Mark 13

Sema Iren Digat A Onmothok No Sa-ki Din Akow

(Matthew 24:1-14; Luke 21:5-19)

1Idi bimo-day si Jesus chiwa timplo, gwariy sa-kin disipolos ton engowan i “Maistoro, matham i babenay a bathon iyosal chen engitgwen niya timplo tan mamapteng a bali-baliy a iyandikmot chiyay.”

2Kigwan men Jesus i “Jowan si-nenga ira jay a babenay a baliy? No sa-ki din akow, mesidak ira ja batho ra. Nagwariy angken sa-kin bathon on-eket cha kawad-an to.”

3Et idi mantoktokkong si Jesus cha Chontog na Olivas a towan sangoay timplo, si ira Peter, James, John, tan si Andrew, kimowan ired kad-an to a si-kara bengat, et kigwan cha i 4“Enti, igwanggwang mod si-kawi no empiyan aliy kepesamak niwan. Nengo pay i sinjal a chanchanin mepesamak ira man?”

5Kigwan Jesus i “Pantanchaan kayo, nahol ni mesaol kayo. 6Chakel aliy toon onkowan a mengosal na ngaran kon mengowan i ‘Si-kak i Cristo,’ et chakel i saolen cha. 7Tan no iki-ngelan jo pay i maypangkep na kobat cha iyay-esop a ili tan kobat cha aragwin ili, enog i chanag. Tep mesepol a mepesamak ira man, nem nat seman nin i pantepos na dobong. 8Tep sa-kin ili, kobathen toy sa-kin ili, tan sa-ki ngon gobirno, kobathen toy sa-kin gobirno. Gwara di pay iriy jegjeg cha chakel a dogad tan gwara di pay iriy bithil. Nem emiin ira man a mepesamak, singen inges toy pilmiron sahit na pan-enak na bii.

9“Nem si-kayo, pantanchaan kayo tep iawat cha kayod gwariy karebengan chen becha-bechasen cha kayod synagog. Icharom cha kayod sangoanan na gogobirnador tan aari tep naemati kayod si-kak. Et gwariy gwaya yon mengigwanggwanggwang niwa mapteng a chamag cha si-kara. 10Sema mapteng a chamag, mesepol a maykaskasaba nin cha emiin a ili asan ma onmothok aliy pantepos na dobong. 11Nem no chedmethen cha kayo et bistigalen cha kayo, enog i chanag maypangkep na konen jo tep no seman alin timpo, maypaamted si-kayo ma konen jo. Tep sema Ispirito Santo, si-kathoy kedepoan na konen jo, nat si-kayo.

12“Et no seman ma din timpo, gwara wa di iriy menraidor na ahi ra say bonoen cha ira. Inges to ngo ired awecha. Traidoren chiy anak cha say bonoen cha ira. Kontraen ngo ira na aanak iriy parintis cha et pebono ra ira. 13Owesen cha kayo na emiin a too tep naemati kayod si-kak. Nem sema memasig a memati ingkathod kekcheng na diga-digat to, maysalakan.”

Sema Ensekig A Oncharal

(Matthew 24:15-28; Luke 21:20-24)

14Et intoloy Jesus a engowan i “No sa-ki din akow, gwariy ensekig a oncharal a on-akgwat chiwa dogad a nagwariy karebengan to. #13:14 Daniel 9:27, 11:31, 12:11 (Sema toon memesen jay, mesepol a egwathan to.) No metaen jo man, sema iren gwared Judea, mesepol a bebtihen chiy chonchontog. 15Sema toon gwared bo-dayan na baliy to, mesepol a eg onsekep cha baliy ton mengeda na kokowa tho, nahol ni metaktak. 16Sema ngon toon gwared payow, mesepol a nat onkowan cha baliy ton mengeda na ta-kep na baro tho. 17No sema timpon kepesamak niwan, kakaasi iriy iyangkebchel tan sema iren gwariy anak chen mansososo! 18Pankararag kayo i eg mepesamak ira man no timpo na siteg-inan. 19Tep sema timpo na digat, nagwariy inges niwan manipod nonta ingkaparsowa na dobong ingkathod niman. Et nagwara ngoy inges niwan a mepesa-pesamak mowan ali. 20Isonga, niyemnem Afo Chiyos i kedpengen toy timpo na pandigat tep no eg to wa a-magen iwan, nagwariy mebay-anan a sibibiyag. Nem kiyedpeng to ngarod iwa timpo say nat metiy ira ma too thon pinispis to.

21“No seman alin timpo, no gwariy mengowan cha si-kayo i ‘Matha yo kechi, ajay i Cristo!’ ono ‘Matha yo, aman chiwa a!’ enog i piyati. 22Tep gwariy mansao-saol a toon manparang a mengowan i si-kara konoy Cristo tan profita kono. Mengemag ira na kaskasdaaw a sinjal tan milagro say no mebedin, saolen chiy angken toon pinispis Afo Chiyos. 23Isonga, pantanchaan kayo tep kowan banchaani kayo wa niman say amtaen jon emiin ira man a mepesamak ali.”

On-oli Diy Anak Na Tood Jay

(Matthew 24:29-31; Luke 21:25-28)

24“No mekcheng ma iwan a timpo na pandigat, mebolinget miy akow tan eg onnihal i bolan. 25Ma-kas ngo iriy pasingsing, tan emiin a gwared iyaykayang, onki-gwed. 26Et si-kak a Anak na Too, metaen chaak a mankokowanak alin edikmothan na kolpot. Mahedsang a pasiyay panakabalin ko tan mandingsiak ali na kinachiyos ko. 27Et ito-nok ali chiy anghilis cha intiron dobong say sa-nofen chiy took a pinispis kod emiin a soli na dobong.

Sema Maachal Cha Kejow A Fig

(Matthew 24:32-35; Luke 21:29-33)

28“Nemnem joy kejow a fig. Gwariy maachal chiwan. Apaman a man-green a onjep-es i panga-panga tho et ichogi thon manbolong, amta yo i chanchani wiy tiya-kow. 29Inges to ngo man no metaen jon emangkepasamak a emiin ira man a kigwa-kigwan kod si-kayo. Et amtaen jo wa i chanchaniy timpo na iolik alid jay. 30Sejay a konen kod si-kayo, podnon gwared jay i echom a toon sibibiyag pay laeng no mepesamak a emiin ira man. 31Sema gwared iyaykayang tan chiya dobong, mepokaw, nem sema ese-esel ko, eg mepoka-pokaw.”

Nagwariy Mahaamta No Empiyan Aliy Ioli Na Anak Na Too

(Matthew 24:36-44)

32Intoloy Jesus a engowan i “Nagwariy mahaamta na oras tan akow na iolik ali. Angken sema iren anghilis cha dangit tan si-kak a Anak Afo Chiyos, eg mi amta. Si Afo Chiyos a Awa bengat i mahaamta. 33Bantayi jo ngarod! Pansagana kayo na olay tep eg jo amtiy timpo na kepesamak to. 34Inges toy dahin mansaganen manbiyakid aragwin dogad. Ipiyal toy baliy to ired bagaen to, et i-kan toy koston obdaen na sa-ki tan sa-ki. Bidinen to pay i kowadjen nat onjo-kow. 35Si-kak, inges toak niwa mahabaliy tep eg jo amta no empiyan aliy iolik, no ma-chem, kawa na dagwi, sikakaokan, ono kagwis. Isonga, pansagana kayo, 36nahol ni no bigla din onkowanak ali, sebien tahejon manjo-jo-kow. 37Sejay a konen kod si-kayo, konen kod emiin a toon ‘Pansagana kayo!’ ”

Currently Selected:

Mark 13: KAR

Highlight

Copy