ᤜᤡᤒᤪᤢ 11
11
ᤏᤛᤠᤴ
1ᤀᤠᤸᤗ ᤏᤛᤠᤴ ᤑᤠ᤹ᤀᤡᤴ ᤌᤧᤔᤠ ᤑᤠ᤹ᤗᤧ ᤏᤡᤱᤛᤠᤱ ᤀᤠᤈᤥᤃᤢᤶᤒᤠᤴ ᤛᤧᤰᤂᤠᤀᤣ ᤐᤥᤱ ᤜᤧᤰᤁᤩᤠᤱ ᤀᤠᤴᤏᤡᤛᤢᤶᤔᤡᤴᤒᤠᤴ ᤛᤧᤰᤂᤠᤀᤣ ᤘᤠ᤹ ᤑᤠ᤹ᤀᤠᤱ ᤏᤡᤛ᤻ᤛᤣ ᤆᤥ᤺ᤰᤔᤠᤖᤥ॥ 2ᤀᤢᤏᤠᤜᤢᤖᤡᤒᤠ ᤔᤏᤠᤜᤠ᤹ᤖᤧ ᤔᤧᤈᤥᤃᤢᤒᤠ ᤂᤢᤏᤡ᤹ ᤏᤛᤠ᤺ᤴᤗᤠᤶᤒᤠᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤋᤩᤧᤖᤥ॥
3ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤒᤠ᤺ᤴᤈᤠᤰᤁᤡᤸᤗᤧ ᤁᤠᤰ ᤏᤠᤘᤠᤃᤧᤴ ᤆᤀᤡ᤺ᤳ ᤆᤥᤃᤢᤒᤠ ᤑᤠ᤹ᤀᤠᤱ ᤀᤠᤏᤡ᤹ ᤏᤛᤠ᤺ᤴᤗᤠᤶᤒᤠ ᤁᤢᤛᤡᤱ ᤀᤠᤏᤡ᤺ᤳᤋᤢᤶᤗᤥ. ᤜᤧᤰᤁᤣᤗ᤹ᤖᤡᤰ ᤏᤡᤔᤏᤠᤒᤠ ᤐᤠ᤺ᤴᤜᤠ᤹ᤃ ᤏᤡᤔᤧᤴᤍᤧᤵᤔᤏᤠᤒᤠ ᤐᤠ᤺ᤴᤜᤠ᤹ᤗᤠᤶ ᤐᤥ᤺ᤰᤂᤧᤒᤠᤖᤥ॥
4ᤏᤛᤠ᤺ᤴᤗᤠᤶᤒᤠᤀᤣ ᤜᤠᤒᤡᤗᤖᤧ ᤁᤢᤶᤓᤢ᤹ ᤁᤕᤡᤏᤧᤴᤏᤢ᤺ᤸᤗᤧᤀᤠᤱ ᤏᤢᤒᤠ ᤛᤡᤍᤢᤱᤈᤓᤠ ᤏᤡᤱᤘᤠ᤹ᤑᤢᤔᤠᤱᤅᤥ ᤋᤥ᤺ᤴᤍᤢᤖᤥ॥ ᤜᤧᤰᤁᤩᤠᤱ ᤂᤢᤏᤧ᤹ ᤋᤥ᤺ᤴᤍᤢᤒᤠ ᤛᤡᤍᤢᤱᤈᤓᤠᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤋᤠ᤺ᤰᤋᤢᤀᤠᤱ ᤂᤧᤴᤗᤠᤶᤒᤠᤀᤣ ᤂᤢᤏᤧ᤹ ᤛᤠᤶᤕᤥᤒᤠ ᤔᤏᤠ ᤔᤧᤳᤋᤢᤖᤥ॥ ᤜᤧᤰᤁᤩᤠᤱ ᤂᤢᤏᤧ᤹ ᤛᤩᤧᤛᤠᤱ ᤀᤠᤸᤗᤥ ᤌᤠᤖᤡᤰ ᤂᤢᤏᤧ᤹ ᤁᤢᤏᤛᤠ᤺ᤴᤏᤡᤸᤗᤧ ᤏᤢᤒᤠ ᤐᤠᤴ ᤀᤠᤜᤢ᤹ᤖᤥ॥#ᤋᤥᤗᤡᤱ ᥊:᥉-᥇᥆
5ᤏᤛᤠ᤺ᤴᤗᤠᤶᤒᤠᤀᤣ ᤜᤏᤥᤰᤁᤧᤴ ᤔᤧᤴᤇᤡᤀᤣ ᤁᤢᤜᤡᤱᤘᤧᤳ ᤛᤠᤱᤃᤪᤠᤶᤐᤣᤍᤠᤱᤅᤥ ᤌᤠ᤺ᤱ ᤋᤣ᤹ᤖᤧᤖᤥ॥ ᤂᤢᤏᤧ᤹ ᤁᤢᤎᤰᤁᤡᤴ ᤂᤥ᤺ᤔᤧᤍᤧᤳᤋᤧᤴᤗᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤌᤠ᤺ᤱ ᤋᤣ᤹ᤖᤢᤖᤥ॥ ᤂᤢᤏᤧ᤹ ᤌᤠ᤺ᤱ ᤋᤣ᤹ᤔᤠᤏᤢ᤺ᤸᤗᤧ ᤋᤃᤡ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤏᤡᤱᤘᤠ᤹ ᤋᤠᤛᤢᤀᤠᤱ ᤘᤕᤧ ᤑᤠ᤹ᤀᤠᤱ ᤛᤠᤶᤕᤥᤛᤠᤵᤗᤠ᤺ᤸᤗᤧ ᤋᤥ᤺ᤴᤍᤡ ᤐᤡᤖᤢ᤹ᤖᤥ॥#ᤋᤥᤗᤡᤱ ᥋:᥈᥇-᥈᥊ 6ᤜᤧᤰᤁᤩᤠᤱ ᤏᤛᤠᤴ ᤔᤣ᤺ᤴᤏᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤋᤠᤔᤠ ᤛᤢᤰᤔᤧᤍᤧᤳᤏᤧᤴᤗᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤀᤥ ᤁᤧᤍᤠᤒᤠᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤧᤰᤂᤠᤀᤣ ᤘᤠ᤹ ᤜᤧᤰᤁᤩᤠᤱ ᤏᤡᤱᤘᤠ᤹ ᤀᤡᤃᤣ᤺ᤰᤁᤠᤱ ᤂᤢᤏᤧ᤹ ᤁᤧᤃᤥ᤺ᤵᤐᤠᤜᤠ᤹ ᤜᤠᤱᤛᤧᤶ ᤐᤡᤖᤢᤛᤡ᤹ᤖᤥ ᤗ᤹ᤖᤡᤰ ᤏᤛᤠᤴ ᤆᤥ᤺ᤰᤔᤠᤀᤣ ᤐᤥᤱᤗᤥ॥
7ᤏᤛᤠ᤺ᤴᤗᤠᤶᤒᤠᤀᤣ ᤏᤢᤜᤠᤖᤧ ᤁᤢᤜᤡᤶᤛᤕᤱᤜᤠ᤹ ᤋᤠᤱᤛᤧ᤺ᤵᤛᤧ ᤘᤠᤗᤠᤎᤠ ᤆᤥᤃᤢᤖᤥ॥ ᤋᤃᤡ ᤀᤠᤵᤑᤠᤸᤗᤧᤀᤠᤱ ᤔᤧᤶᤒᤥᤱᤅᤣ ᤁᤧᤘᤠ᤹ᤒᤠ ᤐᤠ᤺ᤴᤜᤠ᤹ ᤀᤠᤸᤗ ᤐᤥᤱᤗᤥ ᤗ᤹ᤖᤡᤰ ᤛᤠᤶᤍᤡᤱ ᤁᤧᤒᤡᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠᤱᤅᤡᤴ ᤂᤧᤵᤛᤢᤀᤠᤱ ᤜᤧᤰᤁᤣ ᤆᤥᤃᤢᤖᤥ॥ ᤂᤢᤏᤧ᤹ ᤁᤢᤏᤛᤠ᤺ᤴᤗᤠᤶᤒᤠᤀᤣ ᤂᤧᤴ ᤕᤧᤶᤔᤥᤒᤠ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤏᤠᤜᤠ᤹ ᤀᤠᤵᤋᤡᤰᤁᤥ ᤔᤧᤎᤩᤧ ᤜᤧᤰᤁᤩᤠᤱ ᤏᤛᤠ᤺ᤴᤗᤠᤶ ᤁᤧᤍᤠᤒᤠ ᤛᤠᤶᤕᤥᤒᤠ ᤗᤰᤁᤧᤄᤥᤒᤠ ᤐᤥ᤺ᤰᤂᤧᤖᤥ॥#ᤋᤥᤗᤡᤱ ᥌:᥇᥉-᥈᥈
8ᤏᤛᤠ᤺ᤴᤗᤠᤶᤒᤠᤀᤣ ᤀᤒᤪᤠᤜᤠᤔᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠᤱᤅᤡᤴ ᤂᤧᤵᤛᤢ॥ ᤜᤧᤰᤁᤩᤠᤱ ᤀᤢ᤺ᤳᤋᤢᤀᤠᤱ ᤐᤣᤃᤧ᤹ ᤔᤧᤳᤋᤢᤒᤠ ᤗᤠᤈᤣ᤹ᤀᤥ ᤐᤣᤖᤥ॥ ᤂᤧᤴ ᤗᤠᤈᤣ᤹ᤀᤡᤱᤃ ᤋᤠ᤺ᤴᤍᤡ ᤂᤢᤏᤧ᤹ ᤂᤥᤔᤠ ᤁᤧᤒᤥᤱᤒᤠ ᤁᤢᤗᤰ ᤘᤕᤧᤖᤥ॥ ᤂᤢᤏᤧ᤹ ᤀᤠᤳᤋᤠᤴ ᤐᤣ᤺ᤰᤁᤠᤖ ᤐᤳᤋᤠ ᤑᤠ᤹ᤀᤠᤱ ᤌᤣᤀᤠᤱ ᤔᤧᤏᤡᤛᤢᤴᤗᤥ॥#ᤋᤥᤗᤡᤱ ᥇᥈:᥇-᥋ 9ᤏᤛᤠ᤺ᤴᤗᤠᤶᤒᤠᤀᤣ ᤂᤢᤏᤧ᤹ ᤔᤠᤱᤜᤧᤰᤁᤥ ᤂᤥᤛᤢᤒᤠ ᤗᤠᤈᤣ᤹ᤀᤥ ᤜᤡᤶ ᤆᤥᤃᤢᤀᤠᤱ ᤕᤠ᤺ᤰᤋᤧᤛᤠᤱ ᤂᤢᤏᤧ᤹ᤃ ᤔᤠ᤺ᤱᤄᤠ ᤗᤠᤈᤣ᤹ᤀᤥ ᤋᤠᤵᤁᤧᤒᤧ᤹ᤒᤠᤀᤠᤱ ᤁᤧᤘᤠ᤹ᤒᤠ ᤁᤢᤀᤡᤛᤡᤰ ᤘᤕᤧᤖᤥ॥ ᤂᤢᤏᤧ᤹ᤏᤢ ᤛᤥᤖᤡᤰ ᤔᤠᤱᤜᤧᤰᤗᤧᤴ ᤗᤰᤁᤧᤄᤥᤒᤠ ᤀᤡᤛᤜᤠᤁ ᤏᤢ ᤕᤠᤁᤢᤒ ᤁᤢᤀᤡᤛᤡᤰ ᤂᤢᤏᤧ᤹ᤀᤠᤱ ᤛᤠ᤺ᤱᤃᤠᤜᤡᤶᤔᤥ ᤘᤕᤧᤃᤳᤋᤧᤖᤥ॥#ᤋᤥᤗᤡᤱ ᥉᥋:᥈᥍ 10ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤃ ᤔᤧᤴᤏᤢᤵᤔᤏᤠᤒᤠ ᤐᤠᤱᤕᤰ ᤁᤧᤏᤧᤒᤠ ᤕᤧᤰᤕᤰᤌᤡᤰ ᤁᤥ᤺ᤳᤋᤢᤖ ᤘᤕᤧᤖᤥ॥ ᤂᤧᤴ ᤕᤧᤰᤕᤰᤁᤡᤸᤗᤧᤴ ᤀᤡᤳᤇᤠᤵ ᤁᤧᤛᤠᤵᤐᤠᤀᤠᤱ ᤁᤧᤈᤥ᤺ᤰᤐᤠᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤣᤖᤥ॥
11ᤀᤒᤪᤠᤜᤠᤔᤖᤧ ᤁᤢᤔᤣᤳ ᤛᤠᤖᤠᤴ ᤛᤠᤔᤧᤱᤃᤵᤔᤏᤠᤔᤠ ᤘᤕᤧ ᤜᤧᤰᤁᤩᤠᤱ ᤛᤠᤃᤵᤔᤠ ᤗᤧᤳᤋᤢᤀᤠᤱ ᤘᤕᤧᤛᤠᤱ ᤏᤛᤠ᤺ᤴᤗᤠᤶᤒᤠᤀᤣ ᤛᤠᤃᤵᤔᤠ ᤛᤢᤰᤋᤢᤖᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤔᤠᤱᤜᤧᤰ ᤁᤧᤈᤥ᤺ᤰᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤛᤠ᤺ᤴᤛᤠᤒᤠ ᤆᤥᤰ ᤑᤠ᤹ᤀᤠᤱ ᤀᤡ᤺ᤳᤋᤢᤖᤥ॥ 12ᤜᤧᤰᤁᤣᤗ᤹ᤖᤡᤰ ᤁᤴ ᤛᤡᤔᤠ ᤁᤧᤀᤡ᤺ᤵᤐᤠ ᤔᤏᤠᤎᤡᤰᤗᤠᤶᤒᤠ ᤀᤠᤳᤋᤠᤳᤋᤠᤴᤏᤣ ᤏᤡ᤺ᤵᤔᤧᤴᤍᤧᤵᤔᤏᤠᤒᤠ ᤋᤠᤱᤛᤠᤰᤐᤥᤒᤠ ᤂᤣ᤺ᤶᤛᤡᤰ ᤏᤢ ᤘᤠᤜᤱᤅᤡᤸᤗᤧ ᤁᤢᤕᤠᤀᤥᤒᤠ ᤕᤧ᤺ᤱᤄᤠ ᤁᤢᤀᤡᤛᤡᤰ ᤁᤢᤔᤢ᤹ᤀᤡᤍᤠᤱᤛᤠ ᤔᤧᤒᤥ᤺ᤰᤂᤧᤖᤥ॥ 13ᤁᤴ ᤁᤠᤰ ᤏᤛᤠ᤺ᤴᤛᤠᤒᤠᤜᤠ᤹ᤖᤧᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤱᤜᤠ᤹ᤏᤢ ᤆᤥᤃᤢᤒᤠ ᤔᤠᤱᤜᤧᤰ ᤔᤧᤱᤄᤥᤀᤣ ᤔᤧᤛᤩᤧ. ᤁᤖ ᤂᤧᤱᤜᤠ᤹ᤖᤧᤃ ᤔᤠ᤺ᤱᤄᤠᤗᤠᤶ ᤂᤧᤴ ᤔᤧᤏᤡᤛᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤜᤧᤰᤁᤡᤴ ᤗᤠᤱᤔᤧᤍᤠ᤺ᤰᤋᤢᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤃ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤘᤣ᤹ ᤗᤠᤈᤣ᤹ᤒᤠ ᤏᤢ ᤋᤠᤰᤁᤧᤃᤶᤒᤠ ᤘᤕᤡᤃᤧᤖᤧᤳᤇ ᤗ᤹ᤖᤡᤰ ᤋᤧᤴᤍᤡᤱ ᤔᤧᤈᤥᤃᤢᤖᤥ॥ 14ᤀᤰᤂᤣᤗ᤹ᤖᤡᤰ ᤁᤧᤒᤠ᤺ᤵᤐᤠ ᤔᤏᤠᤜᤠ᤹ᤖᤧᤃ ᤛᤧᤰᤂᤠᤛᤠᤱ ᤀᤠᤒᤠᤅᤣ ᤂᤢᤏᤡ᤹ ᤗᤠᤈᤣ᤹ᤀᤡᤴ ᤔᤧᤃᤥ᤺ᤳᤋᤢᤖ ᤔᤧᤘᤠ᤹ᤒᤠ ᤏᤡ᤺ᤴᤎᤥ ᤐᤥᤱᤗᤥ॥ 15ᤂᤧᤱᤜᤠ᤹ᤖᤧ ᤔᤧᤗᤧᤖᤢ ᤔᤧᤎᤒᤠ ᤗᤠᤈᤣ᤹ᤀᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤏᤡᤱᤘᤠ᤹ ᤔᤧᤀᤡ᤺ᤳᤋᤢᤀᤠᤱ ᤔᤧᤘᤕᤧᤸᤗᤧᤃ ᤂᤧᤵᤔᤥ ᤂᤧᤱᤜᤠ᤹ᤖᤧ ᤕᤠᤶᤔᤥ ᤏᤢ᤺ᤱᤔᤠ ᤐᤣ᤺ᤰᤔᤠ ᤕᤧᤶ ᤔᤧᤄᤥ᤺ᤛᤢᤒᤠᤔᤧᤴ॥ 16ᤁᤖ ᤂᤧᤱᤜᤠ᤹ᤖᤧᤃ ᤂᤧᤴᤏᤢ᤺ᤸᤗᤧᤀᤠᤱ ᤏᤢᤒᤠᤃ ᤛᤠᤱᤃᤪᤠᤶᤐᤣᤍᤠᤱᤒᤠ ᤗᤠᤈᤣ᤹ᤀᤡᤴ ᤂᤥᤔᤠ ᤛᤠ᤹ᤖᤡᤰ ᤏᤡᤱᤘᤠ᤹ ᤔᤧᤈᤥᤃᤢᤖᤥ॥ ᤂᤧᤸᤗᤧᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤀᤠ ᤐᤠ᤺ᤵᤔᤠ ᤂᤧᤱᤜᤠ᤹ᤏᤢ ᤛᤡᤖᤡᤱ ᤔᤧᤔᤕᤧᤴᤏᤠᤱ ᤂᤢᤏᤡ᤹ ᤗᤠᤃᤡ ᤏᤢᤒᤠ ᤕᤧᤰᤕᤰᤌᤡᤰ ᤕᤠᤖᤡᤵ ᤆᤥᤃᤢ ᤐᤡᤖᤢᤛᤡᤀᤠᤱ ᤘᤠ᤹ᤖᤥ॥
17-18ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤒᤪᤠᤜᤠᤶᤔᤡᤸᤗᤧ ᤁᤢᤏᤡᤱᤘᤠ᤹ ᤛᤠ᤹ᤖᤢᤸᤗᤧ ᤂᤢᤏᤧ᤹ ᤏᤛᤠ᤺ᤴᤗᤠᤶᤒᤠᤀᤣ ᤀᤡᤛᤜᤠᤰᤁᤡᤴ ᤛᤡᤍᤢᤱᤈᤓᤠ ᤁᤢᤀᤡᤛᤡᤰ ᤋᤥ᤺ᤴᤍᤢᤖᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤛᤜᤠᤁᤗᤠᤶᤒᤠᤀᤣ ᤂᤧᤏᤧ᤹ ᤁᤧᤔᤢ᤹ᤀᤡᤍᤠᤱᤛᤠᤜᤠ᤹ ᤔᤧᤒᤥᤱᤗᤥ#ᤋᤥᤗᤡᤱ ᥈᥈:᥇-᥇᥊. ᥈᥇:᥇᥈ ᤗ᤹ᤖᤡᤰ ᤔᤠᤱᤜᤧᤰ ᤐᤡᤖᤢᤀᤠᤱ ᤘᤕᤧᤛᤠᤱ ᤀᤒᤪᤠᤜᤠᤶᤔᤡᤸᤗᤧ ᤗᤳᤌᤡᤰᤗᤰ ᤁᤢᤛ᤻ᤛᤠᤴ ᤛᤡᤍᤢᤱᤈᤓᤠ ᤆᤥ᤺ᤰᤔᤠ ᤕᤠᤖᤡᤵ ᤐᤥ᤺ᤰᤂᤧᤖᤥ॥ 19ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤛᤡᤒᤠᤜᤠ᤹ ᤕᤠᤶᤔᤥ ᤁᤢᤜᤡᤱᤘᤧᤳ ᤆᤥ᤺ᤰᤔᤠ ᤛᤢᤰᤋᤢᤛᤡ᤹ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤀᤒᤪᤠᤜᤠᤔᤖᤧ ᤏᤡᤱᤘᤠ᤹ ᤀᤡ᤺ᤳᤋᤢᤖᤥ॥ ᤜᤧᤰᤁᤩᤠᤱ ᤛᤧᤰᤂᤠ᤺ᤸᤗᤧᤃ. ᤂᤢᤏᤧ᤹ ᤁᤢᤛᤡᤘᤧᤳ ᤁᤢᤀᤡᤛᤡᤰ ᤐᤥ᤺ᤰᤂᤧᤒᤠ ᤀᤡᤛᤜᤠᤰᤁᤡᤴ ᤕᤠᤶᤔᤥ ᤁᤢᤜᤡᤱᤘᤧᤳᤋᤣ ᤂᤥᤛᤢᤖᤥ॥ 20ᤏᤛᤠ᤺ᤴᤗᤠᤶᤒᤠᤀᤣ ᤀᤡᤛᤜᤠᤁᤖᤧᤀᤠᤱ ᤕᤠᤁᤢᤒ ᤏᤢ ᤀᤧᤛᤠᤀᤢ᤺ᤴ ᤂᤢᤴᤇᤡ᤹ ᤁᤧᤍᤠᤒᤠ ᤕᤧᤶᤔᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤔᤢ᤹ᤀᤡᤛᤠᤶ ᤌᤠ᤺ᤛᤢᤐᤡᤖᤢᤛᤡᤖᤥ॥#ᤋᤥᤗᤡᤱ ᥈᥍:᥈᥍-᥈᥏.᥉᥏-᥊᥆ 21ᤏᤛᤠ᤺ᤴᤗᤠᤶᤒᤠᤀᤣ ᤕᤠᤁᤢᤒᤧᤴ ᤛᤡᤔᤠ ᤕᤧᤶᤔᤥ ᤁᤢᤍᤰᤁᤠ᤺ᤳᤋᤡᤸᤗᤧ ᤋᤰᤛᤡᤱᤅᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤧᤘᤠ ᤆᤥᤃᤢᤖ ᤕᤢᤛᤢᤑᤖᤧ ᤁᤠᤰ ᤁᤢᤛ᤻ᤛᤠᤜᤠ᤹ ᤔᤢ᤹ᤀᤡᤛᤠᤶ ᤌᤠᤛᤢᤐᤡᤖᤢᤛᤡᤖᤥ॥#ᤋᤥᤗᤡᤱ ᥊᥍:᥉᥇. ᥊᥎:᥇-᥈᥆
22ᤏᤛᤠ᤺ᤴᤗᤠᤶᤒᤠᤀᤣ ᤕᤢᤛᤢᤑᤖᤧᤀᤠᤱ ᤛᤡᤔᤠ ᤀᤡ᤺ᤳᤋᤧᤸᤗᤧ ᤀᤡᤛᤪᤠᤀᤡᤗᤡᤜᤠ᤹ ᤔᤡᤛᤪ ᤗᤠᤈᤣ᤹ᤗᤠᤶ ᤔᤧᤗᤴ ᤔᤧᤒᤣ᤺ᤰᤐᤠ ᤐᤠ᤺ᤴᤏᤡᤴ ᤆᤧᤰᤂᤢᤀᤠᤱ ᤂᤧᤴ ᤕᤧᤶᤔᤥ ᤁᤢᤕᤧᤵᤐᤡᤴᤏᤠᤱ ᤂᤢᤏᤡ᤹ᤏᤢᤀᤣ ᤔᤧᤍᤣ᤹ᤖᤢᤖ ᤗ᤹ᤖᤡᤰ ᤀᤡᤱᤈᤠᤱ ᤐᤡᤖᤢᤛᤡᤖᤥ॥#ᤋᤥᤗᤡᤱ ᥋᥆:᥈᥊-᥈᥋; ᤗᤠ ᥇᥉:᥇᥏
23ᤏᤛᤠ᤺ᤴᤗᤠᤶᤒᤠᤀᤣ ᤔᤥᤛᤠᤴ ᤛᤠᤘᤠ᤺ᤴᤇᤡᤱᤅᤡᤸᤗᤧ ᤁᤢᤶᤔᤠ ᤁᤢᤶᤒᤠᤛᤡᤖᤧ ᤗᤠ ᤛᤢᤶᤛᤡ ᤌᤠᤖᤡᤰ ᤆᤡᤰᤂᤧᤳᤇᤢᤀᤠᤱ ᤁᤳᤋᤧᤳᤇᤢ. ᤌᤣᤀᤠᤱᤓᤧᤸᤗᤧ ᤂᤧᤴ ᤀᤅᤧ᤺ᤰᤘᤠᤴ ᤛᤠ᤹ᤖᤡᤰ ᤏᤢᤒᤠ ᤏᤡᤛᤧᤳᤇᤢ. ᤜᤧᤰᤁᤩᤠᤱ ᤜᤠᤱᤅᤡᤸᤗᤧ ᤁᤢᤀᤡᤱᤈᤠᤱᤅᤡᤴᤏᤠᤱ ᤔᤧᤃᤡᤖᤧᤳᤇᤢᤴᤗᤥ॥#ᤗᤠ ᥇:᥈᥈. ᥈:᥈
24ᤔᤥᤛᤠᤴ ᤌᤠᤱᤒᤧᤴ ᤁᤧᤖᤧᤸᤗᤧ ᤏᤛᤠ᤺ᤴᤗᤠᤶᤒᤠᤀᤣ ᤑᤠᤖᤥ ᤜᤠᤱᤅᤡᤸᤗᤧ ᤁᤢᤛ᤻ᤛᤠ ᤔᤧᤴᤇᤢᤔᤠ᤹ᤀᤡᤸᤗᤧ ᤁᤢᤛ᤻ᤛᤠ᤺ᤀᤠ ᤐᤠ᤺ᤵᤔᤠ ᤔᤧᤍᤧᤴᤍᤧᤴᤗᤥ॥#ᤗᤠ ᥈:᥇᥆-᥇᥈ 25ᤂᤢᤏᤧ᤹ ᤗᤠᤕᤥᤒᤠ ᤛᤢᤰᤂᤣᤘᤠᤀᤥ ᤛᤵᤑᤠᤎᤡᤰ ᤘᤠ᤹ᤔᤠᤏᤢ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤠᤵᤔᤡᤜᤠ᤹ᤏᤢ ᤋᤢᤰᤂᤣᤘᤠᤀᤥ ᤘᤠ᤹ᤔᤠᤀᤣ ᤏᤡᤱᤘᤠ᤹ ᤆᤥᤃᤢᤖᤥ॥ 26ᤔᤡᤛᤪ ᤗᤠᤈᤣ᤹ᤛᤔᤠ ᤕᤠᤱᤛᤠᤁᤢᤴᤎᤣ᤺ᤴᤏᤢ᤺ᤸᤗᤧᤃ ᤂᤪᤡᤛ᤻ᤋᤖᤧ ᤁᤢᤗᤠᤃᤡ ᤏᤡᤱᤄᤢᤶᤔᤥ ᤌᤠᤔᤠᤀᤣ ᤏᤢᤒᤠ ᤀᤡ᤺ᤳᤋᤢᤖᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤢᤏᤡᤱᤘᤠ᤹ᤀᤡᤴ ᤋᤠ᤺ᤴᤍᤡ ᤂᤥᤃᤧᤍᤧᤵᤐᤠ ᤌᤢᤶᤄᤥᤀᤥ ᤐᤳᤇᤧᤖᤥ॥ 27ᤏᤛᤠ᤺ᤴᤗᤠᤶᤒᤠᤀᤣ ᤂᤢᤏᤧ᤹ᤃ ᤏᤡ᤺ᤔᤧᤴᤎᤠ᤺ᤵᤔᤏᤠᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤡᤛᤢᤒᤠ ᤁᤢᤀᤡᤛᤡ᤺ᤰᤁᤣ ᤜᤠᤱᤅᤡᤸᤗᤧ ᤁᤢᤛᤡᤰᤁᤡᤴᤏᤢ ᤔᤧᤃᤡᤛᤧᤴᤏᤠᤱ ᤔᤡᤛᤪᤗᤠᤶ ᤗ᤺ᤴᤍᤧᤐᤣᤒᤠᤴ ᤐᤣᤒᤠᤀᤣ ᤐᤥ᤺ᤰᤂᤧᤀᤠᤱ ᤔᤧᤏᤢ᤺ᤰᤂᤧᤴ॥ 28ᤏᤛᤠ᤺ᤴᤗᤠᤶᤒᤠᤀᤣ ᤕᤜᤢᤍᤡᤜᤠ᤹ᤖᤧ ᤂᤢᤏᤡ᤹ ᤋᤢᤶᤒᤠ ᤛᤠ᤺ᤜᤠ᤹ ᤁᤧᤔᤧᤱᤒᤠᤸᤗᤧ#᥇᥇:᥈᥎ ᤁᤧᤔᤧᤱᤒᤠ—ᤃᤪᤡᤁ ᤐᤠ᤺ᤴᤍᤠᤱᤅᤥ “ᤛᤡᤔᤧᤸᤗᤧᤴ ᤔᤠᤱᤗᤠᤀᤡᤱᤒᤠᤴ” ᤐᤥᤱᤗᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤔᤡᤜᤠ᤹ ᤔᤧᤱᤛᤧ ᤔᤠᤱᤗᤠᤀᤡᤱᤒᤠᤴ ᤐᤠᤱᤄᤢ ᤕᤢ᤺ᤛᤢᤖᤥ (ᤗᤠ ᥇᥈:᥈᥇-᥉᥆)॥ ᤛᤢ᤺ᤔᤠ ᤔᤧᤛᤢᤰᤋᤢᤴᤇᤡᤴᤗ ᤑᤠ᤹ᤀᤠᤱ ᤂᤢᤏᤧ᤹ ᤔᤠᤰᤂᤡ᤹ᤀᤡᤴ ᤑᤡᤴᤍᤢᤖ ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶ ᤌᤡᤶᤔᤡᤴ ᤜᤣ᤺ᤰᤋᤢᤖᤥ॥
29ᤏᤛᤠ᤺ᤴᤗᤠᤶᤒᤠᤀᤣ ᤀᤡᤛᤪᤠᤀᤡᤗᤡᤜᤠ᤹ ᤛᤧᤱᤛᤧᤱᤒᤠ ᤂᤠᤶᤔᤥ ᤗᤠᤱᤔᤧᤄᤣᤃᤧᤖ ᤜᤧ᤺ᤳᤋᤠᤱᤒᤠ ᤘᤠᤜᤱᤅᤡᤴ ᤔᤧᤃᤠ᤺ᤰᤋᤢᤀᤠᤱ ᤏᤠᤎᤠ᤺ᤶᤒᤡ ᤔᤧᤒᤣᤖᤥ. ᤁᤖ ᤔᤡᤛᤪᤡᤜᤠ᤹ᤖᤧᤀᤠᤱ ᤒᤠᤜᤧᤰᤁᤣ ᤆᤥ᤺ᤰᤔᤠ ᤔᤧᤃᤥ᤺ᤳᤋᤢᤸᤗᤧ ᤂᤧᤱᤜᤠ᤹ ᤁᤠᤰ ᤂᤩᤠᤶ ᤔᤧᤜᤢᤔᤧ ᤔᤧᤛᤩᤧᤖᤥ॥#ᤗᤠ ᥇᥊:᥈᥇-᥉᥇
30ᤏᤛᤠ᤺ᤴᤗᤠᤶᤒᤠᤀᤣ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤏᤢᤛᤡ ᤕᤧᤴ ᤌᤠᤖᤡᤰ ᤕᤧᤖᤡᤜᤥ ᤕᤧᤰᤕᤰᤁᤡᤴ ᤔᤧᤃᤒᤢᤀᤠᤱ ᤂᤧᤸᤗᤧ ᤁᤢᤄᤡᤖᤡᤒᤠ ᤗᤢᤱᤎᤠᤰᤁᤡᤴ ᤗᤢ᤺ᤴᤍᤧᤖᤥ॥#ᤕᤜᤥ ᥌:᥇᥈-᥈᥇
31ᤏᤛᤠ᤺ᤴᤗᤠᤶᤒᤠᤀᤣ ᤕᤧᤖᤡᤜᤥᤀᤥᤔᤠ ᤁᤧᤳᤏᤡᤔᤠ ᤖᤠᤜᤠᤒᤖᤧ ᤀᤡᤛᤪᤠᤀᤡᤗᤡ ᤌᤥ᤺ᤶᤈᤡᤒᤠᤜᤠ᤹ ᤋᤖᤧᤍᤥᤛᤢᤛᤡᤒᤠᤸᤗᤧ ᤆᤥᤃᤢᤸᤗᤧ ᤂᤧᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠᤱ ᤔᤧᤱᤄᤧᤔᤏᤠᤒᤠᤜᤠ᤹ᤏᤢ ᤔᤧᤛᤩᤧᤏᤧᤴᤗᤥ॥#ᤕᤜᤥ ᥈:᥇-᥈᥇. ᥌:᥈᥈-᥈᥋
32ᤂᤧᤴ ᤕᤠᤖᤡᤰᤁᤠᤱᤎᤥ ᤀᤡᤱᤃᤠ᤹ ᤌᤣ ᤐᤠ᤺ᤵᤔᤠᤒᤣ᥅ ᤃᤡᤍᤡᤕᤥᤏ. ᤒᤠᤖᤠᤁ. ᤛᤡᤶᤛᤏ. ᤕᤡᤵᤋᤠᤜ. ᤍᤠᤀᤢᤍ. ᤛᤠᤔᤢᤀᤧᤗ ᤜᤧᤰᤁᤩᤠᤱ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤂᤢᤏᤡ᤹ ᤕᤠ᤺ᤶᤒᤣᤀᤥ ᤐᤠ᤺ᤵᤔᤠ ᤕᤧᤶ ᤔᤧᤃᤳᤋᤠᤴᤗᤥ॥#ᤂᤠᤗᤥ ᥌:᥇᥇–᥎:᥉᥈. ᥊:᥌–᥋:᥉᥇. ᥇᥉:᥈–᥇᥌:᥉᥇. ᥇᥇:᥇–᥇᥈:᥍; ᥇ ᤛᤠᤔᤢ ᥇᥌:᥇–᥇ ᤜᤠᤱ ᥈:᥇᥇; ᥇ ᤛᤠᤔᤢ ᥇:᥇–᥈᥋:᥇᥇ 33ᤂᤧᤱᤜᤠ᤹ᤖᤧᤃ ᤏᤛᤠ᤺ᤴᤗᤠᤶᤒᤠᤀᤣ ᤜᤠᤱᤈᤢᤶᤜᤠ᤹ ᤔᤧᤏᤠ᤺ᤴᤍᤢ. ᤛᤠᤶᤕᤥᤒᤠ ᤂᤠᤛᤧᤴ ᤔᤧᤗᤥ᤺ᤴᤍᤢ. ᤔᤠᤱᤜᤧᤰ ᤆᤥ᤺ᤰᤔᤏᤠᤒᤠ ᤐᤠ᤺ᤴᤜᤠ᤹ ᤔᤧᤄᤥᤛᤢ॥ ᤂᤧᤱᤜᤠ᤹ᤖᤧ ᤂᤡᤖᤡᤱᤒᤠᤜᤠ᤹ᤖᤧ ᤂᤢᤏᤡ᤹ ᤔᤢᤖᤠᤴ ᤔᤧᤛᤢᤒᤢ.#ᤍᤠᤏᤡ ᥌:᥇-᥈᥍ 34ᤐᤕᤶ ᤕᤶᤒᤠ ᤔᤡᤖᤠ᤺ᤰᤜᤠ᤹ ᤔᤧᤛᤧᤖᤢ. ᤋᤠᤓᤣᤗᤠᤶᤒᤠ ᤋᤠᤱᤔᤧᤛᤧ᤺ᤵᤋᤧ. ᤂᤧᤱᤜᤠ᤹ᤖᤧ ᤂᤢᤏᤡ᤹ ᤛᤠ᤹ᤀᤡ ᤜᤥ᤺ᤵᤋᤧᤛᤠᤱ ᤁᤧᤎᤢᤶᤒᤠ ᤔᤧᤒᤥ᤺ᤰᤂᤧ ᤜᤧᤰᤁᤩᤠᤱ ᤌᤱᤅᤥ ᤔᤢᤰᤁᤧᤃᤢᤒᤠ ᤔᤧᤒᤥ᤺ᤰᤂᤧᤀᤠᤱ ᤏᤡᤱᤔᤡᤜᤠ᤹ ᤔᤧᤏᤠ᤺ᤴᤍᤢᤛᤡᤖᤥ॥#ᤍᤠᤏᤡ ᥉:᥇-᥉᥆ 35ᤔᤧᤴᤇᤢᤔᤠᤜᤠ᤹ᤖᤧ ᤁᤧᤛᤡᤒᤠ ᤁᤧᤒᤣ᤺ᤰᤐᤠ ᤀᤠᤒᤠᤅᤣ ᤂᤢᤏᤡ᤹ ᤔᤏᤠᤜᤠ᤹ ᤕᤠᤶᤔᤥ ᤁᤢᤜᤡᤱᤘᤧᤳ ᤔᤧᤄᤥᤛᤢᤛᤡᤖᤥ॥#᥇ ᤜᤠᤱ ᥇᥍:᥇᥍-᥈᥊; ᥈ ᤜᤠᤱ ᥊:᥈᥋-᥉᥍
ᤘᤣ᤹ᤜᤠ᤹ᤖᤧ ᤛᤡᤔᤧᤴ ᤀᤣᤃᤠᤱ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴᤏᤡᤴ ᤂᤥᤔᤠ ᤑᤠ᤹ᤀᤠᤱ ᤆᤥ᤺ᤰᤕᤢᤶᤓᤥ ᤐᤥᤱᤔᤠ ᤔᤧᤴᤍᤧᤴᤍᤧᤴᤏᤠᤱ ᤏᤡᤱᤄᤢᤶᤔᤡᤴ ᤔᤧᤍᤠ᤺ᤰᤋᤢᤖᤥ॥ 36ᤁᤢᤓᤠᤃ ᤜᤡᤏᤠ᤺ᤶ ᤔᤧᤔᤧᤳᤋᤢᤛᤡᤀᤠᤱ ᤋᤧ᤺ᤶᤓᤢᤰ ᤔᤧᤕᤠᤰᤋᤢᤛᤡ. ᤁᤢᤓᤠᤃ ᤀᤡᤔᤧᤄᤣ᤺ᤰᤂᤢᤛᤡᤀᤠᤱ ᤐᤢᤱᤗᤠᤜᤡᤶᤔᤥ ᤔᤧᤛᤠᤰᤋᤢᤛᤡᤖᤥ॥#᥇ ᤜᤠᤱ ᥈᥈:᥈᥌-᥈᥍; ᥈ ᤛᤠᤵᤔᤢ ᥇᥎:᥈᥋-᥈᥌; ᤕᤷᤔᤡ ᥈᥆:᥈. ᥉᥍:᥇᥋. ᥉᥎:᥌ 37ᤁᤢᤓᤠ ᤗᤢᤱᤅᤡᤸᤗᤧ ᤔᤧᤗᤧᤵᤋᤢ ᤔᤧᤛᤧᤖᤢᤛᤡ. ᤁᤢᤓᤠ ᤆᤧᤴᤍᤡᤖᤡ᤺ᤸᤗᤧ ᤔᤧᤈᤧᤖᤢ ᤔᤧᤛᤧᤖᤢᤛᤡ. ᤁᤢᤓᤠᤃ ᤋᤠᤓᤣ᤺ᤸᤗᤧ ᤔᤧᤈᤧᤵᤋᤢ ᤔᤧᤛᤧᤖᤢᤛᤡᤖᤥ॥ ᤁᤢᤓᤠᤃ ᤏᤡᤱᤄᤢᤶ ᤏᤢ ᤋᤢᤰᤂᤣ ᤔᤧᤈᤩᤧᤀᤠᤱ ᤆᤠᤜᤠᤒᤥ ᤔᤧᤘᤕᤧᤸᤗᤧ ᤔᤧᤸᤗᤢᤰ ᤏᤢ ᤔᤧᤴᤍᤠᤰ ᤛᤧᤜᤥᤒᤠ ᤆᤠᤱ ᤔᤧᤈᤠᤰᤂᤢ॥#᥈ ᤛᤠᤵᤔᤢ ᥈᥊:᥈᥇ 38ᤂᤧᤱᤜᤠ᤹ᤃ ᤗᤢᤱᤓᤢᤰᤁᤢ ᤏᤢ ᤂᤠᤶᤓᤢᤰᤁᤢᤜᤠ᤹ᤀᤥ ᤕᤠᤱᤎᤥ᤺ᤰᤁᤡ ᤕᤧ᤺ᤱᤄᤠᤍᤧᤴᤏᤥ ᤏᤢ ᤁᤥ᤺ᤰᤔᤠ ᤑᤠᤱᤈᤱ ᤜᤧᤱᤄᤠᤳᤋᤡ ᤔᤧᤀᤡᤖᤧᤖ ᤔᤧᤘᤕᤧᤖᤥ॥ ᤂᤧᤴ ᤜᤧᤰᤋᤱᤒᤠ ᤔᤏᤠᤜᤠ᤹ᤖᤧ ᤗᤠᤃᤡ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤛᤢᤶᤒᤥᤎᤠᤒᤠ ᤜᤥ᤺ᤵᤋᤧᤖᤥ॥
39ᤂᤧᤱᤜᤠ᤹ ᤁᤧᤖᤧᤰᤗᤧ ᤂᤢᤏᤡ᤹ ᤏᤛᤠ᤺ᤴᤗᤠᤶᤒᤠᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤔᤧᤍᤠᤛᤢᤛᤠᤱ ᤂᤧᤱᤜᤠ᤹ᤏᤢ ᤆᤥᤃᤧᤒᤠ ᤔᤠᤱᤜᤧᤰᤁᤡᤴ ᤔᤧᤱᤄᤥᤀᤣ ᤔᤧᤛᤩᤧ ᤔᤧᤒᤣᤖᤥ॥ 40ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤸᤗᤛᤠᤱ ᤛᤠ᤹ᤖᤡᤰ ᤏᤢᤒᤠ ᤏᤡᤱᤛᤣᤰ ᤀᤠᤏᤡ᤹ ᤁᤧᤖᤧᤰᤗᤧ ᤗᤠᤃᤡ ᤁᤳᤋᤢᤒᤠᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤃ ᤀᤠᤏᤡ᤹ᤏᤢᤖᤰ ᤁᤢᤗᤡᤱᤍᤥ ᤔᤧᤃᤧᤳᤗᤥ॥
Currently Selected:
ᤜᤡᤒᤪᤢ 11: LIFOTNT
Highlight
Share
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.