Mark 2

Inpamapteng Jesus I Dahin Nat Mahakiykiy

(Matthew 9:1-8; Luke 5:17-26)

1Idi epalabas miy piyen akow, imolis Jesus cha Capernaum et echamag i gwared baliy to. 2Et chakel miy toon esa-sa-nop chiwan, et nagwariy gwayed sekep, angken chiwa bo-dayan. Idi mankaskasabes Jesus, 3gwariy mansekit a eg mahakiykiy a biyangkil ali na epat a too. 4Nem nat mebedin a iesop ched kad-an Jesus tep chakel i too. Isonga, inkayang ched bobongan, et gwini-gwian chiy bobongan a petek Jesus. Et insa-kod cha ma kamen a imoligan niwa mansekit. 5Idi iyamtaan Jesus i banay i pamati red si-katho, kigwan tod ma mansekit i “Anak ko, epakawanan i basol mo.”

6Gwara iriy echom a mamaistoro na dinteg a ketinokkong chiwan. Idi inki-ngelan chiy kigwan Jesus, gwared nemnem cha i 7“Apay nga seman i towan kona? Towan iinges i angel tod Afo Chiyos. Tep nagwariy mebedin a memekawan na basol, malaksid si Afo Chiyos bengat.”

8Nem si Jesus, amta thon chakos i gwared nemnem chen kigwan to i “Niyana setan i jowan nemnemnema? 9Konen jo emo i mas inam-ay i kekegwan tod ja mansekit i ‘Epakawanan i basol mo’ iy ‘Bangon ka, alam itha kamen mo, et pan-ekad ka.’ 10Nem konen ko ma edigat say amtaen jo i si-kak a Anak na Too, gwariy karebengan kod dobong a memekawan na basol.” 11Et kigwan Jesus med ma mansekit i “Konen kod si-kam i ‘Bangon ka, alam itha kamen mo, et betik ka.’ ” 12Et sema wen mansekit, bimangon, ida thon chakos i kamen to, et bimetik iy kesini-neng iren emiin. Et sema emiin a toon gwared man, iyasdaaw ira tan chijaw ches Afo Chiyos a kigwan cha i “Ara! Nagwariy sini-si-neng tayon inges niyay!”

Pinispis Jesus Si Levi A Iyanngaran Pay Na Matthew

(Matthew 9:9-13; Luke 5:27-32)

13Kimowan mowan si Jesus cha kilig niwa baybay. Esa-sa-nop i chakel a tood kad-an to et intoroan to ira. 14Idi iyakcheng a imekal mes Jesus chiwan, gwariy mita thon dahin iyanngaran na Levi a anak Alphaeus a mantoktokkong chiwed opisina thon naeningilan to na binis. Kigwan Jesus i “Gwalid jay, kay-olop ked si-kak.” Et imakgwat mes Levi a ekiolop.

15Idi eng-engkay a mankakakan ires Jesus cha baliy Levi, sema iren chakel a toon para singil na binis tan mabesol kono, ekidihob ired Jesus tan disipolos to. Tep gwariy chakel a naekiolop cha Jesus. 16Sema iren echom a mamaistoro na dinteg a Pharisees, #2:16 Sema iren Pharisees tan Sadducees, chegwen gropo na Hodjos a iyanpan-achal. Sema iren Sadducees, naiyonoran chiy toro-toro bengat a gwared dimen dibchon insolat Moses (Genesis, Exodus, Leviticus, Numbers, tan Deuteronomy). Sema iren Pharisees, naiyonoran chiy toro-toron iyaysolat ired ma dibcho, nem naiyonoran cha ngoy toro-toron in-elbat iren ma afo-afo ra la maypangkep na mapteng a panbiyag. Maypangkep na napiyati iren ma Hodjos, napiyati na Pharisees i manpawil i iyangketiy, nem enchiy Sadducees. Napiyati ngo na Pharisees i no metiy miy too, kongkonaan Afo Chiyos no napiyatin ma tooy bili-bilin to, tan chosaen Afo Chiyos no nat napiyati tho ma bili-bilin to. Nem nat napiyati iren ma Sadducees iwan. Tan napiyati ngo iren ma Pharisees i gwares Satanas, anghilis, dimonyos, tan ispiritos, nem enchiy Sadducees. idi mita res Jesus a ekidihob ired ma tothoo, kigwan ched disipolos to i “Niyana naekidihob si Jesus ired ma toon para singil na binis tan sema iren mabesol?”

17Idi inki-ngelan Jesus i kigwan cha, insongbat ton engiarig i “Sema mahasafol na doktor, nat sema iren mahedsang, no diket sema iren mansekit. Ekak ali kimowan say mena-gwayak na maronong a too, no diket sema iren mabesol.”

Sema Maypangkep Na Ayonar

(Matthew 9:14-15; Luke 5:33-35)

18Nonta sa-kin akow, sema iren disipolos John a Naemonjag tan sema ngo iren disipolos na Pharisees, man-aayonar ira. Gwariy echom a toon kimowan ali ched kad-an Jesus, et inbagaan cha i “Sema disipolos iren John a Naemonjag tan disipolos na Pharisees, naiyan-ayonar ira no timpo tho, nem apay nga sema disipolos mo ket, eg ira naiyan-ayonar?”

19Simongbat si Jesus cha si-karen engiarig iren ma disipolos tod tothoon mekikasal. Kigwan to i “Sema iren toon mekikasal, man-ayonar ira aya iy gwara pay cha si-kariy dahin engimbaliy? Enchi. Basta gwara pay cha si-kara ma dahin engimbaliy, nat mebedin a man-ayonar ira. 20Nem onmothok aliy timpo no si-kak a inges to ma dahin engimbaliy, a-kalen chaak ired ma disipolos ko, et si-katho diy timpon pan-ayonar cha.”

Sema Maypangkep Na Badon Intoron Jesus

(Matthew 9:16-17; Luke 5:36-39)

21Gwara mowan i sa-kin arig a kigwan Jesus i “Nagwariy mengitahap na badon dofot cha bakjot. Tep no a-magen to man, onkesen i badon dofot, et sema bakjot a iyaytahapan to, mema-men mebi-nik. 22Tan nagwara ngo met pay i mengi-jan na tafiy cha chaan a kathat a ejanan. #2:22 Sema naiyosal na Hodjos a ejanan a para cha tafiy, ejanan a aamag na bedat na kanching. Tep no a-magen to man, ma-tengan iwa tafiy a onpekis iwa ejanan to. Et onkawas iwa tafiy tan mechechal ngo ma ejanan to. Sema tafiy, may-ejan chiwa badon kathat a ejanan.”

Sema Maypangkep Na Sabbath

(Matthew 12:1-8; Luke 6:1-5)

23Nonta sa-kin timpo na Sabbath, man-aahad ires Jesus cha payow a etaneman na wheat. Sema iren disipolos to, emekpek ira na dawes ton kiyothim cha say kakanen cha. 24Gwara ngo iriy Pharisees chiwan a engowan cha Jesus i “Matham, apay nga nat niyanpatia iren ma disipolos moy dinteg tayon Hodjos a iyayparit i pan-ani na timpo na Sabbath?”

25Insongbat Jesus i “Sigoradon bisa yo ma inpasing David nonta aofa iren ma echom to. 26Nontan a timpon si Abiathar i kahejangan a pari, simekep si David chiwa baliy Afo Chiyos, et ida tho ma tinapay a iyaytangdal cha Afo Chiyos a iyaypalobos cha dinteg i papari bengat i mengan niwan. Nem kiyakan ngorechan David et in-i-kanan to ngoy echom to.”

27Et kigwan Jesus i “Nat piyarsowen Afo Chiyos i too para cha Sabbath, no diket indasin toy Sabbath para cha too. 28Isonga, si-kak a Anak na Too, gwariy karebengan kon mengipalobos na ma-mag no timpo na Sabbath.”

Currently Selected:

Mark 2: KAR

Highlight

Copy