John 5

Inpamapteng Jesus I Sa-kin Dahid Bethzatha

1Idi iyakcheng iwan, gwariy piyasta na Hodjos cha Jerusalem, et kimowan si Jesus a mekipiyasta. 2Niman gwared Jerusalem i chanom a iyabjeng a engaranan na Bethzatha cha esel na Hodjos a iyay-esop cha Pasbol na Kalniro. Tan gwara ngod man i dimen siroman 3a imoli-oligan na chakel a mansekit. Gwara iriy ekorab, epilay, tan sema iren gwariy parti na angel chen nat mahakiykiy. [Chiyan sekeriy chanom a onkiykiy. 4Tep no singka-chom, onsekep i anghil Afo Chiyos chiwa iyabjeng a chanom, et ikiykiy to ma chanom. No onkiykiy maliy chanom, sema pilmiron toon onsekep chiwan, ma-kal i sahit to, angken kilasin sahit.] #5:3-4 Sema iyaysolat cha kawa niya malka […], nat iyayka-chom cha echom a Greek a sola-solat.

5Gwared man i sa-kin dahin mansekit na tedon polo tan gwalon tawen. 6Miten Jesus iwa mansekit a man-oolig chiwan, et amta tho i ebayag i sahit to. Et inbagen Jesus cha si-katho i “Piyan mon ma-kal i sahit mo?” 7Et insongbat na mansekit i “Ahow, Afo, piyan ko, nem nagwariy mena-ched si-kak a onkowan cha chanom no onkiykiy. Nainpara-paras kon onkowan, nem gwara na olay i naedagwas iy say si-kak.” 8Et kigwan Jesus i “Bangon ka, alam itha kamen mo, et pan-ekad ka.” 9Et mimapteng a chakos iwa dahi, et ida tho ma kamen to et iyan-ahad.

Sema akow a inmapteng niwa dahi, sema Sabbath a akow na pan-inana na Hodjos. 10Isonga, sema iren naengibalnay na Hodjos, kigwan ched ma dahin iya-kal i sahit to i “Niyana mowan sakbatha ta kamen? Mowan charaliy dinteg tayo tep Sabbath niman a akow na pan-inana.” 11Insongbat na dahi i “Ahow, nem sema toon iyangkal na sahit ko, kigwan tod si-kak i a-daen koy kamen ko et man-ekarak.” 12Et inbaga ra i “Siya tan a toon engowan cha si-kam i a-daen moy kamen mo et man-ekad ka?” 13Nem nat amta niwa dahi no siyay iyangkal na sahit to tep bimetik males Jesus a iyaydaok ded chakel a toon esa-sa-nop chiwan.

14Idi engkay, sibin Jesus iwa dahid ma timplon kigwan tod si-katho i “Si-neng mo, mapteng ka wa. Enog i basol mowan, nahol ni gwariy karkaron mepesamak cha si-kam.” 15Et bimetik da ma dahi, et kimowan a mengigwanggwang ired ma naengibalnay na Hodjos i si Jesus i iyangkal na sahit to. 16Et piyadigathan iren ma Hodjos si Jesus tep naima-imag ton inges niwan na Sabbath a akow na pan-inana. 17Nem kigwan Jesus cha si-kara i “Naiyan-obda na olay si Awak, isonga mesepol a man-obdaak ngo na olay.” 18Kagol a engowanan Jesus niwan, sema iren naengibalnay na Hodjos, karkaron piyan chen bonoen. Tep nat chichal to bengat i dinteg maypangkep na pan-inana no Sabbath, nem in-inges to ngoy angel tod Afo Chiyos a kigwan to i Aweto.

Sema Karebengan Na Anak Afo Chiyos

19Et kigwan Jesus ired ma Hodjos i “Sejay a konen kod si-kayo, podnon si-kak a Anak Afo Chiyos, nagwariy mebedin a a-magen ko no si-kak bengat, no diket naimag ko bengat iwa nasini-neng kon naimag Awak. Tep angken nengoy a-magen Awak, si-katho ngoy a-magen ko. 20Tep si Awak, ensemek toak a Anak to. Isonga, nainbiybiy tod si-kak i emiin a naimag to. Et gwara ngo ira ma ibiybiy tod si-kak a mas kaskasdaaw iy say imag ko la. Ipa-mag to ira man cha si-kak say agpayson masdaaw kayo. 21Tep si Awak, nainpanpawil toy iyangketiy, et nain-i-kanan to ira na biyag, et si-kak a Anak to, inges niwan ngoy pesing ko tep i-kan koy biyag chiwa piyan kon i-kanan. 22Si Awak, nagwariy kowisen to, no diket si-kak a Anak to, in-i-kan toy karebengan kon mengowis na emiin a too. 23Tep piyan ton chejawen chaak na emiin a toon inges toy nainpanchayaw chen Awak. Sema nat naiyanchayaw cha si-kak, nat nachijaw to ngos Awak a engito-no did si-kak.

24“Sejay a konen kod si-kayo, podnon angken siyen toon mengi-ngel na kowan kona et memati ngod engito-no did si-kak, gwara did si-kathoy biyag a nagwariy pengingkaan to. Nat mechosa tep nat iyaysi-jan med Afo Chiyos a singen etiy, no diket iyay-i-kanan na biyag a nagwariy pengingkaan to. 25Sejay a konen kod si-kayo, podno ngon emiin a too, singen etiy ira tep iyaysi-jan ired Afo Chiyos. Nem manmomothok aliy timpo et niman men mimothok no sema iren toon singen etiy, iki-ngelan chiy konen kon Anak Afo Chiyos, et sema iren memati na iki-ngelan cha, manbiyag ira. 26Tep si Awak i naengi-kan na biyag. Et inges nithan ngod si-kak a Anak to tep in-i-kan toy karebengan kon mengi-kan na biyag. 27In-i-kan to pay i karebengan kon mengowis tep si-kak i Anak na Too. 28Enchek kayo masdaaw niwa kigwan ko. Tep onmothok aliy akow a emiin a iyangketiy, iki-ngelan chiy esel ko, 29et onbangon ired iyaybekaan cha. Sema iren toon engamag na mapteng, manpawil ira say may-i-kanan ira na biyag a nagwariy pengingkaan to. Nem sema iren toon engamag na ngaaw, manpawil ira say mekowis ira et mechosa ira na ingked ingka.

30“Nagwariy mebedin a a-magen ko no si-kak bengat. No naengowisak, naimag ko bengat i kigwan Afo Chiyos cha si-kak. Isonga, kosto ma nainpasing kon mengowis tep sema naimag ko, nat sema piyan ko, no diket sema piyan Afo Chiyos a engito-no did si-kak.”

Sema Iren Naenistigo Maypangkep Jesus

31Kigwan ngon Jesus i “No si-kak bengat i naenistigo maypangkep na angel ko, mebedin emon konen jo i nat podnoy nakigwan ko. 32Nem gwara ngos Awak a naenistigo maypangkep cha si-kak, et amtak i podnoy nakigwan to.

33“Gwara iriy into-no yod John a Naemonjag say salodsoren cha, et kigwan toy podno maypangkep cha si-kak. 34Nem nat mesepol koy toon menistigo maypangkep cha si-kak. Kowan kona ira jay say patien joy kigwan John et say maysalakan kayo. 35Tep si John, may-arig chiwa dampen nasimilow tep sema toro-toro tho, nasinilowan toy nemnem na too. Et kaimdeng kayon engi-ngel na toro-toro tho na sankaatihan.

36“Nem gwara pay i mengipaneknek i podno ma kowan kona, et mas ebahed iy say sema kigwan John. Sema iren naimag kon nainpa-mag Awak cha si-kak, seman iriy mengipaneknek i into-no thoak alin Awak. 37Et si Awak a engito-no did si-kak, naenistigon mismo maypangkep cha si-kak. Nem eg jo inki-ki-ngelan i esel to tan eg jo sini-si-neng i itsora tho. 38Et amtak i eg jo inpaeket cha nemnem joy esel to tep eg kayo naematid si-kak a into-no tho di. 39Naiyacha-achal joy esel Afo Chiyos tep kin jo i chiwan i pengedaan jo na biyag a nagwariy pengingkaan to. Nem sema esel Afo Chiyos, si-kathoy naenistigo maypangkep cha si-kak, 40nem eg jo pay piyan a mematid si-kak say gwara did si-kayoy biyag a nagwariy pengingkaan to. 41Nat chayaw na tooy kowan anafa. 42Tep amtak i nagwariy semek jod Afo Chiyos. 43Kimowanak alid jay a gwariy karebengan kon edafod Awak, nem eg joak igwat. Nem no onkowan alid jay i sa-kin toon nagwariy engi-kan na karebengan to, naigwat jo. 44Kas-anon memati kayod si-kak no say piyan jo ket, chayaw a naedafod echom jo, tan nat a-nafen joy chayaw a naedafod Afo Chiyos a sa-sa-kin Chiyos? 45Enog i niyemnem i ibasolan tahejod Awak. Nat si-kak i mengibasol cha si-kayo, no diket si Moses a engi-kan cha si-kayo na dinteg a naniyamnama yo i si-kathoy chalan cha kaysalakanan jo. 46No agpayson piyati yo komes Moses, piyati yoak ngo koma tep sema insolat Moses ket, maypangkep cha si-kak. 47Nem no eg jo napiyatiy insolat Moses, eg jo ngo patien i nakigwan ko.”

Currently Selected:

John 5: KAR

Highlight

Copy