ᤔᤷᤁᤢᤛ 14
14
ᤕᤧᤛᤢᤴ ᤛᤧᤵᤔᤠ ᤏᤡᤱᤛᤣᤰ
(ᤔᤳᤋᤡ ᥈᥌:᥇-᥋; ᤗᤢᤁᤠ ᥈᥈:᥇-᥈; ᤕᤢᤜᤢ ᥇᥇:᥊᥋-᥋᥉)
1ᤀᤠᤸᤗ ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶ#᥇᥊:᥇ ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶ—ᤐᤧᤴᤏᤡᤒᤠ᤺ᤴᤏᤥ ᤁᤴ ᤋᤱᤏᤠᤶ “ᤏᤡᤛ᤻ᤋᤠᤖ” ᤔᤧᤵᤔᤏᤠᤒᤠᤖᤥ॥ ᤁᤴ ᤋᤱᤏᤠᤶᤔᤡᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤡᤛᤪ ᤗᤠᤈᤣ᤹ᤗᤠᤶ ᤀᤡᤛᤪᤠᤀᤡᤗᤡᤜᤠ᤹ ᤗ᤺ᤳᤋᤢᤛᤡᤒᤠ ᤔᤡᤱᤛᤥᤀᤥ ᤔᤧᤀᤡ᤺ᤳᤋᤢᤒᤠ ᤋᤱᤏᤠᤶᤗᤥ॥ ᤏᤢ ᤛᤡᤍᤠ᤹ ᤔᤧᤶᤓ᤺ᤴᤏᤣᤒᤠ ᤂᤖᤧ᤺ᤱ ᤆᤠᤔᤠ ᤕᤧᤴ ᤋᤠᤔᤠ ᤏᤡᤕᤧᤴᤗᤰ ᤘᤕᤧ॥ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ᤖᤧ ᤕᤧᤛᤢᤴ ᤀᤠᤰᤂᤣᤗ᤹ᤖᤡᤰ ᤛᤫᤠ᤺ᤳᤋᤠᤱ ᤋᤧᤶᤔᤠᤀᤠᤱ ᤛᤧᤵᤔᤠᤒᤣ ᤑᤠ᤹ᤀᤠᤱ ᤗᤠᤶ ᤔᤧᤃᤥ᤺ᤳᤋᤢᤖ ᤔᤧᤘᤕᤧᤖᤥ॥ 2ᤁᤖ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤁᤴ ᤋᤱᤏᤠᤶᤔᤥᤃ ᤀᤠᤏᤡ᤹ ᤜᤧᤰᤁᤣ ᤆᤥ᤺ᤰᤔᤠ ᤔᤧᤏᤢ᤹ᤏᤧᤴᤗᤥ. ᤔᤣ᤺ᤴᤏᤣ ᤑᤠ᤹ᤃᤪ ᤁᤴ ᤔᤏᤠᤜᤠ᤹ᤖᤧ ᤜᤕᤱᤁᤡᤸᤗᤡᤱ ᤔᤧᤈᤥᤃᤢ᤹ᤖᤥ॥”
ᤒᤣᤌᤠᤏᤡ ᤐᤠᤱᤓᤣ᤹ᤀᤥ ᤕᤧᤛᤢᤴ ᤔᤢᤷᤖ ᤔᤧᤜᤢ᤺ᤳᤋᤢ᤹
(ᤔᤳᤋᤡ ᥈᥌:᥌-᥇᥉; ᤕᤢᤜᤢ ᥇᥈:᥇-᥎)
3ᤂᤧᤴ ᤕᤧᤶᤔᤥ ᤕᤧᤛᤢᤴ ᤒᤣᤌᤠᤏᤡ ᤐᤠᤱᤓᤣ᤹ᤀᤥ ᤗᤥᤃᤣ᤹#᥇᥊:᥉ ᤗᤥᤃᤣ᤹—ᤂᤧᤴ ᤑᤠ᤹ᤀᤡᤴ ᤂᤢᤏᤧ᤹ ᤐᤠᤖᤠᤔ ᤛᤠᤶᤔᤠᤱᤅᤡᤸᤗᤧ ᤕᤠᤱᤄᤢᤒᤠ ᤔᤏᤠ ᤘᤕᤧ॥ ᤋᤢᤰᤔᤠᤗᤠᤶ ᤁᤧᤘᤣ᤺ᤵᤐᤠ ᤛᤡᤔᤥᤏᤖᤧ ᤁᤢᤜᤡᤶᤔᤥ ᤘᤕᤧᤖᤥ॥ ᤜᤧᤰᤁᤩᤠᤱ ᤆᤠᤈᤠᤏᤢ ᤕᤢᤅᤧᤸᤗᤧ ᤔᤧᤴᤇᤢᤔᤠ᤹ᤎᤡᤰ ᤀᤡᤔᤧᤸᤗᤢᤱᤒᤠ ᤐᤠᤱᤒᤥ᤺ᤰ ᤑᤢᤱᤏᤠᤶ ᤏᤡ᤺ᤱᤃᤣ᤹ ᤁᤧᤕᤠᤰᤐᤠ ᤗᤧᤶᤓᤠᤗᤢᤱ ᤐᤷᤕᤠᤔᤠᤏᤢ ᤋᤩᤧᤀᤠᤱ ᤐᤷᤕᤠᤔᤠᤸᤗᤧ ᤁᤢᤛᤢ᤺ᤵᤔᤧᤴ ᤑᤢᤴᤍᤢᤀᤠᤱ ᤂᤧᤴ ᤑᤢᤱᤏᤠᤶᤔᤡᤴ ᤕᤧᤛᤢᤖᤧ ᤁᤢᤎᤧᤃᤣ᤺ᤰᤐᤥ ᤜᤢᤰᤂᤢᤖᤥ॥ 4ᤁᤖ ᤂᤧ᤹ᤕᤥ ᤁᤧᤘᤠ᤹ᤒᤠ ᤁᤢᤓᤠ ᤔᤏᤠᤜᤠ᤹ᤖᤧ ᤛᤠ᤹ᤖᤡᤰ ᤂᤢᤏᤡ᤹ ᤛᤡᤰ ᤐᤥᤃᤧᤀᤠᤱ ᤀᤰᤂᤣ ᤔᤧᤔᤧᤳᤇᤡᤱ. “ᤁᤴ ᤌᤣᤀᤠᤱ ᤆᤠᤛᤥᤰ ᤐᤠᤱᤔᤏᤠᤒᤠᤒᤣ᥅ 5ᤁᤱᤃ ᤁᤡᤵ ᤛᤢᤶᤛᤡ (᥉᥆᥆) ᤕᤢᤵᤐᤠᤕᤠᤱᤅᤥ#᥇᥊:᥋ ᤁᤡᤵ ᤛᤢᤶᤛᤡ ᤕᤢᤵᤐᤠᤕᤠᤱ—ᤃᤪᤡᤁ ᤐᤠ᤺ᤴᤍᤠᤱᤅᤥ “ᤍᤡᤏᤠᤖ॥” ᤁᤴ ᤑᤠ᤹ᤀᤡᤴ ᤌᤡᤰ ᤔᤏᤠ᤺ᤸᤗᤧ ᤋᤱᤒᤣᤎᤡᤰᤗᤧ ᤁᤢᤏᤠᤶᤕᤠᤰᤗᤥ॥ ᤛᤱᤔᤠᤀᤠᤱ ᤂᤧᤴ ᤕᤠᤱᤅᤡᤴ ᤕᤠᤱᤃᤧᤛᤠ᤹ᤒᤠᤜᤠ᤹ ᤐᤡᤔᤏᤠᤛᤡᤸᤗᤧ ᤐᤥ᤺ᤰᤂᤧᤒᤠ॥” ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤧᤴ ᤔᤧᤴᤇᤢᤔᤠ᤹ᤀᤡᤴ ᤔᤧᤓᤧ᤺ᤰᤋᤢᤖᤥ॥
6ᤁᤖ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤌᤣᤀᤠᤱ ᤂᤧᤴ ᤁᤧᤓᤧ᤺ᤰᤋᤢᤶᤒᤠᤒᤣ᥅ ᤂᤧᤴ ᤋᤢᤰᤂᤣ ᤔᤧᤈᤠ᤺ᤳᤋᤧᤶᤔᤡᤴᤏᤧ᤹ᤀᤥ᥄ ᤂᤧᤸᤗᤧᤃ ᤀᤠᤗᤠᤃᤡ ᤏᤢᤒᤠ ᤆᤥᤃᤢᤀᤠᤱ ᤘᤠ᤹ᤖᤥ॥ 7ᤕᤠᤱᤃᤧᤛᤠ᤹ᤒᤠᤜᤠ᤹ᤃ ᤂᤡᤏᤡ᤹ᤏᤢᤀᤣ ᤛᤍᤠᤍᤡᤱ ᤔᤧᤘᤠ᤹ᤖᤥ॥ ᤜᤧᤰᤁᤩᤠᤱ ᤀᤠᤵᤑᤠᤸᤗᤧᤛᤠᤱ ᤁᤶᤒᤪᤠᤱ ᤔᤧᤵᤔᤠ ᤁᤧᤛᤢᤰᤋᤢᤶᤛᤡᤶᤗᤥ. ᤁᤖ ᤀᤡᤱᤃᤠ᤹ᤃ ᤛᤍᤠᤍᤡᤱ ᤂᤡᤏᤡ᤹ᤏᤢ ᤔᤧᤘᤠ᤹ᤀᤠᤴᤗᤥ॥ 8ᤂᤧᤸᤗᤧ ᤀᤡᤱᤃᤠ᤹ ᤏᤠᤛᤡᤱᤃᤧᤴ ᤀᤠᤎᤰᤁᤡᤴ ᤗᤢᤵᤔᤠᤖᤧ ᤗᤠᤃᤡ ᤋᤃᤡᤀᤣ ᤀᤠᤎᤧᤃᤣ᤺ᤰᤐᤥ ᤑᤢᤱᤏᤠᤶ ᤜᤢ᤺ᤳᤋᤢᤀᤠᤱ ᤘᤠ᤹ᤖᤥ॥ 9ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤀᤠᤳᤋᤡᤛᤠᤱ ᤛᤢᤏᤠᤀᤡᤱ ᤀᤡᤱᤓᤥ᤺ᤸᤗᤧ. ᤂᤧᤵᤔᤥ ᤁᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤆᤥᤃᤢᤒᤠ ᤁᤢᤕᤠ᤺ᤶᤒᤰᤁᤡᤴ ᤔᤏᤠᤜᤠ᤹ᤖᤧ ᤔᤧᤈᤧᤰᤂᤢᤀᤠᤱ ᤏᤡᤱᤘᤠ᤹ ᤔᤧᤀᤡ᤺ᤳᤋᤢ᤹ᤖᤥ॥”
ᤕᤜᤢᤍᤠ᤺ᤸᤗᤧ ᤕᤧᤛᤢᤴ ᤀᤡᤱᤗᤧᤰᤋᤢ᤹
(ᤔᤳᤋᤡ ᥈᥌:᥇᥊-᥇᥌; ᤗᤢᤁᤠ ᥈᥈:᥉-᥌)
10ᤜᤧᤰᤁᤩᤠᤱ ᤌᤡᤰ-ᤏᤧᤳ ᤁᤢᤜᤢ᤹ᤛᤠᤶᤒᤠᤜᤠ᤹ᤀᤥ ᤕᤜᤢᤍᤠ ᤀᤡᤛ᤻ᤁᤖᤡᤕᤥᤋ ᤔᤧᤵᤔᤏᤠᤒᤧᤴ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤥ ᤕᤧᤛᤢᤴ ᤀᤡᤱᤗᤧᤰᤋᤢᤱ ᤑᤠ᤹ᤀᤠᤱ ᤐᤣᤖᤥ॥ 11ᤂᤧᤱᤜᤠ᤹ᤖᤧ ᤁᤴ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤀᤠᤱ ᤛᤠ᤹ᤖᤡᤰ ᤔᤧᤛ᤺ᤳᤋᤧᤖ ᤕᤜᤢᤍᤠᤴ ᤕᤠᤱ ᤐᤡᤀᤠᤛᤡᤃᤧ ᤑᤠ᤹ᤀᤠᤱ ᤔᤠᤱᤔᤧᤜᤧᤰᤋᤢ॥ ᤂᤧᤴ ᤕᤧᤶᤔᤠᤱᤎᤥ ᤕᤜᤢᤍᤠ᤺ᤸᤗᤧ ᤕᤧᤛᤢᤴ ᤀᤡᤱᤗᤧᤰᤔᤠ ᤑᤠ᤹ᤀᤠᤱ ᤛᤢᤕᤧᤶ ᤁᤥ᤺ᤵᤔᤠ ᤜᤣ᤺ᤰᤋᤢᤖᤥ॥
ᤋᤱᤏᤠᤶᤔᤥ ᤕᤧᤛᤢᤖᤧ ᤁᤢᤏᤢᤵᤔᤠ ᤆᤠ ᤆ᤹᤺
(ᤔᤳᤋᤡ ᥈᥌:᥇᥍-᥉᥆; ᤗᤢᤁᤠ ᥈᥈:᥍-᥈᥉; ᤕᤢᤜᤢ ᥇᥉:᥈᥇-᥉᥆)
12ᤜᤧᤰᤁᤩᤠᤱ ᤛᤡᤍᤠ᤹ ᤔᤧᤴᤓ᤺ᤴᤏᤣᤒᤠ ᤂᤖᤧ᤺ᤱ ᤆᤠᤔᤠ ᤋᤱᤏᤠᤶᤔᤡᤸᤗᤧ ᤌᤡᤰᤛᤡᤃᤣᤰᤐᤠ ᤕᤧᤴᤏᤥ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤔᤡᤸᤗᤧᤴ ᤔᤧᤸᤗᤢᤰᤛᤠᤴ ᤛᤡᤍᤢᤱᤈᤓᤠ ᤆᤥ᤺ᤰᤔᤠ ᤌᤡᤶ ᤘᤕᤧ॥ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤢᤏᤧ᤹ ᤛᤣ᤺ᤴᤔᤧᤍᤥᤛᤢ. “ᤀᤠᤍᤠᤱᤒᤣ. ᤀᤠᤏᤡ᤹ ᤀᤠᤳᤋᤥ ᤐᤣ᤺ᤰᤔᤠᤀᤠᤱ ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤔᤡᤸᤗᤧᤴ ᤛᤠᤓ᤺ᤱᤈᤠᤴ ᤕᤠᤖᤡᤵ ᤆᤥ᤺ᤰᤔᤠ ᤁᤧᤗ᤹ᤒᤠ ᤏᤡᤱᤘᤠ᤹ ᤁᤧᤃᤳᤋᤢᤒᤣ᥅” 13-14ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤏᤧᤵᤑᤢ ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤰᤂᤣ ᤔᤧᤳᤋᤢᤛᤡᤖ ᤕᤖᤢᤛᤗᤧᤶᤔᤥ ᤐᤠᤱᤄᤢᤛᤡ. “ᤂᤡᤴᤇᤡ᤹ ᤕᤧᤰᤕᤰᤁᤥ ᤁᤧᤗᤠ᤺ᤳᤇᤡᤖ ᤁᤧᤒᤳᤇᤡᤸᤗᤧ ᤆᤫᤠ᤺ᤳ ᤁᤢ᤺ᤴᤍᤠ ᤁᤧᤒᤱᤒᤠ ᤔᤏᤠᤎᤡᤰᤗᤧ ᤁᤧᤍᤢᤶᤛᤡ᤹॥ ᤂᤧᤴ ᤗᤠ᤺ᤵᤐᤠ ᤜᤡᤶᤔᤥ ᤌᤠᤖᤡᤰ ᤋᤡᤶᤍᤧᤳᤇᤧ᤹॥ ᤜᤧᤰᤁᤩᤠᤱ ᤜᤡᤶᤍᤠᤱᤒᤠᤴ ᤔᤧᤳᤋᤧᤳᤇᤧ᤹. ‘ᤀᤠᤏᤡᤃᤣ ᤛᤡᤰᤛᤠᤶᤒᤠᤸᤗᤧ ᤂᤧᤏᤧ᤹ ᤀᤰᤂᤣ ᤁᤧᤔᤧᤳᤋᤧᤀᤠᤱ ᤁᤧᤘᤠ᤹ᤖᤥ. ᤋᤖᤣ ᤕᤢᤱᤔᤠ ᤕᤠᤰᤑᤠᤱᤅᤡᤴ ᤀᤠᤳᤋᤥ ᤏᤧᤒᤣ᥅ ᤂᤧᤵᤔᤥ ᤀᤡᤱᤃᤠ᤹ ᤀᤠᤜᤢ᤹ᤛᤠᤶᤒᤠᤜᤠ᤹ᤏᤢ ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤔᤡᤸᤗᤧᤴ ᤛᤠᤓ᤺ᤱᤈᤠᤴ ᤆᤠᤱᤗᤥ॥’ 15ᤜᤧᤰᤁᤩᤠᤱ ᤂᤧᤸᤗᤧ ᤂᤡᤴᤇᤡ᤹ ᤌᤥᤛᤔᤠ ᤂᤠᤶᤗᤥᤀᤥ ᤕᤠᤖᤡᤵ ᤆᤥ᤺ᤰᤔᤏᤠᤒᤠ ᤗᤳᤇᤠ ᤕᤶᤒᤠ ᤕᤠᤰᤑᤠᤱᤅᤡᤴ ᤀᤥᤛᤣ᤺ᤴᤃᤧᤎᤠᤰᤛᤡ᤹॥ ᤂᤧᤵᤔᤥᤀᤣ ᤀᤠᤏᤡ᤹ ᤛᤠᤓ᤺ᤱᤈᤠᤴ ᤕᤠᤖᤡᤵ ᤆᤥᤃᤧᤳᤇᤧ᤹ᤀᤥ॥” 16ᤜᤧᤰᤁᤩᤠᤱ ᤂᤧᤴ ᤏᤧᤵᤑᤢ ᤁᤢᤜᤢ᤹ᤛᤠᤶᤒᤠᤜᤠ᤹ ᤐᤣᤃᤧᤳᤇᤡᤸᤗᤧ ᤕᤧᤛᤢᤖᤧ ᤐᤠ᤺ᤳᤋᤢᤒᤠ ᤜᤧᤰᤁᤣᤀᤣ ᤋᤢᤔᤧᤳᤇᤢᤀᤠᤱ ᤂᤧᤱᤜᤠ᤹ᤖᤧ ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤔᤡᤸᤗᤧᤴ ᤛᤠᤓ᤺ᤱᤈᤠᤴ ᤕᤠᤖᤡᤵ ᤆᤥᤃᤧᤳᤇᤢ॥ 17ᤂᤧᤴ ᤕᤢ᤺ᤴᤇᤡᤰ ᤕᤧᤛᤢᤴ ᤏᤢ ᤌᤡᤰ-ᤏᤧᤳ ᤁᤢᤜᤢ᤹ᤛᤠᤶᤒᤠᤜᤠ᤹ ᤂᤧᤵᤔᤥ ᤔᤧᤍᤩᤧᤖᤥ॥ 18ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤆᤠᤔᤠ ᤋᤧᤴᤏᤥ ᤔᤧᤈᤖ ᤔᤧᤕᤢᤅᤧᤸᤗᤧ ᤕᤧᤛᤢᤖᤧ ᤂᤧᤱᤜᤠ᤹ ᤀᤰᤂᤣ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤀᤡᤱᤃᤠ᤹ᤏᤢ ᤁᤧᤈᤠᤒᤠᤖ ᤁᤧᤕᤢᤱᤒᤠ ᤂᤡᤏᤡ᤹ᤀᤥ ᤌᤡᤰᤁᤡᤸᤗᤧ ᤀᤡᤱᤃᤠ᤹ ᤀᤡᤱᤗᤧᤰᤁᤠᤖᤥ॥” 19ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ ᤛᤠ᤹ᤖᤡᤰ ᤏᤡᤱᤛᤠᤶᤔᤥ ᤔᤧᤎᤩᤧᤀᤠᤱ ᤁᤧᤖᤧᤰᤗᤧ ᤂᤢᤏᤧ᤹ ᤛᤣ᤺ᤴᤍᤥᤔᤠ ᤔᤧᤜᤣ᤺ᤰᤋᤢ. “ᤍᤠᤱᤒᤣ. ᤁᤧᤒᤠ᤺ᤳᤋᤢᤒᤠ ᤔᤏᤠᤴ ᤀᤡᤱᤃᤠ᤹ᤀᤠᤒᤡ᥅”
20ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤂᤡᤏᤡ᤹ ᤌᤡᤰᤏᤧᤳᤋᤥ ᤀᤠᤸᤗᤥ ᤀᤡᤱᤃᤠ᤹ᤏᤢ ᤛᤥᤖᤡᤰ ᤁᤧᤈᤠᤒᤠᤖ ᤁᤧᤕᤢᤱᤒᤠᤎᤡᤰᤁᤡᤸᤗᤧ ᤀᤡᤱᤃᤠ᤹ ᤀᤡᤱᤗᤧᤰᤁᤠᤖᤥ॥ 21ᤔᤧᤴᤇᤠᤶᤛᤠ᤺ᤱᤃ ᤛᤠᤶᤕᤥᤛᤠᤵᤗᤠᤀᤥ ᤛᤠᤵᤋᤧᤒᤠ ᤁᤢᤀᤡᤛᤡ᤺ᤰᤁᤣ ᤛᤡᤔᤠᤀᤣ ᤐᤥᤱᤗᤥ॥ ᤁᤖ ᤔᤧᤴᤇᤠᤶᤛᤠᤴ ᤀᤡᤱᤃᤧᤗᤧᤰᤐᤧᤱᤃ ᤆᤡ᤺ᤳᤋᤧᤛᤩᤧᤖᤥ᥄ ᤂᤧᤱᤃ ᤛᤠᤔᤧᤘᤠ᤺ᤴᤇᤡᤱᤅᤡᤴᤏᤡᤸᤗᤧᤀᤣ ᤏᤢᤖᤧᤒᤠᤖᤥ॥”
22ᤂᤧᤱᤜᤠ᤹ᤖᤧ ᤔᤧᤈᤖ ᤔᤧᤕᤢᤅᤧᤸᤗᤧ ᤕᤧᤛᤢᤖᤧ ᤂᤖᤧ᤺ᤱᤅᤡᤴ ᤂᤵᤛᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤐᤡᤖᤢ. ᤜᤧᤰᤁᤩᤠᤱ ᤂᤧ᤺ᤰᤂᤢᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ ᤐᤡᤖᤢᤛᤡᤖ ᤀᤰᤂᤣ ᤔᤧᤳᤋᤢᤛᤡ. “ᤁᤴ ᤋᤠ᤺ᤰᤋᤧᤶᤔᤧ᤹ᤀᤥ. ᤁᤴ ᤀᤡᤱᤃᤠ᤹ ᤏᤠᤛᤡᤱᤃᤧᤴ ᤀᤠᤎᤰᤗᤥ॥” 23ᤜᤧᤰᤁᤩᤠᤱ ᤆᤸᤗᤱᤏᤠ ᤂᤥᤷᤕᤠᤴ ᤐᤰᤂᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤐᤡᤖᤢ. ᤜᤧᤰᤁᤩᤠᤱ ᤂᤧᤱᤜᤠ᤹ ᤐᤡᤖᤢᤛᤡᤀᤠᤱ ᤁᤧᤖᤧᤰᤗᤧ ᤔᤧᤎᤢᤅᤢᤖᤥ॥ 24ᤕᤧᤛᤢᤖᤧ ᤂᤧᤱᤜᤠ᤹ ᤕᤠᤶᤔᤥ ᤔᤧᤳᤋᤢᤛᤡ. “ᤁᤴ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤆᤥ᤺ᤰᤔᤏᤠᤒᤠ ᤁᤢᤛᤱ ᤔᤠᤱᤜᤢᤵᤗᤧᤴ ᤀᤠᤔᤠᤰᤂᤡ᤹ᤖᤥ॥ ᤁᤴ ᤕᤖᤡᤰ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤗᤠᤕᤥᤴ ᤘᤠᤜᤵᤔᤠ ᤑᤠ᤹ᤀᤠᤱ ᤘᤠᤍᤣ᤺ᤴᤗᤥ॥ 25ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤀᤠᤀᤡᤴᤏᤠᤱᤎᤥ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤥ ᤁᤢᤛᤱ ᤆᤧᤸᤗᤧᤰᤛᤣ᤹ ᤌᤡᤴ ᤔᤧᤴᤎᤢᤱᤅᤣ ᤌᤠᤖᤡᤰ ᤕᤠᤶᤔᤥ ᤆᤧᤸᤗᤧᤰᤛᤣ᤹ ᤌᤡᤴ ᤔᤧᤎᤢᤱᤅᤠᤴᤗᤥ॥” 26ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤔᤠᤱᤛᤧᤘᤠ ᤛᤠᤶᤗᤥᤎᤡᤰ ᤛᤠᤶᤔᤧᤗᤥᤖᤧᤀᤠᤱ ᤈᤤᤋᤢᤏ ᤁᤥ᤺ᤰᤔᤠᤀᤥ ᤔᤧᤒᤣᤖᤥ॥
ᤕᤧᤛᤢᤖᤧ ᤐᤋᤪᤢᤛᤧᤴ ᤁᤧᤏᤠ᤹ᤀᤠᤖᤥ ᤔᤧᤳᤋᤢ᤹
(ᤔᤳᤋᤡ ᥈᥌:᥉᥇-᥉᥋; ᤗᤢᤁᤠ ᥈᥈:᥉᥇-᥉᥊; ᤕᤢᤜᤢ ᥇᥉:᥉᥌-᥉᥎)
27ᤂᤧᤵᤔᤥ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤁᤧᤖᤧᤰᤗᤧ ᤀᤡᤱᤃᤠ᤹ ᤕᤠᤵᤔᤡ ᤁᤧᤗᤧᤖᤡ᤹ᤀᤠᤱ ᤁᤧᤒᤣᤃᤡ᤹. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣ ᤐᤠ᤺ᤳᤋᤢᤀᤠᤱ ᤐᤳ.
“‘ᤀᤡᤱᤃᤠ᤹ ᤔᤧᤸᤗᤢᤰᤁᤶᤒᤠᤴ ᤜᤡᤵᤋᤢᤱ.
ᤜᤧᤰᤁᤩᤠᤱ ᤁᤧᤖᤧᤰ ᤔᤧᤸᤗᤢᤰᤜᤠ᤹ ᤁᤧᤖᤧᤰ ᤐᤡᤛᤠᤱ ᤔᤧᤛᤧᤖᤥ॥’#ᤈᤁ ᥇᥉:᥍
28ᤁᤖ ᤀᤡᤱᤃᤠ᤹ ᤛᤡᤔᤧᤴᤗᤠᤶ ᤕᤠᤶᤔᤥ ᤜᤡᤱᤅᤠᤀᤠᤱ ᤂᤡᤏᤡ᤹ᤏᤢ᤺ᤸᤗᤧ ᤋᤃᤡ ᤃᤠᤗᤡᤗ ᤌᤢᤶᤔᤥ ᤐᤣ᤺ᤰᤁᤠᤖᤥ॥”
29ᤐᤋᤪᤢᤛᤖᤧ ᤕᤧᤛᤢᤴ ᤔᤧᤳᤋᤢ. “ᤁᤧᤖᤧᤰᤗᤧ ᤂᤧᤏᤧ᤹ ᤁᤧᤶᤗᤧᤳ ᤁᤧᤶᤎᤠᤛᤠᤱ ᤀᤡᤱᤃᤠ᤹ᤃ ᤀᤠᤵᤑᤠᤸᤗᤧᤀᤠᤱ ᤔᤧᤗᤧᤳᤏᤧᤴᤗᤥ॥”
30ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤧ᤹. ᤀᤠᤰᤂᤥ ᤛᤧᤴᤍᤡᤰ ᤏᤡᤗᤧᤱ ᤀᤡᤱᤘᤠ ᤁᤠᤔᤠᤏᤢ᤺ᤸᤗᤧ ᤋᤃᤡᤀᤣ. ᤂᤢᤏᤧ᤹ ᤁᤢᤛᤡᤱ ᤔᤧᤏᤡ᤺ᤳᤋᤢᤱᤅᤡᤴ ᤁᤧᤒᤠ᤺ᤳᤋᤢᤖ ᤂᤧᤏᤧ᤹ ᤛᤢᤶᤗᤧᤱ ᤁᤧᤏᤠ᤹ᤀᤠᤖᤥ॥”
31ᤁᤖ ᤐᤋᤪᤢᤛᤖᤧ ᤜᤠᤍᤡᤱ ᤌᤰᤋᤧᤖ ᤔᤧᤳᤋᤢ. “ᤔᤣ᤺ᤴᤗᤥ. ᤀᤡᤱᤃᤠ᤹ᤃ ᤂᤧᤏᤧ᤹ᤏᤢ ᤛᤡᤔᤠ ᤐᤥᤱᤛᤠᤱ ᤀᤠᤵᤑᤠᤸᤗᤧᤀᤠᤱ ᤔᤧᤏᤠ᤹ᤏᤧᤴᤗᤥ॥” ᤘᤣ᤹ ᤜᤢ᤹ᤛᤠᤶᤒᤠᤜᤠ᤹ᤖᤧᤀᤠᤱ ᤒᤠ ᤜᤧᤰᤁᤣᤀᤣ ᤔᤧᤒᤠ᤺ᤳᤋᤢᤖᤥ॥
ᤕᤧᤛᤢᤴ ᤃᤧᤋᤛᤔᤏᤡᤀᤥ ᤋᤢᤘᤠ ᤆᤥᤰ
(ᤔᤳᤋᤡ ᥈᥌:᥉᥌-᥊᥌; ᤗᤢᤁᤠ ᥈᥈:᥉᥏-᥊᥌)
32ᤜᤧᤰᤁᤩᤠᤱ ᤂᤧᤱᤜᤠ᤹ ᤃᤧᤋᤛᤔᤏᤡ ᤔᤧᤵᤔᤏᤠᤒᤠ ᤈᤤᤋᤢᤏ ᤛᤡᤱᤗᤠᤀᤥ ᤔᤧᤒᤣ॥ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤰᤂᤣ ᤔᤧᤳᤋᤢᤛᤡ. “ᤋᤢᤘᤠ ᤆᤥᤃᤢᤱᤅᤡᤸᤗᤧ ᤂᤡᤏᤡ᤹ ᤁᤵᤔᤥ ᤕᤢᤅᤧᤶᤔᤧ᤹ᤀᤥ॥” 33ᤜᤧᤰᤁᤩᤠᤱ ᤂᤢᤏᤧ᤹ ᤐᤋᤪᤢᤛ. ᤕᤠᤁᤢᤒ. ᤏᤢ ᤕᤢᤜᤢᤴᤏᤠᤛᤡ ᤋᤣ᤹ᤖᤢᤛᤡ॥ ᤂᤢᤏᤧ᤹ ᤛᤠ᤹ᤖᤡᤰ ᤁᤢᤏᤡᤱᤘᤠ᤹ ᤋᤢᤃᤧᤀᤠᤱ ᤏᤡᤱᤛᤠᤶᤔᤥ ᤌᤩᤧ॥ 34ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ᤃ ᤔᤡᤱᤘᤠᤖᤧ ᤕᤥ᤺ᤴᤍᤠᤱᤅᤠᤱ ᤛᤡᤔᤠᤗᤡᤱᤎᤥ ᤌᤠᤖᤡᤰ ᤁᤧᤖᤠᤱᤅᤠᤱ ᤘᤠ᤹ᤀᤠᤖᤥ॥ ᤂᤡᤏᤡ᤹ ᤁᤵᤔᤥ ᤆᤠᤱᤈᤠᤱᤅᤠᤱ ᤕᤢᤅᤧᤶᤔᤧ᤹ᤀᤥ॥”
35ᤂᤢᤏᤧ᤹ ᤔᤡᤛᤠᤰ ᤏᤠᤏᤠᤰ ᤐᤣᤀᤠᤱ ᤛᤠᤶᤒᤥᤴ ᤑᤴᤇᤡᤱᤗ ᤋᤢᤘᤠ ᤆᤥᤃᤢ. “ᤐᤥᤱᤏᤧ ᤑᤠ᤹ᤃᤪ ᤁᤴ ᤀᤡᤏᤥᤃᤧᤴ ᤋᤢᤰᤂᤣᤴ ᤀᤠᤛᤶᤍᤠᤱ ᤔᤧᤍᤠᤏᤧᤴᤗ॥ 36ᤐᤠᤏᤢᤍᤡᤱ ᤀᤠᤶᤒᤦ. ᤂᤧᤏᤧ᤹ ᤁᤧᤗᤠᤃᤡᤃ ᤁᤠᤰ ᤐᤥᤱᤔᤠ ᤛᤢᤰ॥ ᤁᤴ ᤀᤡᤏᤥᤃᤧᤴ ᤋᤢᤰᤂᤣᤖᤧᤴ ᤂᤥᤷᤕᤠᤴ ᤀᤡᤱᤃᤠ᤹ᤀᤥᤗᤠᤶ ᤂᤧᤳᤋᤧᤍᤣᤛᤧ᤹ᤀᤥ. ᤁᤖ ᤜᤧᤰᤁᤣᤛᤠᤱ ᤀᤠᤏᤡᤱᤘᤠ᤹ ᤜᤧᤰᤁᤣᤃ ᤔᤣ᤺ᤴ. ᤁᤖ ᤁᤧᤏᤡᤱᤘᤠ᤹ ᤜᤧᤰᤁᤣᤀᤣ ᤐᤥᤱᤗᤖᤥ॥”
37ᤜᤧᤰᤁᤩᤠᤱ ᤂᤢᤏᤧ᤹ ᤏᤢ᤺ᤰᤂᤧᤸᤗᤧ ᤂᤧᤴ ᤛᤢᤶᤒᤪᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ᤃ ᤔᤧᤀᤡᤵᤛᤧᤀᤠᤱ ᤔᤧᤏᤧᤛ᤻ᤛᤧᤒᤠ ᤋᤢᤔᤢᤛᤡ॥ ᤜᤧᤰᤁᤩᤠᤱ ᤐᤋᤪᤢᤛᤧᤴ ᤔᤧᤳᤋᤢ. “ᤛᤡᤔᤥᤏᤣ. ᤌᤣᤀᤠᤱ ᤁᤧᤀᤡᤵᤛᤧᤒᤠ᥅ ᤁᤢᤔᤢᤰᤌᤡᤰᤁᤠᤱ ᤆᤠᤱᤈᤠᤱᤅᤠᤱ ᤕᤢᤱᤔᤠ ᤁᤧᤴᤇᤢᤰᤋᤢᤴᤒᤡ᥅ 38ᤜᤱᤛᤠ᤹ᤔᤠᤀᤥ ᤔᤧᤎᤩᤧ᤹ᤀᤡᤃᤧᤴᤗ ᤑᤠ᤹ᤀᤠᤱ ᤏᤡᤱᤘᤠ᤹ ᤆᤠᤱᤈᤠᤱᤅᤠᤱ ᤋᤢᤘᤠ ᤆᤥᤃᤧᤶᤔᤧ᤹ᤀᤥ॥ ᤂᤡᤏᤡ᤹ ᤏᤡᤱᤘᤠ᤹ᤀᤡᤸᤗᤧ ᤏᤢ᤺ᤖᤡᤰᤁᤠᤱ ᤆᤥ᤺ᤰᤔᤠ ᤁᤧᤃᤥ᤺ᤳᤋᤢᤶ. ᤁᤖ ᤂᤡᤏᤡ᤹ ᤏᤠᤛᤡᤱᤃᤧᤴ ᤌᤰᤁᤡᤱᤃ ᤔᤧᤎᤢᤶᤔᤡᤴᤒᤠᤸᤗᤧ ᤆᤥᤃᤢᤸᤗᤧ ᤁᤧᤴᤇᤢᤰᤋᤢᤶᤔᤡᤸᤗᤥ॥”
39ᤕᤠᤶᤔᤥ ᤂᤢᤏᤧ᤹ ᤐᤣᤀᤠᤱ ᤀᤠᤴᤍᤣᤴ ᤜᤧᤰᤁᤣ ᤐᤠ᤺ᤳᤋᤢᤖ ᤋᤢᤘᤠ ᤆᤥᤃᤢ॥ 40ᤂᤢᤏᤧ᤹ ᤏᤢ᤺ᤰᤂᤧ ᤑᤧᤖᤧᤸᤗᤧ ᤕᤠᤶᤔᤥ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤀᤡᤵᤛᤧᤀᤠᤱ ᤔᤧᤏᤧᤛ᤻ᤛᤧᤒᤠ ᤋᤢᤔᤢᤛᤡ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤔᤡᤰᤕᤢᤔᤠᤸᤗᤧ ᤛᤠ᤹ᤖᤡᤰ ᤋᤖᤢᤛᤡᤀᤠᤱ ᤔᤧᤘᤕᤧ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤠᤰᤂᤣ ᤐᤠ᤺ᤵᤔᤠᤒᤣ ᤑᤠ᤹ᤀᤠᤱ ᤌᤣᤀᤠᤱ ᤏᤡᤱᤘᤠ᤹ ᤔᤧᤱᤃᤳᤋᤢᤴᤗᤥ॥
41ᤜᤧᤰᤁᤩᤠᤱ ᤂᤢᤏᤧ᤹ ᤛᤢᤶᤗᤧᤱᤅᤥ ᤏᤢ᤺ᤰᤂᤧ ᤑᤧᤖᤧᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤀᤠᤸᤗᤛᤠᤱ ᤁᤧᤏᤠᤛᤡᤀᤠᤱ ᤁᤧᤀᤡᤵᤛᤡᤀᤠᤱ ᤁᤧᤏᤧᤛ᤻ᤛᤡᤒᤡ᥅ ᤀᤠᤸᤗ ᤐᤥ᤺ᤰᤂᤧᤖᤥ᥄ ᤀᤥᤔᤧᤳᤋᤧᤶᤔᤧ᤹. ᤀᤡᤱᤃᤠ᤹ ᤔᤧᤴᤇᤠᤶᤛᤠᤴ ᤗᤠᤕᤥᤒᤠᤜᤠ᤹ᤖᤧ ᤂᤢᤏᤡ᤹ ᤜᤢᤰᤁᤥ ᤌᤠᤔᤠ ᤕᤧᤶᤔᤡᤴ ᤋᤩᤧᤖᤥ॥ 42ᤐᤥᤃᤧᤶᤔᤧ᤹. ᤁᤵᤔᤥᤗᤠᤶ ᤐᤡᤃᤡ᥄ ᤀᤥᤔᤧᤳᤋᤧᤶᤔᤧ᤹. ᤀᤡᤱᤃᤠ᤹ ᤕᤠᤵᤔᤡ ᤀᤡᤱᤃᤧᤗᤧᤰᤐᤧᤴ ᤂᤠ ᤑᤧᤴᤗ ᤐᤳᤗᤥ᥄”
ᤕᤧᤛᤢᤴ ᤔᤧᤍᤧᤶᤛᤢ᤹
(ᤔᤳᤋᤡ ᥈᥌:᥊᥍-᥋᥌; ᤗᤢᤁᤠ ᥈᥈:᥊᥍-᥋᥉; ᤕᤢᤜᤢ ᥇᥎:᥉-᥇᥈)
43ᤜᤧᤰᤁᤣᤗ᤹ᤖᤡᤰ ᤂᤢᤏᤧ᤹ ᤐᤠᤖᤧᤖ ᤐᤳᤇᤧᤸᤗᤧᤛᤠ ᤌᤡᤰ-ᤏᤧᤳ ᤁᤢᤜᤢ᤹ᤛᤠᤶᤒᤠᤜᤠ᤹ᤀᤥᤒᤠ ᤕᤜᤢᤍᤠ ᤔᤧᤵᤔᤏᤠᤒᤧᤴ ᤂᤧᤵᤔᤥ ᤁᤧᤖᤧ ᤋᤩᤧ॥ ᤂᤢᤏᤧ᤹ᤏᤢ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹. ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤏᤢ ᤕᤜᤢᤍᤡ ᤋᤢᤶᤗᤠᤶᤗᤥᤒᤠᤜᤠ᤹ᤖᤧ ᤔᤧᤒᤠᤱᤄᤢᤛᤡᤒᤠ ᤋᤠᤓᤣ ᤏᤢ ᤋᤰᤁᤠᤳ ᤁᤧᤃᤵᤐᤠ ᤕᤖᤡᤰ ᤔᤏᤠᤜᤠ᤹ᤀᤠᤱ ᤔᤧᤘᤕᤧᤖᤥ॥ 44ᤀᤠᤸᤗ ᤕᤧᤛᤢᤴ ᤀᤡᤱᤃᤧᤗᤧᤰᤐᤧᤸᤗᤧ ᤀᤠᤳᤋᤡᤴ ᤔᤏᤠᤴ ᤀᤡᤱᤃᤠ᤹ ᤆᤢᤵ ᤔᤧᤳᤋᤢᤱ. ᤂᤧᤴ ᤋᤧᤶᤛᤧᤶᤔᤧ᤹ᤀᤠᤱ ᤋᤣ᤹ᤖᤧᤶᤔᤧ᤹ ᤗ᤹ᤖᤡᤰ ᤔᤡᤰᤛᤣᤴ ᤐᤡᤖᤢᤛᤡᤀᤠᤱ ᤘᤕᤧᤖᤥ॥ 45ᤕᤜᤢᤍᤠᤴ ᤁᤧᤖᤧᤏᤢᤔᤧ᤺ᤴᤏᤣ ᤕᤧᤛᤢᤖᤥ ᤐᤣᤀᤠᤱ “ᤛᤡᤰᤛᤠᤶᤒᤣ” ᤔᤧᤳᤋᤢᤖ ᤆᤢᤵ ᤔᤧᤳᤋᤢᤖᤥ॥ 46ᤜᤧᤰᤁᤩᤠᤱ ᤘᤣ᤹ ᤔᤏᤠᤜᤠ᤹ᤖᤧ ᤕᤧᤛᤢᤴ ᤜᤢᤰ ᤔᤧᤕᤠᤰᤋᤢᤀᤠᤱ ᤔᤧᤍᤧᤶᤛᤢᤖᤥ॥ 47ᤂᤧᤵᤔᤥ ᤁᤧᤕᤧᤵᤐᤠᤜᤠ᤹ᤀᤥ ᤌᤡᤰᤁᤡᤸᤗᤧ ᤋᤠᤓᤣᤴ ᤋᤖᤵ ᤑᤡ᤺ᤰᤂᤢᤀᤠᤱ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤁᤧᤛᤧᤘᤠᤖᤥᤒᤠᤴ ᤆᤧᤵᤋᤢᤸᤗᤧ ᤁᤢᤏᤧᤰᤂᤥ᤹ᤒᤠᤴ ᤐᤧᤳᤋᤢ ᤌᤠᤛᤢᤖᤥ॥ 48ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤜᤠᤱᤒᤡᤑᤩᤢᤱ ᤁᤧᤈᤥ᤺ᤰᤐᤠᤀᤠᤒᤡ᥅ ᤌᤣᤀᤠᤱ ᤀᤡᤱᤃᤠ᤹ ᤀᤠᤍᤧᤶᤛᤧ ᤋᤠᤓᤣ ᤜᤧᤰᤁᤩᤠᤱ ᤋᤰᤁᤠ᤺ᤳᤏᤢ ᤁᤧᤍᤩᤧ᤹ᤀᤡᤒᤣ᥅ 49ᤀᤡᤱᤃᤠ᤹ᤃ ᤌᤡᤰᤕᤠ᤺ᤴᤎᤰᤛᤠ ᤔᤠᤱᤜᤡᤶ ᤗᤰᤂᤢᤶᤔᤥ ᤏᤡᤛᤠᤶ ᤜᤢ᤹ᤀᤡᤛᤧ ᤘᤕᤠᤱᤒᤠ ᤜᤧᤰᤁᤣᤛᤠᤱ ᤕᤠᤵᤔᤡ ᤁᤧᤴᤍᤧᤶᤛᤡᤴ. ᤁᤖ ᤛᤠᤶᤕᤥᤛᤠᤵᤗᤠᤀᤥ ᤁᤧᤒᤵᤐᤧᤴ ᤁᤧᤳᤗ ᤑᤠ᤹ᤀᤠᤱ ᤀᤰᤂᤣ ᤐᤥ᤺ᤰᤂᤧᤒᤠᤖᤥ॥” 50ᤜᤧᤰᤁᤩᤠᤱ ᤁᤧᤖᤧᤰ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤢᤏᤧ᤹ ᤐᤰᤔᤧᤎᤀᤠᤱ ᤔᤧᤄᤧᤳᤇᤡᤱ ᤔᤧᤒᤣᤖᤥ॥
51ᤂᤧᤵᤔᤥ ᤌᤡᤰ ᤏᤠᤗᤡᤱᤃᤧᤴ ᤌᤠᤱᤒᤧᤴᤏᤡᤸᤗᤧ ᤛᤢᤱᤄᤣᤰᤘᤠᤴ ᤜᤧᤶᤛᤡᤱᤅᤧᤀᤠᤱ ᤕᤧᤛᤢᤖᤧ ᤁᤢᤀᤣ᤺ᤰ ᤁᤢᤀᤣ᤺ᤰ ᤋᤡ᤺ᤰᤋᤢᤖ ᤘᤕᤧ॥ ᤂᤧᤴ ᤔᤏᤠᤛᤢᤶᤜᤠ᤹ᤖᤧ ᤂᤧᤴ ᤋᤧᤶᤔᤠ ᤔᤧᤃᤥ᤺ᤳᤋᤢᤸᤗᤧ 52ᤛᤢᤱᤄᤣᤰᤘᤠᤴ ᤐᤰᤌᤀᤠᤱ ᤗᤧᤰᤆᤠᤒᤧᤎᤡ᤺ᤰ ᤗᤥ᤺ᤰᤋᤧ ᤐᤣᤖᤥ॥
ᤕᤧᤛᤢᤴ ᤕᤧᤈᤢᤶᤓᤥ ᤋᤃᤡ ᤔᤧᤍᤣ᤹ᤖᤢ᤹
(ᤔᤳᤋᤡ ᥈᥌:᥋᥍-᥌᥎; ᤗᤢᤁᤠ ᥈᥈:᥋᥊-᥋᥋; ᤕᤢᤜᤢ ᥇᥎:᥇᥉-᥇᥊)
53ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤕᤧᤛᤢᤴ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤁᤢᤜᤡᤶᤔᤥ ᤔᤧᤍᤣ᤹ᤖᤢ॥ ᤂᤧᤵᤔᤥ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹. ᤕᤜᤢᤍᤡ ᤋᤢᤶ ᤗᤠᤶᤗᤥᤒᤠᤜᤠ᤹ᤏᤢ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤔᤧᤈᤢᤵᤛᤧᤀᤠᤱ ᤔᤧᤘᤕᤧᤖᤥ॥ 54ᤐᤋᤪᤢᤛᤧᤸᤗᤧᤀᤠᤱ ᤔᤠ᤺ᤱᤄᤠᤗᤠᤶ ᤕᤧᤛᤢᤴ ᤋᤡᤶᤍᤢᤖ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤁᤢᤗᤰᤂᤢᤶᤔᤥ ᤌᤠᤖᤡᤰ ᤁᤧᤖᤧ॥ ᤂᤧᤵᤔᤥ ᤛᤧᤘᤠᤖᤥᤒᤠᤜᤠ᤹ᤏᤢ ᤔᤡᤈᤠ᤹ᤏᤢ ᤕᤢᤅᤧ॥ 55ᤀᤠᤸᤗ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤕᤜᤢᤍᤡ ᤕᤧᤈᤢᤶᤓᤥᤖᤧᤴ ᤁᤠᤰ ᤐᤠᤛᤡᤱᤐᤠᤍᤠᤱᤗᤠᤜᤠ᤹ᤖᤧ ᤕᤧᤛᤢᤴ ᤛᤡᤔᤧᤸᤗᤧᤴ ᤂᤢᤶᤍᤡᤱ ᤐᤡᤔᤠ ᤑᤠ᤹ᤀᤠᤱ ᤂᤢᤏᤧ᤹ ᤁᤢᤍᤰᤗᤧᤱᤘᤠᤀᤥ ᤑᤥᤋᤩᤠᤒᤠ ᤀᤠᤵᤋᤡᤰᤜᤠ᤹ ᤔᤧᤃᤥ᤺ᤳᤋᤢ. ᤁᤖ ᤌᤣᤀᤠᤱ ᤔᤧᤱᤄᤥᤛᤢᤴᤗᤥ॥ 56ᤕᤖᤡᤰ ᤑᤥᤋᤩᤠᤒᤠ ᤀᤠᤵᤋᤡᤰ ᤁᤧᤃᤢ᤺ᤵᤐᤠᤜᤠ᤹ ᤕᤧᤛᤢᤖᤧ ᤁᤢᤍᤰᤗᤧᤱᤘᤠᤀᤥ ᤔᤧᤒᤠᤖᤧ. ᤁᤖ ᤂᤢᤏᤡ᤹ ᤐᤠᤴ ᤔᤧᤍᤅᤧᤴᤗᤥ॥
57ᤜᤧᤰᤁᤩᤠᤱ ᤁᤢᤓᤠ ᤔᤏᤠᤜᤠ᤹ᤖᤧ ᤔᤧᤒᤥᤃᤧᤀᤠᤱ ᤕᤧᤛᤢᤖᤧ ᤁᤢᤍᤰᤗᤧᤱᤘᤠᤀᤥ ᤀᤰᤂᤣᤗ᤹ᤖᤡᤰ ᤀᤡᤱᤗᤧᤰ ᤐᤠᤴ ᤔᤧᤒᤠ᤺ᤳᤋᤢ. 58“ᤀᤠᤏᤡᤃᤣ ᤕᤧᤛᤢᤖᤧ ᤀᤰᤂᤣ ᤐᤠ᤺ᤳᤋᤢᤒᤠ ᤂᤧᤵᤛᤢᤶᤒᤧᤖᤥ. ‘ᤁᤴ ᤔᤏᤠᤜᤠ᤹ᤖᤧ ᤔᤧᤈᤥᤃᤢᤒᤠ ᤔᤠᤱᤜᤡᤶᤔᤡᤴ ᤕᤛ᤻ᤛᤢᤱᤅᤠᤱ ᤛᤢᤶᤕᤧᤴ ᤀᤣᤃᤠᤱ. ᤔᤏᤠᤜᤠ᤹ᤖᤧ ᤔᤧᤶᤓᤠ᤹ᤀᤣ. ᤘᤣ᤹ ᤔᤠᤱᤜᤡᤶᤔᤡᤴ ᤆᤥᤃᤢᤱᤗᤥ॥’” 59ᤜᤧᤰᤁᤣᤛᤠᤱ ᤂᤧᤱᤜᤠ᤹ᤖᤧ ᤕᤧᤛᤢᤖᤧ ᤁᤢᤔᤧᤴᤏᤥ ᤀᤡᤱᤗᤧᤰ ᤔᤧᤒᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤔᤧᤍᤅᤧᤴᤗᤥ॥
60ᤜᤧᤰᤁᤣ᤺ᤸᤗᤧ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤴ ᤁᤧᤖᤧᤰᤗᤧ ᤂᤢᤏᤡ᤹ ᤋᤃᤡ ᤐᤥᤃᤧᤀᤠᤱ ᤕᤧᤛᤢᤴ ᤛᤣ᤺ᤴᤍᤥᤛᤢ. “ᤁᤴ ᤔᤏᤠᤜᤠ᤹ᤖᤧ ᤁᤧᤍᤰᤗᤧᤱᤘᤠᤀᤥ ᤐᤡᤖᤧᤳᤇᤢᤒᤠ ᤋᤥ᤺ᤴᤍᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤌᤣᤀᤠᤱ ᤂᤧᤏᤧ᤹ ᤏᤥᤃᤵ ᤁᤧᤶᤒᤡᤖᤢᤴᤇᤡᤴᤒᤠᤒᤣ᥅”
61ᤁᤖ ᤕᤧᤛᤢᤖᤧ ᤌᤣᤀᤠᤱ ᤏᤥᤃᤵ ᤔᤧᤶᤒᤡᤛᤡᤱᤅᤣ ᤛᤫᤠ᤺ᤳ ᤕᤧᤒᤧ॥ ᤕᤠᤶᤔᤥ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤛᤣ᤺ᤴᤍᤥᤛᤢ. “ᤂᤧᤏᤧ᤹ ᤔᤢ᤹ᤀᤡᤛᤠᤶᤍᤠᤱᤒᤠ ᤏᤡᤱᤘᤠ᤹ᤑᤢᤛᤠ ᤂᤪᤡᤛ᤻ᤋᤏᤧᤒᤡ᥅”
62ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤥᤖᤥ. ᤀᤡᤱᤃᤠ᤹ᤀᤠᤖᤥ᥄ ᤁᤖ ᤀᤡᤱᤃᤠ᤹ ᤔᤧᤳᤏᤡᤱ. ᤀᤡᤱᤃᤠ᤹ ᤔᤧᤴᤇᤠᤶᤛᤠᤴ ᤔᤢᤰᤛᤠᤶᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤈᤢᤵᤛᤠᤱ ᤗᤧᤵᤔᤠᤱ ᤕᤢᤱᤅᤠᤒᤠ ᤏᤢ ᤛᤠᤱᤃᤪᤠᤶᤐᤣᤍᤠᤱᤅᤥᤏᤢ ᤂᤠᤵᤔᤡ᤺ᤳᤋᤥ ᤕᤢ᤺ᤀᤠᤒᤠ ᤁᤧᤏᤡᤛᤢᤶᤗᤥ॥”
63ᤜᤧᤰᤁᤩᤠᤱ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤁᤢᤛᤠᤰᤁᤧᤴ ᤀᤥᤛᤣ᤺ᤴᤎᤠᤰᤋᤢᤛᤡᤖ ᤀᤠᤒᤠᤅᤣ ᤁᤢᤍᤣ᤺ᤳᤋᤡᤴ ᤌᤧ᤺ᤰᤂᤢᤀᤠᤱ ᤀᤰᤂᤣ ᤐᤠ᤺ᤳᤋᤢ. “ᤀᤠᤸᤗ ᤀᤠᤏᤡ᤹ ᤘᤣ᤹ ᤋᤥ᤺ᤴᤍᤡᤜᤠ᤹ ᤌᤣᤀᤠᤱ ᤆᤠᤜᤠᤒᤠ ᤀᤠᤈᤥᤃᤧᤒᤣ᥅ 64ᤁᤸᤗᤧᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤔᤠᤱ ᤆᤧ᤹ᤕᤠᤐᤠᤴ ᤐᤠ᤺ᤳᤋᤢᤒᤠᤴ ᤂᤡᤏᤡ᤹ ᤁᤧᤄᤧᤵᤛᤢᤶᤗᤥ॥ ᤀᤠᤸᤗ ᤌᤧᤔᤠ ᤁᤧᤀᤡ᤺ᤳᤋᤢᤶᤒᤣ᥅”
ᤂᤧᤵᤔᤥ ᤁᤧᤘᤠ᤹ᤒᤠ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤛᤡᤔᤧᤸᤗᤧ ᤂᤢᤶᤍᤡᤱ ᤂᤥᤔᤠᤀᤣ ᤐᤥᤱ ᤑᤠ᤹ᤀᤠᤱ ᤔᤧᤔᤧᤳᤋᤢ॥ 65ᤜᤧᤰᤁᤩᤠᤱ ᤁᤢᤓᤠᤖᤧ ᤂᤢᤏᤧ᤹ ᤌᤩᤠ᤺ᤳ ᤔᤧᤎᤥ᤺ᤰᤂᤢᤀᤠᤱ ᤁᤢᤓᤠᤖᤧ ᤁᤢᤔᤡᤰᤁᤧᤴ ᤔᤧᤍᤧᤵᤋᤢᤀᤠᤱ ᤂᤢᤏᤡ᤹ ᤜᤢᤰᤐᤢᤳᤋᤡᤸᤗᤧ ᤔᤧᤗᤰᤋᤢᤖ “ᤔᤠᤱᤏᤡᤱᤘᤠ᤹ᤐᤠᤴ ᤐᤠᤖᤧ᤹. ᤜᤠ᤺ᤳᤗᤧ ᤁᤧᤜᤡᤵᤋᤧᤒᤣ᥅” ᤔᤧᤔᤧᤳᤋᤢ॥ ᤜᤧᤰᤁᤩᤠᤱ ᤂᤢᤏᤧ᤹ ᤁᤧᤃᤥᤒᤠ ᤌᤰᤛᤢᤒᤠᤜᤠ᤹ᤖᤧ ᤔᤧᤍᤣ᤹ᤖᤢᤀᤠᤱ ᤔᤧᤜᤡᤵᤋᤢᤖᤥ॥
ᤐᤋᤪᤢᤛᤖᤧ ᤕᤧᤛᤢᤴ ᤏᤠ᤹ᤖᤢ᤹
(ᤔᤳᤋᤡ ᥈᥌:᥌᥏-᥍᥋; ᤗᤢᤁᤠ ᥈᥈:᥋᥌-᥌᥈; ᤕᤢᤜᤢ ᥇᥎:᥇᥋-᥇᥎)
66ᤐᤋᤪᤢᤛᤧᤴ ᤕᤥ ᤗᤰᤂᤢᤶᤔᤥ ᤘᤕᤧᤸᤗᤧ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤁᤢᤛᤧᤘᤠᤖᤥᤔᤠ ᤆᤢᤰᤔᤠᤎᤡᤰ ᤂᤧᤵᤔᤥ ᤋᤩᤧᤀᤠᤱ 67ᤐᤋᤪᤢᤛᤧᤴ ᤔᤡᤈᤠ᤹ᤏᤢ ᤕᤢᤅᤧᤒᤠ ᤏᤡᤛᤢᤀᤠᤱ ᤁᤢᤒᤣᤛᤠᤱ ᤐᤣᤀᤠᤱ ᤏᤢᤖᤡᤰ ᤀᤥᤔᤧᤳᤋᤢᤖ ᤔᤧᤳᤋᤢ. “ᤂᤧᤏᤧ᤹ᤃ ᤏᤠᤛᤖᤡ ᤕᤧᤛᤢᤴ ᤏᤢ ᤁᤧᤘᤕᤧ ᤔᤣ᤺ᤶᤒᤡ᥅”
68ᤁᤖ ᤐᤋᤪᤢᤛᤖᤧ ᤂᤧᤴ ᤏᤠ᤹ᤖᤢᤖ ᤔᤧᤳᤋᤢ. “ᤀᤡᤱᤃᤠ᤹ ᤂᤢᤏᤧ᤹ ᤁᤢᤛᤡᤱ ᤔᤧᤏᤡ᤺ᤳᤋᤢᤱᤅᤡᤴᤗᤥ᥄ ᤂᤧᤏᤧ᤹ ᤌᤣ ᤁᤧᤒᤠ᤺ᤳᤋᤢᤒᤠ ᤀᤡ᥅” ᤜᤧᤰᤁᤩᤠᤱ ᤂᤢᤏᤧ᤹ ᤗᤠ᤺ᤰᤁᤠᤳ ᤐᤣ᤺ᤰᤔᤠ ᤗᤠᤶᤎᤣ᤺ᤵ ᤗᤧᤵᤔᤠᤱ ᤆᤳᤇᤡᤱ॥ ᤜᤧᤰᤁᤩᤠᤱ ᤒᤠ ᤂᤧᤴ ᤕᤧᤶᤔᤥ ᤀᤡᤱᤘᤠ ᤁᤠᤛᤧ॥
69ᤜᤧᤰᤁᤩᤠᤱ ᤂᤧᤴ ᤛᤣᤘᤠᤖᤥᤔᤠ ᤆᤢᤰᤔᤧᤴ ᤕᤠᤶᤔᤥ ᤋᤩᤧᤀᤠᤱ ᤂᤧᤵᤔᤥ ᤐᤋᤪᤢᤛᤧᤴ ᤏᤡᤛᤢᤀᤠᤱ ᤁᤢᤄᤡᤖᤡ ᤁᤧᤕᤧᤵᤐᤠ ᤔᤏᤠᤜᤠ᤹ ᤔᤧᤳᤋᤢᤛᤡ. “ᤁᤴ ᤔᤏᤠ᤺ᤱᤃ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ᤀᤥ ᤌᤡᤰᤗᤥ॥” 70ᤁᤖ ᤐᤋᤪᤢᤛᤖᤧ ᤕᤠᤶᤔᤥ ᤏᤠ᤹ᤖᤢ॥
ᤕᤠᤱᤛᤡ ᤂᤧᤵᤔᤥ ᤁᤧᤘᤠ᤹ᤒᤠ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤔᤧᤏᤡᤛᤢᤀᤠᤱ ᤔᤧᤔᤧᤳᤋᤢ. “ᤛᤧᤰᤂᤠᤛᤠᤱ ᤂᤧᤱᤜᤠ᤹ᤀᤥ ᤂᤧᤏᤧ᤹ ᤌᤡᤰᤏᤧᤖᤥ. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ᤀᤠᤱ ᤃᤠᤗᤡᤗᤗᤠᤶ ᤁᤧᤍᤩᤧᤒᤠᤖᤥ॥”
71ᤜᤧᤰᤁᤣ᤺ᤸᤗᤧ ᤐᤋᤪᤢᤛᤖᤧ ᤔᤠᤱᤜᤧᤰᤛᤡᤱᤗ ᤀᤰᤂᤣ ᤔᤧᤳᤋᤢᤛᤡ. “ᤁᤴ ᤔᤏᤠᤴ ᤜᤠᤳ ᤀᤡ ᤑᤠ᤹ᤀᤠᤱ ᤔᤧᤏᤡᤛᤢᤱᤅᤡᤴᤗᤥ᥄ ᤂᤡᤏᤡ᤹ ᤌᤧᤔᤠ ᤁᤧᤒᤠ᤺ᤳᤋᤢᤶᤒᤠ ᤀᤡ᥅”
72ᤂᤡᤔᤥ ᤀᤡᤱᤘᤠᤴ ᤏᤡᤛᤡᤃᤣᤰ ᤗᤧᤱ ᤁᤠᤛᤧᤖᤥ॥ ᤜᤧᤰᤁᤩᤠᤱ ᤐᤋᤪᤢᤛᤖᤧ “ᤏᤡᤗᤧᤱ ᤀᤡᤱᤘᤠ ᤁᤠᤔᤠᤏᤢ᤺ᤸᤗᤧ ᤋᤃᤡ ᤂᤧᤏᤧ᤹ ᤛᤢᤶᤗᤧᤱ ᤁᤧᤏᤠ᤹ᤀᤠᤖᤥ” ᤑᤠ᤹ᤀᤠᤱ ᤕᤧᤛᤢᤖᤧ ᤔᤧᤳᤋᤢᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤀᤡᤋᤢᤀᤠᤱ ᤛᤠ᤹ᤖᤡᤰ ᤜᤠᤒᤧᤖᤥ॥
Currently Selected:
ᤔᤷᤁᤢᤛ 14: LIFOTNT
Highlight
Share
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.