ᤜᤡᤒᤪᤢ 12
12
ᤕᤧᤛᤢᤖᤧ ᤁᤢᤒᤡ᤺ᤴ ᤀᤡ᤺ᤵᤔᤠ ᤏᤠ᤺ᤵᤔᤠ ᤐᤥᤱ
1ᤂᤧᤸᤗᤧᤆᤥᤃᤢᤸᤗᤧ ᤏᤛᤠᤏᤡᤒᤠ ᤜᤡᤱᤔᤴᤗᤧ ᤁᤢᤕᤠ᤺ᤶᤒᤣᤀᤥ ᤁᤶᤔᤩᤠᤰ ᤕᤖᤡᤰ ᤋᤥ᤺ᤴᤍᤡᤜᤠ᤹ᤖᤧ ᤂᤢᤏᤡ᤹ ᤗᤢᤶᤔᤥ ᤀᤠᤘᤠ᤹ᤒᤠᤸᤗᤧ ᤆᤥᤃᤢᤸᤗᤧ ᤕᤠᤵᤔᤡ ᤁᤧᤜᤶᤒᤠ ᤐᤠ᤺ᤴᤜᤠ᤹ ᤏᤢ ᤁᤧᤖᤧᤰ ᤐᤖᤡᤰᤗᤧᤴ ᤕᤠᤵᤔᤡ ᤁᤧᤄᤒᤠ ᤗᤠᤕᤥᤜᤠ᤹ ᤗᤠᤵᤑᤢᤛᤢᤶᤗᤥ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤧᤛ᤻ᤛᤢ ᤀᤠᤒᤡᤖᤧᤒᤠ ᤗᤥ᤺ᤰᤗᤥ᤺ᤰᤁᤣ ᤆᤠ᤺ᤳᤋᤥ ᤏᤠᤛᤡ ᤌ᤺ᤳᤋᤢᤶᤗ ᤗᤥ᤺ᤰᤋᤡᤖᤥ॥ 2ᤀᤠᤏᤡ᤹ ᤏᤛᤠ᤺ᤴᤏᤡᤴ ᤁᤧᤜᤣ᤺ᤰᤐᤠ ᤏᤢ ᤁᤢᤗᤡᤱᤍᤥ ᤁᤧᤃᤧᤵᤐᤠ ᤕᤧᤛᤢᤴ ᤀᤥᤔᤧᤳᤋᤢᤶᤗᤥ॥ ᤋᤠ᤺ᤴᤍᤡ ᤁᤧᤍᤠᤒᤠ ᤀᤥᤔᤢᤗ᤹ᤔᤠᤸᤗᤧ ᤗᤠᤃᤡ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱᤒᤠ ᤀᤡᤏᤥᤃᤧᤴ ᤋᤢᤰᤂᤣᤴ ᤏᤢ ᤏᤠᤎᤠᤔᤠᤴ ᤂᤢᤏᤧ᤹ ᤌᤣᤀᤠᤱ ᤔᤧᤴᤀᤡ᤺ᤳᤋᤣ ᤌᤖᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤠᤱᤕᤢᤰᤏᤠ᤺ᤸᤗᤧ ᤁᤢᤈᤢᤵᤛᤠᤱᤗᤧᤵᤔᤠᤱ ᤕᤢᤱᤛᤡᤱᤗᤥ॥
3ᤗᤠᤕᤥᤒᤠ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤁᤢᤍᤰᤗᤧᤱᤅᤥ ᤔᤧᤍᤠᤖᤢᤒᤠ ᤀᤰᤋᤱᤒᤠ ᤐᤠ᤺ᤴᤜᤠ᤹ ᤁᤧᤎᤶᤒᤠ ᤕᤧᤛᤢᤴ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹ᤀᤥ. ᤜᤧᤰᤁᤣ᤺ᤸᤗᤧ ᤂᤡᤏᤡ᤹ ᤏᤡᤱᤘᤠ᤹ᤒᤥ ᤏᤠᤕᤥ ᤁᤧᤶᤒᤥ᤺ᤰᤂᤡᤴᤗᤥ. ᤜᤧᤰᤁᤩᤠᤱ ᤂᤡᤏᤡ᤹ ᤛᤰᤔᤠᤀᤠᤱ ᤔᤧᤒᤢ᤹ᤏᤧᤴᤗᤥ॥
ᤏᤡᤱᤘᤠ᤹ᤑᤢᤔᤠᤱᤅᤡᤴ ᤐᤠᤏᤢᤍᤡᤱ ᤐᤠ ᤁᤢᤀᤡᤛᤡᤰ ᤆᤥᤰ
4ᤂᤡᤏᤡ᤹ ᤗᤠᤕᤥᤸᤗᤧ ᤁᤢᤍᤰᤗᤧᤱᤘᤠᤀᤥᤒᤠ ᤌᤱᤅᤥ ᤁᤧᤘᤕᤡᤛᤠᤱ ᤛᤡᤔᤠᤗᤡᤱᤎᤥᤀᤥ ᤌᤠᤖᤡᤰ ᤔᤧᤱᤃᤧᤳᤋᤣ ᤁᤧᤘᤕᤡ᤹ᤖᤥ॥ 5ᤂᤡᤏᤡ᤹ ᤀᤠᤒᤢᤃᤧᤴ ᤀᤠᤛ᤻ᤛᤠᤛᤣ ᤗ᤹ᤖᤡᤰ ᤁᤧᤶᤔᤧᤳᤋᤡᤒᤠ ᤂᤠᤜᤢᤴᤏᤡᤴ ᤏᤡᤱᤘᤠ᤹ ᤁᤧᤓᤣ᤺ᤳᤇᤢᤶᤒᤡ᥅
“ᤀᤠᤒᤢᤃᤧᤴ ᤀᤠᤛ᤻ᤛᤠᤀᤣ. ᤕᤜᤘᤣ ᤍᤠᤱᤒᤠᤸᤗᤧ ᤁᤢᤜᤧᤴᤌᤡᤶᤔᤡᤴ ᤕᤠᤱᤕᤠᤱ ᤔᤧᤀᤡ᤺ᤳᤋᤧᤴᤏᤧ᤹ᤀᤥ. ᤜᤧᤰᤁᤩᤠᤱ ᤂᤢᤏᤧ᤹ ᤁᤧᤓᤧ᤺ᤰᤁᤡᤸᤗᤧ ᤁᤧᤏᤡᤱᤛᤠᤱ ᤔᤧᤒᤢᤃᤧᤴᤏᤧ᤹ᤀᤥ. 6ᤌᤣᤀᤠᤱᤓᤧᤸᤗᤧ ᤀᤠᤳᤋᤡᤴ ᤕᤜᤘᤣ ᤍᤠᤱᤒᤠᤸᤗᤧ ᤗᤢᤱᤔᤠ᤹ ᤋᤢᤰᤋᤢ᤹. ᤂᤧᤴ ᤜᤧᤴᤌᤡᤶ ᤕᤠᤰᤋᤢ᤹. ᤜᤧᤰᤁᤩᤠᤱ ᤂᤢᤏᤧ᤹ ᤋᤧᤴᤍᤡᤱ ᤆᤥᤃᤢᤒᤠ ᤀᤠᤳᤋᤡᤴ ᤁᤢᤛ᤻ᤛᤠᤴᤇᤠᤱ ᤂᤢᤶᤍᤡᤱ ᤐᤡᤖᤢ᤹ᤖᤥ॥”#ᤂᤠᤜᤢᤴ ᥉:᥇᥇-᥇᥈
7ᤀᤡᤏᤥᤃᤧᤴ ᤋᤢᤰᤂᤣᤴ ᤜᤧᤴᤌᤡᤶ ᤁᤢᤀᤡᤛᤡᤰ ᤌᤖᤧᤶᤔᤧ᤹. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤀᤠᤒᤢᤃᤧᤴ ᤁᤢᤛ᤻ᤛᤠ ᤁᤢᤀᤡᤛᤡᤰ ᤁᤧᤀᤡ᤺ᤳᤋᤡ᤹ᤖᤥ॥ ᤀᤠᤳᤋᤡᤴ ᤐᤠ᤺ᤸᤗᤧ ᤀᤠᤒᤢᤃᤧᤴ ᤁᤢᤛ᤻ᤛᤠᤴ ᤜᤧᤴᤌᤡᤶ ᤔᤧᤕᤠᤰᤋᤢᤴᤒᤣ᥅ 8ᤂᤡᤏᤡ᤹ ᤀᤠᤳᤋᤡᤴᤜᤠ᤹ᤖᤧ ᤐᤠᤗᤠᤶ ᤁᤠᤰ ᤛᤠᤜᤠ᤹ᤖᤧ ᤂᤥᤔᤠ ᤁᤧᤒᤥᤱᤒᤠ ᤜᤧᤴᤌᤡᤶᤔᤡᤴ ᤁᤧᤱᤄᤥᤛᤢᤶᤔᤡᤴᤏᤧ ᤑᤠ᤹ᤃᤪ ᤂᤡᤏᤡ᤹ᤃ ᤛᤧᤰᤂᤠᤒᤠ ᤛᤠ ᤔᤣ᤺ᤴ. ᤁᤖ ᤂᤥ᤹ᤛᤠᤏᤡᤱᤗᤥ॥ 9ᤀᤠᤸᤗ ᤀᤡᤰᤛᤠᤒᤠ ᤀᤠᤏᤡ᤹ ᤐᤠᤜᤠ᤹ᤖᤧ ᤜᤧᤴᤌᤡᤶ ᤀᤠᤔᤩᤠᤰᤋᤧᤸᤗᤧᤃ ᤀᤠᤏᤡ᤹ ᤔᤡᤱᤛᤥ ᤀᤡᤱᤎᤠᤱ ᤀᤠᤒᤡᤖᤢᤶᤛᤡᤶᤗᤥ॥ ᤂᤧᤴᤏᤢ᤺ᤸᤗᤧᤀᤠᤱ ᤕᤖᤡᤰ ᤀᤠᤏᤡ᤹ ᤕᤠᤶᤛᤠᤶᤔᤡᤸᤗᤧᤴ ᤐᤠ᤺ᤸᤗᤧ ᤜᤧᤴᤌᤡᤶ ᤀᤠᤕᤠᤰᤁᤡᤸᤗᤧ ᤀᤠᤏᤡ᤹ ᤛᤧᤰᤂᤠᤒᤠ ᤜᤡᤱᤔᤴ ᤂᤥᤔᤠ ᤑᤠ᤹ᤀᤠᤱ ᤂᤧᤴ ᤜᤧᤴᤌᤡᤶᤔᤡᤸᤗᤧ ᤁᤢᤕᤢᤰᤁᤥ ᤋᤠᤔᤠ ᤐᤥᤱᤗᤥ॥ 10ᤌᤣᤀᤠᤱᤓᤧᤸᤗᤧ ᤀᤡᤰᤛᤠᤒᤠ ᤀᤠᤏᤡ᤹ ᤐᤠᤜᤠ᤹ᤖᤧ ᤁᤢᤓᤠ ᤋᤱᤒᤣ ᤌᤠᤖᤡᤰ ᤂᤢᤏᤡ᤹ ᤔᤧᤗᤧᤛ᤻ᤛᤢ ᤔᤧᤏᤡᤛᤢᤒᤠ ᤕᤠᤖᤡᤰ ᤜᤧᤴᤌᤡᤶ ᤀᤠᤶᤕᤠᤰᤗᤥ॥ ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤀᤡᤛᤡᤰ ᤛᤣᤛᤣᤒᤠ ᤀᤠᤒᤥᤱᤗ ᤑᤠ᤹ᤀᤠᤱ ᤀᤠᤏᤡ᤹ ᤀᤡᤴᤎᤠ᤺ᤰᤗᤧ ᤗᤠᤃᤡ ᤂᤢᤏᤧ᤹ ᤜᤧᤴᤌᤡᤶ ᤀᤠᤕᤠᤰᤗᤥ॥ 11ᤀᤠᤳᤋᤡᤴ ᤜᤧᤴᤌᤡᤶᤔᤡᤴᤏᤠᤱ ᤂᤥᤔᤠ ᤕᤧᤶᤔᤥ ᤂᤧᤴ ᤛᤡᤖᤠ᤹ ᤁᤧᤎᤠᤱᤒᤠ ᤔᤧᤈᤥᤰᤏᤧᤴᤗᤥ ᤁᤖ ᤁᤱᤃ ᤛᤠᤰᤗᤥ. ᤜᤧᤰᤁᤣᤛᤠᤱ ᤕᤠᤱᤛᤡ ᤂᤧᤴ ᤜᤧᤴᤌᤡᤶᤗᤠᤶ ᤛᤃᤧᤎᤠᤛᤡᤱᤒᤠᤜᤠ᤹ ᤛᤠᤶᤕᤥᤒᤠ ᤜᤡᤱᤔᤴᤏᤥ ᤔᤧᤜᤡᤱᤅᤠᤱ ᤛᤏᤠᤖᤢᤱ ᤔᤧᤄᤥᤛᤢ᤹ᤖᤥ॥
12ᤂᤧᤸᤗᤧᤆᤥᤃᤢᤸᤗᤧ ᤛᤥᤖᤥ ᤁᤧᤗ᤹ᤒᤠ ᤜᤢᤰᤜᤠ᤹ ᤑᤥ᤺ᤰᤂᤧᤶᤔᤧ᤹ ᤜᤧᤰᤁᤩᤠᤱ ᤌᤧᤃᤰᤁᤰ ᤁᤧᤕᤱᤒᤠ ᤌᤢᤱᤒᤥᤜᤠ᤹ ᤁᤧᤎᤢᤶᤒᤠ ᤆᤥᤃᤧᤶᤔᤧ᤹॥ 13ᤗᤠᤱᤛᤰᤐᤠᤜᤠ᤹ ᤔᤧᤘᤣ᤺ᤳᤋᤠᤱ ᤔᤧᤴᤈᤥ᤺ᤴᤏᤣ ᤔᤧᤱᤃᤧᤱᤅᤣ ᤗᤠᤱᤄᤣ᤺ᤰᤔᤠ ᤔᤧᤛᤢᤰᤗ ᤑᤠ᤹ᤀᤠᤱ ᤂᤡᤏᤡ᤹ ᤗᤠᤶᤔᤡᤴ ᤋᤥ᤺ᤴᤍᤧᤶᤔᤧ᤹ᤀᤥ॥
ᤏᤡᤱᤘᤠ᤹ᤑᤢᤔᤠᤱᤗᤠᤶ ᤛᤠᤶᤍᤡᤱ
14ᤁᤠᤰ ᤔᤏᤠᤜᤠ᤹ᤏᤢ ᤛᤏᤠᤖᤢᤱᤅᤥ ᤘᤠ᤹ᤔᤠ ᤏᤢ ᤛᤣᤛᤣ ᤐᤥᤱᤔᤠ ᤁᤠᤰ ᤐᤖᤡᤰᤗᤧ ᤋᤶᤛᤡᤱ ᤆᤥᤃᤧᤶᤔᤧ᤹ᤀᤥ॥ ᤛᤣᤛᤣ ᤔᤧᤶᤒᤥᤱᤅᤣᤃ ᤀᤠᤳᤋᤡᤴ ᤔᤏᤠ᤺ᤸᤗᤧᤀᤠᤱ ᤕᤜᤘᤣ ᤍᤠᤱᤒᤠᤴ ᤔᤧᤏᤡᤛᤢᤴᤗᤥ॥ 15ᤜᤧᤰᤁᤩᤠᤱ ᤂᤡᤏᤡ᤹ ᤗᤢᤶᤔᤥ ᤀᤠᤳᤋᤡᤴᤏᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤃᤢᤶ ᤔᤧᤱᤄᤥᤶᤏᤠᤒᤠ ᤔᤧᤒᤥᤱᤏᤧᤴᤗ. ᤛᤡᤰᤐᤥ᤺ᤰᤔᤠᤸᤗᤧ ᤂᤣᤔᤠ ᤌᤰᤔᤠ ᤔᤧᤓᤥ᤺ᤰᤂᤢᤴᤗ. ᤜᤧᤰᤁᤩᤠᤱ ᤂᤧᤴ ᤏᤡᤱ ᤁᤢᤀᤡᤛᤡ᤺ᤰᤐᤠ ᤛᤡᤰᤁᤢᤔᤠᤸᤗᤧ ᤘᤣ᤹ ᤔᤏᤠᤜᤠ᤹ᤀᤠᤱ ᤔᤧᤈᤡ᤺ᤴᤍᤢᤴᤇᤡᤸᤗ ᤑᤠ᤹ᤀᤠᤱ ᤛᤡᤱᤛᤡᤱ ᤗ᤹ᤖᤧᤶᤔᤧ᤹ᤀᤥ॥ 16ᤜᤧᤰᤁᤩᤠᤱ ᤀᤠᤳᤋᤡᤴᤏᤠᤱ ᤆᤠᤃᤧᤗᤠᤶᤒᤠ ᤀᤡᤃᤪ ᤀᤣᤛᤠᤀᤢ ᤜᤧᤰᤋᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤧᤱᤃᤥ᤺ᤵᤔᤏᤠ ᤔᤧᤶᤒᤥᤱᤏᤧᤴᤗᤖᤥ॥ ᤂᤧᤸᤗᤧᤃ ᤆᤠᤔᤠ ᤌᤢᤱᤔᤠᤖᤧᤗᤠᤃᤡ ᤋᤢᤶᤒᤠ ᤁᤢᤕᤢᤰᤁᤡᤴ ᤗᤧᤰᤋᤢᤖᤥ॥ 17ᤜᤧᤰᤁᤩᤠᤱ ᤕᤠᤱᤛᤡ ᤁᤢᤶᤒᤠᤗᤠᤶᤒᤠ ᤔᤢ᤹ᤀᤡᤛᤠᤶ ᤂᤥᤔᤠ ᤑᤠ᤹ᤀᤠᤱ ᤀᤠᤰᤂᤧᤴ ᤁᤥ᤺ᤳᤋᤢᤛᤠᤱ ᤂᤧᤴ ᤏᤠ᤹ᤖᤧᤒᤠ ᤐᤠ᤺ᤴᤏᤡᤴ ᤂᤡᤏᤡ᤹ ᤁᤧᤏᤡᤛᤢᤶᤗᤥ॥ ᤂᤧᤸᤗᤧ ᤁᤢᤔᤡᤰᤘᤠ ᤌᤠᤛᤢᤖ ᤔᤢ᤹ᤀᤡᤛᤠᤶ ᤂᤥᤔᤠ ᤏᤡᤱᤘᤠ᤹ ᤆᤥᤃᤢᤛᤠᤱ ᤋᤠᤵᤑᤧ᤺ᤶᤒᤠ ᤁᤢᤕᤠ᤺ᤶᤒᤰᤗᤠᤶᤒᤠ ᤏᤢ᤺ᤱᤔᤠ ᤕᤧᤶᤔᤡᤴ ᤗᤧᤰᤋᤧᤒᤣᤀᤠᤱ ᤘᤕᤧᤖᤥ॥
18-19ᤂᤡᤏᤡ᤹ᤃ ᤛᤡᤏᤠᤀᤡ ᤁᤥ᤺ᤰᤔᤠ ᤜᤧᤰᤋᤱᤒᤠ ᤛᤢᤔᤠ ᤛᤢᤰᤁᤧᤍᤧᤵᤐᤠ ᤍᤧᤴᤏᤥ ᤔᤧᤴᤍᤠᤀᤣ ᤁᤧᤘᤕᤡ᤹. ᤜᤧᤰᤁᤩᤠᤱ ᤔᤡ ᤁᤧᤍᤡ᤺ᤵᤐᤠ. ᤂᤠᤃᤧᤍᤠᤶᤒᤠ. ᤔᤠᤰᤁᤧᤗ᤹ᤒᤠ ᤜᤧᤰᤁᤩᤠᤱ ᤁᤡᤵᤔᤠ ᤁᤧᤄᤢᤒᤠ ᤛᤢᤖᤡᤳ ᤁᤣᤈᤱ ᤁᤧᤜᤢᤒᤠ ᤍᤧᤴᤏᤥ. ᤌᤢᤳᤋᤢᤖᤡ᤺ᤵᤐᤠ ᤔᤢᤰᤋᤧᤒᤠ ᤀᤡᤰᤗᤠ ᤏᤢ ᤁᤡᤵᤔᤠ ᤁᤧᤄᤢᤒᤠ ᤀᤡᤰᤗᤠ᤺ᤸᤗᤧ ᤁᤢᤒᤣᤛᤠᤱ ᤔᤧᤴᤍᤠᤀᤣ ᤁᤧᤘᤕᤡ᤹ᤖᤥ॥ ᤂᤧᤴ ᤁᤧᤄᤧᤶᤒᤠᤜᤠ᤹ᤖᤧ ᤕᤠᤶᤔᤥ ᤀᤰᤋᤱᤒᤠ ᤁᤡᤵᤔᤠ ᤁᤧᤄᤢᤒᤠ ᤀᤡᤰᤗᤠᤀᤥ ᤂᤢᤏᤡ᤹ᤏᤢ ᤔᤧᤒᤠ᤺ᤳᤏᤧᤴᤗ ᤑᤠ᤹ᤀᤠᤱ ᤐᤣᤗᤡ ᤔᤧᤓᤠᤰᤋᤢᤖᤥ॥ 20ᤌᤣᤀᤠᤱᤓᤧᤸᤗᤧ “ᤁᤴ ᤁᤥ᤺ᤰᤔᤠᤴ ᤁᤧᤛᤢᤒᤠ ᤀᤠᤳᤋᤡᤴ ᤌᤰᤛᤠ᤺ᤴᤇᤠᤱ ᤗᤢᤱᤅᤡᤸᤗᤧ ᤗᤧᤵᤋᤧᤶ ᤛᤧᤖᤧᤶᤔᤧ᤹”#ᤗᤠ ᥇᥏:᥇᥉ ᤁᤧᤗ᤹ᤒᤠ ᤀᤡᤱᤈᤠᤱᤅᤡᤴ ᤂᤧᤱᤜᤠ᤹ᤖᤧ ᤌ᤺ᤵᤔᤠ ᤔᤧᤴᤇᤢᤰᤋᤢᤴᤗᤥ॥ 21ᤁᤴ ᤏᤡᤕᤠᤖᤠ᤺ᤱᤃ ᤛᤠ᤹ᤖᤡᤰ ᤁᤡᤵᤔᤠ ᤁᤧᤄᤢᤒᤠ ᤆᤥᤃᤧ. ᤜᤧᤰᤁᤩᤠᤱ ᤔᤥᤛᤠᤖᤧᤀᤠᤱ ᤀᤡᤱᤃᤠ᤹ᤃ ᤀᤠᤃᤡᤔᤠᤸᤗᤧ ᤕᤱᤅᤠᤖᤥ#ᤛᤠᤶᤕᤥ ᤀᤡᤱ ᥏:᥇᥏ ᤗ᤹ᤖᤡᤰ ᤐᤠ᤺ᤳᤋᤢᤖᤥ॥ 22ᤁᤖ ᤂᤡᤏᤡ᤹ᤃ ᤛᤡᤕᤥᤏ ᤁᤥ᤺ᤰᤔᤠᤀᤥ. ᤁᤢᤜᤡᤱᤘᤧᤳ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤧᤰᤕᤰ ᤛᤠᤱᤃᤪᤠᤶᤐᤣᤍᤠᤱᤒᤠ ᤕᤖᤢᤛᤗᤧᤶᤔᤥ ᤁᤧᤍᤩᤧ᤹ᤀᤡᤀᤠᤱ ᤁᤧᤘᤕᤡᤖᤥ॥ ᤂᤡᤏᤡ᤹ᤃ ᤜᤧᤴᤇᤡᤱ ᤜᤧᤴᤇᤡᤱ ᤔᤠᤱᤗᤠᤀᤡᤱᤒᤠᤜᤠ᤹ᤖᤧ ᤂᤢᤏᤡ᤹ ᤀᤥᤔᤢᤗ᤹ᤔᤠᤖᤧ ᤁᤢᤎᤡᤶᤒᤠ ᤂᤢᤏᤡ᤹ ᤆᤢᤶᤗᤢᤱᤅᤥ ᤁᤧᤍᤩᤧ᤹ᤀᤡᤀᤠᤱ ᤁᤧᤘᤕᤡ᤹ᤖᤥ॥ 23ᤂᤡᤏᤡ᤹ᤃ ᤛᤠᤱᤃᤪᤠᤶᤐᤣᤍᤠᤱᤅᤥ ᤂᤢᤏᤡ᤹ ᤔᤡᤱᤜᤠ᤹ ᤛᤠᤵᤋᤧᤀᤠᤱ ᤁᤧᤘᤠ᤹ᤒᤠ ᤋᤢᤶᤒᤠᤗᤰ ᤁᤧᤄᤥᤒᤠᤜᤠ᤹ᤖᤧ ᤂᤢᤏᤡ᤹ ᤆᤢᤶᤗᤢᤱᤅᤥ ᤁᤧᤍᤩᤧ᤹ᤀᤡᤀᤠᤱ ᤁᤧᤘᤕᤡ᤹ᤖᤥ॥ ᤂᤡᤏᤡ᤹ᤃ ᤁᤠᤰ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤂᤠᤛᤧᤴᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤥ. ᤜᤧᤰᤁᤩᤠᤱ ᤁᤢᤗᤡᤱᤍᤥ ᤁᤧᤃᤧᤵᤐᤠ ᤔᤧᤈᤥᤃᤧᤒᤠ ᤛᤠᤶᤕᤥᤒᤠᤜᤠ᤹ᤖᤧ ᤂᤢᤏᤡ᤹ ᤕᤠᤶᤛᤠᤶᤗᤢᤶᤔᤥ ᤁᤧᤍᤩᤧ᤹ᤀᤡᤀᤠᤱ ᤁᤧᤘᤕᤡ᤹ᤖᤥ॥ 24ᤂᤡᤏᤡ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤢ ᤔᤏᤠᤜᤠ᤹ᤗᤢᤶᤔᤥ ᤁᤢᤛᤱ ᤔᤠᤱᤜᤢᤵᤗᤧᤴ ᤐᤠ᤺ᤴᤍᤱᤛᤠᤒᤠ ᤕᤧᤛᤢᤖᤥ ᤁᤧᤍᤩᤧ᤹ᤀᤡᤀᤠᤱ ᤁᤧᤘᤕᤡ᤹॥ ᤜᤧᤰᤁᤩᤠᤱ ᤂᤡᤏᤡ᤹ᤃ ᤜᤠᤒᤡᤗᤖᤧ ᤁᤢᤔᤠᤰᤂᤡ᤹ᤏᤢ᤺ᤸᤗᤧᤀᤠᤱ ᤛᤠ᤹ᤖᤡᤰ ᤏᤢᤒᤠ ᤐᤠᤴ ᤁᤧᤒᤠ᤺ᤵᤐᤠ ᤛᤠᤱᤔᤏᤠᤒᤠ ᤕᤧᤛᤢᤖᤧ ᤁᤢᤔᤠᤰᤂᤡ᤹ᤀᤥ ᤁᤧᤍᤩᤧ᤹ᤀᤡᤀᤠᤱ ᤁᤧᤘᤕᤡᤖᤥ॥#᥇᥈:᥈᥊ ᤀᤢᤴᤇᤣ᤺ᤴ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤏᤡ᤹ ᤗᤠᤕᤥᤴ ᤗᤧᤵᤔᤡ ᤐᤡᤔᤠᤖᤧ ᤗᤠᤃᤡ ᤔᤠᤱᤜᤡᤶᤔᤥᤒᤠ ᤛᤣᤛᤣ ᤋᤧᤴᤏᤥ ᤔᤠᤰᤂᤡ᤹ ᤛᤠᤰᤂᤢᤒᤠ ᤜᤧᤰᤁᤣ. ᤀᤠᤏᤡ᤹ ᤗᤠᤕᤥᤴ ᤗᤧᤵᤔᤡ ᤐᤡᤔᤠᤖᤧ ᤗᤠᤃᤡ ᤕᤧᤛᤢᤖᤧ ᤁᤢᤔᤠᤰᤂᤡ᤹ᤀᤡᤴ ᤘᤠᤍᤣ᤺ᤴᤍᤢ॥ ᤁᤖ ᤁᤕᤡᤏᤖᤧ ᤛᤧᤖᤢᤒᤠ ᤁᤢᤴᤛᤠ᤹ ᤜᤠᤒᤡᤗᤖᤧ ᤁᤢᤔᤠᤰᤂᤡ᤹ᤀᤡᤸᤗᤧ ᤂᤢᤶᤍᤡᤱ ᤏᤠ᤺ᤰᤋᤢᤖ ᤀ᤺ᤰᤋᤧ (ᤋᤥᤗᤡᤱ ᥊)
25ᤂᤡᤏᤡ᤹ᤏᤢ ᤁᤧᤒᤠ᤺ᤵᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤧᤴᤏᤠ᤹ᤔᤠ ᤑᤠ᤹ᤀᤠᤱ ᤛᤡᤱᤛᤡᤱ ᤗ᤹ᤖᤧᤶᤔᤧ᤹ᤀᤥ॥ ᤌᤣᤀᤠᤱᤓᤧᤸᤗᤧ ᤀᤡᤰᤛᤠᤒᤠ ᤀᤡᤱᤃᤧᤛᤠᤒᤠ ᤔᤥᤛᤠ᤺ᤸᤗᤧ ᤁᤢᤛᤠᤶᤍᤡᤱᤅᤡᤴ ᤂᤧᤶᤔᤠ ᤔᤧᤴᤍᤧᤶᤔᤏᤠᤒᤠ ᤀᤡᤛᤪᤠᤀᤡᤗᤡᤜᤠ᤹ ᤋᤠᤱᤔᤧᤴᤇᤧ᤺ᤵᤋᤧᤴᤏᤡᤸᤗᤧ ᤛᤠᤱᤃᤪᤠᤶᤐᤣᤍᤠᤱᤗᤠᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤠᤶᤍᤡᤱ ᤀᤠᤒᤡ᤺ᤸᤗᤧ ᤀᤠᤏᤡ᤹ ᤀᤠᤏᤠ᤹ᤖᤢᤶᤏᤧ ᤑᤠ᤹ᤃᤪ ᤀᤠᤏᤡ᤹ᤀᤠᤱ ᤀᤠᤴᤍᤠᤱᤏᤧᤴᤗᤥ॥ 26ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤡᤏᤠᤀᤡ ᤁᤥ᤺ᤰᤔᤠᤗᤠᤶ ᤐᤠᤖᤧᤸᤗᤧ ᤁᤢᤀᤡᤰᤗᤠ᤺ᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤕᤰᤂᤢ. ᤁᤖ ᤀᤠᤸᤗᤥ ᤂᤢᤏᤧ᤹ ᤔᤠᤱᤜᤧᤰ ᤆᤥᤃᤢᤀᤠᤱ ᤘᤠ᤹. “ᤕᤠᤶᤔᤥ ᤌᤡᤰᤗᤧᤱ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴᤗᤰ ᤔᤣ᤺ᤴ. ᤁᤖ ᤛᤠᤱᤃᤪᤠᤶᤐᤣᤍᤠᤱᤅᤡᤴᤏᤠᤱ ᤕᤰᤂᤢᤱᤗᤥ॥”#ᤜᤠᤃ᤻ᤃᤤ ᥈:᥌ 27ᤁᤴ “ᤕᤠᤶᤔᤥ ᤌᤡᤰᤗᤧᤱ” ᤐᤠ᤺ᤵᤔᤏᤠᤒᤠ ᤛᤢᤳᤗᤠ᤺ᤸᤗᤧᤃ ᤁᤠᤰ ᤏᤠᤘᤠᤃᤧᤴ ᤆᤀᤡ᤺ᤳᤋᤡᤴ ᤕᤱᤅᤠᤱ ᤆᤳᤇᤡᤱ ᤐᤣ᤺ᤰᤗᤥ ᤁᤧᤗ᤹ᤒᤠᤴ ᤀᤥᤛᤣ᤺ᤴᤀᤠᤎᤠᤰᤗᤥ. ᤁᤖ ᤕᤱᤔᤠ ᤛᤢᤰᤔᤧᤴᤍᤧᤵᤔᤏᤠᤒᤠ ᤐᤠ᤺ᤴᤜᤠ᤹ᤖᤰ ᤏᤧᤕᤠ᤺ᤰᤗᤥ॥ 28ᤂᤧᤸᤗᤧᤆᤥᤃᤢᤸᤗᤧ ᤀᤠᤏᤡ᤹ ᤕᤱᤔᤠ ᤛᤢᤰᤔᤧᤴᤍᤧᤵᤔᤏᤠᤒᤠ ᤜᤠᤱᤈᤢᤶᤔᤡᤴ ᤀᤠᤄᤥᤛᤢᤶᤗ ᤀᤠᤘᤠ᤹ᤒᤠᤸᤗᤧ ᤆᤥᤃᤢᤸᤗᤧ ᤏᤥᤃᤧᤴᤛᤠᤒᤠ ᤐᤥ᤺ᤰᤂᤡᤖᤥ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤏᤡᤱᤘᤠ᤹ ᤋᤠᤔᤠ ᤑᤠ᤹ᤀᤠᤱ ᤔᤡᤱᤛᤥ ᤀᤡᤱᤎᤠᤱ ᤐᤡᤀᤡ ᤁᤡᤖᤢᤶᤗ ᤛᤧᤘᤠ ᤆᤥᤃᤢᤶᤗᤥ॥ 29ᤌᤣᤀᤠᤱᤓᤧᤸᤗᤧ ᤀᤠᤏᤡ᤹ “ᤏᤡᤱᤘᤠ᤹ᤑᤢᤔᤠᤱᤅᤡᤱᤃ ᤁᤠᤰ ᤔᤡᤍᤡᤰᤔᤠ ᤁᤧᤛᤢᤰᤐᤠ ᤐᤠ᤺ᤴᤜᤠ᤹ ᤂᤠᤵᤐᤢᤌᤩ᤺ᤱ ᤁᤧᤈᤥ᤺ᤰᤐᤠ ᤔᤡᤖᤥ॥”#ᤛᤠᤶᤕᤥ ᤀᤡᤱ ᥊:᥈᥊
Currently Selected:
ᤜᤡᤒᤪᤢ 12: LIFOTNT
Highlight
Share
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.
