GENESIS 35

1Ma tha God ka soree isatha Jekofo, Tatae fasi, oko tae uri Bethele, oko to iei: oko thauwai nia fulii era ni foa la iei ifatha God ne fula fatai isamu na ba si maṉa ba no thaka faisia maana thoomu na tha Iso. 2Sui tha Jekofo ka soree isana toa na i maafera nia, ma isana toa eki sui bana na kera abetai nia, Alua fasi ithara god eeta eki na keka to imaalutamulua, muka faalu, muka tatalaa tooni kamulua ki: 3Kulu kau, kulu tae uri Bethele; ma ni nau kwai thauwai nia ta fulii era ni foa la iei ifatha God ne luua bae laku afa boṉi ku toto ana taa la na ba, me to bi nau sula tala nau ku lalae sulia. 4Ma keka falea ifatha Jekofo god eeta eki sui bana na kera ni abada, ma kokome eki na i aliṉada; ma tha Jekofo ka alu thaufuni asi do eki ifara ’ai ouka ne to karaṉia i Sekema. 5Ma kera lae nada: ma aanu la ita atha God ka to fafia toaa susu eki na ni kakali kera, ma kesi tari buriana kaluwane tha Jekofo ki. 6Mania tha Jekofo lalae ka fula i Lasa, ni nia bia toa eki sui bana na kera abetai nia. 7Ma nia ka thauwai nia fulii era ni foa la iei, ka alaṉia thatana fanua eri ana Ele‐bethele: uria na tha God e fula fatai isana i la fanua eri, si maṉa ba ne thaka faisia maana thoona. 8Ma sui ni Debora, na kini eri ne nanaia ni Ribeka, ka mae, ma keka alua ifara i Bethele i ’aena ouka: ma kera alaṉia thatana ’ai eri ana Alonobakuta.

9Ma tha God ka fula fatai si lau isatha Jekofo si maṉa ne fula mai faisia i Bedanerama, ka alua lea la fafi nia. 10Ma tha God ka soree isana, Thatamu na tha Jekofo: kesi alaṉia lau thatamu atha Jekofo; thatamu na tha Isirela: ma nia ka alaṉia thatana atha Isirela. 11Ma tha God ka una eri isana, Ni nau ṉa God Sukwai ka Tatha: kwalafamu keki oro faamau ka lae alaa; kulee toa ma aini kulee toa ki keki ita mai ani oe, ma kiṉa ki keki ita mai i matoṉamu; 12Ma fanua eri na nau ku falea naa ifatha Aberahamo ma tha Aesiki, kwai falea boo ifamu; ma ifana kwalafamu na keki to bada iburiamu kwai falea boo fanua eri. 13Ma tha God ka bii tae kau faisi nia asi kula ne ṉata bi nia iei. 14Ma tha Jekofo ka takwelaṉania tee beta asi kula eri ne ṉata bi nia iei, beta eri e thauwai nia ana gwa fau: ma nia ka kikia do ni foa la ifafona asi do ni kuu la, ka kikia lau boo ta si gwai ifafona. 15Ma tha Jekofo ka alaṉia thatana si kula eri na tha God e ṉata bi nia iei i Bethele.

16Ma keka lae nada faisia i Bethele; ma kasi kadee tala ni u bana fasi keki bii fula isana Efirata: ma ni Resela karaṉia kai thare‐wela, ma fiwela la ka baita fafi nia. 17Ma lalae mai, si maṉa na fiwela la eri e baita fafi nia, kini ne nanaia ka una eri isana, Osi mau; toto oki tharea lau boo kaluwane oe nei. 18Ma lalae mai si maṉa na maṉona karaṉia kai sui (uria ne mae neri), nia ka alaṉia thatana atha Benoni: maka nia molo ka alaṉia atha Benijamini. 19Ma ni Resela e mae, ma keka alua sula tala ne lae uri Efirata, uri Bethelehemo neri. 20Ma tha Jekofo ka takwelaṉania tee beta fafia kwaiṉeia kini eri: betana kwaiṉeia ni Resela neri na kai to bana ka fula itaraena.

21Ma tha Isirela ka lae nana, ka regwetaa biui‐maku nia asi kula ne tatha ana failaṉi eri i Ida. 22Ma lalae mai, si maṉa na tha Isirela ka to bana i fanua eri, tha Rubeni e lae nana ka teo isani Bila na ai maka nia: ma tha Isirela ka roṉoa. Ma kaluwane tha Jekofo ki tee akwala ma ro nonii wane: 23Kaluwane ni Lia ki; tha Rubeni, na kaluwane ulunao tha Jekofo, ma tha Simiona, ma tha Lifae, ma tha Juda, ma tha Isaka, ma tha Sebiulono: 24Kaluwane ni Resela ki; tha Josefa ma tha Benijamini. 25Ma kaluwane ni Bila ki, na kini ni ra fani Resela; tha Dana, ma tha Nafatalae: 26Ma kaluwane ni Silifa ki, na kini ni ra fani Lia; tha Gada, ma tha Asa: kaluwane tha Jekofo ki neri, na kera futa mai isana i Bedanerama. 27Ma tha Jekofo lalae ka fula isana maka nia na tha Aesiki i Mamari, isana toaa susu tha Aba, i Hefirono, fanua na tha Aberahamo ma tha Aesiki kero to ni laea iei. 28Ma fa boṉi eki ana to lana tha Aesiki tee taleṉee fa ṉali ma kwalu tafulu fa ṉali. 29Ma tha Aesiki ka luka ana maṉona, ka mae, sui ka tatha, ka to ofu bia toa nia ki; nia e arai naa, ma fa boṉi nia ki e oro ka tatha: ma tha Iso ma tha Jekofo, ro kaluwane nia ki, keko alu nia.

Currently Selected:

GENESIS 35: MLU1949

Highlight

Copy