ᤔᤷᤁᤢᤛ 12

ᤁᤢᤓᤪᤧ᤺ᤱ ᤀᤡᤰᤔᤛᤠᤒᤠᤜᤠ᤹ᤖᤧᤴ ᤂᤧᤍᤠ᤹

(ᤔᤳᤋᤡ ᥈᥇:᥉᥉-᥊᥌; ᤗᤢᤁᤠ ᥈᥆:᥏-᥇᥏)

1ᤕᤧᤛᤢᤴ ᤂᤧᤱᤜᤠ᤹ᤏᤢ ᤂᤧᤍᤠ᤹ᤀᤥ ᤀᤰᤂᤣᤗ᤹ᤖᤡᤰ ᤐᤠᤖᤧ. “ᤀᤢᤴᤇᤣ᤺ᤴ ᤔᤏᤠᤎᤡᤰᤗᤧ ᤗᤳᤇᤠ ᤀᤡᤰᤁᤥ ᤆᤧᤸᤗᤧᤰᤛᤣ᤹ ᤗᤣ᤺ᤳᤋᤢᤀᤠᤱ ᤁᤢᤄᤡᤖᤡ ᤗᤢᤱᤎᤠᤰ ᤛᤧᤳᤋᤢᤀᤠᤱ ᤑᤠᤅᤢ. ᤜᤧᤰᤁᤩᤠᤱ ᤁᤢᤗᤢᤶᤔᤥ ᤗᤢᤶᤒᤠᤳ ᤋᤕᤢᤀᤠᤱ ᤂᤧᤵᤔᤥ ᤆᤧᤸᤗᤧᤰᤛᤣ᤹ ᤀᤣ᤺ᤶᤔᤠ ᤋᤧᤴᤎᤡᤰ ᤆᤥᤃᤢ॥ ᤀᤡᤰ ᤁᤥᤔᤠ ᤕᤠᤰᤛᤠᤎᤡᤰᤁᤠᤱ ᤆᤥᤃᤢ. ᤜᤧᤰᤁᤩᤠᤱ ᤂᤧᤴ ᤆᤧᤸᤗᤧᤰᤛᤣ᤹ ᤀᤡᤰᤁᤡᤴ ᤁᤢᤓᤪᤧ᤺ᤱ ᤗᤰ ᤂᤥᤔᤠᤖᤧ ᤗᤠᤃᤡ ᤀᤡᤰᤔᤛᤠᤒᤠᤜᤠ᤹ ᤐᤡᤖᤢᤛᤡᤀᤠᤱ ᤂᤢᤏᤧ᤹ ᤗᤠᤶᤍᤡᤰ ᤆᤥ᤺ᤰᤛᤧ ᤐᤣᤖᤥ॥ 2ᤜᤧᤰᤁᤩᤠᤱ ᤆᤧᤸᤗᤧᤰᤛᤣ᤹ ᤋᤢᤵᤔᤠ ᤕᤧᤶ ᤋᤩᤧ᤺ᤸᤗᤧ ᤁᤢᤗᤰ ᤗᤠᤛᤧ ᤁᤢᤛᤧᤘᤠᤖᤥᤒᤠᤎᤡᤰ ᤀᤡᤰᤔ᤺ᤒᤠᤜᤠ᤹ᤖᤥ ᤐᤠᤱᤄᤢᤖᤥ॥ 3ᤁᤖ ᤂᤧᤴ ᤀᤡᤰᤔᤛᤠᤒᤠᤜᤠ᤹ᤖᤧ ᤂᤢᤏᤧ᤹ᤃ ᤔᤧᤜᤡᤵᤋᤢᤀᤠᤱ ᤌᤣᤀᤠᤱ ᤔᤧᤶᤒᤡᤀᤣ ᤜᤠᤒᤠ ᤔᤧᤒᤠᤱᤄᤢ ᤔᤧᤍᤣ᤺ᤛᤢᤖᤥ॥ 4ᤕᤠᤶᤔᤥ ᤂᤧᤴ ᤀᤡᤰᤁᤧᤸᤗᤧ ᤁᤢᤴᤍᤠᤱᤒᤠᤸᤗᤧ ᤘᤣ᤹ᤛᤔᤠ ᤛᤧᤘᤠᤖᤥᤒᤠᤴ ᤐᤠᤱᤄᤢ॥ ᤂᤧᤴᤏᤠᤱ ᤁᤢᤎᤧᤃᤣ᤺ᤰᤐᤥ ᤔᤧᤄᤠᤰᤂᤢᤖ ᤁᤢᤈᤠ᤺ᤳᤌᤡ ᤔᤧᤍᤣ᤺ᤛᤢ॥ 5ᤕᤠᤶᤔᤥ ᤘᤣ᤹ᤛᤔᤠ ᤛᤧᤘᤠᤖᤥᤒᤠᤴ ᤐᤠᤱᤄᤢ. ᤜᤧᤰᤁᤩᤠᤱ ᤂᤧᤱᤃ ᤔᤧᤜᤡᤵᤋᤢᤀᤠᤱ ᤔᤧᤛᤧᤖᤢᤖᤥ॥ ᤜᤧᤰᤁᤣᤗ᤹ᤖᤡᤰ ᤂᤢᤏᤧ᤹ ᤘᤣ᤹ ᤘᤣ᤹ ᤕᤖᤡᤰ ᤛᤧᤘᤠᤖᤥᤒᤠᤜᤠ᤹ ᤐᤠᤱᤄᤢᤛᤡᤸᤗᤧ ᤁᤢᤓᤠ ᤔᤧᤜᤡᤵᤋᤢᤛᤡ. ᤁᤢᤓᤠ ᤔᤧᤛᤧᤖᤢᤛᤡᤖᤥ॥ 6ᤂᤧᤴ ᤀᤡᤰᤁᤧᤸᤗᤧ ᤁᤢᤴᤍᤠᤱᤒᤠᤸᤗᤧ ᤗᤢᤱᤔᤠ᤹ ᤋᤢᤰᤋᤢᤒᤠ ᤗᤳᤌᤡᤰᤗᤰ ᤁᤢᤛ᤻ᤛᤠ ᤘᤕᤧ॥ ᤀᤠᤸᤗ ᤁᤴ ᤀᤠᤛ᤻ᤛᤠᤴ ᤐᤠᤱᤄᤢᤱᤅᤡᤸᤗᤧᤃ ᤛᤧᤰᤂᤠᤛᤠᤱ ᤁᤢᤏᤠ ᤔᤧᤛᤠ᤹ᤖᤢᤒᤡᤗᤠ ᤑᤠ᤹ᤀᤠᤱ ᤀᤡᤋᤢᤀᤠᤱ ᤁᤧᤖᤧᤰᤏᤢ᤺ᤸᤗᤧ ᤀᤣᤃᤠᤱ ᤐᤠᤱᤄᤢᤖᤥ॥

7“ᤁᤖ ᤂᤧᤴ ᤀᤡᤰᤔᤛᤠᤒᤠᤜᤠ᤹ ᤀᤰᤂᤣ ᤔᤧᤔᤧᤳᤇᤡᤱ. ‘ᤁᤱᤃ ᤁᤢᤶᤒᤠᤖᤧ ᤁᤢᤗᤰ ᤁᤧᤄᤥᤒᤠᤖᤥ. ᤁᤴ ᤛᤧᤖᤢᤶᤔᤠᤱ ᤁᤢᤗᤠᤈᤣ᤹ ᤛᤡᤱᤒᤢᤱᤜᤠ᤹ ᤀᤠᤏᤡ᤹ ᤜᤢᤰᤁᤠᤵᤐᤠᤛᤡᤖᤥ॥’ 8ᤜᤧᤰᤁᤩᤠᤱ ᤁᤢᤛ᤻ᤛᤠᤴᤏᤠᤱ ᤔᤧᤜᤡᤵᤋᤢ ᤔᤧᤛᤧᤖᤢᤀᤠᤱ ᤆᤧᤸᤗᤧᤰᤛᤣ᤹ ᤀᤡᤰᤁᤥᤗᤠᤶ ᤗᤠ᤺ᤰᤁᤠᤳ ᤗᤠᤵᤔᤧᤓᤢᤛᤢᤖᤥ॥”

9ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤛᤣ᤺ᤴᤗᤠᤵᤋᤢᤛᤡ. “ᤀᤠᤸᤗ ᤂᤧᤴ ᤆᤧᤸᤗᤧᤰᤛᤣ᤹ ᤀᤡᤰᤁᤧᤸᤗᤧ ᤁᤢᤴᤍᤠᤱᤒᤠᤴ ᤋᤠᤀᤠᤱ ᤂᤧᤱᤜᤠ᤹ ᤀᤠᤰᤂᤣ ᤔᤧᤳᤋᤢᤛᤡ᤹ᤒᤣ᥅ ᤛᤧᤰᤂᤠᤛᤠᤱ ᤂᤢᤏᤧ᤹ ᤁᤧᤖᤧᤰ ᤛᤧᤖᤢᤛᤡᤀᤠᤱ ᤂᤧᤴ ᤆᤧᤸᤗᤧᤰᤛᤣ᤹ ᤀᤡᤰᤁᤡᤴ ᤘᤣ᤹ ᤔᤏᤠᤜᤠ᤹ ᤐᤡᤖᤢᤛᤡ᤹ᤖᤥ॥ 10ᤁᤴ ᤛᤠᤶᤕᤥᤛᤠᤵᤗᤠᤀᤥ ᤁᤧᤒᤵᤐᤠ ᤐᤠ᤺ᤴᤏᤡᤴ ᤔᤧᤴᤏᤡ᤺ᤳᤋᤣ ᤁᤧᤘᤕᤡ᤹ᤒᤡ᥅

“‘ᤗᤢᤱᤃᤠᤶᤒᤠᤜᤠ᤹ᤖᤧ ᤔᤧᤏᤠ᤹ᤖᤢᤒᤠ ᤗᤢᤱᤅᤡᤴ

ᤁᤠᤰᤏᤢ᤺ᤸᤗᤧ ᤁᤧᤕᤧᤰᤐᤠ ᤁᤢᤶᤔᤠᤗᤢᤱ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥

11ᤁᤱᤃ ᤕᤜᤘᤣ ᤍᤠᤱᤒᤠᤸᤗᤧᤀᤣ ᤆᤥᤃᤢᤒᤠᤖᤥ.

ᤜᤧᤰᤁᤩᤠᤱ ᤁᤴ ᤀᤠᤏᤡ᤹ ᤏᤡᤔᤥ ᤏᤡᤱᤘᤠ᤹ ᤁᤧᤔᤠᤒᤠ ᤆᤥᤰᤗᤥ॥’”#ᤏᤡᤱ ᤛᤢᤶ ᥇᥇᥎:᥈᥈-᥈᥉

12ᤂᤧᤱᤜᤠ᤹ᤖᤧ ᤕᤧᤛᤢᤴ ᤋᤧᤶᤔᤠ ᤏᤡᤱᤘᤠ᤹ ᤔᤧᤈᤥᤃᤢ. ᤌᤣᤀᤠᤱᤓᤧᤸᤗᤧ ᤕᤧᤛᤢᤖᤧ ᤐᤠ᤺ᤳᤋᤢᤒᤠ ᤂᤧᤍᤠ᤹ᤀᤥ ᤂᤧᤱᤜᤠ᤹ ᤁᤢ᤹ᤀᤡᤁᤧᤓᤧᤶᤒᤠ ᤀᤡᤰᤔᤛᤠᤒᤠᤜᤠ᤹ᤏᤢ ᤋᤱᤄᤢᤛᤡᤒᤠᤴ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ ᤔᤧᤄᤥᤛᤢ॥ ᤁᤖ ᤂᤧᤱᤜᤠ᤹ᤖᤧ ᤔᤏᤠᤜᤠ᤹ ᤔᤧᤃᤡᤖᤢᤛᤡᤀᤠᤱ ᤂᤢᤏᤧ᤹ ᤔᤧᤗᤧᤖᤢᤀᤠᤱ ᤔᤧᤒᤣᤖᤥ॥

ᤀᤣ᤺ᤱᤕᤠᤱ ᤜᤢᤱᤔᤠᤒᤡ ᤔᤣ᤺ᤶᤒᤡ᥅

(ᤔᤳᤋᤡ ᥈᥈:᥇᥋-᥈᥈; ᤗᤢᤁᤠ ᥈᥆:᥈᥆-᥈᥌)

13ᤂᤧᤸᤗᤧ ᤁᤢᤀᤣᤃᤠᤱ ᤁᤢᤓᤠ ᤕᤜᤢᤍᤡ ᤗᤠᤶᤗᤥᤒᤠᤜᤠ᤹ᤖᤧ ᤐᤠ᤺ᤴᤏᤥ ᤋᤧᤶᤔᤠᤀᤠᤱ ᤕᤧᤛᤢᤴ ᤀᤠᤵᤋᤡᤰ ᤁᤢ᤺ᤵᤔᤠ ᤑᤠ᤹ᤀᤠᤱ ᤁᤢᤓᤠ ᤑᤖᤡᤛᤡᤜᤠ᤹ ᤏᤢ ᤜᤧᤖᤥᤍ ᤜᤠᤱᤅᤡᤸᤗᤧ ᤁᤢᤔᤏᤠᤜᤠ᤹#᥇᥈:᥇᥉ ᤜᤧᤖᤥᤍ ᤜᤠᤱᤅᤡᤸᤗᤧ ᤁᤢᤔᤏᤠᤜᤠ᤹—ᤃᤪᤡᤁ ᤐᤠ᤺ᤴᤍᤠᤱᤅᤥ “ᤜᤧᤖᤥᤍᤡᤜᤠ᤹॥” ᤂᤧᤱᤜᤠ᤹ ᤕᤜᤢᤍᤡᤛᤡ ᤔᤧᤘᤕᤧ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤠᤒᤠᤅᤣ ᤁᤢᤓᤠ᤹ ᤂᤥᤔᤠᤖᤧ ᤗᤠᤃᤡ ᤖᤥᤔᤡᤜᤠ᤹ᤖᤧ ᤛᤣ᤺ᤰᤕᤢᤰ ᤔᤧᤈᤥᤃᤢᤛᤡᤒᤠᤜᤠ᤹ ᤔᤧᤓᤠ᤹ᤖᤢᤛᤡ॥ ᤑᤖᤡᤛᤡᤜᤠ᤹ᤖᤧ ᤖᤥᤔᤡ ᤌᤡᤶᤔᤡᤴ ᤔᤧᤀᤳᤋᤢ. ᤁᤖ ᤏᤧᤵᤔᤠᤱ ᤗᤰᤜᤠ᤹ᤖᤧ ᤕᤧᤛᤢᤴ ᤌᤧᤔᤠᤀᤡ ᤔᤧᤵᤔᤠᤀᤠᤱ ᤂᤢᤏᤧ᤹ ᤖᤥᤔᤡᤜᤠ᤹ᤏᤢ ᤁᤧᤛᤠᤰᤐᤥ ᤌᤠ᤺ᤔᤠ ᤔᤧᤀᤡ᤺ᤳᤋᤢ॥ ᤔᤧᤒᤠᤱᤄᤢᤛᤡ॥

14ᤂᤧᤱᤜᤠ᤹ ᤔᤧᤍᤩᤧᤀᤠᤱ ᤛᤣ᤺ᤴᤔᤧᤍᤥᤛᤢ. “ᤛᤡᤰᤛᤠᤶᤒᤣ. ᤂᤧᤏᤧ᤹ᤃ ᤛᤧᤰᤂᤠ ᤐᤠ᤺ᤴᤗᤰ ᤁᤧᤒᤠ᤺ᤳᤗᤥ॥ ᤂᤧᤏᤧ᤹ᤃ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤐᤠ᤺ᤴᤏᤥᤀᤠᤱ ᤁᤧᤶᤒᤳᤏᤧᤴ. ᤜᤧᤰᤁᤩᤠᤱ ᤀᤠᤳᤋᤡᤴ ᤔᤏᤠᤜᤠ᤹ᤀᤠᤱ ᤁᤧᤴᤇᤧᤴᤍᤢᤴᤇᤡᤴ॥ ᤂᤧᤏᤧ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤶᤔᤡᤴ ᤛᤧᤰᤂᤠᤀᤣ ᤁᤧᤜᤢ᤹ᤖᤢᤛᤡᤖᤥ॥ ᤜᤧᤰᤁᤣ᤺ᤸᤗᤧ ᤁᤴ ᤐᤠ᤺ᤴᤏᤡᤴ ᤀᤥᤔᤧᤳᤋᤧ᤹ ᤖᤥᤔᤡ ᤐᤕᤶ ᤜᤠᤱ ᤛᤡᤈᤖᤧᤴ#᥇᥈:᥇᥊ ᤛᤡᤈᤖ—ᤛᤡᤈᤖᤧᤴ ᤖᤥᤔᤡ ᤜᤠᤱᤕᤢᤰᤁᤡᤸᤗᤧᤴ ᤐᤕᤶ ᤜᤠᤱᤖᤧ ᤁᤢᤔᤡᤱ ᤘᤕᤧ॥ ᤖᤥᤔᤡᤜᤠ᤹ᤖᤧ ᤕᤖᤡᤰ ᤗᤠᤈᤣ᤹ᤜᤠ᤹ ᤔᤧᤏᤠ᤺ᤴᤍᤢᤛᤡᤀᤠᤱ ᤂᤢᤏᤡ᤹ ᤕᤢᤰᤁᤥ ᤔᤧᤃᤳᤋᤢᤛᤡ. ᤜᤧᤰᤁᤩᤠᤱ ᤂᤧᤴ ᤁᤧᤖᤧᤰᤗᤧᤴ ᤐᤕᤶ ᤜᤠᤱ ᤛᤡᤈᤖᤧᤴ ᤘᤕᤧ॥ ᤖᤥᤔᤡ ᤐᤕᤶ ᤜᤠᤱᤜᤠ᤹ ᤁᤧᤖᤧᤰ ᤛᤡᤈᤖ ᤔᤧᤔᤧᤳᤋᤢᤛᤡ॥ ᤀᤣ᤺ᤱᤕᤠᤱ ᤜᤢᤱᤔᤠ ᤀᤠᤏᤡ᤹ ᤛᤠᤶᤕᤥᤌᤡᤶᤔᤡᤸᤗᤧ ᤀᤠᤒᤡ᤹ᤒᤡ ᤀᤠᤶᤒᤡᤏᤧᤴᤒᤡ᥅”

15ᤕᤧᤛᤢᤖᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤆᤡ᤺ᤵᤔᤠᤴ ᤏᤡᤛᤢᤀᤠᤱ ᤛᤣ᤺ᤴᤍᤥᤛᤢᤛᤡ. “ᤌᤣᤀᤠᤱ ᤂᤡᤏᤡ᤹ ᤀᤰᤂᤣᤗ᤹ᤖᤡᤰ ᤀᤡᤱᤃᤠ᤹ ᤐᤠ᤺ᤴᤏᤥ ᤋᤧᤶᤔᤠ ᤏᤡᤱᤘᤠ᤹ ᤁᤧᤀᤡ᤺ᤳᤋᤢᤶᤒᤠᤒᤣ᥅ ᤕᤠᤱᤀᤡᤳᤇᤡᤴ ᤑᤧᤳᤋᤧᤶᤔᤧ᤹. ᤀᤡᤱᤃᤠ᤹ ᤀᤥᤔᤧᤳᤋᤢᤱ ᤛᤠ᤹ᤖᤢᤱ॥” 16ᤂᤧᤱᤜᤠ᤹ᤖᤧ ᤔᤧᤓᤧᤳᤋᤢᤀᤠᤱ ᤕᤧᤛᤢᤖᤧ ᤂᤧᤴ ᤀᤥᤔᤧᤳᤋᤢᤀᤠᤱ ᤛᤣ᤺ᤴᤍᤥᤛᤢᤛᤡ. “ᤁᤴ ᤕᤠᤱᤀᤡᤳᤇᤡᤀᤥ ᤜᤠ᤺ᤳᤗᤧ ᤁᤢᤀᤡᤳᤇᤠᤵ ᤏᤢ ᤁᤢᤒᤠ᤺ᤴᤛᤠᤵ ᤐᤵᤐᤣ᥅”

ᤂᤧᤱᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤛᤡᤈᤖᤧᤸᤗᤧᤴ ᤐᤳᤗᤥ॥”

17ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤜᤧᤰᤁᤣ᤺ᤸᤗᤧ ᤛᤡᤈᤖᤗᤧ ᤁᤢᤒᤠ᤺ᤴᤜᤠ᤹ ᤛᤡᤈᤖᤧᤴ ᤐᤡᤖᤧᤶᤔᤧ᤹. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤒᤠ᤺ᤴᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤣ ᤐᤡᤖᤧᤶᤔᤧ᤹ᤀᤥ॥”

ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤛᤠ᤹ᤖᤡᤰ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧ॥

ᤛᤡᤔᤧᤴᤗᤠᤶ ᤕᤠᤶᤔᤥ ᤜᤡᤱᤔᤠ

(ᤔᤳᤋᤡ ᥈᥈:᥈᥉-᥉᥉; ᤗᤢᤁᤠ ᥈᥆:᥈᥍-᥊᥆)

18ᤂᤧᤵᤔᤥ ᤛᤡᤔᤧᤴᤗᤠᤶ ᤕᤠᤶᤔᤥ ᤜᤡᤱᤔᤴ ᤜᤥᤵ ᤗ᤹ᤖᤡᤰ ᤏᤛᤠᤴ ᤁᤧᤈᤥ᤺ᤰᤐᤠ ᤛᤍᤢᤁᤡᤜᤠ᤹#᥇᥈:᥇᥎ ᤛᤍᤢᤁᤡᤜᤠ᤹—ᤁᤴ ᤔᤏᤠᤜᤠ᤹ ᤕᤜᤢᤍᤡ ᤛᤠᤶᤕᤥ ᤗᤰᤁᤥᤒᤠᤛᤡ ᤁᤖ ᤑᤖᤡᤛᤡᤜᤠ᤹ᤏᤢ ᤘᤣ᤹ᤛᤡᤖᤥ॥ ᤔᤧᤍᤩᤧᤀᤠᤱ 19ᤛᤣ᤺ᤴᤔᤧᤍᤥᤛᤢ. “ᤛᤡᤰᤛᤠᤶᤒᤣ. ᤔᤥᤛᤠᤖᤧᤃ ᤀᤰᤂᤣᤗ᤹ᤖᤡᤰ ᤛᤠᤵᤋᤢ ᤀᤠᤒᤡᤖᤧᤀᤠᤱ ᤐᤳ—‘ᤀᤠᤳᤋᤡᤸᤗᤧ ᤁᤢᤶᤓᤢ᤹ᤀᤡᤴ ᤁᤢᤛ᤻ᤛᤠ ᤁᤢᤀᤣ ᤔᤧᤴᤘᤠ᤹ᤀᤣ ᤛᤡ᤹᤺. ᤂᤧᤸᤗᤧ ᤁᤢᤴᤛᤠ᤹ᤖᤧ ᤔᤣᤔᤣᤍᤢᤔᤠ ᤁᤢᤴᤏᤧ᤹ᤍᤪᤣ᤺ᤴᤏᤢ ᤔᤣ᤺ᤰᤂᤡᤶ ᤆᤥ᤺ᤰᤔᤠᤀᤣ ᤐᤥᤱ॥ ᤜᤧᤰᤁᤩᤠᤱ ᤁᤢᤶᤓᤢ᤹ᤖᤧ ᤁᤢᤗᤠᤃᤡ ᤛᤠᤃᤵᤔᤠ ᤐᤥᤱᤗᤥ॥’ 20ᤀᤠᤸᤗ ᤏᤢᤛᤡ ᤑᤢ᤹ᤏᤢᤛᤠ᤹ᤜᤠ᤹ ᤔᤧᤘᤕᤧ॥ ᤋᤢᤶᤒᤠᤸᤗᤧ ᤔᤣ᤺ᤰᤂᤡᤶ ᤆᤥᤃᤢᤀᤠᤱ ᤁᤢᤛ᤻ᤛᤠ ᤁᤢᤀᤣ ᤔᤧᤴᤘᤠ᤹ᤀᤣ ᤛᤩᤧᤖᤥ॥ 21ᤜᤧᤰᤁᤩᤠᤱ ᤛᤖᤢᤶᤒᤧᤸᤗᤧᤀᤠᤱ ᤔᤣᤔᤣᤍᤢᤔᤠ ᤁᤢᤴᤏᤧ᤹ᤍᤪᤣ᤺ᤴᤏᤢ ᤔᤣ᤺ᤰᤂᤡᤶ ᤆᤥᤃᤢ. ᤁᤖ ᤂᤧᤴᤏᤠᤱ ᤁᤢᤛ᤻ᤛᤠ ᤔᤧᤴᤘᤠ᤹ᤀᤣ ᤛᤩᤧ॥ ᤜᤧᤰᤁᤩᤠᤱ ᤕᤠᤱᤛᤖᤢᤶᤒᤧᤸᤗᤧᤀᤠᤱ ᤂᤧᤴ ᤔᤣᤔᤣᤍᤢᤔᤠ ᤁᤢᤴᤏᤧ᤹ᤍᤪᤣ᤺ᤴᤏᤢ ᤔᤣ᤺ᤰᤂᤡᤶ ᤆᤥᤃᤢ. ᤂᤧᤴᤏᤠᤱ ᤁᤢᤛ᤻ᤛᤠ ᤔᤧᤴᤘᤠ᤹ᤀᤣ ᤛᤩᤧᤖᤥ॥ 22ᤏᤢᤛᤡ ᤑᤢ᤹ᤏᤢᤛᤠ᤹ᤜᤠ᤹ᤖᤧ ᤔᤣ᤺ᤰᤂᤡᤶ ᤔᤧᤈᤥᤃᤢᤛᤠᤱ ᤂᤢᤏᤡ᤹ ᤛᤠᤔᤧᤴᤘᤠ᤹ᤀᤣ ᤁᤧᤖᤧᤰ ᤔᤧᤛᤩᤧ॥ ᤁᤢᤏᤢᤵᤔᤥ ᤂᤧᤴ ᤔᤧᤴᤇᤢᤔᤠ᤹ᤀᤡᤴᤏᤠᤱ ᤛᤩᤧᤖᤥ॥ 23ᤀᤠᤸᤗ ᤂᤧᤱᤜᤠ᤹ ᤛᤡᤔᤧᤴᤗᤠᤶ ᤕᤠᤶᤔᤥ ᤔᤧᤜᤡᤱᤅᤡᤸᤗᤧ ᤀᤠᤳᤋᤡᤸᤗᤧ ᤁᤢᤔᤣᤳ ᤐᤥᤱᤒᤠᤒᤣ᥅ ᤂᤧᤴᤏᤢᤃ ᤏᤢᤛᤡᤀᤣ ᤑᤢ᤹ᤏᤢᤛᤠ᤹ᤜᤠ᤹ᤖᤧ ᤔᤣ᤺ᤰᤂᤡᤶ ᤔᤧᤈᤥᤃᤢᤀᤠᤱ ᤔᤧᤘᤕᤧ॥” 24ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤂᤡᤏᤡ᤹ᤃ ᤐᤡᤷᤒᤣ᤺ᤶᤒᤠ ᤁᤧᤈᤩᤧ᤹ᤀᤡᤀᤠᤱ ᤁᤧᤘᤕᤡ᤹ᤖᤥ. ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤛᤠᤵᤗᤠᤴ ᤁᤢᤛᤡᤱ ᤔᤧᤴᤏᤡ᤺ᤳᤋᤣ ᤁᤧᤘᤕᤡ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤢᤰᤛᤠᤶᤔᤡᤴᤏᤠᤱ ᤁᤢᤛᤡᤱ ᤔᤧᤴᤏᤡ᤺ᤳᤋᤣ ᤁᤧᤘᤕᤡ᤹ᤖᤥ॥ 25ᤌᤣᤀᤠᤱᤓᤧᤸᤗᤧ ᤛᤡᤔᤧᤴᤗᤠᤶ ᤕᤠᤶᤔᤥ ᤔᤧᤜᤡᤱᤅᤡᤸᤗᤧᤃ ᤔᤏᤠᤜᤠ᤹ ᤔᤣ᤺ᤰᤂᤡᤶ ᤔᤧᤴᤈᤥ᤺ᤰᤏᤧᤴᤗᤥ. ᤁᤖ ᤂᤧᤱᤜᤠ᤹ᤃ ᤛᤠᤱᤃᤪᤠᤶᤐᤣᤍᤠᤱᤅᤥᤒᤠ ᤔᤠᤱᤗᤠᤀᤡᤱᤒᤠ ᤁᤢᤀᤡᤛᤡ᤺ᤰᤏᤧ ᤔᤧᤒᤥᤱᤗᤥ॥ 26ᤀᤠᤸᤗ ᤛᤡᤔᤧᤴᤗᤠᤶ ᤕᤠᤶᤔᤥ ᤁᤧᤜᤡᤱᤒᤠᤜᤠ᤹ᤖᤧ ᤂᤢᤏᤡ᤹ ᤔᤧᤴᤏᤥ ᤂᤡᤏᤡ᤹ ᤔᤥᤛᤠᤖᤧ ᤁᤢᤛᤠᤵᤐᤴᤏᤡᤴ ᤔᤧᤴᤏᤡ᤺ᤳᤋᤣ ᤁᤧᤘᤕᤡ᤹ᤒᤡ᥅#ᤗᤠ ᥉:᥌ ᤂᤧᤵᤔᤥ ᤔᤡ ᤁᤧᤍᤡ᤺ᤵᤐᤠ ᤐᤥ᤺ᤰᤗᤠᤗᤠᤶ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢᤀᤠᤱ ᤐᤳ. ‘ᤀᤡᤱᤃᤠ᤹ᤃ ᤀᤒᤪᤠᤜᤠᤔ. ᤀᤡᤛᤜᤠᤁ ᤏᤢ ᤕᤠᤁᤢᤒᤖᤧ ᤂᤢᤏᤡ᤹ ᤏᤡᤱᤘᤠ᤹ᤑᤢᤔᤠᤱᤀᤠᤖᤥ॥’ 27ᤂᤧᤸᤗᤧᤆᤥᤃᤢᤸᤗᤧ ᤂᤢᤏᤧ᤹ᤃ ᤁᤢᤛᤡᤘᤧᤳᤜᤠ᤹ᤖᤧᤴ ᤔᤣ᤺ᤴ. ᤁᤖ ᤁᤢᤜᤡᤱᤘᤧᤳᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤑᤢᤔᤠᤱᤗᤥ॥ ᤂᤡᤏᤡ᤹ᤃ ᤛᤠ᤹ᤖᤡᤰᤁᤣ ᤐᤡᤷᤒᤣ᤺ᤶᤒᤠ ᤁᤧᤈᤩᤧᤀᤡᤀᤠᤱ ᤁᤧᤘᤕᤡ᤹ᤖᤥ॥”

ᤁᤧᤖᤧᤰᤏᤢ᤺ᤸᤗᤧ ᤁᤧᤕᤧᤰᤐᤠ ᤀᤡᤱᤈᤠᤱ

(ᤔᤳᤋᤡ ᥈᥈:᥉᥊-᥊᥆; ᤗᤢᤁᤠ ᥇᥆:᥈᥋-᥈᥎)

28ᤂᤧᤵᤔᤥᤒᤠ ᤛᤠᤶᤕᤥᤌᤡᤶᤛᤠᤶᤒᤠᤎᤡᤰᤗᤧ ᤐᤠᤴ ᤔᤧᤎᤰᤋᤧᤒᤠ ᤂᤧᤵᤛᤢᤛᤡ॥ ᤂᤧᤸᤗᤧ ᤕᤧᤛᤢᤖᤧ ᤛᤠ᤹ᤖᤡᤰ ᤏᤡᤱᤘᤠ᤹ ᤁᤧᤍᤠᤒᤠ ᤏᤥᤃᤵ ᤐᤡᤖᤢᤛᤡᤒᤠ ᤏᤡᤱᤘᤠ᤹ ᤂᤥᤛᤢᤀᤠᤱ ᤕᤧᤛᤢᤴ ᤛᤣ᤺ᤴᤍᤥᤛᤢ. “ᤛᤡᤰᤛᤠᤶᤒᤣ. ᤀᤡ᤺ᤵᤔᤠ ᤏᤠ᤺ᤵᤔᤠᤀᤣ ᤁᤧᤒᤥᤱᤒᤠ ᤁᤧᤖᤧᤰᤏᤢ᤺ᤸᤗᤧ ᤕᤶᤒᤠ ᤛᤠᤶᤕᤥᤌᤡᤶ ᤀᤡᤱᤈᤠᤱᤅᤡᤴ ᤀᤠᤳᤋᤡᤱᤃ᥅”

29ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤁᤧᤖᤧᤰᤏᤢ᤺ᤸᤗᤧ ᤕᤶᤒᤠ ᤏᤠ᤺ᤵᤔᤠᤀᤣ ᤁᤧᤒᤥᤱᤒᤠ ᤀᤡᤱᤈᤠᤱᤅᤡᤴ ᤁᤴᤗᤥ—‘ᤀᤡᤛᤪᤠᤀᤡᤗᤡᤛᤣ. ᤂᤧᤵᤛᤧᤶᤔᤧ᤹ᤀᤥ᥄ ᤀᤠᤏᤡ᤹ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ. ᤌᤡᤰᤗᤰ ᤘᤠ᤹ᤖᤥ॥ 30ᤁᤧᤴᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤧᤏᤧ᤹ ᤁᤧᤖᤧᤰ ᤁᤧᤛᤡᤰᤗᤢᤱᤔᤠᤸᤗᤧ ᤁᤧᤖᤧᤰ ᤁᤧᤛᤰᤔᤠ ᤛᤠᤶᤔᤡᤸᤗᤧ. ᤁᤧᤖᤧᤰ ᤁᤧᤏᤡᤱᤘᤠ᤹ᤀᤡᤸᤗᤧ. ᤁᤧᤖᤧᤰ ᤁᤧᤎᤢᤶᤔᤡᤸᤗᤧ ᤔᤡ᤺ᤶᤈᤡ ᤔᤧᤳᤋᤧ᤹ᤀᤥ॥’ 31ᤏᤡᤛᤡᤃᤣᤰᤐᤠ ᤀᤡᤱᤈᤠᤱᤅᤡᤴ ᤁᤴᤗᤥ—‘ᤀᤠᤵᤑᤣᤰ ᤗᤢᤱᤔᤠ᤹ ᤁᤧᤍᤢᤰᤛᤡᤱᤒᤠ ᤁᤢᤀᤡᤛᤡ᤺ᤰᤁᤣ ᤁᤧᤒᤠᤱᤓᤣ᤹ᤛᤠᤒᤠᤜᤠ᤹ᤀᤠᤱ ᤗᤢᤱᤔᤠ᤹ ᤋᤢᤰᤋᤧᤛᤧ᤹ᤀᤥ॥’#ᤗᤧᤒᤡ ᥇᥏:᥇᥎ ᤁᤴᤜᤠ᤹ᤏᤢ᤺ᤸᤗᤧ ᤕᤶᤒᤠ ᤘᤣ᤹ ᤀᤡᤱᤈᤠᤱᤅᤡᤱᤃ ᤌᤣᤀᤠᤱ ᤜᤥᤵᤗᤥ॥” 32ᤂᤧᤴ ᤔᤏᤠ᤺ᤸᤗᤧ ᤕᤧᤛᤢᤴ ᤏᤥᤃᤵ ᤐᤡᤖᤢ. “ᤛᤡᤰᤛᤠᤶᤒᤣ ᤛᤧᤰᤂᤠᤀᤣ ᤁᤧᤒᤠ᤺ᤳᤋᤢᤖᤥ॥ ᤀᤠᤏᤡ᤹ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴᤗᤰ ᤍᤠᤱᤒᤠᤖᤥ॥ ᤘᤣ᤹ ᤔᤠᤱ ᤔᤧᤜᤥᤵᤗᤥ ᤑᤠ᤹ᤀᤠᤱ ᤛᤠ᤹ᤖᤡᤰ ᤁᤧᤍᤱᤒᤠ ᤁᤧᤒᤠ᤺ᤳᤋᤢᤖᤥ॥ 33ᤜᤧᤰᤁᤩᤠᤱ ᤂᤢᤏᤧ᤹ ᤁᤧᤖᤧᤰ ᤛᤡᤰᤗᤢᤱᤔᤠᤸᤗᤧ. ᤁᤧᤖᤧᤰ ᤏᤡᤱᤘᤠ᤹ᤀᤡᤸᤗᤧ. ᤁᤧᤖᤧᤰ ᤌᤢᤶᤔᤡᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤡ᤺ᤶᤈᤡ ᤔᤧᤵᤔᤠ ᤏᤢ ᤐᤠᤱᤓᤣ᤹ᤛᤠᤒᤠᤜᤠ᤹ ᤀᤠᤒᤠᤅᤣ ᤜᤧᤰᤁᤣ ᤗᤢᤱᤔᤠ᤹ ᤋᤢᤰᤔᤠᤛᤡᤃ. ᤁᤧᤖᤧᤰ ᤔᤡᤎᤡᤱᤔᤏᤠᤀᤠᤱ ᤋᤥ᤺ᤶᤔᤏᤠᤒᤠ ᤛᤡᤍᤢᤱᤈᤓᤠ ᤏᤢ ᤘᤣ᤹ ᤛᤡᤍᤢᤱᤈᤓᤠ ᤆᤥ᤺ᤰᤔᤠᤏᤢ᤺ᤸᤗᤧᤀᤠᤱ ᤕᤶᤒᤠ ᤀᤡᤱᤈᤠᤱᤗᤥ॥” 34ᤂᤧᤸᤗᤧ ᤛᤡᤱᤛᤡᤱᤅᤠᤱ ᤏᤥᤃᤵ ᤐᤡᤖᤢᤒᤠ ᤏᤡᤛᤢᤀᤠᤱ ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤂᤧᤏᤧ᤹ ᤏᤡᤱᤘᤠ᤹ᤑᤢᤜᤠᤱᤈᤢᤶᤗᤠᤶᤒᤠ ᤔᤠ᤺ᤱᤄᤠ ᤁᤧᤜᤥ᤺ᤵᤗᤥ॥

“ᤜᤧᤰᤁᤩᤠᤱ ᤂᤧᤴ ᤕᤧᤴᤏᤠᤱᤎᤥ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤂᤢᤏᤧ᤹ ᤐᤠᤴ ᤛᤣ᤺ᤴᤍᤥᤔᤠ ᤀᤠ᤺ᤴᤇᤡᤱᤔᤠᤀᤠᤱ ᤔᤧᤴᤇᤢᤰᤋᤢᤴᤗᤥ॥”

ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋ

(ᤔᤳᤋᤡ ᥈᥈:᥊᥇-᥊᥌. ᥈᥉:᥇-᥉᥌; ᤗᤢᤁᤠ ᥈᥆:᥊᥇-᥊᥊)

35ᤕᤧᤛᤢᤖᤧ ᤔᤠᤱᤜᤡᤶ ᤗᤰᤂᤢᤶᤔᤥ ᤜᤢ᤹ᤖᤢᤛᤡᤖ ᤘᤕᤧᤸᤗᤧ ᤂᤧᤱᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤀᤠᤰᤂᤣᤗ᤹ᤖᤡᤰ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤧᤴ ᤍᤠᤀᤢᤍ ᤜᤠᤱᤅᤡᤸᤗᤧ ᤁᤢᤛ᤻ᤛᤠᤖᤥ ᤑᤠ᤹ᤀᤠᤱ ᤔᤧᤒᤠ᤺ᤳᤋᤢᤒᤠᤒᤣ᥅ 36ᤍᤠᤀᤢᤍ ᤜᤠᤱᤅᤡᤸᤗᤧ ᤛᤣᤛᤣᤔᤠᤱᤗᤠᤶ ᤀᤰᤂᤣ ᤐᤠ᤺ᤳᤋᤢᤀᤠᤱ ᤘᤠ᤹.

“‘ᤕᤜᤘᤣ ᤍᤠᤱᤒᤠᤸᤗᤧ ᤀᤡᤱᤃᤠ᤹ ᤀᤠᤴᤍᤠᤱᤒᤠᤴ ᤀᤰᤂᤣ ᤔᤧᤳᤋᤢ.

ᤁᤧᤏᤡᤱᤔᤡᤜᤠ᤹ ᤁᤧᤕᤢᤰᤁᤥ ᤀᤡᤱᤃᤠ᤹ ᤔᤧᤴᤍᤠ᤺ᤳᤇᤡᤱᤅᤣ ᤌᤠᤖᤡᤰ

ᤀᤠᤈᤢᤵᤛᤠᤱ ᤗᤧᤵᤔᤠᤱ ᤂᤧᤏᤧ᤹ ᤕᤢᤅᤧ᤹ᤀᤥ॥’#ᤏᤡᤱ ᤛᤢᤶ ᥇᥇᥆:᥇

37“ᤍᤠᤀᤢᤍ ᤜᤠᤱᤅᤡᤸᤗᤧᤀᤣ ᤂᤢᤏᤧ᤹ ᤀᤠᤍᤠᤱᤒᤣ ᤔᤧᤳᤋᤢᤸᤗᤧ ᤀᤠᤰᤂᤣᤗ᤹ᤖᤡᤰ ᤂᤪᤡᤛ᤻ᤋᤧᤴ ᤍᤠᤀᤢᤍᤖᤧ ᤁᤢᤛ᤻ᤛᤠ ᤐᤥᤱᤒᤠᤒᤣ᥅”#᥇᥈:᥉᥍ ᤂᤧᤴ ᤑᤠ᤹ᤀᤡᤴ ᤂᤪᤡᤛ᤻ᤋᤧᤴ ᤍᤠᤀᤢᤍ ᤜᤠᤱᤅᤡᤸᤗᤧ ᤁᤢᤛ᤻ᤛᤠ ᤏᤢ ᤁᤢᤴᤍᤠᤱᤒᤠ ᤏᤧᤵᤔᤠᤱ ᤘᤕᤧᤖᤥ॥

ᤕᤖᤡᤰ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤁᤢᤏᤡᤛᤠᤶᤔᤡᤴ ᤂᤢᤏᤡ᤹ ᤛᤡᤖᤠ᤹ ᤌᤠᤅᤧᤖ ᤔᤧᤄᤧᤵᤛᤢᤖᤥ॥

38ᤀᤰᤂᤣᤗ᤹ᤖᤡᤰ ᤕᤧᤛᤢᤖᤧ ᤔᤧᤳᤋᤢᤛᤡ. “ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ᤏᤢ ᤛᤡᤱᤛᤡᤱ ᤗ᤹ᤖᤧᤶᤔᤧ᤹ᤀᤥ᥄ ᤂᤧᤱᤜᤠ᤹ ᤁᤣ᤺ᤶᤒ ᤁᤣ᤺ᤶᤒᤠ ᤗᤃᤣᤵ ᤔᤧᤈᤠᤰᤂᤢᤀᤠᤱ ᤏᤠᤏᤢᤃᤳᤏᤠ ᤗᤠᤱᤔᤧᤄᤣ᤺ᤰᤗᤥ. ᤜᤧᤰᤁᤩᤠᤱ ᤐᤠᤱᤈᤢᤶ ᤗᤢᤶᤔᤥ ᤛᤧᤘᤠ ᤔᤧᤔᤧᤳᤋᤡᤃᤧᤖ ᤁᤧᤗ᤹ᤒᤠ ᤏᤡᤱᤘᤠ᤹ ᤔᤧᤈᤥᤃᤢᤀᤠᤱ 39ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤏᤢ ᤛᤠᤓᤠᤱᤈᤠᤀᤥ ᤋᤢᤶᤔᤩᤠᤱᤜᤠᤱ ᤕᤢᤰᤏᤠᤜᤠ᤹ᤀᤥ ᤕᤢᤱᤔᤠ ᤂᤢᤏᤡ᤹ ᤛᤡᤖᤠ᤹ᤌᤠᤱᤗᤥ॥ 40ᤂᤧᤱᤜᤠ᤹ᤖᤧ ᤔᤣᤔᤣᤍᤢᤔᤠᤜᤠ᤹ ᤀᤡᤱᤔᤧᤗᤧᤰᤋᤢᤛᤡᤀᤠᤱ ᤂᤢᤏᤡ᤹ ᤜᤡᤶᤎᤠ᤺ᤱᤜᤠ᤹ ᤔᤧᤏᤠᤵᤋᤢᤛᤡ᤹. ᤁᤖ ᤏᤢᤒᤠ ᤀᤥᤛᤣ᤺ᤴᤎᤠᤰᤛᤡᤱᤔᤠᤖᤧ ᤗᤠᤃᤡ ᤁᤣ᤺ᤶᤒᤠ ᤁᤣ᤺ᤶᤒᤠ ᤋᤢᤘᤠ ᤔᤧᤈᤥᤃᤢ᤹॥ ᤂᤧᤱᤜᤠ᤹ᤖᤧᤃ ᤛᤧᤰᤂᤠᤀᤣ ᤁᤧᤛᤠᤰᤐᤠ ᤂᤢᤶᤍᤡᤱ ᤔᤧᤄᤥᤛᤢ᤹ᤖᤥ॥”

ᤔᤣᤔᤣᤍᤢᤔᤠᤸᤗᤧ ᤁᤢᤜᤢᤰᤛᤥᤕᤠᤱ

(ᤗᤢᤁᤠ ᥈᥇:᥇-᥊)

41ᤕᤧᤛᤢᤴ ᤔᤠᤱᤜᤡᤶᤔᤥ ᤜᤢᤰᤛᤥᤕᤠᤱ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤒᤣᤛᤠᤱ ᤜᤢᤰᤛᤥᤕᤠᤱ ᤁᤧᤕᤠᤰᤐᤠᤜᤠ᤹ ᤀᤥᤔᤧᤳᤋᤢᤛᤡᤖ ᤕᤢᤅᤧᤖᤥ॥ ᤂᤧᤵᤔᤥ ᤕᤖᤡᤰ ᤕᤠᤱᤛᤠᤁᤢᤴᤎᤣᤛᤠᤒᤠᤜᤠ᤹ ᤔᤧᤍᤩᤧᤀᤠᤱ ᤕᤖᤡᤰ ᤕᤠᤱᤜᤠ᤹ ᤔᤧᤕᤠᤰᤋᤢ. 42ᤁᤖ ᤂᤧᤵᤔᤥ ᤕᤠᤱᤃᤧᤛᤠ᤹ᤔᤠ ᤔᤣᤔᤣᤍᤢᤔᤠᤎᤡᤰ ᤋᤩᤧᤀᤠᤱ ᤕᤠᤱᤏᤧᤳᤇᤡ#᥇᥈:᥊᥈ ᤕᤠᤱᤏᤧᤳᤇᤡ ᤃᤪᤡᤁ ᤐᤠ᤺ᤴᤍᤠᤱᤅᤥ “ᤏᤧᤳᤇᤡ ᤗᤧᤵᤋᤥᤴ॥” ᤁᤴ ᤕᤜᤢᤍᤡᤜᤠ᤹ᤖᤧ ᤔᤧᤈᤥᤃᤢᤒᤠ ᤁᤧᤖᤧᤰᤏᤢ᤺ᤸᤗᤧ ᤁᤢᤔᤧᤸᤗᤢᤱ ᤛᤢ᤺ᤸᤗᤡᤰᤐᤠ ᤕᤠᤱ ᤘᤕᤧ॥ ᤕᤠᤰᤋᤢ॥ 43ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤢ᤺ᤳᤋᤢᤛᤡᤀᤠᤱ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤀᤠᤀᤡᤴ ᤁᤴ ᤕᤠᤱᤃᤧᤛᤠ᤹ᤔᤠ ᤔᤣᤔᤣᤍᤢᤔᤠᤸᤗᤧ ᤘᤣ᤹ᤜᤠ᤹ᤏᤢ᤺ᤸᤗᤧ ᤕᤖᤡᤰ ᤜᤢᤰᤛᤥᤕᤠᤱ ᤕᤠᤰᤋᤢᤀᤠᤱ ᤘᤠ᤹ᤖᤥ॥ 44ᤌᤣᤀᤠᤱᤓᤧᤸᤗᤧ ᤁᤴ ᤕᤠᤱᤛᤠᤁᤢᤴᤎᤣᤛᤠᤒᤠᤜᤠ᤹ᤖᤧᤃ ᤂᤢᤏᤡ᤹ ᤁᤧᤕᤥᤒᤠᤀᤠᤱ ᤁᤧᤏᤶᤒᤠ ᤕᤠᤱᤜᤠ᤹ᤀᤣ ᤔᤧᤕᤠᤰᤋᤢ. ᤁᤖ ᤁᤴ ᤕᤠᤱᤃᤧᤛᤠ᤹ᤔᤠ ᤔᤣᤔᤣᤍᤢᤔᤠᤸᤗᤧᤃ ᤂᤢᤏᤧ᤹ ᤁᤢᤕᤠᤱᤛᤠ᤹ᤔᤥ ᤁᤳᤋᤢᤒᤠ ᤁᤠᤰ ᤆᤠᤔᤠ ᤌᤢᤱᤔᤥᤗᤠᤶ ᤕᤠᤰᤋᤢᤀᤠᤱ ᤘᤠ᤹ᤖᤥ॥”

Currently Selected:

ᤔᤷᤁᤢᤛ 12: LIFOTNT

Highlight

Copy