Mark 3

Sema Dahin Otik I Diwa Tho

(Matthew 12:9-14; Luke 6:6-11)

1Idi sa-kin akow, kimowan mowan si Jesus chiwa synagog et simekep chiwan. 2Gwariy dahid man a otik i diwa tho. Gwara ngo pay iriy toon chiyan bantayes Jesus say amtaen cha no pemapteng to ma too no timpo na Sabbath. Tep man-aanap ira na kagol a pengicharoman ched si-katho. 3Kigwan Jesus chiwa dahin otik i diwa tho i “Gomalid ja sangoanan mi.” 4Et kigwan tod ma echom i “Nengoy iyaypalobos chiwa dinteg tayon pesing tayo no timpo na Sabbath? Mengemag na mapteng ono ngaaw? Mena-cha na too ono memono na too?” Nem imeke-eket ira.

5Kebonget si Jesus iy towan si-nenga ira, nem kaengos ngo tep aingel ira. Et kigwan tod ma dahi i “Iokjad moy diwam.” In-okjad toy diwa tho et mimapteng men kosto. 6Idi iyakcheng ma iwan, iyamtik ira ma Pharisees et engaspol iren chakos na olop Herod say tabtabalen cha no nengo emoy pesing chen memonon Jesus.

Iyonod Na Chakel A Toos Jesus

7Et kimowan si Jesus tan disipolos tod ma kilig na baybay na Galilee, et iyonod na chakel a toon edafo di ired Galilee, Judea, 8Jerusalem, sahop na Idumea, piig na kolos a Jordan, tan cha Tyre tan Sidon tan doga-dogad a sahop cha. Kimowan ira ma tood kad-an Jesus tep chimag chiy emiin a inpasi-pasing to. 9Kagol a chakel a pasiyay too, kigwan Jesus cha disipolos to i mengeda ira na bangka say ontokkong chiwan, et say nat setseten na too. 10Tep chakel i inpamapteng to, isonga sema iren mansekit, ebo-bo-ngol ired si-katho say kapkafen cha. 11Sema ngo iren toon iyangka-janan na dimonyos, idi mita res Jesus, naiyantalimohod ired sangoanan to, et sema iren dimonyos, nainpakeljaw cha iren nakigwan cha i “Si-kam i Anak Afo Chiyos!” 12Nem tiyengteng iren Jesus i eg cha ipaamta no siyes si-katho.

Emispis Si Jesus Na Sawal Na Chegwen Apostolis

(Matthew 10:1-4; Luke 6:12-16)

13Et timiyed si Jesus cha chontog a tiya-gway toy toon piyan to et ekiolop ira. 14Et emispis si Jesus na sawal na chegwed si-karen ngiyaranan to na apostolis. Kigwan to i “Pinispis tahejo tep say mekiolo-olop kayod si-kak. Ito-no tahejo pay a mankasaba 15tan i-kan koy karebengan jon menagchag na dimonyos.”

16Sema iren pinispis Jesus, si Simon a ngiyaranan to pay na Peter, 17si James ni John a san-ahin anak iren Zebedee a ngiyaranan Jesus na Boanerges a sema banag to, anak ira na kirol, 18si Andrew, si Philip, si Bartholomew, si Matthew, si Thomas, si James a anak Alphaeus, si Thaddaeus, si Simon a iyanngaran na Zealot tep intakchel toy ili tho, 19tan si Judas Iscariot a enraidor Jesus.

Si Jesus Tan Si Beelzebul

(Matthew 12:22-32; Luke 11:14-23; 12:10)

20Et bimetik ires Jesus. Gwara mowan iriy chakel a tothoon esa-sa-nop alid kad-an to, isonga nagwariy pesing iren Jesus a mengan. 21Idi inki-ngelan ira na bonat Jesus i ima-imag to, kimowan ired kad-an to say odofen cha tep gwariy echom a naengowan i etoneng.

22Gwara ngo iriy mamaistoro na dinteg a edafod Jerusalem a naengowan i “Si Beelzebul a afo na dimonyos, iyay-ejan cha Jesus. #3:22 Si Beelzebul i sa-kin ngaran Satanas. Si-kathoy naengi-kan na panakabalin Jesus a menagchag na dimonyos.”

23Isonga, tiya-gway iren Jesus, et engiarig a kigwan to i “Ngoy pesing Satanas a menagchag na angel to? 24No manbabakal i tood ili, mechechal iwa ili. 25Inges to ngod pamilja. No manbabakal ira, mechechal ira. 26Inges to ngod Satanas. No towan chagchaga iriy echom ton dimonyos, say piyan ton a-seden, towan bakala ira, et sema pantorayan to, nat onbayag, no diket mepokaw.

27“Si Satanas, inges toy mahedsang a toon naiyanbantay na baliy to. Nagwariy mahaskep cha baliy ton mengibot na kameng to, kampet bedoren cha nin. Et mebedin men ibetik chiy kameng to.

28“Sejay a konen kod si-kayo, podnon emiin a basol na too tan ngaaw a ese-esel cha maypangkep na echom cha, mebedin a mepekawanan. 29Nem sema ngon toon mengowan na ngaaw maypangkep na Ispirito Santo, eg mepeka-pekawanan tep basol to man na ingked ingka.” 30Kigwan Jesus iwan tep nadiyamsis iren ma mamaistoro na dinteg i Ispirito Santo nonta kigwan cha i “Si Jesus, iya-janan na dimonyo.”

Si Inen Jesus Tan Sema Iren Aahi Thon Daleki

(Matthew 12:46-50; Luke 8:19-21)

31Et si inen Jesus tan sema iren aahi thon daleki, mimothok ired ma kad-an to. Imakgwat ired awas et inpata-gway cha. 32Sema iren toon ketinokkong cha dikmot Jesus, kigwan cha i “Igwa ires inam tan aahim cha awas a chiyan ipata-gway ka kono.”

33Et kigwan Jesus i “Ahow, nem igwa ngo iriy echom a kowan ibilang a inak tan aahik.” 34Idi towan si-nenga ira ma ketinokkong cha dikmot to, kigwan to i “Sejay iriy inak tan aahik 35tep sema iren naengamag na piyan Afo Chiyos, si-kariy naiyaybilang a inak tan aahik.”

Currently Selected:

Mark 3: KAR

Highlight

Copy