ᤗᤢᤁᤠ 5
5
ᤌᤡᤰᤛᤡᤃᤣᤰᤐᤠ ᤜᤢ᤹ᤛᤠᤶᤒᤠᤜᤠ᤹
(ᤔᤳᤋᤡ ᥊:᥇᥎-᥈᥈; ᤔᤷᤁᤢ ᥇:᥇᥌-᥈᥆; ᤕᤢᤜᤢ ᥇:᥊᥆-᥊᥈)
1ᤌᤡᤰᤕᤧᤴ ᤕᤧᤛᤢᤴ ᤃᤏᤧᤛᤖᤧᤋ ᤘᤠᤜᤱᤅᤡᤸᤗᤧ ᤁᤢᤕᤠᤀᤥ ᤛᤢᤏᤠᤀᤡᤱ ᤛᤧᤛᤢᤖ ᤕᤧᤒᤧᤸᤗᤧ ᤂᤧᤵᤔᤥ ᤔᤏᤠᤜᤠ᤹ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤴ ᤂᤧᤶᤛᤧ ᤔᤧᤍᤩᤧᤀᤠᤱ ᤂᤢᤏᤧ᤹ ᤆᤡᤒᤢ᤺ᤳ ᤔᤧᤒᤴᤇᤢᤖᤥ॥ 2ᤂᤧᤵᤔᤥ ᤁᤢᤕᤠᤀᤥ ᤏᤧᤳᤇᤡ ᤂ᤺ᤱᤒᤣᤜᤠ᤹ ᤕᤧᤛᤢᤖᤧ ᤏᤡᤛᤢᤛᤡ. ᤁᤖ ᤁᤢᤒᤣᤛᤠᤱ ᤕᤥ᤺ᤱ ᤁᤧᤗᤧᤵᤐᤠᤜᤠ᤹ ᤂᤢᤏᤡ᤹ ᤕᤥ᤺ᤱ ᤘᤠᤜᤵᤏᤢ ᤔᤧᤕᤠᤃᤧ॥ 3ᤕᤧᤛᤢᤴ ᤛᤡᤔᤥᤏᤖᤧ ᤁᤢᤄ᤺ᤱᤒᤣᤀᤥ ᤗᤠᤛᤧᤀᤠᤱ ᤔᤡᤛᤠᤰ ᤁᤢᤍᤡ᤺ᤶᤒᤣ ᤁᤣ᤺ᤶᤒᤠᤀᤥ ᤋᤣ᤹ᤒᤠᤱᤄᤢ. ᤜᤧᤰᤁᤩᤠᤱ ᤂᤧᤵᤔᤥ ᤕᤢᤱᤛᤡᤱᤅᤠᤱ ᤔᤏᤠᤜᤠ᤹ ᤜᤢ᤹ᤖᤢᤛᤡ॥
4ᤂᤢᤏᤧ᤹ ᤐᤠ᤺ᤵᤔᤠ ᤛᤢᤖᤢᤀᤠᤱ ᤛᤡᤔᤥᤏᤧᤴ ᤔᤧᤳᤋᤢ. “ᤂ᤺ᤱᤒᤣᤴ ᤏᤠ ᤁᤢᤍᤡ᤺ᤶᤒᤣ ᤁᤣ᤺ᤶᤒᤠᤀᤥ ᤋᤣ᤹ᤖᤧᤀᤠᤱ ᤅᤠᤍᤧᤶᤔᤠᤖᤧ ᤗᤠᤃᤡ ᤕᤥ᤺ᤱᤅᤡᤴ ᤗᤧᤵᤋᤧ᤹॥” 5ᤜᤧᤰᤁᤣ᤺ᤸᤗᤧ ᤛᤡᤔᤥᤏᤖᤧ ᤏᤥᤃᤵ ᤐᤡᤖᤢ. “ᤀᤠᤍᤠᤱᤒᤣ. ᤀᤠᤏᤡᤃᤧᤃ ᤏᤠᤶᤍᤠ᤺ᤳᤋᤠ᤺ᤳ ᤕᤠᤶᤒᤢᤎᤡᤰᤁᤠᤱ ᤕᤥ᤺ᤱ ᤗᤧᤵᤔᤏᤠᤛᤠᤱ ᤅᤠᤎᤡᤰᤁᤠᤱ ᤔᤧᤕᤠᤱᤄᤢᤶᤒᤧᤴᤗᤥ. ᤜᤧᤰᤁᤣᤛᤠᤱ ᤂᤧᤏᤧ᤹ ᤁᤧᤒᤠ᤺ᤳᤋᤢᤒᤠ ᤜᤧᤰᤁᤣ ᤗᤧᤵᤋᤢᤱᤛᤠ᤹ᤖᤢᤱᤗᤥ॥” 6ᤜᤧᤰᤁᤩᤠᤱ ᤂᤢᤏᤧ᤹ ᤐᤠ᤺ᤳᤋᤢᤒᤠ ᤜᤧᤰᤁᤣ ᤕᤥ᤺ᤱᤅᤡᤴ ᤗᤧᤵᤋᤢᤸᤗᤧ ᤕᤖᤡᤰ ᤅᤠᤜᤠ᤹ ᤔᤧᤎᤩᤧᤀᤠᤱ ᤕᤥ᤺ᤱᤅᤡᤴᤏᤣ ᤋᤧ᤺ᤱᤔᤠ ᤜᤣ᤺ᤰᤋᤧᤖᤥ॥ 7ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤘᤣ᤹ ᤂᤢᤏᤡ᤹ ᤋᤣ᤺ᤱᤈᤢᤶᤜᤠ᤹ ᤘᤣ᤹ ᤂ᤺ᤱᤒᤣᤴ ᤑᤧᤳᤋᤧᤶᤔᤧ᤹ᤀᤠᤱ ᤀᤠᤓᤠ᤹ᤖᤧᤶᤔᤧ᤹ᤀᤥ ᤗ᤹ᤖᤡᤰ ᤜᤢᤰᤆᤠ᤺ᤸᤁᤡ᤺ᤸᤗᤧ ᤔᤧᤀᤢ᤺ᤳᤋᤢᤛᤡ॥ ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤓᤧᤖᤧᤀᤠᤱ ᤏᤧᤵᤔᤠᤱ ᤂ᤺ᤱᤒᤣᤜᤠ᤹ ᤅᤠ᤺ᤸᤗᤧ ᤋᤡᤶᤛᤧᤀᤠᤱ ᤏᤡ᤺ᤶᤔᤠ ᤀᤡ᤺ᤳᤋᤧ॥ 8ᤛᤡᤔᤥᤏ ᤐᤋᤪᤢᤛᤖᤧ ᤁᤴ ᤏᤡᤛᤢᤀᤠᤱ ᤕᤧᤛᤢᤖᤧ ᤁᤢᤍᤃᤡ ᤌᤢᤱᤒᤥᤜᤈ᤹ ᤕᤢᤱᤛᤡᤱᤅᤠᤱ ᤔᤧᤳᤋᤢ. “ᤀᤠᤍᤠᤱᤒᤣ. ᤀᤡᤱᤃᤠ᤹ᤃ ᤛᤠ᤹ᤖᤡᤰ ᤗᤠᤕᤥᤒᤠ ᤔᤏᤠᤀᤠᤖᤥ. ᤂᤧᤏᤧ᤹ᤏᤢ ᤘᤠ᤹ᤔᤠ ᤔᤧᤗᤠ᤹ᤀᤠᤴᤗᤥ. ᤗᤧᤖᤠᤱ ᤌᤩᤠᤱᤅᤧ᤹ᤀᤥ॥”
9ᤌᤣᤀᤠᤱᤓᤧᤸᤗᤧ ᤛᤡᤔᤥᤏ ᤏᤢ ᤁᤢᤴᤈᤢᤶᤜᤠ᤹ᤖᤧ ᤔᤧᤎᤠᤛᤢᤛᤡᤒᤠ ᤅᤠᤜᤠ᤹ ᤔᤧᤀᤡ᤺ᤳᤋᤢᤀᤠᤱ ᤛᤠ᤹ᤖᤡᤰ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖᤥ॥ 10ᤛᤡᤔᤥᤏᤖᤧ ᤁᤢᤴᤈᤢᤶ ᤈᤒ᤻ᤍᤡᤕᤠᤖᤧ ᤁᤢᤛ᤻ᤛᤠᤜᤠ᤹ ᤕᤠᤁᤢᤒ ᤏᤢ ᤕᤢᤜᤢᤴᤏᤠᤛᤡᤖᤧᤀᤠᤱ ᤂᤢᤴᤇᤡ᤹ ᤏᤡᤱᤘᤠ᤹ ᤔᤕᤧ॥ ᤕᤧᤛᤢᤖᤧ ᤛᤡᤔᤥᤏᤧᤴ ᤔᤧᤳᤋᤢ. “ᤂᤧᤏᤧ᤹ ᤔᤧᤃᤡᤛᤧᤴᤏᤧ᤹. ᤅᤠ ᤁᤧᤍᤧᤶᤛᤢᤒᤠ ᤜᤧᤰᤁᤣᤀᤣ ᤀᤠᤸᤗᤀᤠᤱᤎᤥ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤥ ᤔᤏᤠ ᤁᤧᤍᤧᤶᤒᤠ ᤁᤧᤍᤠ᤺ᤵᤐᤠ ᤁᤧᤒᤥᤱᤗᤥ॥”
11ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂ᤺ᤱᤒᤣᤜᤠ᤹ ᤁᤢᤕᤠᤀᤥ ᤔᤧᤍᤣ᤹ᤖᤢᤛᤡ. ᤜᤧᤰᤁᤩᤠᤱ ᤁᤧᤖᤧᤰ ᤔᤧᤗᤧᤖᤢ ᤔᤧᤎᤀᤠᤱ ᤕᤧᤛᤢᤴ ᤔᤧᤍᤡᤶᤍᤢᤖᤥ॥
ᤕᤧᤛᤢᤖᤧ ᤗᤥᤃᤣ᤹ᤖᤧ ᤋᤖᤢᤒᤠ ᤔᤏᤠᤴ ᤘᤣ᤺ᤴᤍᤢ᤹
(ᤔᤳᤋᤡ ᥎:᥇-᥊; ᤔᤷᤁᤢ ᥇:᥊᥆-᥊᥋)
12ᤌᤡᤰᤕᤧᤴ ᤕᤧᤛᤢᤴ ᤗᤳᤇᤠ ᤐᤠᤱᤈᤢᤶᤔᤥ ᤘᤕᤧᤸᤗᤧ ᤗᤥᤃᤣ᤹ᤖᤧ ᤋᤖᤢᤀᤠᤱ ᤌᤡᤶᤛᤢᤒᤠ ᤔᤏᤠᤎᤡᤰ ᤂᤧᤵᤔᤥ ᤋᤩᤧ॥ ᤂᤧᤸᤗᤧ ᤕᤧᤛᤢᤴ ᤏᤡᤛᤢᤀᤠᤱ ᤁᤢᤍᤃᤡ ᤛᤠᤶᤒᤥᤴ ᤑᤴᤇᤡᤱᤗ ᤐᤣᤗᤡ ᤑᤠᤰᤋᤢ. “ᤀᤠᤍᤠᤱᤒᤣ. ᤂᤧᤏᤧ᤹ ᤏᤡᤱᤘᤠ᤹ ᤁᤧᤈᤥᤃᤢᤏᤧ ᤑᤠ᤹ᤃᤪ ᤗᤥᤃᤣ᤹ᤗᤠᤶ ᤘᤣ᤺ᤶᤔᤠ ᤁᤧᤛᤢᤰᤁᤠᤖᤥ॥”
13ᤕᤧᤛᤢᤖᤧᤀᤠᤱ ᤁᤢᤜᤢᤰᤁᤡᤴ ᤛᤴᤇᤢᤀᤠᤱ ᤛᤢᤛᤢᤖ ᤂᤧᤴ ᤔᤏᤠᤴ ᤀᤰᤂᤣ ᤔᤧᤳᤋᤢ. “ᤀᤡᤱᤃᤠ᤹ ᤁᤧᤏᤢ᤹ᤖ ᤑᤠ᤹ᤀᤠᤱ ᤏᤡᤱᤘᤠ᤹ ᤆᤥᤃᤢᤱᤗᤥ॥” ᤜᤧᤰᤁᤩᤠᤱ ᤂᤡᤔᤥ ᤂᤧᤴ ᤗᤥᤃᤣ᤹ᤖᤧ ᤋᤖᤢᤒᤠ ᤔᤏᤠᤴ ᤏᤢᤖᤧᤖᤥ॥ 14ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤴ ᤔᤏᤠᤴ ᤔᤧᤳᤋᤢ. “ᤁᤴ ᤐᤠ᤺ᤴᤏᤡᤴ ᤜᤠ᤺ᤳᤋᤠᤱ ᤔᤧᤔᤧᤳᤋᤧᤴᤏᤧ᤹. ᤁᤖ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤁᤧᤛᤠ᤹ᤖ ᤑᤠ᤹ᤀᤠᤱ ᤀᤥᤛᤣ᤺ᤴᤎᤠᤰᤛᤡᤱᤅᤧ᤹. ᤜᤧᤰᤁᤩᤠᤱ ᤔᤥᤛᤠᤖᤧ ᤁᤢᤛᤠᤶᤕᤥᤌᤡᤶ ᤁᤢᤀᤡᤛᤡᤰ ᤔᤏᤠᤜᤠ᤹ ᤏᤢᤖᤠᤱ ᤑᤠ᤹ᤀᤠᤱ ᤀᤥᤛᤣ᤺ᤴᤎᤠᤰᤔᤠᤛᤡᤖᤧ ᤗᤠᤃᤡ ᤛᤡᤍᤢᤱᤈᤓᤠ ᤆᤥᤃᤧ᤹ᤀᤥ॥”
15ᤁᤖᤛᤠᤱ ᤁᤴ ᤐᤠ᤺ᤴᤏᤡᤴ ᤁᤠᤰ ᤐᤡᤛᤠᤱ ᤛᤧᤖᤧᤀᤠᤱ ᤕᤧᤛᤢᤖᤧ ᤁᤢᤒᤠᤴ ᤂᤧᤶᤛᤧ ᤏᤢ ᤂᤢᤏᤡ᤹ ᤋᤢᤰᤔᤠ ᤕ᤹ᤔᤠᤗᤠᤶ ᤏᤢᤛᤡᤱᤛᤧ ᤕᤖᤡᤰ ᤔᤏᤠᤜᤠ᤹ ᤕᤧᤛᤢᤀᤥ ᤔᤧᤍᤩᤧ॥ 16ᤁᤖ ᤕᤧᤛᤢᤴ ᤀᤧᤳᤗᤧᤱ ᤔᤏᤠᤗᤢᤶᤔᤥᤗᤠᤶ ᤛᤧᤴᤇᤡᤱᤅᤠᤱ ᤋᤢᤘᤠ ᤆᤥ᤺ᤰᤛᤧ ᤀᤣ᤺ᤰᤛᤠᤍᤧᤴᤜᤠ᤹ᤀᤥ ᤐᤣᤖᤥ॥
ᤗᤱᤗᤧ᤺ᤱᤘᤠ ᤋᤢᤰᤔᤠᤸᤗᤧ ᤋᤖᤢᤒᤠ ᤔᤏᤠᤴ ᤘᤣ᤺ᤳ
(ᤔᤳᤋᤡ ᥏:᥇-᥎; ᤔᤷᤁᤢ ᥈:᥇-᥇᥈)
17ᤌᤡᤰᤕᤧᤴ ᤕᤧᤛᤢᤴ ᤔᤏᤠᤜᤠ᤹ ᤂᤠᤜᤢᤴ ᤜᤢ᤹ᤖᤢᤛᤡᤖ ᤕᤢᤅᤧᤸᤗᤧ ᤂᤧᤵᤔᤥ ᤃᤠᤗᤡᤗ ᤏᤢ ᤕᤜᤢᤍᤡᤕᤠᤛᤔᤠ ᤕᤖᤡᤰ ᤐᤠᤱᤈᤢᤶᤔᤥᤗᤠᤶ ᤜᤧᤰᤁᤩᤠᤱ ᤕᤖᤢᤛᤗᤧᤔᤗᤠᤶ ᤑᤖᤡᤛᤡᤜᤠ᤹ ᤏᤢ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ᤀᤠᤱ ᤔᤧᤍᤩᤧᤀᤠᤱ ᤂᤠᤜᤢᤴ ᤔᤧᤄᤧᤵᤛᤢᤖ ᤔᤧᤕᤢᤅᤧ॥ ᤕᤧᤛᤢᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤘᤣ᤺ᤶᤔᤠ ᤁᤢᤔᤢᤰᤛᤠᤶᤔᤡᤴ ᤁᤳᤋᤢᤀᤠᤱ ᤘᤕᤧ. 18ᤜᤧᤰᤁᤩᤠᤱ ᤁᤢᤓᤠ ᤔᤏᤠᤜᤠ᤹ᤖᤧ ᤗᤱᤗᤧ᤺ᤱᤘᤠ ᤔᤏᤠᤴ ᤁᤢᤏᤧᤳᤏᤠ᤺ᤴᤏᤢᤀᤣ ᤂᤧᤵᤔᤥ ᤔᤧᤍᤠᤖᤢᤀᤠᤱ ᤕᤧᤛᤢᤖᤧ ᤁᤢᤍᤃᤡ ᤋᤣ᤹ᤔᤠᤀᤠᤱ ᤏᤧᤔᤠ ᤁᤧᤗ᤹ᤒᤠ ᤏᤡᤱᤘᤠ᤹ ᤔᤧᤈᤥᤃᤢ. 19ᤁᤖ ᤂᤧᤵᤔᤥ ᤕᤧᤛᤢᤴ ᤘᤕᤧᤒᤠ ᤜᤡᤶᤔᤥ ᤕᤖᤡᤰ ᤔᤏᤠᤜᤠ᤹ᤖᤧ ᤛᤎᤧᤰ ᤔᤧᤎᤡᤶᤛᤢᤀᤠᤱ ᤔᤧᤕᤢᤅᤧᤒᤠᤸᤗᤧ ᤆᤥᤃᤢᤸᤗᤧ ᤛᤡᤃᤠᤱ ᤋᤣ᤹ᤔᤠ ᤔᤧᤴᤇᤢᤰᤋᤢᤴ॥ ᤜᤧᤰᤁᤣ᤺ᤸᤗᤧ ᤌᤥ ᤂᤠᤶᤒᤢᤀᤥ ᤔᤧᤗᤠᤛᤧᤀᤠᤱ ᤂᤠᤶᤒᤢᤴ ᤔᤧᤜᤴᤍᤢ॥ ᤜᤧᤰᤁᤩᤠᤱ ᤗᤱᤗᤧ᤺ᤱᤘᤠᤴ ᤁᤢᤏᤧᤳᤏᤠᤏᤢᤀᤣ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤗᤢᤶᤔᤥ ᤕᤧᤛᤢᤖᤧ ᤁᤢᤍᤃᤡ ᤕᤥ ᤔᤧᤜᤥᤛᤢ ᤔᤧᤎᤠᤛᤢᤖᤥ॥ 20ᤕᤧᤛᤢᤖᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤛᤠ᤺ᤴᤏᤡᤴ ᤏᤡᤛᤢᤀᤠᤱ ᤂᤧᤴ ᤗᤱᤗᤧ᤺ᤱᤘᤠ ᤔᤏᤠᤴ ᤔᤧᤳᤋᤢ. “ᤆᤢᤶᤔᤣ. ᤂᤧᤏᤧ᤹ ᤁᤧᤗᤠᤕᤥᤜᤠ᤹ ᤗᤧᤵᤔᤡ ᤐᤥ᤺ᤰᤂᤧᤖᤥ॥” 21ᤜᤧᤰᤁᤣ᤺ᤸᤗᤧ ᤂᤧᤵᤔᤥ “ᤁᤴ ᤔᤏᤠᤴ ᤜᤠ᤺ᤵᤐᤣ᥅ ᤀᤰᤂᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤔᤠᤱ ᤆᤧ᤹ᤕᤠᤐᤠᤴ ᤁᤧᤒᤠ᤺ᤵᤐᤠ ᤁᤴ ᤔᤏᤠᤴ ᤜᤠ᤺ᤵᤐᤣ᥅ ᤗᤠᤕᤥᤗᤠᤶ ᤗᤧᤵᤔᤡ ᤐᤡᤔᤠᤃ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ᤺ᤸᤗᤧ ᤘᤣ᤹ ᤜᤠ᤺ᤳᤗᤧᤀᤠᤱ ᤔᤧᤛᤢᤰᤋᤢᤴᤗᤥ” ᤑᤠ᤹ᤀᤠᤱ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤏᤢ ᤑᤖᤡᤛᤡᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤒᤥ ᤔᤧᤀᤡ᤺ᤳᤋᤢ॥
22ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤒᤥ ᤌᤧᤔᤠ ᤔᤧᤀᤡ᤺ᤳᤋᤢᤖ ᤔᤧᤕᤢᤱ ᤁᤧᤗ᤹ᤒᤠᤴ ᤕᤧᤛᤢᤖᤧ ᤏᤡᤛᤢᤀᤠᤱ ᤔᤧᤳᤋᤢᤛᤡ. “ᤂᤡᤏᤡ᤹ ᤀᤰᤋᤱᤒᤠ ᤌᤣᤀᤠᤱ ᤁᤧᤀᤡ᤺ᤳᤋᤢᤶᤒᤠᤒᤣ᥅ 23ᤁᤴ ᤗᤱᤗᤧ᤺ᤱᤘᤠᤴ ‘ᤁᤧᤗᤠᤕᤥᤜᤠ᤹ ᤗᤧᤵᤔᤡ ᤐᤥ᤺ᤰᤂᤧ’ ᤔᤧᤵᤔᤠ ᤀᤢᤛᤢᤖᤢ ᤆᤥ᤺ᤰᤐᤡ᥅ ᤀᤡ ‘ᤐᤥᤃᤧ᤹ᤀᤠᤱ ᤁᤧᤏᤧᤳᤏᤠᤴ ᤂᤵᤛᤧ᤹ᤀᤠᤱ ᤌᤠᤛᤡᤱᤅᤧ᤹’ ᤔᤧᤵᤔᤠ ᤀᤢᤛᤢᤖᤢ ᤆᤥ᤺ᤰᤐᤡ᥅ 24ᤁᤖ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤔᤧᤴᤇᤠᤶᤛᤠ᤺ᤸᤗᤧ ᤗᤠᤕᤥ ᤗᤧᤵᤔᤡ ᤐᤡᤔᤠ ᤕᤢᤰ ᤁᤳᤋᤢ᤹ ᤑᤠ᤹ᤀᤠᤱ ᤂᤡᤏᤡ᤹ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ᤀᤥ.” ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤴ ᤗᤱᤗᤧ᤺ᤱᤘᤠ ᤔᤏᤠᤴ ᤔᤧᤳᤋᤢ. “ᤂᤧᤏᤧ᤹ ᤐᤥᤃᤧ᤹ᤀᤠᤱ ᤁᤧᤏᤧᤳᤏᤠᤴ ᤕᤠᤱᤛᤡᤱᤅᤧ᤹ᤀᤠᤱ ᤁᤧᤜᤡᤶᤔᤥ ᤌᤠᤛᤡᤱᤅᤧ᤹॥”
25ᤂᤡᤔᤥ ᤂᤧᤴ ᤂᤢᤏᤡ᤹ ᤋᤃᤡᤀᤣ ᤔᤢᤳᤌᤪᤡᤰ ᤐᤥᤃᤧᤀᤠᤱ ᤁᤢᤏᤧᤳᤏᤠᤴ ᤕᤠᤱᤛᤡᤱ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤑᤥᤛᤢᤖ ᤁᤢᤜᤡᤶᤔᤥ ᤌᤠᤛᤡᤱᤗᤥ॥ 26ᤁᤧᤖᤧᤰᤗᤧ ᤂᤢᤏᤡ᤹ ᤛᤠ᤹ᤖᤡᤰ ᤏᤡᤱᤘᤠ᤹ ᤔᤕᤧᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤡᤱᤎᤠᤱ ᤔᤧᤒᤡᤖᤢᤖ ᤔᤧᤒᤠ᤺ᤳᤋᤢ. “ᤀᤰᤋᤱᤒᤠᤃ ᤀᤠᤏᤡᤃᤣ ᤀᤠᤵᤑᤠᤸᤗᤧᤀᤠᤱ ᤔᤧᤴᤏᤡᤀᤣ ᤘᤕᤡᤃᤧᤖᤥ॥”
ᤕᤧᤛᤢᤖᤧ ᤗᤧᤒᤡᤴ ᤀᤢ᤺ᤳᤋᤢ᤹
(ᤔᤳᤋᤡ ᥏:᥏-᥇᥉; ᤔᤷᤁᤢ ᥈:᥇᥊-᥇᥍)
27ᤕᤠᤱᤛᤡ ᤕᤧᤛᤢᤴ ᤂᤧᤵᤔᤥᤗᤠᤶ ᤗ᤺ᤴᤍᤧ ᤐᤣᤀᤠᤱ ᤀᤣ᤺ᤱᤕᤠᤱ ᤁᤧᤓᤥᤱᤒᤠ ᤗᤧᤒᤡ ᤔᤡᤱ ᤁᤧᤘᤠ᤺ᤵᤐᤠ ᤔᤏᤠᤴ ᤀᤣ᤺ᤱᤕᤠᤱ ᤑᤥᤱᤔᤠ ᤋᤧᤴᤏᤥ ᤕᤢᤅᤧᤒᤠ ᤏᤡᤛᤢᤀᤠᤱ ᤔᤧᤳᤋᤢ. “ᤀᤡᤱᤃᤠ᤹ ᤋᤡᤶᤍᤠᤱᤅᤧ᤹ᤀᤥ॥” 28ᤜᤧᤰᤁᤩᤠᤱ ᤂᤧᤴᤏᤠᤱ ᤔᤢᤳᤌᤪᤡᤰ ᤐᤥᤃᤧᤀᤠᤱ ᤁᤧᤖᤧᤰ ᤐᤠ᤺ᤴᤜᤠ᤹ ᤗᤧᤖᤢᤎᤀᤠᤱ ᤂᤢᤏᤧ᤹ᤏᤢ ᤌᤠᤛᤡᤱᤗᤥ॥
29ᤕᤠᤱᤛᤡ ᤕᤧᤛᤢᤖᤧ ᤁᤢᤗᤠᤃᤡ ᤗᤧᤒᤡ᤺ᤸᤗᤧ ᤁᤢᤜᤡᤶᤔᤥ ᤕᤶᤒᤠ ᤆᤠᤔᤢᤰ ᤌᤡᤔᤢᤰ ᤛᤧᤛᤢ॥ ᤂᤧᤵᤔᤥ ᤕᤖᤡᤰ ᤀᤣ᤺ᤱᤕᤠᤱ ᤁᤧᤓᤥᤱᤒᤠᤜᤠ᤹ ᤏᤢ ᤘᤣ᤹ ᤋᤖᤣᤒᤠᤜᤠ᤹ ᤔᤧᤘᤕᤧᤖᤥ॥ 30ᤂᤧᤵᤔᤥ ᤑᤖᤡᤛᤡᤜᤠ᤹ ᤏᤢ ᤂᤢᤏᤡ᤹ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤔᤧᤍᤩᤧᤀᤠᤱ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤏᤧ ᤔᤧᤎᤡᤰᤋᤧᤖ ᤀᤰᤂᤣ ᤔᤧᤔᤧᤳᤋᤢᤛᤡ. “ᤀᤣ᤺ᤱᤕᤠᤱ ᤁᤧᤓᤥᤱᤒᤠᤜᤠ᤹ ᤜᤧᤰᤁᤩᤠᤱ ᤗᤠᤕᤥᤒᤠᤜᤠ᤹ᤏᤢ ᤌᤣᤀᤠᤱ ᤂᤡᤏᤡ᤹ ᤁᤧᤍᤱᤅᤠᤛᤡᤀᤠᤱ ᤆᤠ ᤁᤧᤈᤠᤶᤒᤠᤒᤣ᥅”
31ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤛᤡᤍᤠ᤹ᤛᤠᤶᤒᤧᤱᤃ ᤔᤧᤴᤍᤢᤰᤔᤏᤠᤜᤠ᤹ᤖᤧ ᤗᤠᤃᤡ ᤔᤣ᤺ᤴ. ᤁᤖ ᤁᤧᤍᤢᤰᤐᤠᤜᤠ᤹ᤖᤧ ᤗᤠᤃᤡᤖᤥ॥ 32ᤜᤧᤰᤁᤣᤗ᤹ᤖᤡᤰᤁᤣ ᤀᤡᤱᤃᤠ᤹ᤀᤠᤱ ᤛᤠᤶᤕᤥᤒᤠᤜᤠ᤹ ᤔᤣ᤺ᤴ. ᤁᤖ ᤗᤠᤕᤥᤒᤠᤜᤠ᤹ ᤗᤠᤕᤥᤗᤠᤶ ᤔᤧᤜᤡᤴᤗ ᤑᤠ᤹ᤀᤠᤱ ᤀᤢ᤺ᤳᤇᤧ ᤋᤩᤠᤱᤒᤠᤖᤥ॥”
ᤆᤠᤏᤧᤳᤋᤡᤸᤗᤧ ᤁᤢᤕᤠ᤺ᤶᤒᤣᤀᤥ
(ᤔᤳᤋᤡ ᥏:᥇᥊-᥇᥍; ᤔᤷᤁᤢ ᥈:᥇᥎-᥈᥈)
33ᤁᤢᤓᤠᤖᤧ ᤕᤧᤛᤢᤴ ᤔᤧᤔᤧᤳᤋᤢ. “ᤕᤢᤜᤢᤴᤏᤠᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ᤃ ᤀᤧᤳᤗᤧᤱ ᤆᤠᤏᤧᤳᤋᤥ ᤏᤢ ᤋᤢᤘᤠ ᤆᤥ᤺ᤰᤁᤡ ᤔᤧᤕᤢᤱ. ᤑᤖᤡᤛᤡᤜᤠ᤹ᤖᤧ ᤂᤢᤏᤡ᤹ ᤜᤢ᤹ᤛᤠᤶᤒᤠᤜᤠ᤹ᤀᤠᤱ ᤜᤧᤰᤁᤣ ᤔᤧᤈᤥᤰ. ᤁᤖ ᤂᤧᤏᤧ᤹ ᤁᤧᤜᤢ᤹ᤛᤠᤶᤒᤠᤜᤠ᤹ᤃ ᤆᤠᤏᤧᤳᤋᤥᤀᤠᤱ ᤔᤧᤴᤕᤢᤱᤏᤧᤴ. ᤔᤧᤈᤖ ᤔᤧᤎᤢᤅᤢᤖ ᤔᤧᤘᤠ᤹ᤀᤡᤱᤃ᥄”
34ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤔᤣ᤺ᤰᤂᤡᤶᤛᤠᤒᤧᤴ ᤁᤢᤴᤈᤢᤶᤜᤠ᤹ᤏᤢ ᤘᤠ᤹ᤖ ᤌᤠᤖᤡᤰ ᤂᤧᤱᤜᤠ᤹ ᤆᤠᤏᤧᤳᤋᤥ ᤔᤧᤕᤢᤱᤒᤡ᥅ 35ᤁᤖ ᤂᤧᤱᤜᤠ᤹ᤗᤠᤶ ᤔᤣ᤺ᤰᤂᤡᤶᤛᤠᤒᤧᤴ ᤛᤠᤰᤁᤧᤸᤗᤧᤰ ᤔᤧᤍᤧᤶᤛᤢᤀᤠᤱ ᤔᤧᤍᤣ᤹ᤖᤢᤸᤗᤧ ᤂᤧᤱᤜᤠ᤹ ᤆᤠᤏᤧᤳᤋᤥ ᤔᤧᤕᤢᤱᤗᤥ॥”
36ᤜᤧᤰᤁᤩᤠᤱ ᤕᤠᤶᤔᤥ ᤂᤢᤏᤧ᤹ ᤁᤴ ᤂᤧᤍᤠ᤹ᤀᤡᤴ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤜᤠ᤺ᤳᤗᤧᤀᤠᤱ ᤁᤢᤛᤱ ᤆᤠᤱᤅᤡᤴ ᤌᤧ᤺ᤰᤂᤢᤀᤠᤱ ᤁᤢᤍᤪᤧᤰ ᤆᤠᤱᤅᤡᤴ ᤔᤧᤗᤧᤶᤍᤢᤴ. ᤗᤧᤶᤍᤢᤏᤧ ᤑᤠ᤹ᤃᤪ ᤁᤢᤛᤱ ᤆᤠᤱᤅᤡᤴ ᤋᤧ᤺ᤱᤒᤣ᤺ᤰᤗᤥ. ᤜᤧᤰᤁᤩᤠᤱ ᤁᤢᤛᤱ ᤆᤠᤱᤅᤡᤸᤗᤧ ᤁᤢᤍᤪᤧᤰ ᤆᤠᤱᤅᤡᤴ ᤔᤧᤄᤧᤶᤍᤢᤴᤏᤠᤱᤗᤥ॥ 37ᤜᤧᤰᤁᤣᤗ᤹ᤖᤡᤰ ᤀᤠᤳᤋᤡᤸᤗᤧᤀᤠᤱ ᤁᤢᤛᤱ ᤆᤧᤸᤗᤧᤰᤛᤣ᤹ ᤌᤡᤴ ᤁᤢᤍᤪᤧᤰ ᤛᤧᤜᤥᤒᤠ ᤛᤢ᤺ᤰᤘᤠᤀᤥ ᤔᤧᤕᤢᤰᤂᤢᤴ॥ ᤕᤢᤰᤂᤢᤏᤧ ᤑᤠ᤹ᤃᤪ ᤁᤢᤛᤱ ᤆᤧᤸᤗᤧᤰᤛᤣ᤹ ᤌᤡ᤺ᤸᤗᤧ ᤁᤢᤍᤪᤧᤰ ᤛᤧᤜᤥᤒᤠ ᤛᤢᤰᤘᤠᤴ ᤌᤧ᤺ᤰᤂᤢᤍᤣ᤺ᤛᤢ᤹ᤖᤥ॥ ᤜᤧᤰᤁᤩᤠᤱ ᤌᤡᤴ ᤘᤧᤳ ᤐᤣ᤺ᤰ ᤜᤧᤰᤁᤩᤠᤱ ᤛᤧᤜᤥᤒᤠ ᤛᤢᤰᤘᤠ᤺ᤴᤏᤠᤱ ᤆᤠᤛᤥᤰᤗᤥ॥ 38ᤁᤖ ᤁᤢᤛᤱ ᤆᤧᤸᤗᤧᤰᤛᤣ᤹ ᤌᤡᤴ ᤁᤢᤛᤱ ᤛᤧᤜᤥᤒᤠ ᤛᤢ᤺ᤰᤘᤠᤀᤥᤀᤣ ᤕᤠᤰᤔᤠ ᤐᤥᤱᤗᤥ॥ 39ᤜᤧᤰᤁᤩᤠᤱ ᤀᤠᤳᤋᤡᤸᤗᤧᤀᤠᤱ ᤁᤧᤍᤢᤶᤒᤠ ᤆᤧᤸᤗᤧᤰᤛᤣ᤹ ᤌᤡᤴ ᤌᤢᤅᤢᤀᤠᤱ ᤁᤢᤛᤱ ᤆᤧᤸᤗᤧᤰᤛᤣ᤹ ᤌᤡᤴ ᤌᤢᤱᤔᤠ ᤏᤡᤱᤘᤠ᤹ ᤔᤧᤈᤥᤃᤢᤴᤗᤥ. ᤌᤣᤀᤠᤱᤓᤧᤸᤗᤧ ᤀᤰᤂᤣ ᤐᤠ᤺ᤳᤋᤢ. ‘ᤁᤧᤍᤢᤶᤒᤠ ᤆᤧᤸᤗᤧᤰᤛᤣ᤹ ᤌᤡ᤺ᤴᤏᤣ ᤁᤢᤈᤠ ᤏᤢ᤹ᤖᤥ॥’”
Currently Selected:
ᤗᤢᤁᤠ 5: LIFOTNT
Highlight
Share
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.
