Jone 7
7
1Buriana si do eki tha Jesus e lae i Galili: uria na nia lalakwa lae i Judia, sulaania Ju ki kera rofea si ade la na keki ilia fasi keki thauṉi nia. 2Sui fafaṉa ba ana Ju ki, fafaṉa i la ooba ki, e kwaikaraṉi naa. 3Mania doorana kera kera soree isana. Oki lae kau, oko lae uri Judia, fasi toa oe noki toleda keki rikia lau boo ra oe ki noki ilia. 4Uria ne ai ta wane si ili thaufuni ata do, ma ka thathamia keki thaitoomana lalaa ani nia i talaana. Mado so ilia do nei ki, oki fatai oe isana toa na fanua. 5Uria na doorana kera mena e ai kesi fitoona. 6Mania tha Jesus ka soree isada, Si maṉa nau e ai si fula u mai; ma si maṉa kamulua molo ka kwaimaakwali ka toto bana. 7Fanua nei iano sa ka riki kamulua ka taa e ai; nau ana ka riki nau ka taa, uria na nau ku faamamanea si do nau ku thaitoomana sulia, na ra nia ki e taa. 8Kamulua muki tae isana fafaṉa: nau kwasi tae u isana fafaṉa eri; uria na si maṉa nau e ai si mamana u. 9E sorea si do eki isada e sui, ka to lau bana i Galili.
10Ma sui buriana na doorana kera kera tae naa isana fafaṉa eri, nia ka tae lau bokau, sui e ai si lae fatai, ma ’uria sa kai thaufuni. 11Mania Ju ki kera rofe uri nia isana fafaṉa, keka sorea, Nifei nia? 12Ma malului wane eki kera uubulu faamau suli nia: tei toa kera sorea, Nia wane kokoto; tei toa lau kera sorea, E ai lau; nia kai tole garo ana malului wane nei. 13Ma sui e ai ta wane si ṉata lalaa suli nia uria na kera mau ana Ju ki.
14Ma si maṉa na fa boṉi tolibobola ana fafaṉa eri e fula naa, tha Jesus e tae uri biu baita tha God, ka kwaifamanatai. 15Mania Ju ki kera kwele, keka una eri, Nifana ade lana wane nei ka thaitoomana inifita lana si do ki, si do ne ai si too uria? 16Tha Jesus e luuda, ka sorea, Kwaifamanataia nau do nau e ai, kwaifamanataia nia ne arasi nau mai. 17Mada sa ta wane e susuu uria ili lana si do ni nia e thathamia, nia kai thaitoomana kwaifamanataia eri, mada sa si do tha God neri, mado kwai ṉata bakua i talaaku. 18Wane na kai ṉata i talaana kai rofe uria faainoto lana i talaana: ma wane na kai rofe kai faainoto nia ne arasi nia mai, wane eri e mamana, me ai ta do kekeo si ni ani nia. 19Ta na sa tha Mosesi e falea ṉa lo ifamulua, me ai ta wane iamulua si ade sulia lo eri, mado? Uria ta na muki rofe uria thauṉi laku? 20Malului wane eki kera luua, keka una eri, Spirit taa ni ani oe: ni tei na kai rofe uria thauṉi lamu? 21Tha Jesus e luuda, ka soree isada, Nau ku ilia naa tee ra, ma kamulua sui muka kwele. 22Sulia si kula eri tha Mosesi e falea kwai kakali la iamulua (sui do tha Mosesi e ai, do maka nai nao ki); ma muka kwai kalia ta wane afa boṉi mamaloa. 23Mada sa ta wane keki kwai kakali ania afa boṉi mamaloa, fasi e ai kesi ade faisia lo tha Mosesi; rakemulua ka aṉofi nau, uria na ku faamaruki teefau ana wane afa boṉi mamaloa? 24Musi ṉata mala wane ni kotu sulia ta wane sulaania bana si do mulu rikia, muki ṉata mala wane ni kotu ne kokoto.
25Mania tei toa ana toa i Jerusalema kera sorea, Wane ba na kera rofe uria thauṉi lana e ai bana nania? 26Ma lio fasi, nia ṉata lalaa bana, me ai kesi sorea boo ta si isana. Sui toa gwauwai ki kera thaitoomana boo na Christ ba nania, mado ka ai? 27Sui kulu thaitoomana wane nei ifei ne maṉo mai iei: ma si maṉa na Christ ba kai fula, e ai ta imole si thaitoomana si kula na kai maṉo mai iei. 28Mania tha Jesus ka ’ai la biu baita tha God, ka kwaifamanatai, ka una eri, Mulu thaitoomaku, ma mulu thaitoomana lau boo si kula ni nau ku maṉo mai iei; ma nau kwasi lae mai i talaaku, nia ne arasi nau mai e mamana, nia na mulu dora ania. 29Ni nau ku thaitoomana bakua; sulaania ku ita mai ani nia, ma nia arasi nau mai. 30Mania kera rofe uria si ade la na keki ilia fasi keki rau nia: me ai ta wane si alua abana ani nia, uria na kadee maṉa nia e ai si fula u. 31Sui ana malului wane eki imole oro ki kera fitoona; ma keka sorea, Si maṉa na Christ ba kai fula mai, nia kai ilia bala si do ki kai oro ka tatha asi do eki na wane nei e ilia? 32Farisi ki kera roṉoa malului wane eki kera uubulutai nia; ma Farisi eki ma wane inoto ni foa ki kera arasia mai toa ni ilido ki sa keki rau nia. 33Mania tha Jesus e soree isada, Ta kasi maṉa faekwa u nau kwai to bi kamulua, sui nau kwai lae sani nia ne arasi nau mai. 34Kamulua do toto muki rofe uri nau, ma musi rofetooku: ma asi kula na nau kwai to iei, kamulua muka dora ana fula la iei. 35Mania Ju ki kera ṉata kwailiu uri kera, keka una eri, Ma ṉa wane nei kai lae urifei fasi kulu kusi rofetoona? kai lae isana toa na kera lae tataka i maalutana Jenetaele ki, kai kwaifamanatai isana Jenetaele ki? 36Si baea ta na nia e sorea, Kamulua do toto muki rofe uri nau, ma musi rofetooku: ma asi kula na nau kwai to iei, kamulua muka dora ana fula la iei?
37Ma afa boṉi iisi, fa boṉi baita ana fafaṉa eri, tha Jesus e takwe, ka ’ai, ka una eri, Mada sa ta wane lione lalaṉa, kai lae mai isaku, kai kuu ana. 38Wane na kai fitooku, talafana si do kekeda la abu ba e sorea, si kafo maruki ki kai igwa araara mai faisia rakena wane eri. 39Ma nia ṉata una eri sulia tha Spirit, na toa na kera fitoona toto keki ṉalia: uria na kesi falea u tha Spirit Abu; sulaania na tha Jesus kesi faainotoa u. 40Mania tei toa ana malului wane eki, kera roṉoa si baea eki, keka sorea, Porofeta ba mamana boo nai nia. 41Tei toa lau keka sorea, Christ ba nai nia. Sui tei toa lau kera sorea, Nea, ma Christ ba kai maṉo mai i Galili? 42Ta na sa kekeda la abu ba e sorea na Christ kai maṉo mai ana kwalafa tha Defeta, ma i Bethelihemo, toaa na tha Defeta e toto iei, mado? 43Mania malului wane eki thafali lana kera to ana ro si lio suli nia. 44Ma tei toa iada kera thathamia sa keka rau nia; sui e ai ta wane si alua abana ania.
45Mania toa ni ilido ki kera oli isana wane inoto ni foa ki ma Farisi ki; ma ni kera keka soree isada, Uria ta na musi tole nia mai? 46Toa ni ilido ki kera luuda, keka una eri, E ai ta wane si ṉata u una eri. 47Mania Farisi ki kera luuda, keka una eri, Kera talai garo ani kamulua lau boo? 48Ta wane ana toa gwauwai ki e fitoona, mado ta wane ana Farisi ki? 49Sui malului wane nei na kera dora ana ṉa lo kera alua taa la fafida. 50Tha Nikodimasi ka soree isada (nia ne fula isatha Jesus afa rodo na ba, na wane iada lau boo), 51Lo kia ka sorea si do na kai uria imole, mada se ai si roṉoa u inao ana wane eri talaania ma ka thaitoomana si do nia ilia? 52Kera luua, keka soree isana, Ma ni oe wane i Galili lau boo? Oko rofe, ma oki rikia ne ai ta porofeta si maṉo i Galili mai.
[ 53Ma kera sui boo keka lae uria biu kera ki:
Currently Selected:
Jone 7: MLU1949
Highlight
Share
Copy
Want to have your highlights saved across all your devices? Sign up or sign in
British and Foreign Bible Society 1949, 1951
