Luke 22

Enganap Ira Na Pesing Chen Mengipabonon Jesus

(Matthew 26:1-5; Mark 14:1-2; John 11:45-53)

1Sema timpo na Piyasta na Tinapay a Nagwariy Para Debag To tan sema Piyasta na Inda-bas na Anghil cha Hodjos, chanchanin onmothok. #22:1 Sema timpo na Piyasta na Tinapay a Nagwariy Para Debag To tan Piyasta na Inda-bas na Anghil cha Hodjos, naiyanchogi na Abril na tiyawen. Sema pilmiron akow, nasinilibrar na Hodjos i Piyasta na Inda-bas na Anghil. Nontan a piyasta, naniyemnemnem cha ma inpasing na anghil a dima-bas cha baliy cha, et eg to biyono iriy kafangodowanan chen aanak a daleki nonta bagaen ired Egypt. Sema pithon akow a ontened, nasinilibrar na Hodjos i Piyasta na Tinapay a Nagwariy Para Debag To. Naimag cha man say nemnemnemen cha i nonta bintihan chiy Egypt, iyay-agag ira, et iyandotho ira na tinapay a nagwariy para debag to. Isonga, sema pithon akow niwa piyasta, sema tinapay a nakiyakan na Hodjos, sema tinapay a nagwariy para debag to bengat. Sema istoriya na inbetik iren ma Hodjos alid Egypt, naebased Exodus 11 tan 12. 2Sema iren aafo na papari tan mamaistoro na dinteg, kaana-anap ira na pesing chen mengipabonon Jesus a nat amtaen na too. Tep entahot chiy a-magen emo na tothoo.

Ekitolag Si Judas A Traidoren Tos Jesus

(Matthew 26:14-16; Mark 14:10-11)

3Et si Satanas, simekep cha nemnem Judas a iyanngaran na Iscariot a sa-kin sawal na chegwen disipolos Jesus. 4Et kimowan si Judas a mekitebal ired ma aafo na papari tan sema iren kapitan na kowadja na timplo say iawat tos Jesus cha si-kara. 5Imimdeng ira et inkari cha i i-kanan cha na pilak. 6Et ekitolag si Judas cha si-kara, et inchogi tho wen mengenap na gwaya thon menraidor Jesus cha si-kara no nagwariy tothood man.

Insagana Iren Jesus I Kakanen Cha Na Piyasta Na Inda-bas Na Anghil Cha Hodjos

(Matthew 26:17-25; Mark 14:12-21; John 13:21-30)

7Mimothok miy pilmiron akow na Piyasta na Tinapay a Nagwariy Para Debag To. Si-kathoy akow ngo na nainpanparti ra na ngalobon kalniro para cha Piyasta na Inda-bas na Anghil cha Hodjos. 8Isonga, into-non Jesus si Peter tan si John a kigwan to i “Jo isaganiy kakanen tayo na akow na Piyasta na Inda-bas na Anghil.” 9Et kigwan cha i “Toy piyan mon pengisaganaan mi na kakanen tayo i?” 10Et insongbat Jesus i “No onmothok kayo wed ma siyodad, gwariy aspolen jon dahin mansaksakbat na salaw a iya-janan na chanom. Tened jod ma baliy a seskepan to, 11et kowan jod ma mahabaliy i ‘Kigwan na Maistoro wi i “Toy kwadton penganan min pansilibraran mi na Piyasta na Inda-bas na Anghil i?” ’ 12Et itoro toy banay a kwadtod kayang a gwaren emiin i mesepol tayo. Isagana yoy kakanen tayod man.” 13Et kimowan ira ma chegwen disipolos chiwan, et idi mimothok ira, mita ren gwaren koston emiin iwa kigwan Jesus. Et insagana ra wiy kakanen cha na Piyasta na Inda-bas na Anghil.

Sema Kaonoran A Inpakidihob Jesus Ired Ma Disipolos To

(Matthew 26:26-30; Mark 14:22-26; 1 Corinth 11:23-25)

14Idi mimothok i koston timpo, si Jesus tan sema iren apostolis to, ekitokkong iren mengan. 15Et kigwan Jesus cha si-kara i “Piyan kon pasiyen mekidihob cha si-kayo niman a penginemnemneman tayo na inda-bas na anghil asanak mandigat. 16Tep konen kod si-kayo i nat mekidihobak mowan chiya piyasta di ingkathod metongpal i banag tod pantorayan Afo Chiyos.” 17Et engales Jesus na tasen iya-janan na chanom na grape, et iyansalamat cha Afo Chiyos. Et kigwan to i “Alejo jay et pan-inom kayo na sansasa-ki. 18Tep konen kod si-kayo i ekak menginom mowan na chanom na grape ingkathod imothok ali na pantorayan Afo Chiyos.” 19Et engala ngos Jesus na tinapay a iyansalamat cha Afo Chiyos. Et piyetpet-ing to wa, et in-i-kan tod disipolos ton kigwan to i “Sejay i angel kon maytangdal para cha si-kayo. Amag jo jay a penginemnemneman jod si-kak.”

20Idi iyakcheng iren engan, inges to ngoy inpasing Jesus chiwa tasa. Ida tho ma tasen kigwan to i “Seja inom, si-kathoy kasi-nengan na badon tolagan Afo Chiyos cha si-kayo, et seja chalak, si-kathoy mengipaneknek niwa tolagan. 21Nem konen kod si-kayo i sema menraidor cha si-kak, gwared jay a mekidihob. 22Tep si-kak a Anak na Too, metiyak tep si-kathoy planon Afo Chiyos nontan da. Nem kakaasi ma toon menraidorak tep sigoradon mechosa!” 23Et iyansisinalodsod ira ma disipolos no siyed si-kariy mengemag niwan.

Siyay Kahejangan?

24Idi eng-engkay, iyansosongbathan iren ma disipolos Jesus i maypangkep no siyed si-kariy kahejangan. 25Et kigwan Jesus cha si-kara i “Sema iren arin naiyantoray chiya dobong, nainpilit chiy piyan cha. Tan sema ngo iren iyangkekayang i karebengan to, piyan chen mengaranan na ‘sema iren naenolong.’ 26Nem sema a-magen jo, nat inges to koma man. No diket sema kahejangan cha si-kayo, mesepol a manbalin a inges toy kababaan. Tan sema sa-kid si-kayon mengibalnay, mesepol ngon manbalin a inges toy naiyansilbi. 27Tep siyay mas ekayang? Sema ontokkong a mengan ono sema mansilbid si-katho? Nat sema ontokkong a mengan aya? Nem si-kak a Afo yo, ajaak cha si-kayon inges ton naiyansilbi.

28“Si-kayoy imonong cha si-kak nonta timpon picha-pichas chaak. 29Isonga, i-kan koy karebengan jon mantoray no sa-ki din akow a inges toy inpasing Afo Chiyos a engi-kan na karebengan kon mantoray 30say mekidihob tan mekiinom kayod si-kak cha pantorayan ko tan ontokkong kayo ngod thronon pengowisan jo na poli-poli na sawal na chegwen aanak Israel.”

Inpadton Jesus I Dibahan Peter

(Matthew 26:31-35; Mark 14:27-31; John 13:36-38)

31Et kigwan Jesus cha Simon Peter i “Simon, Simon, iki-ngelim i konen ko. Inbagen Satanas cha Afo Chiyos no mebedin, ipahat ton pechasen to kayon emiin say mechechal i pamati yo. Sema paras, singen inges toy panja-pi na wheat say maysi-jan i irik cha ohis to. 32Nem inkararagan taha, Simon, i nat mechechal i pamatim. Et no on-oli ka mowan cha si-kak, pekedsang moy pamati na echom mon naemati.” 33Et kigwan Peter i “Afo, esaganaak a mekikalebos cha si-kam. Esaganaak a mekipathiy cha si-kam.” 34Insongbat Jesus i “Peter, konen kod si-kam i niman a dagwi no aneng onkakaok i manok, memintedo ken mengowan i eg moak amta.”

Kigwan Jesus Ired Ma Disipolos To I Itahin Chiy Mesepol Cha

35Et inbagaan Jesus ira ma disipolos to i “Idi into-no tahejo et nat intahin joy pilak, akbot, tan sa-kin paris na sapathos jo, gwara ayay kolang jo nontan?” “Nagwara” kigwan cha. 36Et kigwan Jesus mowan i “Nem niman, no gwariy pilak jo, alejo. No gwariy akbot jo, alejo ngo. Tan no nagwariy ispada yo, idaho yoy ta-kep na baro yo et penongkal kayo na sa-ki. 37Tep gwariy iyaysolat cha esel Afo Chiyos maypangkep cha si-kak a kigwan to i ‘Maybilang iwan a mabesol a too.’ #22:37 Isaiah 53:12 Konen kod si-kayo i mesepol a metongpal iwan. Ahow, sema iyaysolat maypangkep cha si-kak, chanchanin metongpal.” 38Et kigwan iren ma disipolos i “Afo, ajay i chegwen ispada.” Insongbat Jesus i “Kosto wa.”

Iyankararag Si Jesus Cha Chontog Na Olivas

(Matthew 26:36-46; Mark 14:32-42)

39Et dimayat si Jesus chiwan, et kimowan chiwa Chontog na Olivas a inges toy naimag to no medebi wa. Et ekiolop ira ma disipolos to. 40Idi mimothok ired man, kigwan Jesus cha si-kara i “Pankararag kayo say nat ma-gwak kayo no meparas i pamati yo.”

41Et kimi-ki-nan si Jesus cha disipolos ton inges toy kaaragwi na bathon maychedtog, et iyantalimohod et iyankararag 42a kigwan to i “Awa, pangaasim. No piyan mo, enog i intolok a da-kaman ko ja diga-digat. Nem sema metongpal koma, nat sema piyan ko, no diket seta piyan mo.” 43Et iyanparang i anghil a edafod dangit et inpakedsang tos Jesus. 44Tep kagol na epaladon engos Jesus, mas inpasnek to pay a iyankararag, et sema dinget to, inges toy chalen mantedtedted cha pithek.

45Idi iyakcheng a iyankararag si Jesus, imakgwat et imolid kad-an na disipolos to. Sibi tho iren kejino-kow tep iyabdiy iren pasiya kagol na engos cha. 46Et kigwan tod si-kara i “Apay nga manjo-jo-kow kayo? Bangon kayo et ikararag jo i nat ma-gwak kayo no meparas i pamati yo.”

Chinmet Ches Jesus

(Matthew 26:47-56; Mark 14:43-50; John 18:3-11)

47Idi man-eesel pay laeng si Jesus, mimothok i chakel a tood kad-an to, et sema toon iyanngaran na Judas a sa-kin sawal na chegwen disipolos, towan ibalnay ira. Et imesop cha Jesus say ongoan to. 48Nem kigwan Jesus i “Judas, iyongoan moak a singen kajem moak, et inges niwan ngoy inpasing mon enraidor cha si-kak a Anak na Too.”

49Idi iyamtaan iren ma disipolos Jesus i a-magen na too, kigwan cha i “Afo, osalen miy ispada wi?” 50Et sema sa-kid si-kara, biyetbet to ma bagaen na kahejangan a pari et ingkal toy gwanan a ngila tho. 51Nem kigwan Jesus i “Kosto wa!” Et kiyapkap to ma ngila niwa bagaen, et mimapteng. 52Et kigwan Jesus cha aafo na papari, sema iren kapitan na kowadja na timplo, tan sema iren iyangkaamen kimowan ira din emiin a menmet cha si-katho i “Tolisanak ayen mesepol jon man-ispada tan manpeg-as a menmetak? 53Gwiya-gwa-gwen gwaraak cha si-kayod ma timplo, nem eg joak ida nontan. Nem sejay i timpon iyay-i-kan cha si-kayo say a-magen joy piyan jon a-magen. Et sejay ngoy timpon iyay-i-kan cha Satanas a naiyantoray cha kawad-an na enbolinget say a-magen toy piyan ton a-magen.”

Dinibahan Peter Si Jesus

(Matthew 26:57-58,69-75; Mark 14:53-54,66-72; John 18:12-18,25-27)

54Et sema iren tothoo, ida res Jesus et inkowan ched baliy na kahejangan a pari. Si Peter, bimetaw a timened. 55Chiwa baliy na kahejangan a pari, iyan-afoy ired bo-dayan, et ekitokkong iren menangchang. Et kimowan si Peter et ekitokkong cha si-kara. 56Sema sa-kin marikit a bagaen na kahejangan a pari, mita thos Peter a mantoktokkong cha askang na afoy. Sini-neng ton pasiyen kigwan to i “Seja too, echom ngon Jesus.” 57Nem indibak Peter a kigwan to i “Nat amtak iwan.”

58Idi eng-engkay, mita na sa-kin toon kigwan to i “Si-kam ngoy sa-kid si-kara.” Nem indibak Peter i “Enchi, nat echom toak niwa too.”

59Idi epalabas i sa-kin oras, sema sa-ki ngo pay a too, inpilit ton kigwan to i “Agpayson seja too, echom pay Jesus tep i-Galilee ngo.” 60Nem kigwan Peter i “Nat amtak itha mowan kona.” Idi man-eesel pay, kimakaok i manok. 61Koston gwimingis Jesus et sini-neng tos Peter. Et niyemnem Peter i kigwan Jesus a “Dibahan moak na memintedo asan onkakaok i manok niman a dagwi.” 62Et bimetik si Peter et paladoy nangis to tep iyanbabawin chili.

Iyang-angja Res Jesus Tan Bicha-bichas Cha

(Matthew 26:67-68; Mark 14:65)

63Sema iren toon manbanbantay Jesus, iyang-angja ra tan bicha-bichas cha. 64Biyedberan cha pay i matha tho et kigwa-kigwan cha i “Tiwa, kowan mo no siyay emoksing ka.” 65Et chakel pay i echom a kigwan chen engomang cha si-katho.

Inkowan Ches Jesus Ired Ma Iyangkaama Na Hodjos

(Matthew 26:59-66; Mark 14:55-64; John 18:19-24)

66Idi eta-nang ma, emiin a iyangkaama na toon piyan ton a-seden i sema iren aafo na papari tan mamaistoro na dinteg, esa-sa-nop ira. Et inkowan ches Jesus cha esa-nofan cha say kowisen cha. 67Et kigwan na iyangkaama i “Kowan mod si-kawi no podnon si-kam i Cristo.” Nem insongbat Jesus i “No konen kod si-kayo, eg joak met pay laeng patien. 68Et no gwariy ibagak cha si-kayo, eg jo ngo songbathan. 69Nem manipod niman, si-kak a Anak na Too, ontokkongak cha gwanan Afo Chiyos a manakabalin.” 70Et inbaga ren emiin i “No setan ngarod, si-kam i Anak Afo Chiyos?” Et insongbat Jesus i “Kostoy kigwan jo.” 71Et kigwan na iyangkaama i “Nat mesepol tayo pay laeng i mantistigo. Tep inki-ngelan tayon mismoy kigwan to.”

Currently Selected:

Luke 22: KAR

Highlight

Copy