Jone 8

1Tha Jesus e lae uria gwa tolo i Olifesi.

2Ma i la uusuwadia u boo nia kotho lau i la biu baita tha God, ma toa eki sui boo kera lae mai isana; ma nia ono iano, ka kwaifamanatai isada. 3Ma wane ni kekeda ki bia Farisi ki kera talaia mai tee kini na kera fulatoona ana oe la; ma buriana na kera alu nia kai takwe i maalutada, 4Keka soree isana, Wane ni Kwaifamanatai ae, kera fulatoona kini nei ana oe la, asi maṉa eri boo na nia e ilia. 5Sui ana lo ba tha Mosesi e soree isamilia mika ufauna toa una eki: mania si ta noki sorea? 6Ma si do eri kera sorea, keka faaṉata nia fasi kai ṉata garo, ma keki fulatoona ta si do fasi keki alaṉi nia ania. Ma tha Jesus e agwaoro iano, ka kekeda i theegano ana kukuna. 7Sui uria na keki soeoli nia, nia ka tae ia, ka soree isada, Wane iamulua ne ai ta abula taa la si to ani nia, kai ufauna totonao. 8Ma nia agwaoro lau, ka kekeda lau i theegano. 9Ma ni kera, si maṉa na kera roṉoa, wane nai ruruuda ka tala faaseenoni kera, keka lae too tee wane uri maa, ka thafalia ana ulunao, ka fula ana ai buri: ma kera akwasia tha Jesus ka to tee nia, bia kini eri, asi kula nia e toto iei i maalutada. 10Si maṉa na tha Jesus ka tae ia, ma ka rikia talitoona kini eri, nia ka soree isana, Kini ena, toa ba ki na kera alaṉi oe asi do eri, kera ifei? ta wane si sorea kwae lamu? 11Ma nia sorea, E ai bana, Lord. Ma tha Jesus ka sorea. Ma ni nau lau boo kwasi sorea kwae lamu: oki lae amua; ita itaraena ka lae alaa osi abula taa lau.]

12Mania tha Jesus e ṉata lau isada, ka una eri, Ni nau ṉa lalaa la i fanua nei iano: imole na kai lae iburiaku ka ai si lae i la maerodo, ṉa lalaa la ana marukia kai ni isana. 13Mania Farisi ki keka soree isana, O faamamanea si do no thaitoomana suli oe i talaamu; si do no faamamanea e ai si mamana. 14Tha Jesus e luuda, ka soree isada, Mada sa ku faamamanea si do ku thaitoomana suli nau i talaaku mena, si do ku faamamanea e mamana; uria ni nau ku thaitoomana si kula na ku too mai iei na ku lae mai, ma si kula na kwai tatha uria; ma ni kamulua musi thaitoomana lae laku mai, ma tatha laku kau. 15Kamulua mulu ṉata mala wane ni kotu sulia si do manatana imole e thaitoomana; nau e ai kwasi ṉata mala wane ni kotu sulia ta wane. 16Una ena mena, mada sa kwa ṉata mala wane ni kotu, ṉata laku e mamana; uria na tee nau e ai, nau ma ṉa Maka ne arasi nau mai. 17Iu ma ana lo kamulua kera keda, na si do na ta ro nonii wane kera faamamanea e mamana. 18Nau wane na kwai faamamanea si do ku thaitoomana suli nau i talaaku, ma ṉa Maka ne arasi nau mai, nia lau boo ka faamamanea si do ne thaitoomana suli nau. 19Mania kera soree isana, Ma Maka oe nifei? Tha Jesus e luuda, ka una eri, Mulu dora ani nau, ma muka dora lau boo ana Maka nau: mada sa mulu thaitoomaku, muka thaitoomana lau boo Maka nau. 20Si baea eri tha Jesus e sorea ana fuila malefo, si maṉa nia kwaifamanatai la biu baita tha God: me ai ta wane si rau nia; uria na si kadee maṉa nia e ai si fula u mai.

21Mania tha Jesus ka soree lau isada, Nau kwai lae nakua, ma kamulua muki rofe uri nau, ma muki mae ana abula taa la kamulua ki: si kula ni nau kwai lae uria, kamulua muka dora ana fula la iei. 22Mania Ju ki kera sorea, Ni nia kai tala thauṉi nia i talaana, na kai sorea, Si kula ni nau kwai lae uria, kamulua muka dora ana fula la iei? 23Ma nia ka soree isada, Kamulua mulu ita iano; ni nau ku ita mai ia: kamulua do fanua nei iano ki; ni nau do fanua nei iano e ai. 24Mania nau ku soree isamulua, na toto muki mae ana abula taa la kamulua ki: uria mada sa musi fitoo na nau ku to bakua, toto muki mae bonaa ana abula taa la kamulua ki. 25Mania kera soree isana, Ma ni oe ni tei? Tha Jesus ka soree isada, Nau ṉa do na nau ku ṉata sulia isamulua ita ana thafali la mai. 26Do oro ni u fasi kwai ṉata ania ma kwai sorea mala wane ni kotu suli kamulua: sui nia ne arasi nau mai e mamana; ma si do nau ku roṉoa ani nia, si do eki kwai ṉata sulia isana toa na fanua nei iano. 27Kesi thaitoomana ne ṉata isada sulia ṉa Maka. 28Mania tha Jesus e soree isada, Lalae muka tafoa naa Kaluwane imole, muki bii thaitoomana na nau ku to bakua, ma muki thaitoomana lau boo na nau e ai kwasi ilia ta si i talaaku, talafana si do Maka nau e tooa isaku, ku sorea si do eki. 29Ma nia ne arasi nau mai ka ni isaku; ṉa Maka e ai si akwasi nau kwa to tee nau; uria na kwai ilia ṉado si do na kai lea iana uria. 30Si maṉa nia sorea si do eki, toa oro kera fitoona.

31Mania tha Jesus ka soree isana Ju eki na kera fitoona naa, Mada sa muka to ṉado i bae laku, kamulua toa nau kwai tole kamulua mamana boo; 32Ma muki thaitoomana mamana la, ma mamana la eri kai adea na muki tonee to. 33Kera luua, keka una eri, Kamilia kwalafa tha Aberahamo, me ai ta wane u si suuwai kamilia uria ra la: sui nifana ade lana oki sorea, Kera alu kamulua muki tonee to? 34Tha Jesus e luuda, ka una eri, Mamana, mamana, ku soree isamulua, Ni tei na kai abula taa bana, nia wane na kera suuwai nia ka tona ra ifana abula taa la. 35Ma wane na kera suuwai nia ka ra, sa ka to ṉado i biu ta wane e ai: kaluwane na kai to ṉado bana. 36Mania mada sa ṉa Kaluwane kai alu kamulua muki tonee to, kamulua muki tonee to mamana boo. 37Nau ku thaitoomana kamulua kwalafa tha Aberahamo; sui muki rofe uria thauṉi laku, uria na ruruumulua e fofonola, bae laku si kotho iei. 38Nau ku ṉata sulia si do ni nau ku rikidaki isana Maka nau: ma ni kamulua lau boo muka ilia si do na mulu roṉodaki ana maka kamulua. 39Kera luua, keka soree isana, Maka kamilia na tha Aberahamo. Tha Jesus ka soree isada, Mada sa ni kamulua baree wela tha Aberahamo, do muka ilia ra tha Aberahamo ki. 40Ma mulu rofe si maṉa eri uria thauṉi laku, wane na ku faaroṉo kamulua asi do mamana, na nau ku roṉoa atha God: tha Aberahamo e ai si ade una eri. 41Muka ilia si ra maka kamulua. Kera soree isana, Kesi kwalafi kamilia ana oe la; amilia tee Maka, tha God. 42Tha Jesus ka soree isada, Mada sa Maka kamulua na tha God, do muki liothau ani nau: uria nau ku lae mai ma ku ita mai atha God; ma nau e ai kwasi lae mai i talaaku, ni nia e arasi nau mai. 43Uria ta na musi thaitoomana ṉata laku? Uria na mulu dora ana roṉo lana bae laku. 44Kamulua wela maka kamulua na tha devil, ma si lio taa ki, do maka kamulua eri, muki thathamii ilia. Nia thauwane ita mai i thafali la, me ai si to ana mamana la, uria ne ai ta do ne mamana si ni ani nia. Si maṉa nia lole, nia ṉata asi do nia ki u boo: uria nia do na kai lole, ma maka ana lole la. 45Ma uria na nau ku ṉata mamana, musi fitooku. 46Ni tei iamulua kai faaseenoni iaku ana abula taa la? Mada sa ku ṉata mamana, uria ta na musi fitooku? 47Wane tha God kai roṉoa bae lana tha God: ma sulia si kula eri musi roṉoa, uria na kamulua do tha God e ai. 48Sui Ju ki kera luua, keka soree isana, Si do mamana na mili sorea, oe ṉa wane i Sameria, ma spirit taa ni ani oe? 49Tha Jesus e luuda, ka una eri, E ai ta spirit taa si ni iaku; ma nau ku fare baita ana Maka nau, ma ni kamulua muka fare faekwa iaku. 50Ma nau kwasi rofea inotoa nau i talaaku: ni nia to bana na kai rofea, ṉa wane ni kotu na kai ṉata neri. 51Mamana, mamana, ku soree isamulua, Mada sa ta wane kai ade sulia bae laku, nia sa ka fulatoona maea e ai. 52Mania Ju ki kera soree isana, Si maṉa eri mika bii thaitoomana na spirit taa ni ani oe neri. Tha Aberahamo e mae naa, bia porofeta ba ki; ma ni oe oki sorea, Mada sa ta wane kai ade sulia bae laku, nia sa ka thaitoomana maea e ai. 53Ni oe o inoto ka tatha ana maka kulu tha Aberahamo, na ne mae naa? ma porofeta ba ki kera mae lau boo: oki sorea oe ni tei? 54Tha Jesus e luuda, ka una eri, Mada sa kwa faainoto nau i talaaku, inotoa nau e ai si mamana: Maka nau ana na kai faainoto nau; nia na mulu alaṉia ana God kamulua; 55Ma mulu dora ani nia: ni nau ku thaitoomana; ma mada sa kwa sorea, E ai kwasi thaitoomana, nau kwai ’uri kamulua, wane kwai lole: sui nau ku thaitoomana boo, ma kwai ade sulia bae lana. 56Maka kamulua tha Aberahamo e seethathala faamau uria na toto kai rikia fa boṉi nau eri; sui nia rikia, ma ka lea iana. 57Mania Ju ki kera soree isana, Lima tafulu fa ṉali e ai u iamu, sui o rikia tha Aberahamo? 58Tha Jesus ka soree isada, Mamana, mamana, ku soree isamulua, Si maṉa na tha Aberahamo e ai si ni u bana, ni nau ku to bakua. 59Mania kera ra uria fau ki fasi keki uia ania: sui tha Jesus e thaufuni nia, ka kotho i maa faisia biu baita tha God, ka tatha i maalutada, ma ka lae nana.

Currently Selected:

Jone 8: MLU1949

Highlight

Copy