Jone 9

1Ma si maṉa nia tatha, e rikia tee wane maane boko u bomai ita asi maṉa kera kwalafia. 2Ma toa nia ne toleda kera soetoona, keka una eri, Rabae ae, ni tei ne abula taa, wane nei i talaana, mado maka nia ma thainana, na maana ka boko u bomai ita asi maṉa kera kwalafia? 3Tha Jesus e luuda, ka una eri, Wane nei mena e ai si abula taa bana, ma maka nia ma thainana ka ai lau boo: do fasi keki fatai nia ra tha God ki ani nia. 4Nau kwai ra e ai si ei boo ana ra nia ki na arasi nau mai, si maṉa kai dani: fanua toto kai rodo, si maṉa ne ai ta wane si thaitoomana ra la. 5Si maṉa ku ni ana fanua nei iano, nau ṉa lalaa la i fanua nei iano. 6Buriana ne ṉata una eri, ka ṉisu i theegano, ka thauwai nia mamako ana ṉisu eri, ka alua mamako fafia ro maa wane eri, 7Ma ka soree isana, Lae, oki sisiu amua i lala gwa osi i Siloama (ma toolaṉai lana si ṉata eri, Kera arasia). Mania ka lae, ka sisiu, me oli lau mai, ka lio naa. 8Mania toa nia ki, ma toa na kera riki nia inao, na nia wane maane boko, kera sorea, Wane ba ne ono ka gagani e ai nania? 9Tei toa lau kera sorea, Nia boo: tei toa lau keka sorea, E ai, ma sui ka ’uri nia. Nia ka sorea, Nau boo nania. 10Mania keka soree isana, Ma nifana ade lana na kera ifinia maamu? 11Nia luuda, ka una eri, Wane ba na kera alaṉia atha Jesus e thauwai nia mamako, ka alua fafia ro maa nau ki, ka soree isaku, Lae uri gwa osi i Siloama, oki sisiu amua: mania ku lae kau, kwa sisiu, ma maaku ka laa. 12Sui kera soree isana, Ma nia nifei? Nia ka sorea, Ku dora lau baku ania.

13Kera talaia mai wane eri maane boboko isana Farisi ki. 14Sui fa boṉi mamaloa neri na tha Jesus e thauwai nia mamako, ka ifinia maana. 15Mania Farisi ki lau boo kera soetoona lau uria ade la kera ilia na maana ka laa. Nia soree isada, Nia alua mamako fafia ro maa nau ki, ma nau ku sisiu, sui ku lio. 16Mania tei toa ana Farisi ki kera sorea, Wane nei e ai si ita mai atha God, uria ne ai si faaabua fa boṉi mamaloa. Sui tei toa lau kera sorea, Wane ne abula taa kai ili ufita ana bala si do una eki? Ma kera to kwailiu ana ro si lio. 17Mania kera sorea lau isana wane eri maane boboko, Ta noko sorea suli nia, uria ne ifinia maamu? Ma nia sorea, Nia ṉa porofeta. 18Mania Ju ki kesi faamamanea na maane boboko, ma keka adea ka laa, keka ailia fasi maka ma thainana wane eri na kera adea maana ka laa, 19Ma keka soetoodaroa, keka una eri, Kaluwane kamaroa nania, na moro sorea maane boboko u bomai maṉa kera kwalafi nia? sui nifana ade lana na kai lio maṉa eri? 20Maka nia ma thainana kero luuda, keko sorea, Kamarea mere thaitoomana na ṉa kaluwane kamarea boo nania, ma maana ka boboko u bomai maṉa na kera kwalafi nia: 21Sui ade la eri na kai lio naa maṉa eri, mesi thaitoomana; ma wane ne ifinia maana, e ai mesi thaitoomana: nia baita naa; muki soetoona; kai tala ṉata nana. 22Si do eki maka nia ma thainana kero sorea, uria na kero mau ana Ju ki: sulaania Ju ki kera ala naa, sa ta wane kai faamamanea na nia Christ ba, keki arasi nia faisia biu ni ofu la. 23Mania maka nia ma thainana keko sorea, Nia baita naa; muki soetoona. 24Mania ruana lau keka ailia wane eri maane boboko, keka soree isana, Tha God ana noki taṉoa: mili thaitoomana wane nei wane ne abula taa. 25Mania nia luuda, ka una eri, Mada sa nia wane ne abula taa, nau kwasi thaitoomana: tee si do ku thaitoomana, nau maaku e boboko na ba, ma si maṉa eri kwai lio. 26Mania kera sorea lau isana, Ta si ta ne ilia iamu? e ifini ufita ana maamu? 27Nia luuda, ka una eri, Nau ku bii faaroṉo kamulua, ma musi roṉoi: uria ta na muki thathamii roṉoa lau? mulu thathamia lau boo nia kai tole kamulua? 28Sui kera ṉata taa uri nia, keka sorea, Oe wane nia kai tole oe; ma ni kamilia tha Mosesi kai tole kamilia. 29Mili thaitoomana na tha God e ṉata isatha Mosesi: ma wane nei molo, mili dora ana si kula ne ita mai iei. 30Wane eri e luuda, ka soree isada, Si kula na keki kwele ania nania, na mulu dora ana si kula ne ita mai iei, ma una ena mena nia ka ifinia maaku. 31Kulu thaitoomana tha God e ai si roṉoa ṉata lana toa na kera abula taa: sui mada sa ta wane kai faabaita tha God, ma kai ilia si do nia thathamia, wane eri nia kai roṉoa. 32Ita ana thafali lana fanua nei iano e ai kesi roṉoa u sa ta wane ka ifinia maana ta wane na maane boko u bomai maṉa kera kwalafia. 33Mada sa wane nei e ai si ita mai atha God, e ai si talaana ili lana ta si do. 34Kera luua, keka soree isana, Ni oe o futa sui boo ana abula taa la ki, sui oki kwaifamanatai isamilia? Ma keka suia kau.

35Tha Jesus e roṉoa na kera suia kau; ma nia fulatoona, ka sorea, Oki fitoona Kaluwane tha God? 36Nia luua, ka sorea, Ma nia ni tei, Lord, fasi kwa fitoona? 37Ma tha Jesus ka soree isana, O rikia naa, ma nia boo na kai ṉata bi oe. 38Ma nia sorea, Lord, ku fitoo boo. Ma nia faabaita nia. 39Ma tha Jesus ka sorea, Uria kotu kokoto la nau ku lae mai ana fanua nei iano, fasi toa maade rodo keki lio; ma toa kera lio maada kai rodo. 40Ma toa ana Farisi ki na kera ni isana kera roṉoa si do eki, ma keka soree isana, Ma ni kamilia, maamilia ka rodo lau boo? 41Tha Jesus ka soree isada, Mada sa maamulua e rodo, abula taa la sa ka ni ani kamulua e ai: ma si maṉa eri muka sorea, Miki lio bamilia: mania abula taa lamulua ka to bana.

Currently Selected:

Jone 9: MLU1949

Highlight

Copy