Si do Aposela ki kera ilidaki 1

1Ku keda buka totonao ba, Thiofilasi, sulia thafali lana si do eki sui boo na tha Jesus ka ilia ma ka tooa, 2Ka fula afa boṉi eri na kera tae fafi nia, buriana ne falea si ṉata fifi nia atha Spirit Abu isana toa eki ne filida ana aposela ki: 3Toa ne fatai nia lau boo isada ne maruki buriana ne toto ana seefia na ba, asi do oro ne fatai nia mamana lana, uria ne fafatai nia isada sulia fai tafulu fa boṉi, ma ka ṉata sulia si do sulia tooa tha God ki: 4Ma si maṉa ne to ofu bida, e lufida kesi lae faisia Jerusalema, keka maakwalia alaṉaia ṉa Maka, Nia (bae lana neri) na nau ku faaroṉo kamulua ania: 5Uria na tha Jone e babataesi boo ana kafo; ma ni kamulua ṉadee fa boṉi e sui keki bii babataesi kamulua atha Spirit Abu.

6Mania si maṉa na kera figu mai, kera soetoona, keka una eri, Lord, oki oli fafia ṉa tooa isana Isirela asi maṉa eri? 7Ma nia soree isada, Thaitoomana lana maalutana si maṉa ba ki mado si kada na do eki kai fula mai, si do fani kamulua e ai, si do ṉa Maka e alua fasi kai gwauwai ani nia. 8Ma lalae tha Spirit Abu e fula fafi kamulua, muki bii ṉalia sukwaia: ma si do mulu thaitoomana suli nau muki faamamanea i Jerusalema, ma i fanua i Judia ka sui bana ma i Sameria, ma ana si kula ne tau faamau mena i fanua nei iano. 9Ma buriana ne sorea si do eki e sui, si maṉa na toa eki keki bubu, kera tae fafi nia; ma si datha ka datha faisia, e ai kesi riki nia lau. 10Ma si maṉa na kera bubu tete uria thalo lo si maṉa nia kai lae, rikia fasi, ro nonii wane kero takwe isada fafia tooni kwakwaoa ki; 11Na keko ṉata lau bomai una eri, Kamulua wane i Galili ki, uria ta na muki takwe, muki lio uria thalo lo? Jesus nai boo, na kera tae fafi nia faisi kamulua uri thalo lo, kai lae mai talafana na mulu riki nia ne lae uri thalo.

12Sui kera oli kau uri Jerusalema faisia gwa tolo eri na kera alaṉia ani Olifeta, si kula na ni karaṉia Jerusalema, ’uria lae la na kera alamatania imole kai lae sulia afa boṉi mamaloa. 13Ma lalae kera fula naa, kera tae uria kadee biu laṉi eri, si kula na kera to mai iei; tha Pita bia tha Jemesi lau boo ma tha Jone ma tha Adaru, tha Filifi ma tha Tomasi, tha Batholomiu ma tha Mathiu, tha Jemesi kaluwane tha Alafeasi, ma tha Saimona wane Selota, ma tha Judasi doorana tha Jemesi. 14Wane eki sui boo kera seemabe ṉado ana tee si lio ana foa la ma ṉata fifi la ana foa la, bia kini eki, ma ni Meri thainana tha Jesus, ma doorana tha Jesus ki.

15Ma afa boṉi eki tha Pita e takwe ia i maalutana baree wai doorana eki, ka sorea (ma malului wane kera figu mai, fuliṉana tee taleṉee imole ma ro akwala). 16Doora kera, kekeda la abu eri kera faamamanea e ai si ei boo, si do na tha Spirit Abu e sorea totonao ana fokona tha Defeta sulia tha Judasi, wane ne fatai nia tala isana toa na kera raua tha Jesus. 17Sulaania kera teemai nia bi kamilia, ma kera ukalia ta si asi ra eri ifana. 18(Ma wane eri e usia ta bali gano ana foli lana abula lana ne ai si kokoto; me asi nia ana gwauna, matoṉana ka busu, ma ogana sui bana e lua teefau i maa. 19Ma toa nai Jerusalema ki sui bana kera roṉoa si do eri; adedea keka alaṉia bali gano eri ana ṉata lada ana Akeledama, ma toolaṉai lana si ṉata eri, Si bali gano ana abu.) 20Uria na kera keda i la buka ana Ṉu ki,

Keki faagwaua toaa nia,

Keki lufia ta wane si to iei:

ma,

Ta wane eeta lau kai ṉalia si ra ne nanao ania.

21Mania ana wane eki na kera aabetai kamilia ta si maṉa si ei si kada na tha Lord Jesus e kotho olili i maalutamilia, 22Ka thafali mai ana babataesi la tha Jone, ka fula afa boṉi eri na kera tae fafi nia faisi kamilia, ana wane eki tee wane kai faamamanea ofu bi kamilia e ai si ei boo si do ne thaitoomana sulia tatae lana faisia maea. 23Ma kera alua ro nonii wane keko takwe, tha Josefa na kera alaṉia atha Basabasi, na ruana thatana tha Jasitasi, ma tha Mathiasi. 24Ma kera foa, keka sorea, Oe, Lord, no thaitoomana rurui wane ka sui bana, oki fatai nia ni tei ana ro wane nai ki no fili nia, 25Fasi kai tae fulii atha Judasi ana ra eri ma ra aposela, si do ne asi nia faisia, fasi kai lae uria si kula ne talaana. 26Ma kera ilalatoona ro wane eki; ma ilala e toea tha Mathiasi; ma kera teemai nia wane eri bia akwala ma tee aposela ki.

Currently Selected:

Si do Aposela ki kera ilidaki 1: MLU1949

Highlight

Copy