ਰਸੂਲ 23

1ਪੌਲੁਸ ਨੇ ਗੌਹ ਨਾਲ ਮਹਾਂਸਭਾ ਵੱਲ ਵੇਖਿਆ ਅਤੇ ਕਿਹਾ, “ਹੇ ਭਾਈਓ, ਮੈਂ ਅੱਜ ਦੇ ਦਿਨ ਤੱਕ ਪਰਮੇਸ਼ਰ ਦੇ ਸਨਮੁੱਖ ਆਪਣਾ ਜੀਵਨ ਪੂਰੀ ਤਰ੍ਹਾਂ ਸ਼ੁੱਧ ਵਿਵੇਕ ਨਾਲ ਬਿਤਾਇਆ ਹੈ।” 2ਇਸ ਗੱਲ 'ਤੇ ਮਹਾਂਯਾਜਕ ਹਨਾਨਿਯਾਹ ਨੇ ਉਨ੍ਹਾਂ ਨੂੰ ਜਿਹੜੇ ਉਸ ਦੇ ਕੋਲ ਖੜ੍ਹੇ ਸਨ ਹੁਕਮ ਦਿੱਤਾ ਕਿ ਇਸ ਦੇ ਮੂੰਹ 'ਤੇ ਮਾਰੋ। 3ਤਦ ਪੌਲੁਸ ਨੇ ਉਸ ਨੂੰ ਕਿਹਾ, “ਹੇ ਚੂਨਾ ਫਿਰੀ ਕੰਧ, ਪਰਮੇਸ਼ਰ ਤੈਨੂੰ ਮਾਰੇਗਾ! ਤੂੰ ਬਿਵਸਥਾ ਦੇ ਅਨੁਸਾਰ ਮੇਰਾ ਨਿਆਂ ਕਰਨ ਬੈਠਾ ਹੈਂ ਅਤੇ ਬਿਵਸਥਾ ਦੇ ਵਿਰੁੱਧ ਮੈਨੂੰ ਮਾਰਨ ਦਾ ਹੁਕਮ ਦਿੰਦਾ ਹੈਂ?” 4ਪਰ ਜਿਹੜੇ ਕੋਲ ਖੜ੍ਹੇ ਸਨ ਉਨ੍ਹਾਂ ਨੇ ਕਿਹਾ, “ਤੂੰ ਪਰਮੇਸ਼ਰ ਦੇ ਮਹਾਂਯਾਜਕ ਨੂੰ ਬੁਰਾ-ਭਲਾ ਕਹਿੰਦਾ ਹੈਂ?” 5ਪੌਲੁਸ ਨੇ ਕਿਹਾ, “ਭਾਈਓ, ਮੈਨੂੰ ਪਤਾ ਨਹੀਂ ਸੀ ਕਿ ਇਹ ਮਹਾਂਯਾਜਕ ਹੈ, ਕਿਉਂਕਿ ਲਿਖਿਆ ਹੈ:‘ਤੂੰ ਆਪਣੇ ਲੋਕਾਂ ਦੇ ਪ੍ਰਧਾਨ ਨੂੰ ਬੁਰਾ ਨਾ ਕਹਿ’।”#ਕੂਚ 22:28

6ਜਦੋਂ ਪੌਲੁਸ ਨੇ ਜਾਣਿਆ ਕਿ ਉਨ੍ਹਾਂ ਵਿੱਚੋਂ ਇੱਕ ਦਲ ਸਦੂਕੀਆਂ ਦਾ ਅਤੇ ਦੂਜਾ ਫ਼ਰੀਸੀਆਂ ਦਾ ਹੈ, ਤਾਂ ਉਸ ਨੇ ਮਹਾਂਸਭਾ ਵਿੱਚ ਪੁਕਾਰ ਕੇ ਕਿਹਾ, “ਹੇ ਭਾਈਓ, ਮੈਂ ਫ਼ਰੀਸੀ ਹਾਂ ਅਤੇ ਫ਼ਰੀਸੀਆਂ ਦੇ ਵੰਸ਼ ਦਾ ਹਾਂ! ਮੁਰਦਿਆਂ ਦੇ ਪੁਨਰ-ਉਥਾਨ ਦੀ ਆਸ ਦੇ ਵਿਖੇ ਮੇਰੇ 'ਤੇ ਮੁਕੱਦਮਾ ਚਲਾਇਆ ਜਾ ਰਿਹਾ ਹੈ।” 7ਜਦੋਂ ਉਸ ਨੇ ਇਹ ਕਿਹਾ ਤਾਂ ਫ਼ਰੀਸੀਆਂ ਅਤੇ ਸਦੂਕੀਆਂ ਵਿੱਚ ਝਗੜਾ ਹੋ ਗਿਆ ਅਤੇ ਲੋਕਾਂ ਵਿੱਚ ਫੁੱਟ ਪੈ ਗਈ, 8ਕਿਉਂਕਿ ਸਦੂਕੀ ਕਹਿੰਦੇ ਹਨ ਕਿ ਨਾ ਪੁਨਰ-ਉਥਾਨ ਹੈ, ਨਾ ਸਵਰਗਦੂਤ ਅਤੇ ਨਾ ਹੀ ਆਤਮਾ, ਪਰ ਫ਼ਰੀਸੀ ਇਹ ਸਭ ਮੰਨਦੇ ਹਨ। 9ਤਦ ਉੱਥੇ ਬਹੁਤ ਰੌਲ਼ਾ ਪੈ ਗਿਆ ਅਤੇ ਫ਼ਰੀਸੀਆਂ ਦੇ ਦਲ ਵਿੱਚੋਂ ਕੁਝ ਸ਼ਾਸਤਰੀ ਖੜ੍ਹੇ ਹੋ ਕੇ ਇਹ ਕਹਿੰਦੇ ਹੋਏ ਝਗੜਾ ਕਰਨ ਲੱਗੇ, “ਸਾਨੂੰ ਇਸ ਵਿਅਕਤੀ ਵਿੱਚ ਕੋਈ ਬੁਰਾਈ ਨਹੀਂ ਦਿਸਦੀ; ਜੇ ਕਿਸੇ ਆਤਮਾ ਜਾਂ ਸਵਰਗਦੂਤ ਨੇ ਉਸ ਨਾਲ ਗੱਲ ਕੀਤੀ ਹੋਵੇ, ਤਾਂ ਫਿਰ ਕੀ#23:9 ਕੁਝ ਹਸਤਲੇਖਾਂ ਵਿੱਚ ਇਸ ਜਗ੍ਹਾ 'ਤੇ “ਅਸੀਂ ਪਰਮੇਸ਼ਰ ਨਾਲ ਝਗੜਾ ਕਰੀਏ” ਲਿਖਿਆ ਹੈ।?” 10ਜਦੋਂ ਝਗੜਾ ਬਹੁਤ ਵੱਧ ਗਿਆ ਤਾਂ ਸੈਨਾਪਤੀ ਡਰ ਗਿਆ ਕਿ ਕਿਤੇ ਅਜਿਹਾ ਨਾ ਹੋਵੇ ਜੋ ਉਹ ਪੌਲੁਸ ਦੇ ਟੁਕੜੇ-ਟੁਕੜੇ ਕਰ ਦੇਣ। ਇਸ ਲਈ ਉਸ ਨੇ ਸਿਪਾਹੀਆਂ ਨੂੰ ਹੁਕਮ ਦਿੱਤਾ ਕਿ ਹੇਠਾਂ ਜਾਓ ਅਤੇ ਉਸ ਨੂੰ ਉਨ੍ਹਾਂ ਵਿੱਚੋਂ ਜ਼ਬਰਦਸਤੀ ਕੱਢ ਕੇ ਛਾਉਣੀ ਵਿੱਚ ਲੈ ਆਓ।

ਪੌਲੁਸ ਦੇ ਵਿਰੁੱਧ ਸਾਜ਼ਸ਼

11ਉਸੇ ਰਾਤ ਪ੍ਰਭੂ ਨੇ ਪੌਲੁਸ ਦੇ ਕੋਲ ਖੜ੍ਹੇ ਹੋ ਕੇ ਕਿਹਾ, “ਹੌਸਲਾ ਰੱਖ! ਕਿਉਂਕਿ ਜਿਸ ਤਰ੍ਹਾਂ ਤੂੰ ਮੇਰੇ ਵਿਖੇ ਯਰੂਸ਼ਲਮ ਵਿੱਚ ਗਵਾਹੀ ਦਿੱਤੀ ਉਸੇ ਤਰ੍ਹਾਂ ਤੈਨੂੰ ਰੋਮ ਵਿੱਚ ਵੀ ਗਵਾਹੀ ਦੇਣੀ ਪਵੇਗੀ।”

12ਜਦੋਂ ਦਿਨ ਚੜ੍ਹਿਆ ਤਾਂ ਯਹੂਦੀਆਂ ਨੇ ਇੱਕ ਸਾਜ਼ਸ਼ ਰਚੀ ਅਤੇ ਇਹ ਕਹਿ ਕੇ ਆਪਸ ਵਿੱਚ ਸੌਂਹ ਖਾਧੀ ਕਿ ਜਦੋਂ ਤੱਕ ਅਸੀਂ ਪੌਲੁਸ ਨੂੰ ਮਾਰ ਨਾ ਸੁੱਟੀਏ, ਨਾ ਕੁਝ ਖਾਵਾਂਗੇ ਨਾ ਪੀਵਾਂਗੇ। 13ਜਿਨ੍ਹਾਂ ਇਹ ਸਾਜ਼ਸ਼ ਰਚੀ ਉਹ ਚਾਲ੍ਹੀਆਂ ਤੋਂ ਵੱਧ ਸਨ। 14ਇਨ੍ਹਾਂ ਵਿਅਕਤੀਆਂ ਨੇ ਪ੍ਰਧਾਨ ਯਾਜਕਾਂ ਅਤੇ ਬਜ਼ੁਰਗਾਂ#23:14 ਅਰਥਾਤ ਯਹੂਦੀ ਆਗੂਆਂ ਕੋਲ ਜਾ ਕੇ ਕਿਹਾ, “ਅਸੀਂ ਆਪਸ ਵਿੱਚ ਸੌਂਹ ਖਾ ਕੇ ਇਹ ਠਾਣਿਆ ਹੈ ਕਿ ਜਦੋਂ ਤੱਕ ਪੌਲੁਸ ਨੂੰ ਮਾਰ ਨਾ ਸੁੱਟੀਏ, ਕੁਝ ਨਾ ਚੱਖਾਂਗੇ। 15ਸੋ ਹੁਣ ਤੁਸੀਂ ਮਹਾਂਸਭਾ ਦੇ ਨਾਲ ਮਿਲ ਕੇ ਸੈਨਾਪਤੀ ਨੂੰ ਕਹੋ ਕਿ ਅਸੀਂ ਉਸ ਦੇ ਵਿਖੇ ਹੋਰ ਵੀ ਚੰਗੀ ਤਰ੍ਹਾਂ ਜਾਂਚ ਕਰਨਾ ਚਾਹੁੰਦੇ ਹਾਂ, ਇਸ ਲਈ ਉਹ#23:15 ਕੁਝ ਹਸਤਲੇਖਾਂ ਵਿੱਚ ਇਸ ਜਗ੍ਹਾ 'ਤੇ “ਕੱਲ੍ਹ” ਲਿਖਿਆ ਹੈ। ਉਸ ਨੂੰ ਹੇਠਾਂ ਤੁਹਾਡੇ ਕੋਲ ਲਿਆਵੇ ਅਤੇ ਅਸੀਂ ਉਸ ਦੇ ਨੇੜੇ ਪਹੁੰਚਣ ਤੋਂ ਪਹਿਲਾਂ ਹੀ ਉਸ ਨੂੰ ਮਾਰ ਸੁੱਟਣ ਲਈ ਤਿਆਰ ਹੋਵਾਂਗੇ।”

16ਪਰ ਪੌਲੁਸ ਦੇ ਭਣੇਵੇਂ ਨੇ ਇਹ ਸੁਣ ਲਿਆ ਕਿ ਉਹ ਉਸ ਦੀ ਘਾਤ ਵਿੱਚ ਹਨ। ਤਦ ਉਹ ਛਾਉਣੀ ਵਿੱਚ ਗਿਆ ਅਤੇ ਅੰਦਰ ਜਾ ਕੇ ਪੌਲੁਸ ਨੂੰ ਦੱਸ ਦਿੱਤਾ। 17ਤਦ ਪੌਲੁਸ ਨੇ ਇੱਕ ਸੂਬੇਦਾਰ ਨੂੰ ਕੋਲ ਬੁਲਾ ਕੇ ਕਿਹਾ, “ਇਸ ਨੌਜਵਾਨ ਨੂੰ ਸੈਨਾਪਤੀ ਕੋਲ ਲੈ ਜਾ, ਕਿਉਂਕਿ ਇਸ ਨੇ ਉਸ ਨੂੰ ਕੁਝ ਦੱਸਣਾ ਹੈ।” 18ਸੋ ਉਹ ਉਸ ਨੂੰ ਸੈਨਾਪਤੀ ਕੋਲ ਲੈ ਗਿਆ ਅਤੇ ਕਿਹਾ, “ਕੈਦੀ ਪੌਲੁਸ ਨੇ ਮੈਨੂੰ ਕੋਲ ਬੁਲਾ ਕੇ ਇਸ ਨੌਜਵਾਨ ਨੂੰ ਤੁਹਾਡੇ ਕੋਲ ਲਿਆਉਣ ਦੀ ਬੇਨਤੀ ਕੀਤੀ, ਕਿਉਂਕਿ ਇਸ ਨੇ ਤੁਹਾਨੂੰ ਕੁਝ ਦੱਸਣਾ ਹੈ।” 19ਤਦ ਸੈਨਾਪਤੀ ਉਸ ਲੜਕੇ ਦਾ ਹੱਥ ਫੜ ਕੇ ਉਸ ਨੂੰ ਇੱਕ ਪਾਸੇ ਲੈ ਗਿਆ ਅਤੇ ਪੁੱਛਣ ਲੱਗਾ, “ਉਹ ਕੀ ਹੈ ਜੋ ਤੂੰ ਮੈਨੂੰ ਦੱਸਣਾ ਹੈ?” 20ਉਸ ਨੇ ਕਿਹਾ, “ਯਹੂਦੀਆਂ ਨੇ ਤੁਹਾਨੂੰ ਇਹ ਬੇਨਤੀ ਕਰਨ ਲਈ ਏਕਾ ਕੀਤਾ ਹੈ ਕਿ ਕੱਲ੍ਹ ਪੌਲੁਸ ਨੂੰ ਮਹਾਂਸਭਾ ਵਿੱਚ ਲਿਆਂਦਾ ਜਾਵੇ ਤਾਂਕਿ ਉਸ ਦੇ ਵਿਖੇ ਹੋਰ ਵੀ ਚੰਗੀ ਤਰ੍ਹਾਂ ਜਾਂਚ ਕੀਤੀ ਜਾਵੇ। 21ਇਸ ਲਈ ਤੁਸੀਂ ਉਨ੍ਹਾਂ ਦੀ ਨਾ ਮੰਨਣਾ, ਕਿਉਂਕਿ ਉਨ੍ਹਾਂ ਵਿੱਚੋਂ ਚਾਲ੍ਹੀਆਂ ਤੋਂ ਵੱਧ ਵਿਅਕਤੀ ਪੌਲੁਸ ਦੀ ਘਾਤ ਵਿੱਚ ਹਨ ਜਿਨ੍ਹਾਂ ਆਪਸ ਵਿੱਚ ਇਹ ਸੌਂਹ ਖਾਧੀ ਹੈ ਕਿ ਜਦੋਂ ਤੱਕ ਉਹ ਉਸ ਨੂੰ ਮਾਰ ਨਾ ਸੁੱਟਣ, ਨਾ ਕੁਝ ਖਾਣਗੇ ਨਾ ਪੀਣਗੇ। ਸੋ ਹੁਣ ਉਹ ਤੁਹਾਡੇ ਹੁਕਮ ਦੀ ਉਡੀਕ ਵਿੱਚ ਤਿਆਰ ਬੈਠੇ ਹਨ।” 22ਤਦ ਸੈਨਾਪਤੀ ਨੇ ਉਸ ਨੌਜਵਾਨ ਨੂੰ ਇਹ ਹੁਕਮ ਦੇ ਕੇ ਭੇਜ ਦਿੱਤਾ ਕਿ ਜੋ ਗੱਲਾਂ ਤੂੰ ਮੈਨੂੰ ਦੱਸੀਆਂ ਹਨ ਉਹ ਕਿਸੇ ਨੂੰ ਨਾ ਦੱਸੀਂ।

ਪੌਲੁਸ ਨੂੰ ਕੈਸਰਿਯਾ ਵਿੱਚ ਭੇਜਿਆ ਜਾਣਾ

23ਫਿਰ ਉਸ ਨੇ ਦੋ ਸੂਬੇਦਾਰਾਂ ਨੂੰ ਕੋਲ ਬੁਲਾ ਕੇ ਕਿਹਾ, “ਰਾਤ ਦੇ ਨੌਂ ਵਜੇ ਤੱਕ ਕੈਸਰਿਯਾ ਨੂੰ ਜਾਣ ਲਈ ਦੋ ਸੌ ਸਿਪਾਹੀ, ਸੱਤਰ ਘੋੜਸਵਾਰ ਅਤੇ ਨੇਜਾ ਚਲਾਉਣ ਵਾਲੇ ਦੋ ਸੌ ਆਦਮੀਆਂ ਨੂੰ ਤਿਆਰ ਕਰੋ। 24ਅਸਵਾਰੀ ਤਿਆਰ ਰੱਖੋ ਤਾਂਕਿ ਪੌਲੁਸ ਨੂੰ ਬਿਠਾ ਕੇ ਰਾਜਪਾਲ ਫ਼ੇਲਿਕਸ ਕੋਲ ਸੁਰੱਖਿਅਤ ਪਹੁੰਚਾਇਆ ਜਾ ਸਕੇ।” 25ਫਿਰ ਉਸ ਨੇ ਇਸ ਤਰ੍ਹਾਂ ਦੀ ਇੱਕ ਚਿੱਠੀ ਲਿਖੀ: 26“ਕਲੌਦਿਯੁਸ ਲੁਸਿਯਸ ਵੱਲੋਂ ਸਤਿਕਾਰਯੋਗ ਰਾਜਪਾਲ ਫ਼ੇਲਿਕਸ ਨੂੰ ਨਮਸਕਾਰ! 27ਯਹੂਦੀਆਂ ਨੇ ਇਸ ਵਿਅਕਤੀ ਨੂੰ ਫੜਿਆ ਅਤੇ ਉਹ ਇਸ ਨੂੰ ਮਾਰਨ ਹੀ ਵਾਲੇ ਸਨ, ਪਰ ਜਦੋਂ ਮੈਂ ਜਾਣਿਆ ਕਿ ਇਹ ਰੋਮੀ ਹੈ ਤਾਂ ਸਿਪਾਹੀਆਂ ਦੇ ਨਾਲ ਜਾ ਕੇ ਇਸ ਨੂੰ ਛੁਡਾ ਲਿਆ। 28ਮੈਂ ਇਹ ਜਾਣਨਾ ਚਾਹੁੰਦਾ ਸੀ ਕਿ ਉਹ ਕਿਸ ਕਾਰਨ ਉਸ ਉੱਤੇ ਦੋਸ਼ ਲਾ ਰਹੇ ਸਨ, ਇਸ ਲਈ ਮੈਂ ਇਸ ਨੂੰ ਉਨ੍ਹਾਂ ਦੀ ਮਹਾਂਸਭਾ ਵਿੱਚ ਲੈ ਗਿਆ। 29ਤਦ ਮੈਨੂੰ ਪਤਾ ਲੱਗਾ ਕਿ ਉਹ ਇਸ ਵਿਅਕਤੀ ਉੱਤੇ ਆਪਣੀ ਬਿਵਸਥਾ ਦੇ ਮਸਲਿਆਂ ਦੇ ਵਿਖੇ ਦੋਸ਼ ਲਾ ਰਹੇ ਹਨ, ਪਰ ਇਹ ਦੋਸ਼ ਮੌਤ ਜਾਂ ਕੈਦ ਕਰਨ ਦੇ ਯੋਗ ਨਹੀਂ ਹੈ। 30ਜਦੋਂ ਮੈਨੂੰ ਦੱਸਿਆ ਗਿਆ ਕਿ ਇਸ ਵਿਅਕਤੀ ਦੇ ਵਿਰੁੱਧ#23:30 ਕੁਝ ਹਸਤਲੇਖਾਂ ਵਿੱਚ ਇਸ ਜਗ੍ਹਾ 'ਤੇ “ਯਹੂਦੀਆਂ ਦੇ ਦੁਆਰਾ” ਲਿਖਿਆ ਹੈ। ਸਾਜ਼ਸ਼ ਰਚੀ ਗਈ ਹੈ ਤਾਂ ਮੈਂ ਇਸ ਨੂੰ ਤੁਰੰਤ ਤੁਹਾਡੇ ਕੋਲ ਭੇਜ ਦਿੱਤਾ ਅਤੇ ਮੁਦਈਆਂ#23:30 ਮੁਦਈ: ਦੋਸ਼ ਲਾਉਣ ਵਾਲਾ ਨੂੰ ਵੀ ਹੁਕਮ ਦਿੱਤਾ ਹੈ ਕਿ ਤੁਹਾਡੇ ਸਾਹਮਣੇ ਇਸ ਉੱਤੇ ਦੋਸ਼ ਲਾਉਣ।#23:30 ਕੁਝ ਹਸਤਲੇਖਾਂ ਵਿੱਚ ਇਸ ਜਗ੍ਹਾ 'ਤੇ “ਨਮਸਕਾਰ” ਲਿਖਿਆ ਹੈ।”

31ਸੋ ਸਿਪਾਹੀਆਂ ਨੇ ਉਸ ਹੁਕਮ ਦੇ ਅਨੁਸਾਰ ਜੋ ਉਨ੍ਹਾਂ ਨੂੰ ਦਿੱਤਾ ਗਿਆ ਸੀ, ਪੌਲੁਸ ਨੂੰ ਲਿਆ ਅਤੇ ਰਾਤੋ-ਰਾਤ ਅੰਤਿਪਤ੍ਰਿਸ ਵਿੱਚ ਪਹੁੰਚਾਇਆ। 32ਫਿਰ ਅਗਲੇ ਦਿਨ ਘੋੜਸਵਾਰਾਂ ਨੂੰ ਉਸ ਦੇ ਨਾਲ ਜਾਣ ਲਈ ਛੱਡ ਕੇ ਉਹ ਛਾਉਣੀ ਨੂੰ ਮੁੜ ਗਏ। 33ਕੈਸਰਿਯਾ ਪਹੁੰਚ ਕੇ ਉਨ੍ਹਾਂ ਨੇ ਰਾਜਪਾਲ ਨੂੰ ਉਹ ਚਿੱਠੀ ਦਿੱਤੀ ਅਤੇ ਪੌਲੁਸ ਨੂੰ ਵੀ ਉਸ ਦੇ ਸਾਹਮਣੇ ਹਾਜ਼ਰ ਕੀਤਾ। 34ਉਸ ਨੇ ਚਿੱਠੀ ਪੜ੍ਹ ਕੇ ਪੁੱਛਿਆ ਕਿ ਉਹ ਕਿਹੜੇ ਪ੍ਰਾਂਤ ਦਾ ਹੈ ਅਤੇ ਇਹ ਜਾਣ ਕੇ ਜੋ ਉਹ ਕਿਲਕਿਯਾ ਦਾ ਹੈ, 35ਉਸ ਨੇ ਕਿਹਾ, “ਜਦੋਂ ਤੇਰੇ ਮੁਦਈ ਵੀ ਆ ਜਾਣਗੇ ਤਦ ਮੈਂ ਤੇਰੀ ਸੁਣਵਾਈ ਕਰਾਂਗਾ।” ਫਿਰ ਉਸ ਨੇ ਹੁਕਮ ਦਿੱਤਾ ਕਿ ਉਸ ਨੂੰ ਹੇਰੋਦੇਸ ਦੇ ਰਾਜਭਵਨ#23:35 ਮੂਲ ਸ਼ਬਦ: ਪ੍ਰਾਇਤੋਰੀਅਮ ਵਿੱਚ ਪਹਿਰੇ ਹੇਠ ਰੱਖਿਆ ਜਾਵੇ।

Currently Selected:

ਰਸੂਲ 23: PSB

Highlight

Copy