ᤔᤷᤁᤢᤛ 11
11
ᤕᤧᤛᤢᤴ ᤕᤖᤢᤛᤗᤧᤶᤔᤥ ᤗᤠᤳ
(ᤔᤳᤋᤡ ᥈᥇:᥇-᥇᥇; ᤗᤢᤁᤠ ᥇᥏:᥈᥎-᥊᥆; ᤕᤢᤜᤢ ᥇᥈:᥇᥈-᥇᥏)
1ᤕᤧᤛᤢᤴ ᤏᤢ ᤁᤢᤜᤢ᤹ᤛᤠᤶᤒᤠᤜᤠ᤹ ᤕᤖᤢᤛᤗᤧᤔ ᤔᤧᤒᤣᤖ ᤔᤧᤒᤳᤇᤧᤸᤗᤧ ᤕᤖᤢᤛᤗᤧᤔ ᤏᤡ᤺ᤳᤋᤠᤱᤒᤠ ᤈᤤᤋᤢᤏ ᤁᤥ᤺ᤰᤔᤠᤸᤗᤧ ᤁᤢᤒᤣᤛᤠᤱᤒᤠ ᤒᤧᤌᤑᤠᤃᤣ ᤏᤢ ᤒᤣᤌᤠᤏᤡ ᤔᤧᤵᤔᤏᤠᤒᤠ ᤐᤠᤱᤈᤢᤶ ᤏᤡ᤺ᤳᤋᤠᤱ ᤔᤧᤃᤧᤖᤧ. ᤜᤧᤰᤁᤩᤠᤱ ᤕᤧᤛᤢᤖᤧ ᤏᤧᤵᤑᤢ ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤰᤂᤣ ᤔᤧᤳᤋᤢᤛᤡᤖ ᤐᤠᤱᤄᤢᤛᤡ. 2“ᤂᤡᤴᤇᤡ᤹ ᤋᤃᤠᤱᤒᤠ ᤐᤠᤱᤓᤣ᤹ᤀᤥ ᤐᤣᤛᤧ᤹॥ ᤂᤧᤵᤔᤥ ᤁᤧᤗᤠ᤺ᤳᤇᤡᤸᤗᤧᤛᤠ ᤀᤠᤵᤑᤠᤸᤗᤧᤀᤠᤱ ᤔᤧᤴᤕᤢᤰᤁᤣ ᤁᤧᤘᤠ᤹ᤒᤠ ᤀᤍᤱᤛᤠᤎᤡᤰ ᤀᤡᤔᤧᤄᤣ᤺ᤰᤂᤢᤀᤠᤱ ᤕᤧᤵᤐᤠ ᤁᤧᤍᤢᤶᤛᤢ᤹॥ ᤂᤧᤴ ᤗᤧᤖᤧᤳᤇᤧ᤹ᤀᤠᤱ ᤁᤳᤏᤠ ᤑᤧᤳᤋᤧᤳᤇᤧ᤹॥ 3ᤔᤏᤠᤜᤠ᤹ᤖᤧ ᤌᤣᤀᤠᤱ ᤁᤴ ᤀᤍᤱᤛᤠᤴ ᤁᤧᤗᤧᤳᤇᤢᤒᤠᤒᤣ ᤑᤠ᤹ᤀᤠᤱ ᤛᤣ᤺ᤴᤃᤧᤶᤗᤠᤵᤛᤡᤏᤧ ᤑᤠ᤹ᤃᤪ ᤁᤴ ᤀᤠᤏᤡᤃᤣ ᤍᤠᤱᤒᤠᤴ ᤆᤠᤜᤠᤒᤠ ᤆᤥᤃᤧᤀᤠᤱ ᤘᤠ᤹ ᤜᤧᤰᤁᤩᤠᤱ ᤜᤠᤖᤠᤀᤣ ᤂᤢᤏᤧ᤹ ᤕᤠᤱᤏᤠ ᤏᤢ᤺ᤰᤋᤢ᤹ᤖᤥ ᤔᤧᤳᤋᤧᤇᤧ᤹ᤀᤥ॥”
4ᤜᤧᤰᤁᤩᤠᤱ ᤂᤧᤱᤜᤠ᤹ ᤐᤣᤛᤡᤸᤗᤧ ᤛᤧᤰᤂᤠᤀᤣ ᤗᤳᤇᤠ ᤜᤡᤶᤒᤣᤛᤠᤱ ᤀᤍᤱᤛᤠᤴ ᤀᤡᤔᤧᤄᤣ᤺ᤰᤂᤢᤀᤠᤱ ᤗᤠᤶᤔᤥ ᤕᤧᤒᤧᤒᤠ ᤏᤡᤛᤧᤳᤇᤢ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤗᤧᤖᤧᤳᤇᤢᤖ ᤐᤳᤇᤧᤳᤇᤡᤸᤗᤧ 5ᤂᤧᤵᤔᤥ ᤁᤧᤕᤧᤵᤐᤠ ᤁᤢᤓᤠ ᤔᤏᤠᤜᤠ᤹ᤖᤧ ᤛᤣ᤺ᤴᤔᤧᤍᤥᤛᤢᤛᤡ. “ᤁᤴ ᤀᤍᤱᤛᤠᤴ ᤌᤣᤀᤠᤱ ᤁᤧᤗᤧᤳᤇᤢᤒᤠᤒᤣ᥅”
6ᤂᤧᤱᤜᤠ᤹ᤖᤧ ᤕᤧᤛᤢᤖᤧ ᤔᤧᤳᤋᤢᤛᤡᤒᤠ ᤜᤧᤰᤁᤣᤀᤣ ᤏᤥᤃᤵ ᤐᤡᤖᤧᤳᤇᤢᤀᤠᤱ ᤂᤧᤴ ᤔᤏᤠᤜᤠ᤹ᤖᤧ ᤐᤣ᤺ᤰᤔᤠ ᤔᤧᤒᤠᤱᤄᤢᤛᤡᤖᤥ॥ 7ᤂᤧᤱᤜᤠ᤹ᤖᤧ ᤂᤧᤴ ᤀᤍᤱᤛᤠᤴ ᤕᤧᤛᤢᤖᤥ ᤋᤠᤖᤧᤳᤇᤢᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤢᤏᤡ᤹ ᤋᤣᤳᤜᤠ᤹ ᤂᤧᤴ ᤀᤍᤱᤛᤠ᤺ᤸᤗᤧ ᤁᤢᤀᤣ᤺ᤰᤁᤥ ᤔᤧᤏᤧᤛ᤻ᤛᤢ. ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤴ ᤕᤢᤰᤋᤢ॥ 8ᤕᤖᤡᤰ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤋᤣᤳᤜᤠ᤹ ᤗᤠᤶᤔᤥ ᤔᤧᤓᤧᤛᤢ॥ ᤁᤢᤓᤠᤖᤧᤃ ᤂᤧᤴ ᤂᤡᤖᤡᤗᤠᤶ ᤁᤢᤓᤧᤰᤘᤠᤏᤢᤒᤠ ᤛᤡᤱ ᤐᤥᤖᤠ᤺ᤰᤜᤠ᤹ ᤔᤧᤈᤧᤵᤋᤢᤀᤠᤱ ᤗᤠᤶᤔᤥ ᤔᤧᤓᤧᤛᤢᤖ ᤂᤢᤏᤧ᤹ ᤗᤠᤶᤍᤠ᤺ᤰᤔᤠ ᤔᤧᤒᤡᤖᤢᤖᤥ॥ 9ᤂᤢᤏᤧ᤹ ᤁᤢᤍᤃᤡ ᤏᤢ ᤁᤢᤀᤣᤃᤠᤱ ᤁᤧᤒᤵᤐᤠ ᤕᤖᤡᤰ ᤔᤏᤠᤜᤠ᤹ᤖᤧ ᤔᤧᤀ᤺ᤰᤋᤧᤖ ᤀᤰᤂᤣ ᤔᤧᤒᤠ᤺ᤳᤋᤢ. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤐᤥᤖᤖᤥ᥄#᥇᥇:᥏ ᤃᤪᤡᤁ ᤐᤠ᤺ᤴᤍᤠᤱᤅᤥ “ᤜᤥᤛᤴᤏᤠ” ᤐᤥᤱᤗᤥ॥ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤔᤡᤱᤅᤥ ᤁᤧᤍᤠᤒᤠᤴ ᤔᤢ᤹ᤀᤡᤛᤠᤒᤠ ᤐᤥᤱᤗᤖᤥ॥ 10ᤀᤠᤏᤡ᤹ ᤌᤠ᤺ᤰᤌᤧᤒᤠ ᤍᤠᤀᤢᤍ ᤜᤠᤱᤅᤡᤸᤗᤧᤴ ᤁᤧᤍᤠᤒᤠ ᤜᤠᤱᤈᤢᤶᤔᤡᤴ ᤔᤢ᤹ᤀᤡᤛᤠᤶᤔᤡᤸᤗᤧ ᤁᤢᤎᤡᤶ ᤐᤥᤱᤗᤖᤥ᥄ ᤛᤠᤱᤃᤪᤠᤶᤐᤣᤍᤠᤱᤅᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤐᤥᤖᤖᤥ᥄” 11ᤜᤧᤰᤁᤣᤗ᤹ᤖᤡᤰ ᤕᤧᤛᤢᤴ ᤕᤖᤢᤛᤗᤧᤶᤔᤥ ᤐᤣᤀᤠᤱ ᤔᤠᤱᤜᤡᤶᤔᤥ ᤗᤠᤛᤧ॥ ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤵᤔᤥ ᤂᤡᤖᤡ ᤋᤠᤰᤁᤴᤍᤧᤖ ᤁᤧᤖᤧᤰ ᤀᤥᤔᤧᤳᤋᤢᤛᤡ. ᤁᤖ ᤏᤠᤶᤎᤧ ᤐᤣᤀᤠᤱ ᤘᤕᤧᤒᤠᤸᤗᤧ ᤆᤥᤃᤢᤸᤗᤧ ᤕᤠᤶᤔᤥ ᤌᤡᤰ-ᤏᤧᤳ (᥇᥈) ᤁᤢᤜᤢ᤹ᤛᤠᤶᤒᤠᤜᤠ᤹ᤏᤢ ᤒᤣᤌᤠᤏᤡ ᤐᤠᤱᤈᤢᤶᤔᤥ ᤏᤢ᤺ᤰᤂᤧ ᤐᤣᤖᤥ॥
ᤕᤧᤛᤢᤴ ᤏᤢ ᤐ᤺ᤳᤇᤣ᤹ᤒᤢᤱᤔᤠᤴ
(ᤔᤳᤋᤡ ᥈᥇:᥇᥎-᥇᥏)
12ᤜᤧᤰᤁᤩᤠᤱ ᤁᤢᤍᤠ᤺ᤴᤍᤡᤰ ᤋᤠᤏᤠᤶᤛᤠ ᤒᤧᤌᤠᤏᤡᤗᤠᤶ ᤕᤖᤢᤛᤗᤧᤔ ᤔᤧᤒᤣᤖ ᤔᤧᤒᤳᤇᤧᤸᤗᤧ ᤕᤧᤛᤢᤖᤧ ᤁᤢᤛᤧᤳᤗᤠ᤺ᤰᤋᤧ॥ 13ᤔᤠ᤺ᤱᤄᤠᤗᤠᤶ ᤐ᤺ᤳᤇᤣ᤹ᤒᤢᤱᤔᤠᤴ ᤛᤖᤡᤳ ᤕᤠᤖᤡᤰ ᤏᤡᤛᤢᤀᤠᤱ ᤁᤢᤈᤠ᤹ ᤌᤥ᤺ᤰᤋᤧᤀᤠᤱ ᤐᤳᤐᤡ ᤑᤠ᤹ᤀᤠᤱ ᤂᤧᤵᤔᤥ ᤐᤣᤀᤠᤱ ᤀᤥᤔᤧᤳᤋᤢᤸᤗᤧ ᤁᤢᤓᤧᤰᤘᤠᤖᤰ ᤐᤳᤇᤧ ᤁᤖ ᤁᤢᤈᤠ᤹ ᤔᤧᤒᤳᤇᤧᤴ. ᤌᤣᤀᤠᤱᤓᤧᤸᤗᤧ ᤐ᤺ᤳᤇᤣ᤹ ᤌᤥ᤺ᤰᤔᤠ ᤕᤧᤶ ᤔᤧᤴᤍᤠᤀᤣ ᤘᤕᤧ॥ 14ᤕᤧᤛᤢᤖᤧ ᤂᤧᤴ ᤐ᤺ᤳᤇᤣ᤹ᤒᤢᤱᤔᤠᤴ ᤔᤧᤳᤋᤢ. “ᤀᤠᤸᤗᤀᤠᤱᤎᤥ ᤀᤠᤵᤑᤠᤸᤗᤧᤀᤠᤱ ᤁᤧᤈᤠ᤹ ᤔᤧᤎᤥ᤺ᤰᤏᤧᤴᤗᤖᤥ॥” ᤁᤴ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧᤀᤠᤱ ᤔᤧᤄᤧᤵᤛᤢ॥
ᤕᤧᤛᤢᤴ ᤔᤠᤱᤜᤡᤶᤔᤥ ᤐᤣᤰ
(ᤔᤳᤋᤡ ᥈᥇:᥇᥈-᥇᥍; ᤗᤢᤁᤠ ᥇᥏:᥊᥋-᥊᥎; ᤕᤢᤜᤢ ᥈:᥇᥉-᥈᥈)
15ᤜᤧᤰᤁᤩᤠᤱ ᤕᤖᤢᤛᤗᤧᤔ ᤔᤧᤃᤧᤖᤧᤀᤠᤱ ᤕᤧᤛᤢᤴ ᤔᤠᤱᤜᤡᤶᤔᤥ ᤐᤣ. ᤜᤧᤰᤁᤩᤠᤱ ᤂᤧᤵᤔᤥ ᤆᤡᤃᤰᤘᤠ ᤁᤧᤛᤱᤒᤠ ᤁᤧᤀᤡᤱᤒᤠᤜᤠ᤹ ᤏᤠ᤺ᤵᤔᤠ ᤗ᤺ᤵᤔᤠ ᤜᤣ᤺ᤰᤋᤢᤛᤡ॥ ᤕᤠᤱ ᤁᤧᤗᤧᤰᤐᤠᤜᤠ᤹ᤖᤧ ᤂᤢᤏᤡ᤹ ᤕᤠᤱᤗᤧᤰᤔᤠ ᤛᤠᤵᤏᤧᤳᤋᤡᤴ ᤏᤢ ᤐᤢᤳᤋᤢ᤺ᤰᤁᤣ ᤁᤧᤛᤱᤒᤠᤜᤠ᤹ᤖᤧ ᤂᤢᤏᤡ᤹ ᤕᤢᤰᤏᤠᤴ ᤗᤧᤰᤂᤢᤒᤡᤖᤢᤛᤡᤖᤥ॥ 16ᤜᤧᤰᤁᤩᤠᤱ ᤁᤴ ᤔᤠᤱᤜᤡᤶ ᤗᤰᤂᤢᤶᤔᤥ ᤗᤠᤱᤄᤣ᤺ᤰᤔᤠᤖ ᤆᤡᤃᤰᤘᤠ ᤋᤣ᤹ᤔᤠ ᤋᤠ᤺ᤵᤔᤠ ᤛᤠᤰᤋᤢᤛᤡᤖᤥ॥ 17ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳ. ‘ᤀᤡᤱᤃᤠ᤹ ᤀᤠᤜᤡᤶᤔᤡᤱᤃ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧᤴ ᤋᤢᤘᤠ ᤆᤥ᤺ᤰᤔᤠ ᤜᤡᤶ ᤐᤥᤱ.’ ᤁᤖ ᤂᤡᤏᤡ᤹ᤃ ᤑᤠ᤺ᤴᤍᤠᤜᤠ᤹ ᤆᤡᤱᤛᤡᤱᤔᤠ ᤋᤧᤴ ᤁᤧᤈᤥᤃᤢᤶᤔᤠᤱ ᤁᤧᤘᤕᤡ᤹ᤖᤥ॥”
18ᤂᤧᤵᤔᤥ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ᤖᤧ ᤁᤴ ᤔᤧᤄᤧᤵᤛᤢᤀᤠᤱ ᤕᤧᤛᤢᤴ ᤀᤠᤰᤂᤣᤗ᤹ᤖᤡᤰ ᤛᤧᤵᤔᤠᤒᤣ ᤑᤠ᤹ᤀᤠᤱ ᤗᤠᤶ ᤁᤥ᤺ᤵᤔᤠ ᤔᤧᤜᤣ᤺ᤰᤋᤢ॥ ᤁᤖ ᤂᤧᤱᤜᤠ᤹ ᤔᤧᤃᤡᤛᤧ. ᤌᤣᤀᤠᤱᤓᤧᤸᤗᤧ ᤁᤢᤏᤡᤛᤠᤶᤔᤡᤴ ᤔᤧᤄᤧᤵᤛᤢᤸᤗᤧ ᤁᤧᤖᤧᤰ ᤔᤏᤠᤜᤠ᤹ᤖᤧ ᤛᤠ᤹ᤖᤡᤰ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤀᤠᤱ ᤘᤕᤧᤖᤥ॥ 19ᤜᤧᤰᤁᤩᤠᤱ ᤏᤠᤶᤎᤧᤀᤠᤱ ᤕᤧᤛᤢᤴ ᤏᤢ ᤁᤢᤜᤢ᤹ᤛᤠᤶᤒᤠᤜᤠ᤹ ᤕᤖᤢᤛᤗᤧᤔᤗᤠᤶ ᤔᤧᤗ᤺ᤴᤍᤧ ᤔᤧᤒᤣᤖᤥ॥
ᤐ᤺ᤳᤇᤣ᤹ᤒᤢᤱᤔᤥᤗᤠᤶ ᤏᤡᤛᤠᤶ
(ᤔᤳᤋᤡ ᥈᥇:᥈᥆-᥈᥈)
20ᤁᤢᤏᤠᤶᤍᤠ᤺ᤵᤔᤠ ᤂᤧᤴ ᤗᤠᤶᤔᤥ ᤔᤧᤒᤣ᤺ᤸᤗᤧ ᤔᤡ᤺ᤵᤔᤠᤒᤠ ᤐ᤺ᤳᤇᤣ᤹ᤒᤢᤱᤔᤠᤴ ᤁᤢᤒᤢᤱᤔᤥᤏᤢᤀᤣ ᤜᤣᤖᤧᤀᤠᤱ ᤛᤩᤧᤒᤠ ᤔᤧᤏᤡᤛᤢᤖᤥ॥ 21ᤕᤧᤛᤢᤖᤧ ᤐᤠ᤺ᤳᤋᤢᤒᤠᤴ ᤐᤋᤪᤢᤛᤖᤧ ᤏᤡᤱᤘᤠ᤹ ᤀᤡᤋᤢᤖ ᤂᤢᤏᤧ᤹ ᤔᤧᤳᤋᤢ. “ᤛᤡᤰᤛᤠᤶᤒᤣ. ᤀᤥᤔᤧᤳᤋᤧ᤹᥄ ᤂᤧᤴ ᤛᤠᤱᤃᤪᤠ ᤁᤧᤔᤧᤳᤋᤢᤒᤠ ᤐ᤺ᤳᤇᤣ᤹ᤒᤢᤱᤔᤠᤱᤃ ᤀᤡᤗᤧᤔᤧᤀᤠᤱ ᤛᤩᤧᤖᤥ॥”
22-23ᤕᤧᤛᤢᤖᤧ ᤔᤧᤳᤋᤢᤛᤡ. “ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤛᤠᤴ ᤆᤥᤃᤧᤶᤔᤧ᤹᥄ ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤜᤠ᤺ᤳᤗᤧ ᤏᤡᤱᤘᤠ᤹ᤀᤥ ᤆᤵᤆᤡ ᤔᤧᤴᤈᤥ᤺ᤰᤁᤣ. ᤁᤴ ᤁᤥ᤺ᤰᤔᤠᤴ ᤜᤠ᤹ᤕᤠᤰ ᤀᤠᤃᤧ᤹ᤀᤠᤱ ᤘᤠᤜᤱᤅᤥ ᤗᤠᤵᤑᤢᤛᤡᤱᤅᤧ᤹ ᤑᤠ᤹ᤀᤠᤱ ᤏᤡᤱᤘᤠ᤹ᤀᤥ ᤏᤛᤠᤴ ᤆᤥᤃᤢᤀᤠᤱ ᤐᤠ᤺ᤳᤋᤢ᤹. ᤂᤧᤱᤃ ᤁᤢᤗᤠᤃᤡ ᤐᤥᤱᤅᤣᤖᤥ॥ 24ᤂᤧᤸᤗᤧᤆᤥᤃᤢᤸᤗᤧ ᤂᤡᤏᤡ᤹ ᤋᤢᤘᤠ ᤁᤧᤈᤥᤃᤢᤶᤔᤡᤸᤗᤧ ᤁᤧᤏᤠ᤺ᤰᤋᤢᤶᤒᤠ ᤐᤠ᤺ᤴᤏᤡᤴ ᤂᤥᤛᤢᤶᤒᤧ᤹ ᤑᤠ᤹ᤀᤠᤱ ᤏᤛᤠᤴ ᤆᤥᤃᤧᤶᤔᤧ᤹. ᤜᤧᤰᤁᤩᤠᤱ ᤂᤧᤴ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤁᤧᤄᤥᤛᤢᤶᤗᤥ॥ 25-26ᤜᤧᤰᤁᤩᤠᤱ ᤂᤡᤏᤡ᤹ ᤋᤢᤘᤠ ᤁᤧᤈᤥᤃᤢᤶᤔᤡᤸᤗᤧ ᤀᤠᤳᤋᤡᤴ ᤔᤏᤠ᤺ᤸᤗᤧ ᤁᤢᤍᤰᤗᤧᤱᤘᤠᤀᤥ ᤂᤡᤏᤡ᤹ ᤏᤡᤱᤘᤠ᤹ ᤋᤢᤃᤧᤀᤠᤱ ᤘᤠ᤹. ᤂᤧᤴᤏᤡᤴ ᤗᤧᤵᤔᤡ ᤐᤡᤖᤧᤶᤔᤧ᤹ᤀᤥ॥ ᤜᤧᤰᤁᤣᤗ᤹ᤖᤡᤰ ᤛᤠᤱᤃᤪᤠᤶᤐᤣᤍᤠᤱᤅᤥ ᤁᤧᤘᤠ᤹ᤒᤠ ᤂᤡᤏᤡ᤹ ᤐᤠᤏᤢᤍᤡᤱ ᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤀᤠᤱ ᤂᤡᤏᤡ᤹ ᤗᤠᤕᤥᤴ ᤗᤧᤵᤔᤡ ᤁᤧᤒᤡᤖᤡ᤹ᤖᤥ॥ (ᤁᤖ ᤂᤡᤏᤡ᤹ ᤗᤧᤵᤔᤡ ᤁᤧᤶᤒᤡᤖᤢᤶᤔᤡᤴᤏᤧ ᤑᤠ᤹ᤃᤪ ᤛᤠᤱᤃᤪᤠᤶᤐᤣᤍᤠᤱᤅᤥ ᤁᤧᤘᤠ᤹ᤒᤠ ᤂᤡᤏᤡ᤹ ᤐᤠᤏᤢᤍᤡᤱ ᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤀᤠᤱ ᤂᤡᤏᤡ᤹ ᤗᤠᤕᤥᤴ ᤗᤧᤵᤔᤡ ᤁᤧᤶᤒᤡᤖᤡᤴᤗᤥ॥)”
ᤕᤧᤛᤢᤖᤧ ᤁᤢᤕᤢᤰ
(ᤔᤳᤋᤡ ᥈᥇:᥈᥉-᥈᥍; ᤗᤢᤁᤠ ᥈᥆:᥇-᥎)
27ᤂᤧᤱᤜᤠ᤹ ᤕᤠᤶᤔᤥ ᤕᤖᤢᤛᤗᤧᤶᤔᤥ ᤔᤧᤍᤩᤧ॥ ᤕᤧᤛᤢᤴ ᤔᤠᤱᤜᤡᤶ ᤗᤰᤂᤢᤶᤔᤥ ᤋᤠᤰᤁᤴᤏᤢ ᤘᤕᤧᤸᤗᤧ ᤂᤧᤵᤔᤥ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹. ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤏᤢ ᤕᤜᤢᤍᤡ ᤋᤢᤶᤗᤠᤶᤗᤥᤒᤠᤜᤠ᤹ ᤔᤧᤍᤩᤧᤀᤠᤱ 28ᤛᤣ᤺ᤴᤔᤧᤍᤥᤛᤢ. “ᤂᤧᤏᤧ᤹ ᤌᤧᤔᤠ ᤕᤢᤰᤁᤡᤸᤗᤧ ᤀᤰᤋᤱᤒᤠ ᤕᤠ᤺ᤶᤒᤰᤜᤠ᤹ ᤁᤧᤈᤥᤃᤢᤖ ᤁᤧᤘᤠ᤹᥅ ᤁᤴ ᤕᤢᤰᤁᤡᤴ ᤜᤠ᤺ᤳᤗᤧ ᤁᤧᤒᤡᤖᤧ᥅”
29ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ᤀᤠᤱ ᤗᤳᤇᤠ ᤛᤣ᤺ᤴᤗᤠᤵᤌᤡᤰ ᤛᤣ᤺ᤴᤍᤥᤏᤡᤱᤗᤥ॥ ᤕᤠᤵᤔᤡ ᤏᤥᤃᤵ ᤀᤠᤒᤡᤖᤧᤶᤔᤧ᤹ᤀᤥ. ᤜᤧᤰᤁᤩᤠᤱᤗᤰ ᤌᤧᤔᤠ ᤕᤢᤰᤁᤡᤸᤗᤧ ᤀᤡᤱᤃᤠ᤹ ᤕᤠ᤺ᤶᤒᤰ ᤆᤥᤃᤢᤱ. ᤂᤡᤏᤡ᤹ ᤔᤧᤳᤏᤡᤱᤗᤥ॥ 30ᤕᤢᤜᤢᤴᤏᤠᤖᤧ ᤒᤵᤋᤡᤛ᤻ᤔᤠ ᤐᤡᤔᤠ ᤁᤢᤕᤢᤰᤁᤡᤴ ᤀᤠᤳᤋᤥᤗᤠᤶ ᤋᤩᤧᤒᤠᤒᤣ᥅ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤋᤩᤧᤒᤠᤒᤡ. ᤀᤡ ᤔᤏᤠᤗᤠᤶᤒᤡ᥅ ᤕᤠᤵᤔᤡ ᤀᤠᤔᤧᤳᤋᤧᤶᤔᤧ᤹᥄”
31ᤂᤧᤱᤜᤠ᤹ᤖᤧ ᤂᤢᤏᤡ᤹ ᤗᤢᤶᤔᤥ ᤐᤠᤴ ᤔᤧᤎᤰᤋᤧᤖ ᤀᤰᤂᤣ ᤔᤧᤔᤧᤳᤇᤡᤱ. “ᤀᤠᤸᤗ ᤀᤠᤏᤡ᤹ ‘ᤏᤡᤱᤘᤠ᤹ᤑᤢᤔᤠᤱᤗᤠᤶ’ ᤀᤠᤔᤧᤳᤋᤢᤶᤏᤧ ᤑᤠ᤹ᤃᤪ. ᤌᤣᤀᤠᤱ ᤏᤛᤠᤴ ᤁᤧᤴᤈᤥᤃᤢᤶᤔᤡᤴ ᤑᤠ᤹ᤀᤠᤱ ᤛᤣ᤺ᤴᤀᤠᤗᤠᤵ॥ 32‘ᤔᤏᤠᤜᤠ᤹ᤗᤠᤶᤗᤥ’ ᤀᤠᤔᤧᤳᤋᤢᤶᤏᤧ ᤑᤠ᤹ᤃᤪ. ᤔᤏᤠᤜᤠ᤹ ᤀᤠᤏᤡ᤹ ᤋᤰᤗᤧᤱᤘᤠᤀᤥ ᤔᤧᤒᤥᤰ. ᤌᤣᤀᤠᤱᤓᤧᤸᤗᤧ ᤔᤏᤠᤜᤠ᤹ᤖᤧ ᤕᤢᤜᤢᤴᤏᤠᤴ ᤛᤧᤰᤂᤠᤀᤣ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤑᤠ᤹ᤀᤠᤱ ᤔᤧᤀᤡ᤺ᤳᤋᤢᤀᤠᤱ ᤔᤧᤘᤠ᤹॥” 33ᤂᤧᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤕᤧᤛᤢᤴ ᤔᤧᤔᤧᤳᤋᤢ. “ᤀᤠᤏᤡᤃᤣ ᤔᤧᤏᤡᤛᤢᤶᤒᤧᤴᤗᤥ॥”
ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤜᤧᤰᤁᤣᤏᤧ ᤑᤠ᤹ᤃᤪ ᤌᤧᤔᤠ ᤕᤢᤰᤁᤡᤸᤗᤧ ᤀᤰᤋᤱᤒᤠ ᤕᤠ᤺ᤶᤒᤰᤜᤠ᤹ ᤆᤥᤃᤢᤱ ᤂᤧᤴ ᤀᤡᤱᤃᤠ᤹ᤀᤠᤱ ᤔᤧᤔᤧᤳᤏᤡᤱᤅᤡᤴᤗᤥ॥”
Currently Selected:
ᤔᤷᤁᤢᤛ 11: LIFOTNT
Highlight
Share
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.
