GENESIS 39

1Ma keka talaia tha Josefa ka sifo uri Ijifi; ma tha Botifa, ṉa wane ni ra tha Fero ne tatha inaona omea ni fono toi la kali nia, ṉa wane i Ijifi, ka usia mai i abana wane eki ana kwalafaa tha Isimela na kera talaia mai ka sifo uri fanua eri. 2Ma tha Jihova e to bia tha Josefa, ma mamanaa wane eri ka baita; ma nia ka to bana i maafera wane inoto nia na wane eri i Ijifi. 3Ma wane inoto nia eri e rikia na tha Jihova e to bi nia, ma tha Jihova e adea na si ra eki sui bana ne ilia ka mamana i abana. 4Ma tha Josefa e fulatoona si lio ni kwaiofei la i maana wane eri, ma ka ra ifana: ma wane eri e alu nia ka nanao ana maafera nia; ma si do ne rikidaki ka sui bana e takofalea i abana. 5Ma lalae mai, ita asi maṉa eri ne alu nia ka nanao i maafera nia, ma asi do ne rikidaki ka sui bana, tha Jihova ka alua lea la fafia maafera wane eri i Ijifi inunufatha Josefa; ma lea la tha Jihova e to fafia si do ne rikidaki ka sui bana, i maafera ma i la ra. 6Ma nia ka ekwatai nia si do nia ki sui boo i abana tha Josefa; ka dora ana atona bana ta si do ne rikia, talitoona bana si berede na nia kai ania. Ma tha Josefa riki lana ka lea, ma seena ka thathafaa. 7Ma lalae mai, buriana si ade la eki, maana kwaina wane inoto nia ka lio uria tha Josefa asi lio ni o’ea; ma nia ka una eri, Oko teo fasi isaku. 8Ma sui nia ka tofe, ka soree isana kwaina wane inoto nia, Rikia fasi, wane inoto nau ka dora asi do eki na ni isaku i maafera, me takofalea si do nia ka rikidaki ka sui bana i abaku; 9E a’i ta wane i maafera nei si baita si tatha ani nau; ma nia e a’i si lufia ta si do faisi nau, talifili oe boo, uria na kwaina na ni oe; mania nifana ade lana fasi kwa ilia si do nei ne taa ka tatha, kwa abula taa uria tha God? 10Ma lalae mai, si maṉa na kini eri kai ṉata uria tha Josefa sulia boṉi, ni nia e a’i si roṉoa, ka lalakwee teo isana, ka lalakwee to ofu bi nia. 11Ma lalae mai, ana tee fa boṉi afa boṉi eki, tha Josefa ka kotho i maafera fasi kai ra ana asi ra nia; me a’i ta wane ana toa i maafera eri si to iei i lala. 12Ma kini eri ka rau ana tooni nia, ka una eri, Oko teo fasi isaku: ma nia ka akwasia tooni nia eri i abana, ka thaka, ka lae i maa. 13Ma lalae mai, kini eri e rikia naa ne akwasia tooni nia i abana, me thaka i maa, 14Nia ka bii ’ai thatana wane eki ana maafera nia, ka ṉata uri kera, ka una eri, Rikia fasi, wane ba e talaia mai tee Hibaru isakulua kai malawela kulu neri; e kotho mai isaku sa kai teo ofu bi nau; ma sui nau kwa gagafu baita: 15Ma lalae mai, si maṉa ne roṉoa ’ai baita la na nau ku ’ai kau ania na ba, nia ka bii akwasia tooni nia isaku, ka thaka, ka lae i maa. 16Ma kini eri ka alua tooni nia eri ka to isana maasia wane inoto tha Josefa kai oli lau mai i maafera. 17Ma nia ka ṉata isana sulia si ṉataa ne una lokoo, ka una eri, Hibaru eri, na wane ni ra no talaia mai isamilia, e kotho mai isaku sa kai malaoe nau: 18Ma lalae mai, si maṉa ni nau ku ’ai kau ana ’ai baita la, e akwasia tooni nia isaku, ka thaka i maa. 19Ma lalae mai, si maṉa na wane inoto nia eri e roṉoa naa bae lana kwaina ne ṉata sulia isana, be una eri, Wane ni ra oe ba e abula uri nau asi abula la unei; nia ka bii rakeiri faamau. 20Ma wane inoto tha Josefa ka rau ani nia, ka alua i la lokafu, asi kula na kera kani fafia toa na ṉa kiṉa e suusida iei: ma nia ka to bana i la lokafu eri. 21Ma sui tha Jihova e to bia tha Josefa, ka tatakomi nia ana ade lea lana, ka adea na wane ne nanao ana lokafu eri ka riki nia ka lea. 22Ma wane eri ne nanao ana lokafu ka takofalea i abana tha Josefa toa eki sui bana na kera suusida i la lokafu eri; ma atona bana ta si do na keka ilia iei, ni nia ana ne ilia. 23Wane eri ne nanao ana lokafu ka a’i si lio uria atona bana ta si do na ni fara abana, uria na tha Jihova e to bi nia; ma si do ne ilidaki, tha Jihova e adea ka mamana.

Currently Selected:

GENESIS 39: MLU1949

Highlight

Copy