꤢꤧ꤭ ꤞꤤꤕꤜꤢꤪ꤬ꤥ꤬ ꤖꤢꤧ,” ꤢ꤬ ꤟꤢꤩ ꤓꤥ꤭ꤚꤣꤧ꤬ “ꤒꤢꤩ꤬ꤏꤢꤩ꤭꤮ ꤥ꤬ꤗ꤫ꤢꤩ꤬ꤊꤢꤧ꤭ ꤗꤣꤧ꤭,” ꤢ꤬ ꤟꤢꤩ ꤕ꤫ꤥ꤬ ꤟꤢꤨꤔꤣꤧ꤬, ꤚꤣꤧ꤬ ꤒꤣ꤬ꤖꤥꤒꤥ꤬ ꤒꤢꤩ꤬ꤏꤢꤩ꤭ ꤥ꤬ꤗ꤫ꤢꤩ꤬ꤊꤢꤧ꤭ ꤡꤣꤧ꤯ 4ꤚꤣꤧ꤬ ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨ ꤟꤢꤩ ꤜꤢꤨ꤭ ꤔꤢꤧ, “ꤟꤢꤩꤏꤥ꤬ꤜꤥ꤭ ꤒ꤫ꤢꤧ꤬ ꤕ꤫ꤢꤩ꤬ ꤢꤨ꤭ ꤒꤣ꤬ꤖꤚꤢꤩ꤬꤮ ꤒ꤫ꤢꤧ꤬ꤗꤢꤩ꤬ ꤔꤤ꤮, ꤗꤢ꤬ꤔꤢꤧꤚꤣꤧ꤬ ꤡꤝꤢ ꤘꤣꤧꤜꤥ꤭ꤗꤢꤧ ꤔꤢꤧ꤬ꤔ꤫ꤢꤩ꤬ ꤣꤧ꤭ꤔꤣꤧ꤬ ꤘꤣ ꤖꤚꤢꤩ꤬ꤜꤢꤨ꤭ꤒꤢꤧ꤭ꤒꤢꤩ꤬ ꤔꤣꤧ꤬ꤒꤣ꤬ꤖꤚꤢꤩ꤬ ꤢ꤬ ꤥ꤬ ꤔꤣꤧ꤬ ꤔꤤ꤮꤯ ꤓꤥ꤭ꤚꤣꤧ꤬ ꤞꤢꤧꤟꤢꤨ ꤢ꤬ ꤊ꤫ꤢꤦ꤬ ꤓꤝꤢ꤭ꤓꤢꤧ꤬ ꤒꤢꤩ꤬ꤋꤢꤧꤟꤢꤩꤏꤥ꤬ꤜꤥ꤭ꤒꤢꤩ꤬ ꤘꤣ ꤢꤨ꤭ ꤕꤝꤢ꤭꤮ ꤒꤣ꤬ꤖꤚꤢꤩ꤬ ꤢ꤬ ꤕꤣꤧꤞꤢꤩ꤬ꤑꤢꤩ꤭ ꤔꤢꤧ ꤔꤢꤧ꤬ ꤒꤢꤩ꤬ꤏꤢꤩ꤭ ꤥ꤬ꤗ꤫ꤢꤩ꤬ꤟꤣꤧ ꤚꤣꤧ꤬ ꤢ꤬ ꤕꤜꤤ꤭ꤖꤥꤟꤣꤧ ꤢ꤬ꤑꤢꤩ꤭ꤔꤣꤧ꤬, ꤜꤢꤨ꤭ꤓꤢꤧ꤬ ꤒꤢꤩ꤬ꤜꤢꤨ꤭ꤒꤢꤩ꤬ꤒꤢꤧ꤭ ꤟꤢꤨ ꤋꤢꤨ꤭ꤗꤢꤪꤎꤢꤧ ꤗ꤫ꤢ꤬ꤊꤢꤧ꤭ ꤔꤣꤧ꤬ ꤔꤤ꤮꤯”#ꤡꤢꤪꤙꤢꤨ꤬ꤡꤢꤪꤙꤢꤩ꤭ ꤁꤄:꤁-꤃꤂
ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨ ꤛ꤫ꤢꤧ꤬ꤥ꤬ꤗ꤫ꤢꤩ꤬ ꤚꤥꤗꤢꤩ꤬ ꤢ꤬ ꤊꤜꤣꤧ꤭ꤊꤢꤨ꤬ꤊꤜꤢꤪ ꤢ꤬ꤜꤢꤨ꤬ꤜꤢꤩ ꤒꤣ꤬ꤖꤚꤢꤩ꤬
(ꤜꤢꤨꤊꤢ꤬ ꤇:꤁-꤁꤀, ꤛꤥ꤭ꤟꤢ꤬ ꤄:꤄꤃-꤅꤄)
5ꤙꤣꤧ ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨ ꤟꤢꤧ꤭ꤔꤥ꤭ ꤘꤣ ꤠꤤ꤭ꤊꤢ꤬ꤕꤢꤩ꤬ꤚꤢ꤬ꤔꤢꤪ꤬ ꤢ꤬ꤊꤢꤨ꤭ ꤢ꤬ꤋꤢꤩ꤭ꤔꤣꤧ꤬, ꤚꤥꤗꤢꤩ꤬ ꤊꤜꤣꤧ꤭ꤒꤣ꤬ꤛꤢꤩ꤬ ꤢ꤬ꤊꤢꤨ꤬ꤊꤜꤢꤪ ꤒꤣ꤬ꤖꤚꤢꤩ꤬ ꤟꤢꤧ꤭ꤊꤝꤤ꤭ ꤜꤢꤨ꤭ ꤒꤢꤩ꤬ꤗꤢꤩ꤬ꤡꤝ꤫ꤢ꤬꤯ 6ꤚꤣꤧ꤬ ꤢ꤬ ꤟꤢꤩ ꤜꤢꤨ꤭ ꤔꤢꤧ, “ꤙꤢꤧ꤬ꤡꤢꤩ꤬ ꤠꤢꤧ꤭ꤜꤢꤨ꤬ꤜꤢꤩ ꤒꤣ꤬ꤖꤚꤢꤩ꤬ ꤢ꤬ꤏꤝꤤ ꤞꤣꤧ꤭ꤡꤤꤊꤛꤢ꤭ ꤚꤣꤧ꤬ ꤢ꤬ ꤥ꤬ꤗꤣꤧ꤭ꤒ꤫ꤢꤧ꤬ ꤖꤢꤧ ꤘꤣ ꤜ꤫ꤢꤩ꤬ꤥ꤬ꤗꤣꤧ꤭ꤊꤢꤨ꤭ ꤟꤢꤨꤔꤣꤧ꤬꤯ ꤢ꤬ꤡꤢ꤭ ꤔꤢꤧ꤬ꤡꤣꤧ ꤜꤢꤨ꤭ ꤟꤣꤧ꤯”
7ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨ ꤟꤢꤩꤏꤢꤦ꤬ ꤜꤢꤨ꤭ ꤔꤢꤧ, “ꤠꤢꤧ꤭ ꤡꤝꤢ ꤛ꤫ꤢꤧ꤬ꤥ꤬ꤗ꤫ꤢꤩ꤬ꤘꤢꤦ꤬ ꤕꤢ꤭꤯”
8ꤊꤜꤣꤧ꤭ꤟꤢꤨ ꤒꤣ꤬ꤛꤢꤩ꤬ ꤢ꤬ꤊꤢꤨ꤬ꤊꤜꤢꤪ ꤔꤣꤧ꤬ꤒꤣ꤬ꤖꤚꤢꤩ꤬ ꤟꤢꤩꤏꤢꤦ꤬ ꤔꤢꤧ, “ꤙꤢꤧ꤬ꤡꤢꤩ꤬, ꤔꤢꤧ꤬ ꤟꤢꤧ꤭ꤔꤥ꤭ꤖꤢꤧ ꤘꤣ ꤠꤢꤧ꤭ꤟꤤ꤬ꤊꤢꤨ꤭ ꤖꤢꤧꤔꤣꤧ꤬ ꤢ꤬ ꤊꤢꤪ꤬ ꤔꤢꤧ ꤠꤢꤧ꤭ ꤒꤥ꤬꤯ ꤟꤢꤩꤒꤢ꤭ꤖꤢꤧ ꤔꤢꤧ꤬ꤍ꤫ꤥ꤬ ꤒꤣ꤬ꤗꤢꤦ꤭ꤖꤢꤧ ꤔꤣꤧ꤬ꤗꤢ꤬ ꤠꤢꤧ꤭ꤜꤢꤨ꤬ꤜꤢꤩ ꤥ꤬ꤗꤥ꤬ꤋꤛꤢ꤭ ꤔꤢꤧ꤭ꤘꤢꤦ꤬ꤟꤣꤧ꤯ 9ꤗꤢ꤬ꤗꤢꤩ꤬ꤒꤢꤩ꤭ꤚꤣꤧ꤬ ꤠꤢꤧ꤭ ꤟꤢꤩ ꤟꤢꤨꤣꤧ꤭ ꤟꤢꤩꤔꤣꤧ꤬ꤚꤣꤧ꤬ ꤠꤢꤧ꤭ ꤔ꤫ꤢꤩ꤬ꤙꤢꤧ꤬ꤡꤢꤩ꤬ ꤚꤣꤧꤘꤢꤦ꤬ ꤠꤢꤧ꤭ ꤙꤢꤩ꤬ ꤔ꤫ꤤ꤬ꤘꤢ꤭ ꤊꤣꤧ꤬ꤛꤢꤧ꤭ ꤘꤣ ꤢ꤬ꤘꤢꤨ꤬ꤜꤣ ꤔꤢꤧ ꤠꤢꤧ꤭ ꤒꤣꤧ꤬ꤟꤢꤩ꤬ ꤢ꤬ꤍ꤫ꤥ꤬꤯ ꤟꤢꤨꤔꤣꤧ꤬ꤟꤣꤧ ꤊꤜꤣꤧ꤭ꤟꤢꤨ ꤘꤣ ꤢ꤬ ꤥ꤬ ꤘꤣ ꤠꤢꤧ꤭ꤜꤢꤩ꤭ ꤒꤣꤧ꤬ꤟꤢꤩ꤬ꤔꤣꤧ꤬ ꤢ꤬ ꤙꤢꤩ꤬ ꤔ꤫ꤤ꤬ꤘꤢ꤭ ꤊꤣꤧ꤭ꤘꤢꤦ꤬ ꤠꤢꤧ꤭ꤍ꤫ꤥ꤬ ꤟꤢꤨꤔꤣꤧ꤬ꤔꤣꤧ꤬꤯ ꤊꤢꤩ꤬ ꤠꤢꤧ꤭ ꤟꤢꤩ ꤊꤜꤣꤧ꤭ꤟꤢꤨ ꤒꤣ꤬ꤖꤚꤢꤩ꤬ꤖꤚꤢꤩ꤬ ꤔꤢꤧ, ‘ꤡꤝꤢꤗꤣꤧ꤭,’ ꤟꤢꤩꤔꤣꤧ꤬ꤗꤢ꤬ ꤢ꤬ ꤙꤢꤩ꤬ꤡꤝꤢ ꤖꤢꤧ, ꤊꤢꤩ꤬ ꤠꤢꤧ꤭ ꤟꤢꤩ ꤜꤢ꤭ꤒꤢꤩ꤬ ꤘꤣ ꤢ꤬ꤚꤥ꤬ꤒꤣ꤬ꤖꤚꤢꤩ꤬ ꤔꤢꤧ, ‘ꤟꤢꤧ꤭ꤗꤣꤧ꤭,’ ꤟꤢꤩꤔꤣꤧ꤬ꤗꤢ꤬ ꤢ꤬ ꤙꤢꤩ꤬ ꤟꤢꤧ꤭ ꤖꤢꤧ꤯ ꤓꤥ꤭ꤒꤥ꤬ ꤠꤢꤧ꤭ ꤊꤢꤩ꤬ ꤟꤢꤩ ꤠꤢꤧ꤭ꤡ꤫ꤢꤦ꤬ ꤔꤢꤧ, ‘ꤗꤢꤩ꤬ꤗꤣꤧ꤭ꤣꤧ꤭,’ ꤟꤢꤩꤔꤣꤧ꤬ꤗꤢ꤬ ꤢ꤬ ꤙꤢꤩ꤬ ꤗꤢꤩ꤬ ꤖꤢꤧ꤯”
10ꤙꤣꤧ ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨ ꤔ꤫ꤤ꤬ꤟꤥ꤭ ꤒꤢꤩ꤬ꤟꤢꤩꤙꤢꤩ꤬ ꤣꤧ꤭ ꤢ꤬ꤋꤢꤩ꤭, ꤢ꤬ ꤋꤛꤢꤛꤢꤦ ꤔꤢꤧ꤬ꤡꤣꤧ ꤚꤣꤧ꤬ ꤢ꤬ ꤟꤢꤩ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤋꤚꤝꤢ꤭ ꤜꤢꤨ꤭ꤋꤛꤢ꤭ ꤒꤣꤧ꤬ꤟꤢꤩ꤬ ꤔꤢꤧ, “ꤠꤢꤧ꤭ ꤟꤢꤩꤡꤢꤪꤡꤢꤪ ꤞꤤ꤭, ꤒꤢꤩ꤬ꤛ꤫ꤢꤦ꤬ꤒꤢꤩ꤬ꤔ꤫ꤢꤧ꤬ ꤏꤢꤪ꤭ꤟꤢꤨꤣꤧ꤭ ꤘꤣ ꤤ꤬ꤎꤢ꤬ꤚꤢꤩꤜꤢ꤬ꤖꤢꤨ ꤢ꤬ꤊꤜꤢꤩ꤭ꤔꤣꤧ꤬ ꤠꤢꤧ꤭ ꤗꤢꤧꤓ꤫ꤣꤧ꤬ꤔꤢꤪ ꤜꤢ꤭ꤟꤤꤒꤥ꤬꤯ 11ꤠꤢꤧ꤭ ꤟꤢꤩ ꤞꤤ꤭, ꤊꤣꤧ꤬ꤛꤢꤧ꤭ ꤥ꤬ ꤘꤣ ꤊ꤫ꤢꤩ꤬ꤞꤤꤓꤢꤩ꤬ ꤊ꤫ꤢꤩ꤬ꤞꤤꤔꤥ꤭ ꤒꤣꤧ꤬ꤟꤢꤩ꤬ ꤊ꤫ꤢꤦ꤬ ꤟꤢꤧ꤭ ꤢꤩꤜꤥ꤬ ꤕꤢ꤭꤯ ꤛꤢꤩ꤬ꤞꤤ꤭ ꤊ꤫ꤢꤦ꤬ ꤟꤢꤧ꤭ ꤥ꤬ꤔꤢꤧ꤭ ꤢꤩ꤬ꤒ꤫ꤣ꤬ꤊꤣꤧ꤭ ꤔꤢꤧ ꤕꤢꤩ꤬ ꤖꤥ꤭ꤢ꤬ꤙꤚꤢ꤬ꤟꤢ꤬, ꤖꤥ꤭ꤢꤎꤢꤧ, ꤖꤥ꤭ꤛꤢ꤬ꤊꤥ꤬ ꤘꤣ ꤗꤢꤪꤋꤢꤨ꤬ ꤢ꤬ ꤓꤣꤧ꤭ꤜ꤫ꤢꤩ꤬ꤊ꤫ꤢꤩ꤬ꤊꤢꤨ꤭ ꤕꤢ꤭꤯#ꤜꤢꤨꤊꤢ꤬ ꤁꤃:꤂꤉ 12ꤛꤢꤨꤘꤢ꤬ꤖꤢꤨ ꤒꤣꤧ꤬ꤟꤢꤩ꤬ꤔꤣꤧ꤬, ꤢ꤬ ꤒꤥ꤭ꤙꤢꤩ꤬ ꤓꤝꤢ꤭ ꤡꤢꤪꤗꤣꤧ꤬ꤚꤢꤧ꤬ ꤢ꤬ꤊꤣꤧ꤬ꤛꤢꤧ꤭ ꤘꤣ ꤡꤢꤪꤗꤣꤧ꤬ꤚꤢꤧ꤬ ꤢ꤬ꤓꤣꤧ꤭ꤢ꤬ꤊ꤫ꤢꤩ꤬ꤊꤢꤨ꤭ ꤔꤣꤧ꤬ ꤒꤣꤧ꤬ꤘꤢꤦꤚꤣꤧ꤬ ꤡꤢꤪꤗꤣꤧ꤬ꤚꤢꤧ꤬ ꤊ꤫ꤢꤦ꤬ ꤠꤤ꤭ꤔꤥ꤭ꤊꤢꤧ꤭ ꤛꤢꤩ꤬ꤞꤤ꤭ ꤘꤣ ꤒꤢꤩ꤬ꤋꤤꤒꤢꤩ꤬ꤜꤢꤪ꤬ ꤢ꤬ꤜ꤫ꤢꤩ꤬ꤥ꤬ ꤕꤢ꤭꤯ ꤒꤢꤩ꤬ꤜ꤫ꤢꤩ꤬ꤥ꤬ ꤙꤣꤧ ꤛꤢꤩ꤬ꤞꤤ꤭ ꤊ꤫ꤢꤦ꤬ ꤡꤝꤢ ꤥ꤬ ꤣꤧ꤭ꤒꤣ꤬ꤖꤥ꤬ ꤕꤢ꤭ꤔꤣꤧ꤬, ꤛꤢꤩ꤬ꤞꤤ꤭ ꤊ꤫ꤢꤦ꤬ ꤡꤝꤢ ꤍ꤫ꤥ꤬ꤕꤜ꤫ꤢꤧ꤬ꤍ꤫ꤥ꤬ꤚꤢꤧ꤬ ꤚꤣꤧ꤬ ꤛꤢꤩ꤬ꤞꤤ꤭ ꤊ꤫ꤢꤦ꤬ ꤢ꤫ꤢ꤬ꤒꤣꤧ꤬ꤡꤢ ꤚꤣꤧꤘꤢꤦ꤬ ꤜꤢꤪ꤭ꤕꤜꤤ꤭ ꤡꤣꤧ ꤢ꤬ꤊꤢꤨ꤬ꤋꤣꤧ꤭ ꤕꤢ꤭꤯”#ꤗꤢꤞꤢꤧ ꤂꤂:꤁꤃, ꤂꤅:꤃꤀, ꤜꤢꤨꤊꤢ꤬ ꤁꤃:꤂꤈
13ꤓꤥ꤭ꤚꤣꤧ꤬ ꤢ꤬ ꤟꤢꤩ ꤊꤜꤣꤧ꤭ꤊꤢꤨ꤬ꤊꤜꤢꤪ ꤔꤢꤧ, “ꤊꤢ꤬ꤗꤣꤧ꤭, ꤢ꤬ ꤊ꤫ꤢꤦ꤬ ꤓꤝꤢ꤭ꤓꤢꤧ꤬ꤘꤢꤦ꤬ ꤟꤢꤨ ꤔꤢꤧ꤬ ꤛ꤫ꤢꤦ꤬ꤢꤩ꤬ ꤔꤣꤧ꤬ ꤕꤢ꤭꤯” ꤚꤣꤧ꤬ ꤢ꤬ꤜꤢꤨ꤬ꤜꤢꤩ ꤔꤣꤧ꤬ꤒꤣ꤬ꤖꤚꤢꤩ꤬ ꤥ꤬ꤗꤥ꤬ꤊꤢ꤬ ꤒꤥ꤭ꤒꤢꤦ ꤙꤣꤧ ꤙꤢꤧ꤬ꤡꤢꤩ꤬ ꤟꤢꤩ ꤜꤢꤨ꤭ ꤢ꤬ꤏꤣꤧꤋꤢꤩ꤭ꤔꤣꤧ꤬꤯
ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨ ꤛ꤫ꤢꤧ꤬ꤥ꤬ꤗ꤫ꤢꤩ꤬ ꤢꤩꤜꤥ꤬ ꤊꤣꤧ꤬ꤛꤢꤧ꤭
(ꤗꤢ꤬ꤊꤢꤨ ꤁:꤂꤉-꤃꤄, ꤜꤢꤨꤊꤢ꤬ ꤄:꤃꤈-꤄꤁)
14ꤙꤣꤧ ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨ ꤡꤝꤢꤔꤥ꤭ ꤘꤣ ꤋꤢꤨ꤭ꤕꤢꤩ꤬ꤒꤢ꤬ꤚꤢꤨ ꤢ꤬ꤟꤤ꤬ꤊꤢꤨ꤭ ꤢ꤬ꤋꤢꤩ꤭ꤔꤣꤧ꤬, ꤢ꤬ ꤗꤢꤧꤓ꤫ꤣꤧ꤬ ꤋꤢꤨ꤭ꤕꤢꤩ꤬ꤒꤢ꤬ꤚꤢꤨ ꤢ꤬ ꤖꤚ꤫ꤢꤩ꤬ꤖꤚꤢꤩ꤬ꤗꤢꤪ꤬ ꤞꤤꤏꤝꤤꤔ꤫ꤢꤩ꤬ꤊ꤫ꤢꤨ꤬ ꤚꤣꤧ꤬ ꤢ꤬ ꤥ꤬ꤗꤣꤧ꤭ꤒ꤫ꤢꤧ꤬ ꤖꤢꤧ ꤘꤣ ꤜ꤫ꤢꤩ꤬ꤗꤣꤧ꤭ꤊꤢꤨ꤭ ꤖꤢꤧ꤯ 15ꤢ꤬ ꤕ꤫ꤢꤦ꤬ ꤜꤢꤨ꤭ꤊꤢꤨꤋꤢꤨ꤬ ꤚꤣꤧ꤬ ꤢ꤬ ꤒꤢꤩ꤬ꤏꤝꤤ ꤥ꤬ꤗ꤫ꤢꤩ꤬ꤊꤢꤧ꤭꤯ ꤓꤥ꤭ꤚꤣꤧ꤬ ꤢ꤬ ꤊꤣꤧ꤬ꤓꤢꤪ꤬ ꤗꤢꤩ꤬ꤢꤩ꤬ꤗꤢꤩ꤬ꤥ꤭ꤏꤢꤦ꤬ ꤕ꤫ꤢꤩ꤬ ꤛꤢꤩ꤬ꤏꤛꤢꤨ꤯
16ꤙꤣꤧ ꤗ꤫ꤢꤪ꤬ꤟꤢꤩꤗ꤫ꤢꤪ꤬ꤒꤢ꤭ ꤢ꤬ꤋꤢꤩ꤭ꤔꤣꤧ꤬, ꤢꤨ꤭ ꤟꤢꤧ꤭ꤞꤢꤨ꤭ ꤢꤩꤜꤥ꤬ ꤊꤣꤧ꤬ꤛꤢꤧ꤭ ꤘꤣ ꤜꤥ꤭ꤔꤢꤩꤜꤥ꤭ꤔꤢ꤬ ꤗꤢꤩ꤬ꤙꤢꤩ꤬ ꤜꤢꤨ꤭ ꤒꤣꤧ꤬ꤟꤢꤩ꤬ ꤘꤣ ꤛꤢꤩ꤬ꤏꤛꤢꤨ ꤢ꤬ ꤥ꤬꤯ ꤢ꤬ ꤟꤢꤩꤒꤢ꤭ ꤖꤢꤧ ꤢ꤬ꤍ꤫ꤥ꤬ ꤒꤣ꤬ꤗꤢꤦ꤭ꤗꤢꤦ꤭꤮ ꤟ꤫ꤢꤨ꤬ ꤖꤢꤧ ꤚꤣꤧ꤬ ꤜꤥ꤭ꤔꤢꤩꤜꤥ꤭ꤔꤢ꤬ ꤓꤢꤩ꤬ꤡꤝꤢꤊꤢꤧ꤭ ꤜꤢꤪ꤭꤯ ꤓꤥ꤭ꤚꤣꤧ꤬ ꤢ꤬ ꤛ꤫ꤢꤧ꤬ꤥ꤬ꤗ꤫ꤢꤩ꤬ ꤕ꤫ꤢꤩ꤬ ꤜꤢꤪ꤭ꤕꤜꤤ꤭ ꤜꤢꤪ꤭ ꤢꤨ꤭ꤏꤝꤤꤢꤨ꤭ꤏꤢꤩ꤭ ꤔꤣꤧ꤬ꤒꤣꤧ꤬ꤟꤢꤩ꤬꤯ 17ꤒꤢꤩ꤬ ꤣꤧ꤭ꤒꤣꤧ꤬ꤟꤢꤩ꤬ꤔꤣꤧ꤬ ꤢ꤬ ꤗꤢꤩ꤬ꤜꤣꤗꤢꤩ꤬ꤙꤢ꤭ꤓꤢꤧ꤬ ꤖꤚꤢꤩ꤬ꤖꤚꤥ꤬ ꤛꤢ꤬ꤏꤛꤢꤛꤢ꤬ ꤢ꤬ ꤒꤢꤩ꤬ꤟꤢꤩꤥ꤬ꤔꤢꤩ꤬ ꤔꤢꤧ,
“ꤢ꤬ ꤖꤛꤢꤡꤝꤢꤊꤢꤧ꤭ ꤕꤢꤩ꤬ ꤒꤢꤩ꤬ꤏꤝꤤꤒꤢꤩ꤬ꤏꤢꤩ꤭ ꤒꤣꤧ꤬ꤟꤢꤩ꤬꤯”#ꤛꤢ꤬ꤏꤛꤢꤛꤢ꤬ ꤅꤃:꤄
ꤊꤣꤧ꤬ꤛꤢꤧ꤭ ꤘꤣ ꤢ꤬ ꤋꤚꤝꤢ꤭ ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨ ꤢ꤬ꤋꤛꤢ꤭ ꤒꤣꤧ꤬ꤟꤢꤩ꤬ ꤢ꤬ꤋꤝꤢꤢ꤬ꤊꤢꤩ꤬
(ꤜꤢꤨꤊꤢ꤬ ꤉:꤅꤇-꤆꤂)
18ꤙꤣꤧ ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨ ꤗꤢꤧꤓ꤫ꤣꤧ꤬ ꤔꤢꤧ ꤊꤣꤧ꤬ꤛꤢꤧ꤭ ꤙꤢꤩꤗꤢꤨ꤬ ꤟꤢꤧ꤭ ꤥ꤬ꤒꤣꤧ꤬ꤠꤢ꤬ ꤜꤢꤪ꤭ ꤢ꤬ ꤢ꤬ꤋꤢꤩ꤭ꤔꤣꤧ꤬, ꤢ꤬ ꤟꤢꤩꤒꤢ꤭ ꤢ꤬ꤍ꤫ꤥ꤬ ꤘꤣ ꤢ꤬ ꤋꤥ꤭ꤖꤢꤨꤡ꤫ꤢꤩ꤬ ꤒꤣꤧ꤬ꤟꤢꤩ꤬ ꤢ꤬ ꤥ꤬ ꤔꤢꤧ ꤕꤢꤩ꤬ ꤊ꤫ꤢꤦ꤬ ꤡꤝꤢ ꤘꤣ ꤓꤣꤧ꤭ꤢꤪ꤬ꤘꤢꤨ꤬ꤒꤣꤧ꤬ꤠꤢꤪ꤬ ꤢ꤬ꤙꤢꤩꤚꤢꤩ꤭ ꤕꤥ꤮, ꤢ꤬ ꤟꤢꤩ ꤟꤢꤨꤔꤣꤧ꤬꤯ 19ꤙꤣꤧꤔꤣꤧ꤬ꤢ꤬ꤋꤢꤩ꤭, ꤖꤚꤢꤩ꤬ꤤ꤬ꤞꤝꤢ ꤒꤢꤩ꤬ꤞꤝꤢꤒꤢꤩ꤬ꤞꤢꤧ꤬ ꤢ꤬ꤞꤢꤚꤢ ꤒꤣ꤬ꤖꤚꤢꤩ꤬ ꤟꤢꤧ꤭ ꤘꤣ ꤜꤢꤨ꤭ ꤥ꤬ ꤚꤣꤧ꤬ ꤢ꤬ ꤟꤢꤩ ꤜꤢꤨ꤭ ꤔꤢꤧ, “ꤞꤢꤚꤢ, ꤔꤢꤧ꤬ ꤡꤝꤢ ꤙꤣꤧꤒꤢꤩ꤭꤮ ꤒꤣ꤬ꤖꤥ꤬ ꤙꤢꤩ꤬ꤙꤢꤩ꤬, ꤠꤢꤧ꤭ ꤡꤝꤢꤊꤣꤧ꤭ ꤔꤢꤧ ꤔꤢꤧ꤬”
20ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨ ꤟꤢꤩ ꤜꤢꤨ꤭ ꤔꤢꤧ, “ꤓꤝꤤ꤬ꤗꤤ꤬ ꤒꤣꤧ꤬ꤟꤢꤩ꤬ ꤥ꤬ ꤔꤢꤧ ꤢ꤬ꤊꤢꤨ꤭, ꤓꤢꤨ꤬ꤟꤢꤨꤒꤣꤧ꤬ꤟꤢꤩ꤬ ꤥ꤬ ꤔꤢꤧ ꤢ꤬ꤕꤝꤤ꤬, ꤒꤣꤧ꤬ꤘꤢꤦꤚꤣꤧ꤬ ꤖꤚꤢꤩ꤬ꤜꤢꤨ꤬ꤊꤣꤧ꤬ꤛꤢꤧ꤭ ꤢ꤬ꤖꤢꤨꤖꤚꤢꤩ꤬ꤋꤢꤨ꤭ꤣꤧ꤭, ꤙꤣꤧ ꤢ꤬ꤊꤢꤨ꤬ꤊꤜꤢꤪ ꤜ꤫ꤢꤩ꤬ꤘꤢꤧ꤬ꤒꤢ꤭ ꤖꤢꤧꤔꤣꤧ꤬ ꤢ꤬ ꤥ꤬ꤒꤥ꤬꤯”
21ꤢ꤬ ꤋꤥ꤭ꤖꤢꤨꤡ꤫ꤢꤩ꤬ ꤘꤣ ꤢ꤬ꤚꤥ꤬ꤒꤣ꤬ꤖꤚꤢꤩ꤬ ꤟꤢꤩ ꤜꤢꤨ꤭ ꤔꤢꤧ, “ꤙꤢꤧ꤬ꤡꤢꤩ꤬, ꤘꤣꤧꤚꤣꤧ ꤠꤢꤧ꤭ ꤢ꤬ꤏꤣꤧꤋꤢꤩ꤭ ꤘꤣ ꤠꤢꤧ꤭ ꤊ꤫ꤢꤦ꤬ ꤊꤢ꤬ ꤜꤥ ꤚ꤫ꤣꤧ꤬ ꤊꤥꤚꤣꤧ ꤠꤢꤧ꤭ꤖꤢꤩ꤭ ꤔꤤ꤮꤯”
22ꤗꤢ꤬ꤔꤢꤧꤚꤣꤧ꤬ ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨ ꤟꤢꤩꤏꤢꤦ꤬ ꤜꤢꤨ꤭ ꤔꤢꤧ, “ꤋꤚꤝꤢ꤭ꤊꤣꤧ꤭ ꤡꤣꤧ ꤠꤢꤧ꤭ꤋꤛꤢ꤭ ꤊꤢꤨꤔ꤫ꤢꤧ꤬ꤣꤧ꤭, ꤊꤣꤧ꤬ꤛꤢꤧ꤭ ꤘꤣ ꤢ꤬ ꤔ꤫ꤤ꤬ꤘꤢ꤭ ꤡꤢꤪꤗꤣꤧ꤬ꤚꤢꤧ꤬ ꤢ꤬ꤍ꤫ꤥ꤬ ꤒꤥ꤬ ꤒꤣꤧ꤬ꤟꤢꤩ꤬ ꤔꤣꤧ꤬ꤗꤢ꤬ ꤢ꤬ꤞꤢꤧꤔꤢꤧ ꤊꤣꤧ꤬ꤛꤢꤧ꤭ꤞꤣꤧ꤭ ꤣꤧ꤭ꤔꤣꤧ꤬ꤟꤣꤧ꤯ ꤔꤢꤪ꤭ꤜꤥ ꤚꤣꤧꤘꤢꤦ꤬ ꤊꤣꤧ꤬ꤛꤢꤧ꤭ꤞꤣꤧ꤭ ꤣꤧ꤭ꤔꤣꤧ꤬ ꤔꤢꤧ ꤛꤢꤩ꤬ꤞꤤ꤭ꤔꤣꤧ꤬꤯”
ꤢ꤬ ꤔꤢꤪ꤭ꤥ꤬ꤊꤥ ꤊ꤫ꤢꤩ꤬ꤜꤣꤧ꤬ꤞꤢꤩ
(ꤗꤢ꤬ꤊꤢꤨ ꤄:꤃꤅-꤄꤁, ꤜꤢꤨꤊꤢ꤬ ꤈:꤂꤂-꤂꤅)
23ꤙꤣꤧꤔꤣꤧ꤬ꤢ꤬ꤋꤢꤩ꤭ ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨ ꤔꤥ꤭ ꤘꤣ ꤞꤢꤪ꤬ꤊꤜꤣꤧ꤭ꤊꤢꤨ꤭ ꤚꤣꤧ꤬ ꤢ꤬ ꤋꤥ꤭ꤖꤢꤨꤡ꤫ꤢꤩ꤬ ꤒꤣꤧ꤬ꤟꤢꤩ꤬ ꤋꤚꤝꤢ꤭ꤔꤥ꤭ ꤊꤣꤧ꤭ ꤜꤢꤨ꤭ ꤚꤣꤧ꤬ ꤛꤢꤩ꤬ꤞꤤ꤭ ꤓꤢꤩ꤬ꤡꤝꤢꤊꤢꤧ꤭꤯ 24ꤙꤣꤧ ꤛꤢꤩ꤬ꤞꤤ꤭ ꤡꤝꤢꤒ꤫ꤥ꤬ ꤘꤣ ꤓꤣꤧ꤭ ꤊꤜꤢꤧ꤭ꤗꤢꤩ꤭ꤊꤢꤨ꤭ ꤢ꤬ꤋꤢꤩ꤭ꤔꤣꤧ꤬, ꤊ꤫ꤢꤩ꤬ꤜꤣꤧ꤬ꤞꤢꤩ ꤜꤣꤧ꤬ꤜꤢꤧ꤭ ꤟꤢꤧ꤭ ꤖꤚꤢꤦ꤯ ꤓꤣꤧ꤭ ꤟꤢꤟꤥꤘꤢꤨ꤬ ꤚꤣꤧ꤬ ꤢ꤬ ꤕꤜ꤫ꤢꤧ꤬ꤔꤥ꤭ ꤜꤢꤪ꤭ ꤘꤣ ꤞꤢꤪ꤬ꤊꤜꤣꤧ꤭ꤊꤢꤨ꤭꤯ ꤙꤣꤧꤔꤣꤧ꤬ꤢ꤬ꤋꤢꤩ꤭ ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨ ꤥ꤬ꤗꤣꤧ꤭ꤒꤣꤧ꤬ꤕꤢ꤬꤯ 25ꤚꤣꤧ꤬ ꤢ꤬ ꤋꤥ꤭ꤖꤢꤨꤡ꤫ꤢꤩ꤬ ꤒꤣꤧ꤬ꤟꤢꤩ꤬ ꤡꤝꤢ ꤓꤢꤨ꤬ꤚꤢꤧ꤭ꤊꤣꤧ꤬ꤓꤢꤪ꤬ ꤜꤢꤨ꤭ ꤚꤣꤧ꤬ ꤢ꤬ ꤟꤢꤩ ꤜꤢꤨ꤭ ꤔꤢꤧ, “ꤙꤢꤧ꤬ꤡꤢꤩ꤬, ꤗꤢꤩ꤬ꤡꤝ꤫ꤢ꤬ꤗꤣꤧ꤭ ꤕꤢꤩ꤬, ꤕꤢꤩ꤬ ꤊ꤫ꤢꤦ꤬ꤚꤢꤩ꤭ ꤒꤢ꤭ꤡꤢꤦꤞꤣꤧ꤭ ꤜꤢꤪ꤭ꤟꤣꤧ꤯”
26ꤚꤣꤧ꤬ ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨ ꤟꤢꤩ ꤛꤢꤩ꤬ꤞꤤ꤭ ꤔꤢꤧ, “ꤊꤣꤧ꤬ꤛꤢꤧ꤭ ꤒꤢꤩ꤬ꤛ꤫ꤢꤦ꤬ꤕꤣꤧ꤬ꤒꤤ ꤞꤤ꤭꤮, ꤞꤤ꤭ ꤡꤝꤢꤞꤤꤤ꤬ꤏꤢꤩ꤭ ꤊꤣꤧ꤬ꤒꤢꤩ ꤔꤣꤧ꤬ꤗꤢ꤬ ꤗꤢꤩ꤬ꤒꤢꤩ꤭?” ꤢ꤬ ꤟꤢꤩꤓꤥ꤭ ꤚꤣꤧ꤬ ꤢ꤬ ꤊꤣꤧ꤬ꤓꤢꤪ꤬ ꤞꤤꤖꤚꤝꤢ꤭ ꤊ꤫ꤢꤩ꤬ꤜꤣꤧ꤬ꤞꤢꤩꤣꤧ꤭ ꤔꤢꤧ ꤓꤣꤧ꤭ꤟꤢꤟꤥ ꤣꤧ꤭ꤒꤣꤧ꤬ꤟꤢꤩ꤬꤯ ꤚꤣꤧ꤬ ꤊ꤫ꤢꤩ꤬ꤜꤣꤧ꤬ꤞꤢꤩ ꤥ꤬ꤊꤥ ꤟꤢꤧ꤭ꤖꤚꤢꤦꤡꤣꤧ꤯
27ꤢ꤬ ꤋꤥ꤭ꤖꤢꤨꤡ꤫ꤢꤩ꤬ ꤒꤣꤧ꤬ꤟꤢꤩ꤬ ꤋꤛꤢꤛꤢꤦ ꤜꤢꤪ꤭ꤕꤜꤤ꤭ ꤚꤣꤧ꤬ ꤢ꤬ ꤟꤢꤩ ꤜꤢ꤭ꤋꤢꤧ꤭ ꤜꤢꤨ꤭ ꤔꤢꤧ, “ꤊꤣꤧ꤬ꤛꤢꤧ꤭ ꤣꤧ꤭ꤒꤣ꤬ꤖꤚꤢꤩ꤬ ꤗꤢ꤬ ꤊꤣꤧ꤬ꤛꤢꤧ꤭ ꤡꤣꤧ ꤟꤢꤨꤒꤢꤩ꤭ꤒꤢꤩ꤭? ꤢ꤬ꤒꤣꤧ꤬ꤚꤣꤧ꤭ ꤡꤝꤢꤘꤢꤨ꤬ ꤡꤣꤧ ꤙꤢꤔꤣꤧ꤬ꤔꤣꤧ꤬꤯ ꤊ꤫ꤢꤩ꤬ꤜꤣꤧ꤬ꤞꤢꤩ ꤔꤢꤧ ꤓꤣꤧ꤭ꤟꤢꤟꤥ ꤔ꤫ꤤ꤬ꤘꤢ꤭ ꤡꤣꤧ ꤜꤢꤨ꤭ꤍ꤫ꤥ꤬ꤍ꤫ꤥ꤬꤯”
ꤙꤢꤧ꤬ꤡꤢꤩ꤬ ꤠ꤫ꤢꤩ꤬ꤓꤢꤩ꤬ꤊꤢꤧ꤭ ꤜꤥ꤭ꤔꤢꤩꤜꤥ꤭ꤔꤢ꤬ ꤘꤣ ꤊꤣꤧ꤬ꤛꤢꤧ꤭ꤖꤢꤩ꤭ ꤞꤤꤔꤣꤧ꤭ ꤢ꤬ꤊꤢꤨ꤭
(ꤗꤢ꤬ꤊꤢꤨ ꤅:꤁-꤂꤀, ꤜꤢꤨꤊꤢ꤬ ꤈:꤂꤆-꤃꤉)
28ꤙꤣꤧ ꤛꤢꤩ꤬ꤏꤛꤢꤨ ꤡꤝꤢꤒ꤫ꤥ꤬ ꤘꤣ ꤓꤣꤧ꤭ꤢꤪ꤬ꤘꤢꤨ꤬ꤒꤣꤧ꤬ꤠꤢꤪ꤬ ꤙꤢꤩꤚꤢꤩ꤭, ꤊꤢ꤬ꤘꤢꤚꤢ꤬ꤊ꤫ꤢꤩ꤬ ꤢ꤬ꤋꤢꤩ꤭ꤔꤣꤧ꤬, ꤊꤣꤧ꤬ꤛꤢꤧ꤭ꤖꤢꤩ꤭ ꤘꤣ ꤜꤥ꤭ꤔꤢꤩꤜꤥ꤭ꤔꤢ꤬ ꤗꤢꤩ꤬ꤙꤢꤩ꤬ ꤜꤢꤨ꤭ ꤞꤤꤔꤣꤧ꤭ꤣꤧ꤭ ꤢ꤬ ꤥ꤬ ꤘꤣ ꤜꤥ꤭ꤋꤢꤨ꤬ ꤓꤢꤩ꤬ ꤚꤣꤧ꤬ ꤢ꤬ ꤓꤢꤩ꤬ꤡꤝꤢ ꤗꤢꤧꤓ꤫ꤣꤧ꤬ꤏꤢꤦ꤬ ꤔꤢꤧ ꤜꤢꤨ꤭꤯ ꤊꤣꤧ꤬ꤛꤢꤧ꤭ꤖꤢꤩ꤭ ꤣꤧ꤭ꤞꤤꤔꤣꤧ꤭ ꤔꤣꤧ꤬, ꤜꤥ꤭ꤔꤢꤩꤜꤥ꤭ꤔꤢ꤬ ꤗꤢꤩ꤬ꤙꤢꤩ꤬ ꤜꤢꤨ꤭ ꤢ꤬ꤋꤝꤢ꤬ꤢ꤬ꤋꤛꤢ꤭, ꤢ꤬ꤏꤝꤢ꤬ꤢ꤬ꤏꤢꤪ꤭, ꤢ꤬ ꤒꤣꤧ꤬ꤚꤢꤪ꤬ꤞꤢꤩ ꤞꤤꤤ꤬ꤏꤢꤩ꤭ ꤔꤢꤧ꤬ꤡꤣꤧ ꤚꤣꤧ꤬ ꤊꤜꤢꤧ ꤡꤝꤢ ꤙꤣꤧ ꤜꤥ꤭ꤓꤢꤦ꤭ ꤔꤣꤧ꤬ꤒꤣ꤬ꤙꤥ꤭ ꤔꤣꤧ꤬ ꤢꤨ꤭ ꤡꤝꤢꤖꤢꤦ꤬ꤙꤢꤦ꤬ ꤒꤣ꤬ꤖꤚꤢꤩ꤬꤮ ꤒꤥ꤬꤯ 29ꤛꤢꤩ꤬ꤞꤤ꤭ ꤢꤩꤓꤥ꤭ ꤔꤢꤧ, “ꤡꤢꤪꤗꤣꤧ꤬ꤚꤢꤧ꤬ ꤢ꤬ꤖꤢꤨꤖꤚꤢꤩ꤬ꤋꤢꤨ꤭, ꤔꤢꤧ꤬ ꤞꤤꤛ꤫ꤢꤦ꤬ ꤗꤢꤩ꤬ ꤕꤢꤩ꤬ ꤟꤢꤨꤒꤢꤩ꤭? ꤡꤢꤪꤗꤣꤧ꤬ꤚꤢꤧ꤬ ꤢ꤬ꤗ꤫ꤢꤪ꤬ꤔꤣꤧ꤭ ꤘꤣꤧꤡꤢ꤭ ꤢꤨ꤭ ꤢ꤬ꤏꤣꤧꤋꤢꤩ꤭ ꤒ꤫ꤥ꤬ ꤒꤢꤧ꤬ꤜꤢ꤭ꤟꤤꤒꤥ꤬ ꤢ꤬ꤋꤢꤩ꤭ꤔꤣꤧ꤬, ꤔꤢꤧ꤬ ꤊ꤫ꤢꤦ꤬ꤚꤢꤩ꤭ ꤟꤢꤧ꤭ꤗꤢꤩ꤬ ꤋꤚꤢꤧ꤮ ꤕꤢꤩ꤬ ꤤ꤬ꤒꤢꤩ꤭?”
30ꤙꤣꤧ ꤢ꤬ꤛꤢ꤬ꤜꤢ꤭ ꤔꤢꤧ ꤛꤢꤩ꤬ꤞꤤ꤭ ꤒꤥ꤬ ꤔꤣꤧ꤬, ꤓꤢꤧ ꤥ꤬ ꤒꤣ꤬ꤗꤢꤨ꤬ꤘꤢꤨ꤬ ꤚꤣꤧ꤬ ꤢ꤬ ꤢꤩ꤬ ꤜꤢ꤭ꤋꤢꤧ꤭ ꤢ꤬ꤏꤢꤩ꤬ ꤙꤣꤧꤔꤣꤧ꤬꤯ 31ꤜꤥ꤭ꤔꤢꤩ ꤗꤢꤩ꤬ꤙꤢꤩ꤬ ꤊꤣꤧ꤬ꤛꤢꤧ꤭ꤖꤢꤩ꤭ ꤣꤧ꤭ꤞꤤꤔꤣꤧ꤭ ꤔꤣꤧ꤬, ꤢ꤬ ꤊꤝꤤ꤭ꤞꤤꤛꤢꤪ꤬ ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨ ꤔꤢꤧ, “ꤊꤢꤩ꤬ ꤔꤢꤧ꤬ ꤠ꤫ꤢꤩ꤬ꤓꤢꤩ꤬ꤡꤝꤢꤊꤢꤧ꤭ ꤕꤢꤩ꤬ ꤟꤢꤩꤚꤣꤧ꤬, ꤔꤢꤪ꤭ꤡꤝꤢꤔꤥ꤭ꤥ꤬ ꤚꤣꤧ ꤕꤢꤩ꤬ ꤘꤣ ꤓꤢꤧ ꤔꤣꤧ꤬ꤒꤣꤧ꤬ꤟꤢꤩ꤬ ꤢ꤬ꤊꤢꤨ꤭ ꤔꤣꤧ꤬ ꤔꤤ꤮꤯”
32ꤙꤢꤧ꤬ꤡꤢꤩ꤬ ꤟꤢꤩꤏꤢꤦ꤬ ꤛꤢꤩ꤬ꤞꤤ꤭ ꤔꤢꤧ, “ꤡꤝꤢꤔꤥ꤭ꤥ꤬ꤗꤣꤧ꤭ ꤜꤢ꤭ꤋꤢꤧ꤭!” ꤚꤣꤧ꤬ ꤛꤢꤩ꤬ꤞꤤ꤭ ꤓꤢꤩ꤬ꤡꤝꤢ ꤔꤥ꤭ ꤥ꤬ꤜꤢꤪ꤭ ꤜꤢ꤭ꤋꤢꤧ꤭ ꤘꤣ ꤓꤢꤧ ꤔꤣꤧ꤬ꤒꤣ꤬ꤗꤢꤨ꤬ ꤢ꤬ꤊꤢꤨ꤭, ꤚꤣꤧ꤬ ꤓꤢꤧ ꤒꤣꤧ꤬ꤟꤢꤩ꤬ ꤊꤜꤢꤧ꤬ ꤒꤣꤧ꤬ꤜꤝꤢ꤭ꤒꤢ꤭ ꤙꤢꤩꤗꤢꤨ꤬ꤜꤢꤪ꤭ ꤚꤝꤢꤜ꤫ꤢ꤬ ꤒꤣꤧ꤬ꤔꤢꤧꤜꤥ꤬ ꤚꤣꤧ꤬ ꤒꤢ꤭ꤡꤢꤦ ꤞꤣꤧ꤭ ꤔꤥ꤭ꤜꤢꤪ꤭ ꤘꤣ ꤓꤣꤧ꤭ꤢꤪ꤬ꤘꤢꤨ꤬ꤒꤣꤧ꤬ꤠꤢꤪ꤬ꤊꤢꤨ꤭꤯ 33ꤖꤚꤢꤩ꤬ꤊꤢꤩ꤭ꤓꤢꤧ ꤣꤧ꤭ꤒꤣꤧ꤬ꤟꤢꤩ꤬ ꤊꤜꤢꤧ꤬ꤊꤢ꤬ ꤘꤣ ꤠꤤ꤭ꤊꤢꤨ꤭ ꤚꤣꤧ꤬ ꤢ꤬ ꤊꤜꤢꤧ꤬ꤊꤢ꤬ ꤘꤢꤧꤏꤥ꤬ꤜꤥ꤭ ꤕ꤫ꤢꤩ꤬ ꤢꤨ꤭ ꤔꤢꤧ ꤜꤢꤪ꤭ ꤒꤢꤩ꤬ꤓꤝꤢ꤭ꤓꤢꤧ꤬ ꤢ꤬ꤔ꤫ꤢꤩ꤬ ꤣꤧ꤭ꤒꤣꤧ꤬ꤟꤢꤩ꤬ ꤔꤢꤧ ꤒꤢꤩ꤬ꤗꤢꤩ꤬ꤢ꤬ꤔ꤫ꤢꤩ꤬ ꤔꤢꤧ ꤊꤣꤧ꤬ꤛꤢꤧ꤭ꤖꤢꤩ꤭ ꤞꤤꤔꤣꤧ꤭ꤣꤧ꤭ ꤜꤢꤪ꤭꤮ ꤕꤜꤤ꤭꤯ 34ꤊꤣꤧ꤬ꤛꤢꤧ꤭ ꤒꤣ꤬ꤠꤤ꤭ꤜꤢꤪ꤭ ꤟꤢꤧ꤭ꤓꤢꤩ꤬ꤗꤢꤧ ꤜꤢꤪ꤭ ꤡꤣꤧ ꤛꤢꤩ꤬ꤏꤛꤢꤨ꤯ ꤓꤥ꤭ꤚꤣꤧ꤬ ꤙꤣꤧ ꤛꤢꤩ꤬ꤞꤤ꤭ ꤗꤢꤧꤓ꤫ꤣꤧ꤬ ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨ ꤢ꤬ꤋꤢꤩ꤭, ꤢ꤬ ꤊꤝꤤ꤭ꤞꤤꤛꤢꤪ꤬ ꤜꤢꤨ꤭ ꤔꤢꤧ ꤢ꤬ ꤊ꤫ꤢꤦ꤬ ꤓꤢꤩ꤬ꤡꤝꤢ ꤒꤣꤧ꤬ꤖꤢ꤭ꤊꤢꤧ꤭ ꤔꤢꤧ ꤛꤢꤩ꤬ꤞꤤ꤭ ꤊ꤫ꤢꤩ꤬ꤊꤢꤦ꤭ ꤙꤣꤧꤔꤣꤧ꤬꤯
Currently Selected:
ꤗꤢꤞꤢꤧ 8: eky-Kali-MM
Highlight
Share
Copy
Want to have your highlights saved across all your devices? Sign up or sign in
Wycliffe USA
