ᤗᤢᤁᤠ 6
6
ᤏᤠ᤺ᤶᤛᤡᤱ ᤕᤧᤴᤖᤧ ᤁᤢᤴᤍᤠᤱᤒᤠ
(ᤔᤳᤋᤡ ᥇᥈:᥇-᥇᥊; ᤔᤷᤁᤢ ᥈:᥈᥉-᥈᥎)
1ᤌᤡᤰ ᤏᤠ᤺ᤶᤛᤡᤱ ᤕᤧᤴᤏᤥ ᤕᤧᤛᤢᤴ ᤏᤢ ᤁᤢᤜᤢ᤹ᤛᤠᤶᤒᤠᤜᤠ᤹ ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤗᤢᤶᤔᤥᤏᤢ ᤔᤧᤒᤣᤖ ᤔᤧᤒᤳᤇᤧᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤆᤠᤛᤶᤔᤡᤴ ᤔᤧᤍᤢᤒᤢᤀᤠᤱ ᤜᤢᤰᤁᤥ ᤔᤧᤏᤢᤃᤢᤖ ᤆᤠᤔᤠ ᤔᤧᤜᤣ᤺ᤰᤋᤢᤖᤥ॥ 2ᤜᤧᤰᤁᤣ᤺ᤸᤗᤧ ᤁᤢᤓᤠ ᤑᤖᤡᤛᤡᤜᤠ᤹ᤖᤧ ᤂᤧᤱᤜᤠ᤹ ᤛᤣ᤺ᤴᤔᤧᤍᤥᤛᤢᤛᤡ. “ᤌᤣᤀᤠᤱ ᤏᤠ᤺ᤶᤛᤡᤱ ᤕᤧᤴᤏᤥ ᤆᤥ᤺ᤰᤔᤠ ᤔᤧᤴᤏᤢ᤹ᤔᤏᤠᤒᤠ ᤕᤠ᤺ᤶᤒᤰᤁᤡᤴ ᤁᤧᤈᤥᤃᤢᤶᤒᤠᤒᤣ᥅” 3ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤂᤡᤏᤡ᤹ ᤛᤠᤶᤕᤥᤛᤠᤵᤗᤠᤴ ᤔᤧᤴᤏᤡ᤺ᤳᤋᤣ ᤁᤧᤘᤕᤡ᤹ᤒᤡ᥅ ᤌᤡᤰᤗᤧᤱ ᤍᤠᤀᤢᤍ ᤏᤢ ᤁᤢᤔᤏᤠᤜᤠ᤹ᤖᤧ ᤂᤢᤏᤡ᤹ ᤛᤧᤳᤗᤠ᤺ᤰᤋᤧᤸᤗᤧ 4ᤂᤢᤏᤧ᤹ ᤏᤡᤱᤘᤠ᤹ᤑᤢ ᤛᤠ᤺ᤱᤃᤠᤜᤡᤶᤔᤥ ᤗᤠᤛᤧᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤋᤥ᤺ᤶᤔᤏᤠᤒᤠ ᤛᤣᤛᤣ ᤂᤖᤧ᤺ᤱᤅᤡᤴ ᤆᤀᤠᤱ ᤁᤢᤔᤏᤠᤜᤠ᤹ᤀᤠᤱ ᤐᤡᤖᤢᤛᤡ॥ ᤂᤧᤱᤃ ᤀᤠᤏᤡ᤹ ᤛᤠᤶᤕᤥᤌᤡᤶ ᤁᤢᤀᤡᤛᤡᤰ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧᤖᤰ ᤆᤠᤔᤠ ᤁᤧᤏᤢ᤹ᤒᤠ ᤘᤕᤧᤖᤥ॥” 5ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤕᤠᤶᤔᤥ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤔᤧᤴᤇᤠᤶᤛᤠ᤺ᤱᤃ ᤏᤠ᤺ᤶᤛᤡᤱ ᤕᤧᤴᤏᤡᤸᤗᤧᤴᤏᤠᤱ ᤁᤢᤴᤍᤠᤱᤒᤠᤀᤠᤖᤥ॥”
ᤕᤧᤛᤢᤖᤧ ᤁᤧᤛᤶᤒᤠ ᤜᤢᤰᤁᤡᤴ ᤘᤣ᤺ᤴᤍᤢ᤹
(ᤔᤳᤋᤡ ᥇᥈:᥏-᥇᥊; ᤔᤷᤁᤢ ᥉:᥇-᥌)
6ᤘᤣ᤹ᤛᤔᤠ ᤌᤡᤰ ᤏᤠ᤺ᤶᤛᤡᤱ ᤕᤧᤴᤏᤥ ᤂᤢᤏᤧ᤹ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤐᤣᤀᤠᤱ ᤜᤢ᤹ᤖᤢᤛᤡᤖ ᤕᤠᤃᤧ॥ ᤂᤧᤵᤔᤥ ᤆᤢᤵᤛᤠᤱ ᤁᤢᤜᤢᤰ ᤁᤧᤜᤣᤒᤠ ᤔᤏᤠᤎᤡᤰ ᤘᤕᤧ॥ 7ᤀᤠᤸᤗ ᤁᤢᤓᤠ ᤑᤖᤡᤛᤡᤜᤠ᤹ ᤏᤢ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ᤖᤧ ᤕᤧᤛᤢᤖᤧ ᤂᤧᤴ ᤔᤏᤠᤴ ᤏᤠ᤺ᤶᤛᤡᤱ ᤕᤧᤴᤏᤥ ᤘᤣ᤺ᤴᤍᤢᤸᤗᤧ ᤀᤠᤵᤋᤡᤰ ᤁᤢ᤺ᤵᤔᤠ ᤑᤠ᤹ᤀᤠᤱ ᤂᤧᤵᤔᤥ ᤔᤧᤛᤢᤃᤢᤀᤠᤱ ᤔᤧᤘᤕᤧᤖᤥ॥ 8ᤁᤖ ᤕᤧᤛᤢᤖᤧ ᤂᤢᤏᤡ᤹ ᤏᤡᤱᤘᤠ᤹ ᤔᤧᤀᤡ᤺ᤳᤋᤢᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤂᤥᤛᤢᤀᤠᤱ ᤂᤧᤴ ᤁᤢᤜᤢᤰ ᤁᤧᤜᤣᤒᤠ ᤔᤏᤠᤴ ᤔᤧᤳᤋᤢ. “ᤑᤧᤖᤧ᤹ᤀᤠᤱ ᤁᤧᤖᤧᤰᤗᤧ ᤂᤢᤏᤡ᤹ ᤋᤃᤡ ᤕᤧᤒᤧ᤹॥” ᤂᤧᤴᤏᤠᤱ ᤑᤧᤖᤧᤀᤠᤱ ᤂᤧᤵᤔᤥ ᤕᤧᤒᤧ॥ 9ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ᤀᤠᤱ ᤐᤠ᤺ᤴᤎᤡᤰ ᤛᤣ᤺ᤴᤍᤥᤏᤡᤱᤗᤥ—ᤏᤠ᤺ᤶᤛᤡᤱ ᤕᤧᤴᤏᤥ ᤏᤢᤒᤠ ᤏᤢ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰᤁᤥ. ᤛᤠᤶᤕᤥᤌᤡᤶᤔᤡᤸᤗᤧ ᤀᤠᤳᤋᤡᤴ ᤆᤥ᤺ᤰᤔᤠ ᤀᤠᤒᤡ᤹ᤒᤣ᥅ ᤜᤡᤱᤔᤴ ᤛᤧ᤺ᤵᤔᤠᤒᤡ ᤔᤧᤱᤔᤠᤒᤡ᥅” 10ᤂᤢᤏᤧ᤹ ᤂᤡᤖᤡ ᤀᤥᤔᤧᤳᤋᤢᤛᤡ ᤜᤧᤰᤁᤩᤠᤱ ᤂᤧᤴ ᤁᤢᤜᤢᤰ ᤁᤧᤜᤣᤒᤠ ᤔᤏᤠᤴ ᤔᤧᤳᤋᤢ. “ᤁᤧᤜᤢᤰᤁᤡᤴ ᤛᤴᤇᤧ᤹॥” ᤜᤧᤰᤁᤩᤠᤱ ᤂᤧᤸᤗᤧ ᤁᤢᤜᤢᤰᤁᤡᤴ ᤛᤴᤇᤢᤸᤗᤧ ᤂᤡᤔᤥ ᤘᤣ᤺ᤳᤋᤧᤖᤥ॥ 11ᤁᤖ ᤂᤧᤵᤔᤥ ᤁᤧᤘᤠ᤹ᤒᤠ ᤑᤖᤡᤛᤡᤜᤠ᤹ ᤏᤢ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤛᤠ᤹ᤖᤡᤰ ᤂᤢᤏᤡ᤹ ᤛᤡᤰ ᤐᤥᤃᤧᤀᤠᤱ ᤁᤴ ᤕᤧᤛᤢᤴ ᤌᤣ ᤔᤧᤵᤔᤠᤒᤣ ᤑᤠ᤹ᤀᤠᤱ ᤐᤠᤴ ᤌᤰᤔᤠ ᤔᤧᤜᤣ᤺ᤰᤋᤧᤖᤥ॥
ᤌᤡᤰ-ᤏᤧᤳ ᤛᤣ᤺ᤰᤕᤢᤰᤔᤡᤒᤠᤜᤠ᤹
(ᤔᤳᤋᤡ ᥇᥆:᥇-᥊; ᤔᤷᤁᤢ ᥉:᥇᥉-᥇᥏)
12ᤌᤡᤰᤕᤧᤴ ᤕᤧᤛᤢᤴ ᤁᤥ᤺ᤰᤔᤠᤀᤥ ᤋᤢᤘᤠ ᤆᤥ᤺ᤰᤛᤧ ᤐᤣᤀᤠᤱ ᤏᤠᤶᤍᤠ᤺ᤳᤋᤠ᤺ᤳ ᤏᤡᤱᤘᤠ᤹ᤑᤢᤔᤠᤱᤅᤥ ᤋᤢᤘᤠ ᤆᤥᤃᤧᤖᤥ॥ 13ᤜᤧᤰᤁᤩᤠᤱ ᤂᤠᤀᤥ᤺ᤳᤋᤧᤀᤠᤱ ᤕᤧᤛᤢᤖᤧ ᤁᤠᤰ ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤢ᤺ᤳᤋᤢᤛᤡᤀᤠᤱ ᤂᤧᤱᤜᤠ᤹ᤀᤥᤗᤠᤶ ᤌᤡᤰ-ᤏᤧᤳ (᥇᥈) ᤁᤢᤜᤢ᤹ᤛᤠᤶᤒᤠᤜᤠ᤹ ᤛᤣᤃᤢᤛᤡ॥ ᤂᤧᤱᤜᤠ᤹ ᤛᤣ᤺ᤰᤕᤢᤰᤔᤡᤒᤠᤛᤡ ᤔᤧᤳᤋᤢᤛᤡᤖᤥ॥ 14ᤂᤧᤱᤜᤠ᤹ᤀᤥ ᤛᤡᤔᤥᤏ (ᤂᤢᤏᤧ᤹ ᤐᤋᤪᤢᤛ ᤗ᤹ᤖᤡᤰ ᤔᤡᤱ ᤘᤠ᤺ᤳᤋᤢ). ᤜᤧᤰᤁᤩᤠᤱ ᤂᤧᤸᤗᤧ ᤁᤢᤴᤛᤠ᤹ ᤀᤠᤴᤍᤪᤡᤕᤠᤛ. ᤕᤠᤁᤢᤒ. ᤕᤢᤜᤢᤴᤏᤠ. ᤑᤡᤗᤡᤐ. ᤒᤠᤖᤌᤥᤗᤥᤔᤠᤀᤡ. 15ᤔᤳᤋᤡ. ᤌᤥᤔᤠ ᤀᤸᤑᤠᤕᤛᤖᤧ ᤁᤢᤛ᤻ᤛᤠ ᤕᤠᤁᤢᤒ. ᤛᤡᤔᤥᤏ (ᤂᤢᤏᤧ᤹ ᤜᤠᤱᤒᤡᤑᤩᤢᤱ ᤁᤧᤈᤥ᤺ᤰᤐᤠ ᤈᤡᤗᤋᤡ ᤔᤧᤵᤔᤏᤠᤒᤠ ᤘᤕᤧ). 16ᤕᤠᤁᤢᤒᤖᤧ ᤁᤢᤛ᤻ᤛᤠ ᤕᤜᤢᤍᤠ ᤘᤕᤧ. ᤜᤧᤰᤁᤩᤠᤱ ᤕᤜᤢᤍᤠ ᤀᤡᤛ᤻ᤁᤖᤡᤕᤥᤋᤡ ᤘᤕᤧ. ᤂᤧᤴ ᤋᤠ᤺ᤴᤍᤡ ᤏᤛᤠᤴ ᤁᤧᤗᤧᤱᤒᤠ ᤐᤥ᤺ᤰᤂᤧᤖᤥ॥
ᤕᤧᤛᤢᤖᤧ ᤕᤖᤡᤰ ᤔᤏᤠᤜᤠ᤹ ᤘᤣ᤺ᤴᤍᤢᤛᤡ᤹
(ᤔᤳᤋᤡ ᥊:᥈᥉-᥈᥋)
17ᤜᤧᤰᤁᤩᤠᤱ ᤕᤧᤛᤢᤴ ᤁᤢᤜᤢ᤹ᤛᤠᤶᤒᤠᤜᤠ᤹ᤏᤢ ᤕᤥ ᤌᤩᤧᤀᤠᤱ ᤏᤧᤏᤧᤒᤠ ᤋᤧᤴᤏᤥ ᤕᤧᤶᤛᤡᤱᤗᤥ॥ ᤂᤧᤵᤔᤥ ᤕᤖᤡᤰ ᤁᤢᤜᤢ᤹ᤛᤠᤶᤒᤠᤜᤠ᤹ ᤏᤢ ᤁᤠᤰ ᤕᤜᤢᤍᤡᤕᤠ ᤌᤢᤶ. ᤕᤖᤢᤛᤗᤧᤔ. ᤜᤧᤰᤁᤩᤠᤱ ᤘᤖᤰᤁᤡᤸᤗᤧ ᤁᤢᤕᤠᤀᤥ ᤁᤧᤏᤧᤒᤠ ᤋᤠᤕᤖ ᤏᤢ ᤛᤡᤍᤥᤏ ᤕᤧᤰᤕᤰᤁᤥᤗᤠᤶ ᤕᤖᤡᤰ ᤔᤏᤠᤜᤠ᤹ ᤔᤧᤍᤩᤧᤀᤠᤱ ᤔᤧᤘᤕᤧ॥ 18ᤂᤧᤱᤜᤠ᤹ ᤂᤢᤏᤧ᤹ ᤁᤢᤄᤧᤶᤛᤧ ᤏᤢ ᤂᤢᤏᤡ᤹ ᤋᤢᤰᤔᤠ ᤕ᤹ᤔᤠᤗᤠᤶ ᤘᤣ᤺ᤳᤇᤧ ᤔᤧᤍᤩᤧᤀᤠᤱ ᤔᤧᤘᤕᤧ॥ ᤂᤧᤵᤔᤥ ᤑᤧᤴᤛᤠᤶᤔᤡᤸᤗᤧ ᤋᤢᤰᤂᤣ ᤆᤠ᤺ᤳᤋᤢᤛᤡᤒᤠ ᤔᤏᤠᤜᤠ᤹ᤀᤠᤱ ᤔᤧᤘᤣ᤺ᤳᤋᤧᤖᤥ॥ 19ᤂᤧᤱᤜᤠ᤹ᤖᤧ ᤕᤧᤛᤢᤴ ᤛᤢᤔᤠ ᤔᤧᤃᤥ᤺ᤳᤋᤢ ᤌᤣᤀᤠᤱᤓᤧᤸᤗᤧ ᤁᤧᤘᤣ᤺ᤶᤒᤠ ᤔᤢᤰᤛᤠᤶ ᤂᤢᤏᤧ᤹ᤀᤥᤗᤠᤶ ᤗ᤺ᤴᤍᤧᤖ ᤐᤳᤇᤧ. ᤜᤧᤰᤁᤩᤠᤱ ᤂᤧᤱᤜᤠ᤹ ᤁᤧᤖᤧᤰ ᤘᤣ᤺ᤴᤍᤢᤛᤡᤖᤥ॥
ᤏᤢ᤹ᤔᤠ ᤋᤠᤔᤠ ᤏᤢ ᤋᤢᤰᤂᤣᤴ
(ᤔᤳᤋᤡ ᥋:᥇-᥇᥈)
20ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤥᤔᤧᤳᤋᤢᤛᤡᤖ ᤔᤧᤳᤋᤢᤛᤡ.
“ᤕᤠᤱᤁᤧᤛᤠ᤹ᤒᤠᤛᤣ. ᤂᤡᤏᤡ᤹ ᤔᤢ᤹ᤀᤡᤛᤠᤒᤠᤏᤡᤱᤗᤥ.
ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢ ᤜᤠᤱᤈᤢᤶᤔᤡᤴ ᤂᤢᤏᤧ᤹ᤀᤡᤴᤏᤣᤖᤥ॥
21ᤀᤠᤸᤗ ᤛᤠᤰᤁᤡᤸᤗᤧ ᤋᤖᤢᤛᤡᤒᤠᤛᤣ. ᤂᤡᤏᤡ᤹ ᤔᤢ᤹ᤀᤡᤛᤠᤒᤠᤏᤡᤱᤗᤥ.
ᤌᤣᤀᤠᤱᤓᤧᤸᤗᤧ ᤋᤠ᤺ᤴᤍᤡ ᤂᤡᤏᤡ᤹ ᤁᤧᤄᤠᤛᤡᤀᤠᤱ ᤂᤡᤏᤡ᤹ ᤏᤡᤱᤛᤶᤗᤥ॥
ᤀᤠᤸᤗᤥ ᤔᤧᤖᤡᤱ ᤌᤰᤏᤢ ᤁᤧᤜᤠ᤺ᤵᤐᤠᤛᤣ. ᤂᤡᤏᤡ᤹ ᤔᤢ᤹ᤀᤡᤛᤠᤒᤠᤏᤡᤱᤗᤥ.
ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤁᤧᤀᤣᤖᤡ᤹ᤖᤥ॥
22“ᤔᤧᤴᤇᤠᤶᤛᤠ᤺ᤸᤗᤧ ᤆᤥᤃᤢᤸᤗᤧ ᤔᤏᤠᤜᤠ᤹ᤖᤧ ᤁᤧᤶᤈᤡ᤺ᤳᤋᤡ᤹ᤒᤠ. ᤁᤧᤶᤏᤠ᤹ᤖᤡᤒᤠ ᤜᤧᤰᤁᤩᤠᤱ ᤂᤡᤏᤡ᤹ ᤏᤠᤔᤧᤎᤠᤛᤢᤀᤠᤱ ᤋᤠᤵᤑᤧ᤺ᤸᤗᤡᤰ ᤁᤧᤶᤔᤧᤳᤋᤡᤒᤠᤜᤠ᤹ ᤔᤢ᤹ᤀᤡᤛᤠᤒᤠᤏᤡᤱᤗᤥ॥
23“ᤂᤧᤴ ᤕᤧᤶᤔᤥ ᤛ᤺ᤳᤋᤧᤶᤔᤧ᤹ᤀᤥ. ᤀᤥᤔᤢ ᤗ᤹ᤖᤧᤶᤔᤧ᤹ᤀᤠᤱ ᤗᤠ᤺ᤰᤂᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤌᤢᤶᤄᤥᤴ ᤛᤠᤱᤃᤪᤠᤶᤐᤣᤍᤠᤱᤅᤥ ᤐᤕᤶ ᤕᤶᤒᤠ ᤆᤥᤰᤗᤥ॥ ᤂᤢᤏᤡ᤹ ᤌᤠ᤺ᤰᤌᤧᤒᤠᤜᤠ᤹ᤖᤧᤀᤠᤱ ᤀᤢᤴᤇᤥ᤺ᤴᤒᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤜᤠᤒᤠ ᤜᤧᤰᤁᤣᤀᤣ ᤔᤧᤔᤧᤳᤋᤢᤛᤡᤀᤠᤱ ᤔᤧᤘᤕᤧᤖᤥ॥
24“ᤁᤖ ᤀᤠᤸᤗᤥ ᤕᤠᤱᤛᤠᤁᤢᤴᤎᤣᤛᤠᤒᤠᤛᤣ. ᤆᤡ᤺ᤳᤋᤠᤱᤗᤰ ᤛᤩᤧᤖᤥ.
ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤛ᤺ᤵᤔᤠᤴ ᤏᤢ ᤏᤡᤱᤘᤠ᤹ ᤋᤠᤔᤠᤴ ᤂᤡᤏᤡ᤹ ᤜᤡᤱᤔᤴᤏᤥᤀᤣ ᤁᤧᤄᤥᤛᤢᤶᤔᤠᤱ ᤁᤧᤘᤕᤡ᤹ᤖᤥ॥
25ᤀᤠᤸᤗᤥ ᤁᤧᤄᤠᤒᤠᤀᤠᤱ ᤁᤧᤘᤠ᤹ᤒᤠᤛᤣ.
ᤆᤡ᤺ᤳᤋᤠᤱᤗᤰ ᤛᤩᤧᤖᤥ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤛᤠᤰᤔᤧᤴᤈᤠ ᤁᤧᤒᤥ᤺ᤰᤂᤡ᤹ᤖᤥ॥
ᤀᤠᤸᤗᤥ ᤁᤧᤀᤣ᤺ᤵᤐᤠᤖ ᤁᤧᤘᤠ᤹ᤒᤠᤛᤣ. ᤆᤡ᤺ᤳᤋᤠᤱᤗᤰ ᤛᤩᤧᤖᤥ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤔᤧᤖᤡᤱ ᤌᤰᤏᤢ ᤁᤧᤜᤠᤒᤡ᤹ᤖᤥ॥
26ᤀᤠᤸᤗᤥ ᤔᤏᤠᤜᤠ᤹ᤖᤧ ᤏᤢᤖᤡᤰ ᤔᤧᤔᤧᤳᤋᤢᤛᤡᤒᤠᤛᤣ. ᤆᤡ᤺ᤳᤋᤠᤱᤗᤰ ᤛᤩᤧᤖᤥ. ᤌᤣᤀᤠᤱᤓᤧᤸᤗᤧ ᤂᤢᤏᤡ᤹ ᤌᤠ᤺ᤰᤌᤧᤒᤠᤜᤠ᤹ᤖᤧᤀᤠᤱ ᤀᤡᤱᤗᤧᤰᤐᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤒᤠ ᤜᤧᤰᤁᤣᤀᤣ ᤔᤧᤔᤧᤳᤋᤢᤛᤡᤖᤥ॥”
ᤏᤡᤱᤔᤡᤜᤠ᤹ ᤗᤢᤱᤔᤠ᤹ ᤋᤢᤰᤔᤠᤛᤡ
(ᤔᤳᤋᤡ ᥋:᥉᥎-᥊᥈)
27“ᤁᤖ ᤀᤡᤱᤃᤠ᤹ ᤀᤠᤒᤠᤴ ᤁᤧᤄᤧᤶᤒᤠᤛᤣ. ᤂᤡᤏᤡ᤹ ᤏᤡᤱᤔᤡᤜᤠ᤹ ᤗᤢᤱᤔᤠ᤹ ᤋᤢᤰᤋᤧᤶᤛᤡᤶᤔᤧ᤹ᤀᤥ॥ ᤕᤠᤵᤔᤡ ᤁᤧᤈᤡ᤺ᤵᤐᤠᤜᤠ᤹ ᤏᤢᤖᤡᤰ ᤔᤧᤳᤋᤧᤶᤛᤡᤶᤔᤧ᤹ᤀᤥ॥ 28ᤂᤡᤏᤡ᤹ ᤛᤠᤱᤃᤪᤠ ᤁᤧᤔᤧᤵᤐᤠᤜᤠ᤹ ᤔᤢ᤹ᤀᤡᤛᤠᤶ ᤌᤠᤛᤧᤶ ᤐᤡᤖᤧᤶᤛᤡᤶᤔᤧ᤹ᤀᤥ॥ ᤂᤡᤏᤡ᤹ ᤋᤠᤵᤑᤧ᤺ᤸᤗᤡᤰ ᤁᤧᤔᤧᤵᤐᤠᤜᤠ᤹ ᤋᤢᤘᤠ ᤆᤥᤃᤧᤶ ᤐᤡᤖᤧᤶᤛᤡᤶᤔᤧ᤹ᤀᤥ॥ 29ᤜᤠ᤺ᤳᤗᤧ ᤁᤧᤏᤧᤍᤧᤱᤒᤠᤴ ᤁᤧᤗᤧᤱ ᤁᤧᤒᤡ᤹. ᤂᤧᤏᤧ᤹ ᤘᤣ᤹ ᤗᤧᤵᤔᤠᤱᤒᤠ ᤁᤧᤏᤧᤍᤧᤱᤒᤠᤴᤏᤠᤱ ᤂᤧᤴ ᤋᤥ᤺ᤴᤍᤧ ᤐᤡᤖᤧ᤹॥ ᤜᤠ᤺ᤳᤗᤧ ᤛᤠᤰᤁᤧᤸᤗᤧᤰ ᤁᤧᤛᤢᤱᤄᤣᤰᤘᤠᤴ ᤁᤧᤏᤠᤵᤐᤠᤱ ᤋᤣ᤹ᤖᤢ᤹. ᤂᤧᤴᤏᤡᤴ ᤁᤧᤈᤠᤱᤔᤠ ᤋᤣᤳᤋᤡᤴᤏᤠᤱ ᤐᤡᤖᤧᤍᤣᤛᤧ᤹ᤀᤥ॥ 30ᤜᤧᤰᤁᤩᤠᤱ ᤁᤧᤏᤠ᤺ᤰᤐᤠᤜᤠ᤹ ᤐᤡᤖᤧᤛᤧ᤹ᤀᤥ॥ ᤜᤧᤰᤁᤩᤠᤱ ᤁᤧᤈᤡᤃᤰᤘᤠᤜᤠ᤹ ᤁᤧᤍᤣ᤹ᤒᤠᤜᤠ᤹ ᤕᤠᤶᤔᤥ ᤕᤠᤱᤏᤠ ᤔᤧᤏᤠ᤺ᤰᤋᤧᤶᤛᤡᤔᤡᤴᤏᤧ᤹ᤀᤥ॥ 31ᤜᤧᤰᤁᤩᤠᤱ ᤘᤣ᤹ ᤔᤏᤠᤜᤠ᤹ᤖᤧ ᤀᤠᤰᤂᤣ ᤁᤧᤶᤔᤧᤳᤋᤡᤒᤠ ᤏᤡᤱᤘᤠ᤹ ᤁᤧᤀᤡ᤺ᤳᤋᤢᤶ. ᤂᤡᤏᤡ᤹ᤀᤠᤱ ᤒᤠᤜᤧᤰᤁᤣ ᤔᤧᤳᤋᤧᤶᤛᤡᤶᤔᤧ᤹ᤀᤥ॥
32“ᤂᤡᤏᤡ᤹ ᤗᤢᤱᤔᤠ᤹ ᤁᤧᤍᤢᤰᤐᤠᤜᤠ᤹ᤖᤰ ᤗᤢᤱᤔᤠ᤹ ᤁᤧᤍᤢᤰᤋᤢᤶᤛᤡᤶᤏᤧ ᤑᤠ᤹ᤃᤪ ᤂᤡᤏᤡ᤹ ᤌᤣ ᤕᤶᤒᤠ ᤕᤠ᤺ᤶᤒᤰ ᤁᤧᤈᤥᤃᤢᤶᤔᤠᤱᤒᤣ᥅ ᤂᤧᤱᤃ ᤗᤠᤕᤥᤒᤠᤜᤠ᤹ᤖᤧᤀᤠᤱ ᤒᤠᤜᤧᤰᤁᤣ ᤔᤧᤈᤥᤃᤢ᤹ᤖᤥ॥ 33ᤜᤧᤰᤁᤩᤠᤱ ᤂᤡᤏᤡ᤹ ᤏᤢᤖᤡᤰ ᤁᤧᤔᤧᤵᤐᤠᤜᤠ᤹ᤖᤰ ᤏᤢᤖᤡᤰ ᤁᤧᤔᤧᤳᤋᤢᤶᤛᤡᤶᤏᤧ ᤑᤠ᤹ᤃᤪ ᤌᤣ ᤕᤶᤒᤠ ᤕᤠ᤺ᤶᤒᤰ ᤁᤧᤈᤥᤃᤢᤶᤔᤠᤱᤒᤣ᥄ ᤂᤧᤱᤃ ᤗᤠᤕᤥᤒᤠᤜᤠ᤹ᤖᤧᤀᤠᤱ ᤒᤠᤜᤧᤰᤁᤣ ᤔᤧᤔᤧᤳᤋᤢᤛᤡ᤹ᤖᤥ॥ 34ᤜᤧᤰᤁᤩᤠᤱ ᤂᤡᤏᤡ᤹ ᤕᤠᤶᤔᤥ ᤔᤧᤏᤢ᤺ᤰᤋᤢᤖ ᤑᤠ᤹ᤀᤠᤱ ᤔᤏᤠᤜᤠ᤹ ᤌᤧ᤹ᤗᤠ ᤁᤧᤒᤡᤖᤢᤶᤛᤡᤶᤏᤧ ᤑᤠ᤹ᤃᤪ ᤌᤣ ᤕᤶᤒᤠ ᤕᤠ᤺ᤶᤒᤰ ᤁᤧᤈᤥᤃᤢᤶᤔᤠᤱᤒᤣ᥄ ᤂᤧᤱᤃ ᤗᤠᤕᤥᤒᤠᤜᤠ᤹ᤖᤧᤀᤠᤱ ᤒᤠᤜᤧᤰᤁᤣ ᤔᤧᤈᤥᤃᤢ᤹ᤖᤥ॥ 35ᤁᤖ ᤂᤡᤏᤡ᤹ ᤏᤡᤱᤔᤡᤜᤠ᤹ ᤗᤢᤱᤔᤠ᤹ ᤋᤢᤰᤋᤧᤶᤛᤡᤶᤔᤧ᤹. ᤂᤧᤱᤜᤠ᤹ ᤏᤢᤖᤡᤰ ᤔᤧᤳᤋᤧᤶᤛᤡᤶᤔᤧ᤹. ᤜᤧᤰᤁᤩᤠᤱ ᤔᤧᤏᤢ᤺ᤰᤋᤢᤖ ᤑᤠ᤹ᤀᤠᤱ ᤔᤧᤴᤀᤡ᤺ᤳᤋᤣ ᤌᤧ᤹ᤗᤠ ᤐᤡᤖᤧᤶᤛᤡᤶᤔᤧ᤹. ᤜᤧᤰᤁᤣ᤺ᤸᤗᤧ ᤂᤡᤏᤡ᤹ ᤌᤢᤶᤄᤥᤴ ᤕᤖᤡᤰ ᤐᤥᤱᤗᤥ॥ ᤜᤧᤰᤁᤩᤠᤱ ᤂᤡᤏᤡ᤹ ᤁᤧᤖᤧᤰᤏᤢ᤺ᤸᤗᤧ ᤐᤕᤶ ᤕᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛ᤻ᤛᤠ ᤁᤧᤒᤥ᤺ᤰᤂᤡ᤹ᤖᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤃ ᤁᤢᤏᤡᤱᤘᤠ᤹ ᤔᤧᤴᤍᤠ᤺ᤔᤏᤠᤜᤠ᤹ ᤏᤢ ᤁᤢ᤹ᤀᤡᤃᤧᤓᤧᤶᤒᤠ ᤔᤏᤠᤜᤠ᤹ᤀᤠᤱ ᤗᤢᤱᤔᤠ᤹ ᤋᤢᤰᤋᤢᤛᤡ᤹ᤖᤥ॥ 36ᤂᤡᤏᤡ᤹ ᤐᤠᤏᤢᤍᤡᤱ ᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤕᤠᤵᤔᤡ ᤗᤢᤱᤔᤠ᤹ ᤁᤧᤍᤢᤰᤐᤠ ᤆᤥᤰ. ᤂᤧᤸᤗᤧᤆᤥᤃᤢᤸᤗᤧ ᤂᤡᤏᤡ᤹ᤀᤠᤱ ᤔᤏᤠᤜᤠ᤹ ᤗᤢᤱᤔᤠ᤹ ᤋᤢᤰᤋᤧᤶᤛᤡᤶᤔᤧ᤹ᤀᤥ॥”
ᤘᤣ᤹ᤜᤠ᤹ ᤆᤧ᤹ᤕᤠ ᤀᤡᤱᤍᤥ ᤔᤧᤵᤔᤠᤛᤡ ᤔᤣ᤺ᤴ
(ᤔᤳᤋᤡ ᥍:᥇-᥋)
37“ᤔᤏᤠᤜᤠ᤹ ᤐᤠᤴ ᤔᤧᤎᤡᤰᤋᤧᤶᤛᤡᤶᤔᤧᤴᤏᤧ᤹. ᤜᤧᤰᤁᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ᤀᤠᤱ ᤐᤠᤴ ᤁᤧᤴᤎᤡᤰᤋᤡᤴᤗᤥ॥ ᤔᤏᤠᤜᤠ᤹ ᤆᤧ᤹ᤕᤠ ᤀᤡᤱᤍᤥ ᤔᤧᤔᤧᤳᤋᤧᤶᤛᤡᤶᤔᤧᤴᤏᤧ᤹ᤀᤥ. ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ᤀᤠᤱ ᤆᤧ᤹ᤕᤠ ᤀᤡᤱᤍᤥ ᤁᤧᤔᤧᤶᤔᤧᤳᤋᤡᤴᤗᤖᤥ॥ ᤔᤏᤠᤜᤠ᤹ ᤗᤧᤵᤔᤡ ᤐᤡᤖᤧᤶᤛᤡᤶᤔᤧ᤹ᤀᤥ. ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤧᤵᤔᤡ ᤁᤧᤒᤡᤖᤡ᤹ᤖᤥ॥ 38ᤔᤏᤠᤜᤠ᤹ ᤐᤡᤖᤧᤶᤛᤡᤶᤔᤧ᤹ ᤜᤧᤰᤁᤩᤠᤱ ᤂᤡᤏᤡ᤹ᤀᤠᤱ ᤁᤧᤶᤒᤡᤖᤡ᤹ᤖᤥ॥ ᤏᤢᤖᤡᤰ ᤛᤡ᤺ᤰᤋᤧᤶᤔᤧ᤹ ᤏᤢᤖᤡᤰ ᤌᤧᤰᤋᤧᤶᤔᤧ᤹ᤖ ᤏᤢᤖᤡᤰ ᤔᤢᤴᤍᤧᤶᤔᤧ᤹ᤖ ᤁᤢᤎᤡᤶ ᤐᤥᤱᤅᤠᤱ ᤁᤢᤘᤧᤋᤫᤧᤳ ᤔᤏᤠᤜᤠ᤹ ᤛᤡ᤺ᤰᤋᤧᤶ ᤐᤡᤖᤧᤶᤛᤡᤶᤔᤧ᤹. ᤒᤠ ᤜᤧᤰᤁᤣᤗ᤹ᤖᤡᤰᤁᤣ ᤂᤡᤏᤡ᤹ᤀᤠᤱ ᤁᤧᤶᤒᤡᤖᤡ᤹ᤖᤥ॥ ᤂᤡᤏᤡ᤹ ᤀᤠᤰᤂᤣᤗ᤹ᤖᤡᤰ ᤁᤧᤛᤡ᤺ᤰᤋᤢᤶ ᤁᤧᤒᤡᤖᤢᤶᤛᤡᤶ. ᤒᤠ ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ᤀᤠᤱ ᤁᤧᤶᤛᤡ᤺ᤰᤋᤡ ᤁᤧᤶᤒᤡᤖᤡ᤹ᤖᤥ॥”
39ᤜᤧᤰᤁᤩᤠᤱ ᤕᤧᤛᤢᤖᤧ ᤁᤴ ᤂᤧᤍᤠ᤹ᤀᤡᤴ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤔᤡᤰᤑ᤺ᤶᤒᤠᤸᤗᤧ ᤘᤣ᤹ ᤔᤡᤰᤑ᤺ᤶᤒᤧᤴ ᤗᤠᤶᤗᤥᤔᤠ ᤔᤧᤛᤢᤰᤋᤢᤴᤗᤥ. ᤗᤠᤶᤗᤥᤛᤢᤏᤧ ᤑᤠ᤹ᤃᤪ ᤏᤧᤵᤔᤠᤱ ᤗᤢᤶᤒᤠ᤺ᤳᤋᤥ ᤁᤧᤱᤛᤡ ᤗᤠ᤺ᤳᤇᤡ᤹ᤖᤥ॥ 40ᤜᤢ᤹ᤛᤠᤶᤒᤧᤴ ᤁᤢᤛᤡᤰᤛᤠᤶᤒᤧᤴᤏᤢ᤺ᤸᤗᤧ ᤕᤶᤒᤠ ᤔᤣ᤺ᤴᤗᤥ॥ ᤁᤖ ᤂᤢᤏᤧ᤹ ᤏᤢᤖᤡᤰ ᤜᤢ᤹ᤛᤡᤱ ᤛᤢ᤺ᤳᤇᤡᤱᤅᤠᤱ ᤂᤢᤏᤧ᤹ ᤁᤢᤛᤡᤰᤛᤠᤶᤒᤧᤴ ᤁᤢᤀᤡᤛᤡᤰ ᤐᤥᤱᤗᤥ॥
41“ᤀᤠᤒᤠᤅᤣ ᤌᤰᤁᤥ ᤛᤠ᤺ᤱᤘᤧᤳ ᤆᤠᤖᤠᤶᤒᤠ ᤔᤧᤴᤏᤡᤔᤏᤠᤒᤠᤸᤗᤧ ᤀᤠᤰᤂᤣᤗ᤹ᤖᤡᤰ ᤁᤧᤴᤛᤠ᤹ᤖᤧ ᤁᤢᤎᤰᤁᤥᤒᤠ ᤘᤠᤶᤛᤡᤰᤁᤡᤴ ᤁᤧᤏᤡᤛᤢᤒᤣ᥅ 42ᤂᤧᤏᤧ᤹ ᤀᤠᤒᤠᤅᤣ ᤁᤧᤎᤰᤁᤥ ᤛᤠ᤺ᤱᤘᤧᤳ ᤆᤠᤖᤠᤶᤒᤠ ᤁᤧᤴᤏᤡᤛᤢᤴᤏᤡᤸᤗᤧ ᤀᤠᤰᤂᤣᤗ᤹ᤖᤡᤰ ᤁᤧᤴᤛᤠ᤹ᤀᤡᤴ ᤁᤧᤎᤰᤁᤥᤒᤠ ᤘᤠᤶᤛᤡᤰᤁᤡᤴ ᤂᤧᤰᤂᤢᤱ ᤐᤡᤏᤧ ᤗ᤹ᤖᤡᤰ ᤔᤧᤵᤔᤠ ᤁᤧᤛᤢᤰᤋᤢᤒᤣ᥅ ᤁᤢᤏᤡᤱᤘᤠ᤹ ᤁᤧᤈᤡ᤺ᤵᤐᤠᤀᤣ. ᤁᤧᤖᤧᤰᤏᤢ᤺ᤸᤗᤧ ᤋᤃᤡ ᤀᤠᤒᤠᤅᤣ ᤁᤧᤎᤰᤁᤥᤒᤠ ᤛᤠ᤺ᤱᤘᤧᤳᤋᤡᤴ ᤏᤠ᤺ᤳᤋᤧᤍᤣᤛᤧ᤹ᤀᤥ. ᤜᤧᤰᤁᤩᤠᤱᤗᤰ ᤁᤧᤴᤛᤠ᤹ᤖᤧ ᤁᤢᤎᤰᤁᤥᤒᤠ ᤘᤠᤶᤛᤡᤰᤁᤡᤴ ᤀᤢᤛᤢᤖᤢ ᤁᤧᤏᤡᤛᤢᤀᤠᤱ ᤂᤧᤱᤔᤠ ᤁᤧᤛᤢᤰᤋᤢ᤹ᤖᤥ॥
ᤛᤡᤱᤒᤢᤱ ᤏᤢ ᤛᤡᤱᤛᤣ᤹
(ᤔᤳᤋᤡ ᥍:᥇᥌-᥈᥆. ᥇᥈:᥉᥉-᥉᥋)
43“ᤀᤠᤳᤋᤡᤴ ᤏᤢᤒᤠ ᤛᤡᤱᤒᤢᤱᤅᤥᤀᤠᤱ ᤋᤠᤵᤑᤧ᤺ᤶᤒᤠ ᤛᤡᤱᤛᤣ᤹ ᤔᤧᤎᤥ᤺ᤰᤏᤧᤴᤗᤥ. ᤜᤧᤰᤁᤣᤗ᤹ᤖᤡᤰ ᤀᤠᤳᤋᤡᤴ ᤋᤠᤵᤑᤧ᤺ᤶᤒᤠ ᤛᤡᤱᤒᤢᤱᤅᤥᤀᤠᤱ ᤏᤢᤒᤠ ᤛᤡᤱᤛᤣ᤹ ᤔᤧᤎᤥ᤺ᤰᤏᤧᤴᤗᤥ॥ 44ᤂᤧᤴ ᤛᤡᤱᤒᤢᤱᤜᤠ᤹ᤃ ᤛᤡᤱᤛᤣᤜᤠ᤹ ᤀᤥᤔᤧᤵᤔᤠᤀᤠᤱᤛᤠᤱ ᤁᤢᤛᤡᤱ ᤏᤡ᤺ᤳᤔᤧᤍᤧᤳᤗᤥ॥ ᤀᤠᤵᤑᤠᤸᤗᤧᤀᤠᤱ ᤋᤡᤱᤃᤪᤣᤰ ᤐᤥ᤺ᤰᤗᤠᤀᤥᤗᤠᤶ ᤔᤏᤠᤜᤠ᤹ᤖᤧ ᤐ᤺ᤳᤇᤣ᤹ᤀᤡᤴ ᤔᤧᤴᤍᤢᤒᤢᤴᤗᤥ॥ ᤜᤧᤰᤁᤣᤗ᤹ᤖᤡᤰ ᤋᤡᤱᤘᤠᤛᤣᤰ ᤐᤥ᤺ᤰᤗᤠᤀᤥᤗᤠᤶ ᤆᤧᤸᤗᤧᤰᤛᤣ᤹ᤀᤡᤴ ᤔᤧᤴᤇᤢᤵᤛᤢᤴᤗᤥ॥ 45ᤏᤢᤒᤠ ᤔᤏᤠ᤺ᤸᤗᤧ ᤁᤢᤏᤡᤱᤘᤠ᤹ ᤛᤡᤃᤠᤱ ᤁᤧᤕᤠᤰᤐᤠ ᤏᤢᤒᤠ ᤐᤠ᤺ᤴᤏᤥᤗᤠᤶ ᤏᤢᤒᤠ ᤕᤠ᤺ᤶᤒᤰ ᤆᤥᤃᤢ᤹ᤖᤥ॥ ᤜᤧᤰᤁᤣᤗ᤹ᤖᤡᤰᤁᤣ ᤋᤠᤵᤑᤧ᤺ᤶᤒᤠ ᤔᤏᤠ᤺ᤸᤗᤧᤀᤠᤱ ᤁᤢᤏᤡᤱᤘᤠ᤹ ᤛᤡᤃᤠᤱ ᤁᤧᤕᤠᤰᤐᤠ ᤋᤠᤵᤑᤧ᤺ᤶᤒᤠ ᤐᤠ᤺ᤴᤏᤥᤗᤠᤶ ᤑᤧᤴ ᤕᤠ᤺ᤶᤒᤰ ᤆᤥᤃᤢ᤹ᤖᤥ॥ ᤜᤧᤰᤁᤩᤠᤱ ᤏᤡᤱᤘᤠ᤹ ᤛᤡᤃᤠᤱ ᤁᤧᤕᤠᤰᤐᤠ ᤐᤠ᤺ᤴᤜᤠ᤹ᤀᤣ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤔᤢᤖᤠᤗᤠᤶ ᤔᤧᤒᤠ᤺ᤳᤋᤢ ᤔᤧᤗ᤺ᤳᤋᤢ᤹ᤖᤥ॥
ᤏᤧᤵᤑᤢ ᤜᤡᤶ ᤁᤧᤈᤥ᤺ᤰᤐᤠᤜᤠ᤹
(ᤔᤳᤋᤡ ᥍:᥈᥊-᥈᥍)
46“ᤀᤡᤱᤃᤠ᤹ ᤐᤠ᤺ᤳᤋᤢᤱᤒᤠ ᤐᤠᤴ ᤁᤢᤀᤡᤛᤡᤰ ᤁᤧᤴᤈᤥᤃᤢᤶᤔᤡᤴᤏᤡᤸᤗᤧ. ᤌᤣᤀᤠᤱ ᤀᤡᤱᤃᤠ᤹ ‘ᤀᤠᤍᤠᤱᤒᤣ. ᤀᤠᤍᤠᤱᤒᤣ.’ ᤕᤠᤵᤔᤡ ᤁᤧᤔᤧᤳᤋᤡ᤹ᤒᤣ᥅ 47ᤀᤡᤱᤃᤠ᤹ ᤀᤠᤒᤠᤴ ᤁᤧᤄᤧᤶᤒᤠᤀᤠᤱ ᤂᤧᤴ ᤁᤢᤀᤡᤛᤡᤰ ᤁᤧᤈᤥ᤺ᤰᤐᤠ ᤔᤏᤠᤴ ᤀᤠᤰᤋᤱᤒᤠ ᤆᤥᤰ ᤑᤠ᤹ᤀᤠᤱ ᤔᤧᤳᤏᤡᤱᤗᤥ— 48ᤂᤧᤴ ᤏᤢᤒᤠ ᤐᤠᤱᤕᤰᤁᤥ ᤜᤡᤶ ᤁᤧᤈᤥ᤺ᤰᤐᤠ ᤔᤏᤠ ᤁᤢᤀᤡᤛᤡ᤺ᤰᤗᤥ॥ ᤂᤧᤸᤗᤧ ᤜᤡᤶ ᤆᤥ᤺ᤰᤔᤠ ᤑᤠ᤹ᤀᤠᤱ ᤕᤥ ᤂᤠᤶ ᤛᤡᤃᤠᤱᤒᤠ ᤕᤶᤒᤠ ᤗᤢᤱᤅᤡᤴ ᤔᤧᤴᤕᤠᤱᤅᤣ ᤌᤠᤖᤡᤰ ᤋᤕᤢ॥ ᤜᤧᤰᤁᤩᤠᤱ ᤕᤶᤒᤠ ᤗᤢᤱᤛᤶᤍᤠᤱ ᤐᤠᤱᤕᤰ ᤏᤣᤶᤓᤥ ᤏᤧᤛ᤻ᤛᤢᤀᤠᤱ ᤗᤢᤱᤎᤠᤰ ᤛᤧᤳᤋᤢᤖ ᤜᤡᤶ ᤆᤥᤃᤢ᤹॥ ᤜᤧᤰᤁᤩᤠᤱ ᤕᤶᤒᤠ ᤘᤠᤜᤡᤵᤔᤠᤴ ᤌᤩᤧᤀᤠᤱ ᤘᤠᤁᤢᤰᤛᤧ ᤕᤧᤀᤠᤱ ᤆᤫᤠ᤺ᤳᤋᤡᤸᤗᤧ ᤂᤧᤴ ᤜᤡᤶᤔᤡᤴ ᤗᤰᤋᤢ. ᤁᤖ ᤌᤣᤀᤠᤱ ᤔᤧᤒᤥ᤺ᤰᤂᤧᤴ. ᤌᤣᤀᤠᤱᤓᤧᤸᤗᤧ ᤂᤧᤴ ᤜᤡᤶᤔᤡᤸᤗᤧᤴ ᤏᤢᤖᤡᤰᤁᤠᤱ ᤐᤠᤱᤕᤰ ᤕᤢᤰᤂᤢᤀᤠᤱ ᤘᤕᤧᤖᤥ॥ 49ᤜᤧᤰᤁᤩᤠᤱ ᤀᤠᤒᤠᤴ ᤁᤧᤄᤧᤶᤒᤠᤀᤠᤱ ᤐᤠ᤺ᤳᤋᤢᤱᤒᤠ ᤐᤠᤴ ᤁᤢᤀᤡᤛᤡᤰ ᤔᤧᤴᤈᤥ᤺ᤰᤔᤏᤠᤒᤠ ᤔᤏᤠᤴ ᤀᤠᤰᤋᤱᤒᤠ ᤆᤥᤰ ᤑᤠ᤹ᤀᤠᤱ ᤔᤧᤳᤏᤡᤱᤗᤥ—ᤂᤧᤸᤗᤧᤀᤠᤱ ᤜᤡᤶ ᤆᤥ᤺ᤰᤔᤠ ᤑᤠ᤹ᤀᤠᤱ ᤐᤠᤱᤕᤰ ᤋᤕᤢ. ᤁᤖ ᤏᤢᤒᤠ ᤐᤠᤱᤕᤰ ᤏᤣᤶᤓᤥ ᤔᤧᤴᤏᤧᤀᤣ ᤗᤢᤱᤎᤠᤰ ᤛᤧᤳᤋᤢᤀᤠᤱ ᤜᤡᤶ ᤆᤥᤃᤢ॥ ᤜᤧᤰᤁᤩᤠᤱ ᤕᤶᤒᤠ ᤘᤠᤜᤡᤵᤔᤠᤴ ᤌᤩᤧ. ᤘᤠᤁᤢᤰᤂᤢ ᤕᤧᤀᤠᤱ ᤆᤫᤠ᤺ᤳᤋᤡᤸᤗᤧ ᤂᤧᤴ ᤜᤡᤶᤔᤡᤴ ᤗᤰᤋᤢ. ᤜᤧᤰᤁᤩᤠᤱ ᤗᤢ᤺ᤴᤍᤢᤍᤣᤛᤢᤖᤥ॥ ᤜᤧᤰᤁᤩᤠᤱ ᤂᤧᤴ ᤜᤡᤶᤔᤡᤴ ᤆᤥ᤺ᤴᤍᤧᤒᤣᤀᤠᤱ ᤕᤶᤒᤠ ᤔᤧᤶᤓᤤ ᤐᤥ᤺ᤰᤂᤧᤖᤥ॥”
Currently Selected:
ᤗᤢᤁᤠ 6: LIFOTNT
Highlight
Share
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.
