Popular Bible Verses from Mark 13

Share

Owesen cha kayo na emiin a too tep naemati kayod si-kak. Nem sema memasig a memati ingkathod kekcheng na diga-digat to, maysalakan.”

Bantayi jo ngarod! Pansagana kayo na olay tep eg jo amtiy timpo na kepesamak to.

Nem no chedmethen cha kayo et bistigalen cha kayo, enog i chanag maypangkep na konen jo tep no seman alin timpo, maypaamted si-kayo ma konen jo. Tep sema Ispirito Santo, si-kathoy kedepoan na konen jo, nat si-kayo.

Sema gwared iyaykayang tan chiya dobong, mepokaw, nem sema ese-esel ko, eg mepoka-pokaw.”

Intoloy Jesus a engowan i “Nagwariy mahaamta na oras tan akow na iolik ali. Angken sema iren anghilis cha dangit tan si-kak a Anak Afo Chiyos, eg mi amta. Si Afo Chiyos a Awa bengat i mahaamta.

Tan no iki-ngelan jo pay i maypangkep na kobat cha iyay-esop a ili tan kobat cha aragwin ili, enog i chanag. Tep mesepol a mepesamak ira man, nem nat seman nin i pantepos na dobong.

Si-kak, inges toak niwa mahabaliy tep eg jo amta no empiyan aliy iolik, no ma-chem, kawa na dagwi, sikakaokan, ono kagwis. Isonga, pansagana kayo, nahol ni no bigla din onkowanak ali, sebien tahejon manjo-jo-kow. Sejay a konen kod si-kayo, konen kod emiin a toon ‘Pansagana kayo!’ ”

Tep sa-kin ili, kobathen toy sa-kin ili, tan sa-ki ngon gobirno, kobathen toy sa-kin gobirno. Gwara di pay iriy jegjeg cha chakel a dogad tan gwara di pay iriy bithil. Nem emiin ira man a mepesamak, singen inges toy pilmiron sahit na pan-enak na bii.

Sema mapteng a chamag, mesepol a maykaskasaba nin cha emiin a ili asan ma onmothok aliy pantepos na dobong.

Chakel aliy toon onkowan a mengosal na ngaran kon mengowan i ‘Si-kak i Cristo,’ et chakel i saolen cha.

“Nem si-kayo, pantanchaan kayo tep iawat cha kayod gwariy karebengan chen becha-bechasen cha kayod synagog. Icharom cha kayod sangoanan na gogobirnador tan aari tep naemati kayod si-kak. Et gwariy gwaya yon mengigwanggwanggwang niwa mapteng a chamag cha si-kara.

Tep gwariy mansao-saol a toon manparang a mengowan i si-kara konoy Cristo tan profita kono. Mengemag ira na kaskasdaaw a sinjal tan milagro say no mebedin, saolen chiy angken toon pinispis Afo Chiyos.

“No mekcheng ma iwan a timpo na pandigat, mebolinget miy akow tan eg onnihal i bolan. Ma-kas ngo iriy pasingsing, tan emiin a gwared iyaykayang, onki-gwed.