Luke 21

Sema In-i-kan Na Biin Ebalod Afo Chiyos

(Mark 12:41-44)

1Et timangkak si Jesus et mita tho iriy babaknang a tothoon man-eejan na pilak ched ma ejanan na pilak a para cha timplo. 2Gwariy mita ngon Jesus a ebitheg a biin ebalon engi-jan na chegwen sintimos bengat. 3Et kigwan Jesus i “Sejay a konen kod si-kayo, podnon sema ebalon ebitheg, esolok i in-ejan to iy say sema iren emiin a echom. 4Tep sema iren echom, in-i-kan chiy sobda na kinabaknang cha iy say sema ebalo, angken nagwariy kebedinan to, in-i-kan ton emiin i gwared si-kathon panbiyagan to.”

Sema Pesing A Mengamta A Chanchanin Onmothok I Kaonoran A Akow

(Matthew 24:1-14; Mark 13:1-13)

5Sema iren echom a disipolos Jesus, chiyan tabtabaliy maypangkep na kamapteng na timplo tep aamag na bathon mangkamapteng tan aartian na mamapteng a rigalon iyaytangdal cha Afo Chiyos. Et kigwan Jesus i 6“Podno tan, nem seja iren jowan si-nenga, onmothok i akow no mesidak ira ja batho et nagwariy angken sa-kin bathon on-eket cha kawad-an to.”

7Et inbaga iren ma disipolos i “Maistoro, empiyan aliy kepesamak niwan? Nengo pay i sinjal a chanchanin mepesamak iwan?” 8Insongbat Jesus i “Pantanchaan kayo, nahol ni mesaol kayo. Tep chakel aliy toon onkowan a mengosal na ngaran kon mengowan i ‘Si-kak i Cristo!’ tan ‘Chanchaniy imothok na kaonoran a akow!’ Nem mesepol a eg kayo mekika-chom cha si-kara. 9Tan no iki-ngelan jo pay i maypangkep na kobat tan kolo, enog i tahot. Tep mesepol nin a mepesamak ira man, nem sema pantepos na dobong, nat onmothok alin chakos.”

10Et kigwan Jesus mowan cha si-kara i “Sa-kin ili, kobathen toy sa-kin ili, tan sa-ki ngon gobirno, kobathen toy sa-kin gobirno. 11Gwara di pay iriy mahedsang a jegjeg, tan gwara ngo di iriy bithil tan palado din sahit cha chakel a dogad. Tan gwara ngo pay ali iriy emanekot tan kaskasdaaw a sinjal a mesi-neng cha iyaykayang. 12Nem sakbay a mepesamak a emiin ira man, chedmethen cha kayo tan pedigathan cha kayo. Ikowan cha kayod synagog cha say kowisen cha kayo et ikalebos cha kayo. Icharom cha kayod sangoanan na aari tan gogobirnador tep naemati kayod si-kak. 13Et seman i timpon mengigwanggwanggwang kayo niwa mapteng a chamag cha si-kara. 14Isigorado yo i nat isagana yoy konen jo asan cha kayo salodsoren. 15Tep i-kanan tahejo na daing say amtaen joy konen jo. Et sema iren naengontred si-kayo, nagwared si-kariy mahasongbat cha si-kayo tan nagwara ngod si-kariy mahaagwak cha si-kayo. 16Angken sema iren parintis jo, aahi yo, bobonat jo, tan kakajem jo, iawat cha kayo ired ma naengontred si-kayo, et bonoen chiy echom cha si-kayo. 17Et sema ngo iren emiin a too, owesen cha kayo tep naemati kayod si-kak. 18Nem angken inges to man, kajoan to kayon Afo Chiyos say nat mepokaw i angken sa-kin bowek jo. 19No memasi-masig kayon memati, may-i-kanan kayo na biyag a nagwariy pengingkaan to.”

Inpadton Jesus I Kechechal Na Jerusalem

(Matthew 24:15-21; Mark 13:14-19)

20Kigwan ngon Jesus i “No metaen jo i dinikmot ma na chakel a sosolcharoy Jerusalem, amtaen jo i chanchani diy timpo na kechechal to. 21Et sema iren gwared Judea, mesepol a bebtihen chiy chonchontog. Tan sema ngo iren gwared ja siyodad na Jerusalem, mesepol a bebtihan cha. Tan sema pay iren gwared payo-payow, mesepol a nat onsekep ired ja siyodad. 22Tep seman aliy timpon kechosen ketongpalan na emiin a iyaysolat cha esel Afo Chiyos. 23No sema timpon kepesamak niwan, kakaasi iriy iyangkebchel tan sema iren gwariy anak chen mansososo. Tep chakel i diga-digat a onmothok chiya dogad tan onmothok ngoy chosen Afo Chiyos ired ja tothoo. 24Sema echom, metiy ira babaen na ispada, tan sema echom ngo, ikowan cha iren balod cha emiin a ilid dobong. Et chechalen na Gentiles iya siyodad na Jerusalem, et mantoray ira ingkathod metongpal i timpon inkecheng Afo Chiyos cha si-kara.”

Sema Ikowan Ali Na Anak Na Too

(Matthew 24:29-31; Mark 13:24-27)

25Et intoloy Jesus a engowan i “Gwara di iriy sinjal a mesi-neng cha akow, bolan, tan pasingsing. Et emiin a toon gwared ja dobong, ontahot ira kagol na banay a chalojon cha baybay tan mapkes a notheng to, et nat amtaen chiy a-magen cha. 26Sema iren tothoo, metongba ira kagol na tahot cha iy seskeren chiy mepesamak chiya dobong tep sema emiin a gwared iyaykayang, onki-gwed. 27Et metaen chaak men Anak na Toon emangkedafoak alid dangit a edikmothan na kolpot. Mahedsang i panakabalin ko, tan mandingsiak alin pasiya na kinachiyos ko. 28No metaen jo ira man a manchogin mepesamak, akgwat kayo et tangkak kayo tep chanchani diy timpo na kaydibchi yo.”

Sema Maachal Cha Kejow A Fig

(Matthew 24:32-35; Mark 13:28-31)

29Et engiarig si Jesus a kigwan to i “Matha yoy kejow a fig tan emiin a kejow. 30Apaman a si-nengen jon manbobolong, amta yo i chanchani wiy tiya-kow. 31Inges to ngo man no metaen jon emangkepasamak ira man a kigwa-kigwan kod si-kayo. Et amtaen jo wa i chanchaniy timpo na pantorayan Afo Chiyos. 32Sejay a konen kod si-kayo, podnon gwared jay i echom a toon sibibiyag pay laeng no mepesamak a emiin ira man. 33Sema gwared iyaykayang tan chiya dobong, mepokaw, nem sema ese-esel ko, eg mepoka-pokaw.”

Mesepol A Mantanchaan Kiya

34Intoloy Jesus a engowan i “Pantanchaan kayo, nahol ni nemnemnemen jon man-ino-inom tan mengema-emag na kinakedsel tan mebel-athan kayo na chana-chanag maypangkep na panbiyagan jo. Et sema akow na iolik alid si-kayo, biglen onmothok, 35et ingesen joy titit a iyakned solo. Tep sema akow, onmothok cha emiin a toon sibibiyag chiya dobong. 36Pansaga-sagana kayo tan pankara-kararag kayo i mahedsang kayo say mahaanos jon emiin ira ja chanchanin mepesamak, et say nat onbaing kayo no on-akgwat kayod sangoanan kon Anak na Too.”

37Gwiya-gwa-gwen naiyantoros Jesus chiwa timplo tan diyagwi-dagwin naimawas chiwan et najimo-kow chiwa Chontog na Olivas. 38Et emiin a too, nabimowas ired ma timplo say manki-ngel ira na konen Jesus.

Currently Selected:

Luke 21: KAR

Highlight

Copy