᥈ ᤐᤋᤪᤢᤛ 3
3
ᤍᤠᤱᤒᤠᤸᤗᤧ ᤁᤢᤕᤧᤴ
1ᤀᤠᤔᤡ᤺ᤶ ᤀᤠᤴᤈᤢᤶᤛᤣ. ᤂᤡᤏᤡ᤹ ᤜᤠᤰᤏᤡᤱᤒᤠ ᤁᤴ ᤏᤡᤛᤡᤃᤣᤰᤐᤠ ᤛᤰᤀᤡᤱᤄᤱᤗᤥ॥ ᤁᤴ ᤏᤧᤵᤔᤠᤱ ᤛᤰᤀᤡᤱᤄᤱᤅᤥ ᤏᤡᤱᤘᤠ᤹ᤛᤢᤶ ᤆᤥ᤺ᤰᤏᤡᤱ ᤐᤡᤏᤡᤱᤗ ᤂᤡᤏᤡ᤹ ᤏᤡᤱᤘᤠ᤹ᤀᤡᤴ ᤆᤠᤱᤈᤠᤱᤘᤠ ᤆᤥ᤺ᤰᤔᤠ ᤐᤡᤔᤠ ᤁᤥ᤺ᤳᤋᤢᤱᤒᤠᤖᤥ॥ 2ᤕᤖᤡᤰ ᤋᤱᤒᤣ ᤋᤃᤡ ᤛᤣᤛᤣ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤔᤧᤒᤠ᤺ᤳᤋᤢᤒᤠ ᤐᤠ᤺ᤴᤜᤠ᤹ ᤜᤧᤰᤁᤩᤠᤱ ᤀᤠᤏᤡ᤹ ᤍᤠᤱᤒᤠ ᤏᤢ ᤛᤧᤴᤗᤵᤍᤠᤱᤒᤠᤸᤗᤧ ᤂᤡᤏᤡ᤹ ᤛᤣ᤺ᤰᤕᤢᤰᤔᤡᤒᤠᤜᤠ᤹ᤗᤠᤶ ᤁᤧᤒᤡᤖᤡᤒᤠ ᤀᤡᤱᤈᤠᤱᤜᤠ᤹ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹ ᤁᤧᤗ᤹ᤒᤠ ᤀᤠᤏᤡᤱᤘᤠ᤹ ᤘᤠ᤹ᤖᤥ॥
3ᤁᤠᤰᤏᤢ ᤋᤃᤡ ᤂᤡᤏᤡ᤹ ᤁᤴ ᤐᤠ᤺ᤴᤏᤡᤴ ᤁᤢᤛᤡᤱ ᤏᤡ᤺ᤵᤔᤠᤀᤣ ᤐᤥᤱᤗᤥ॥ ᤁᤢᤏᤢᤵᤔᤠ ᤕᤧᤴᤜᤠ᤹ᤀᤥ ᤁᤡᤏᤠ᤺ᤴᤍᤡ ᤁᤧᤒᤡᤒᤠᤜᤠ᤹ ᤁᤡᤏᤠ᤺ᤴᤍᤡ ᤐᤡᤏᤢ ᤔᤧᤍᤠᤀᤠᤱ ᤂᤧᤱᤜᤠ᤹ᤖᤧ ᤀᤠᤒᤠᤅᤣ ᤂᤢᤏᤡ᤹ ᤋᤠᤵᤑᤧ᤺ᤶᤒᤠ ᤏᤡᤱᤘᤠ᤹ᤀᤥ ᤔᤧᤘᤠ᤹ 4ᤜᤧᤰᤁᤩᤠᤱ ᤀᤰᤂᤣ ᤔᤧᤒᤠ᤺ᤳᤋᤢ᤹ᤖᤥ. “ᤂᤪᤡᤛ᤻ᤋᤖᤧ ᤀᤡᤱᤃᤠ᤹ ᤕᤠᤶᤔᤥ ᤕᤢ᤺ᤀᤠ ᤗ᤹ᤖᤡᤰ ᤔᤠᤱᤜᤧᤰ ᤆᤥᤃᤢᤀᤠᤱ ᤘᤕᤧᤒᤠ ᤔᤣ᤺ᤶᤒᤡ᥅ ᤂᤢᤏᤧ᤹ ᤀᤠᤳᤋᤥ ᤕᤧ᥅ ᤀᤠᤏᤡᤃᤣ ᤛᤢᤎᤧᤒᤠ ᤋᤠᤰᤌᤧᤒᤠᤜᤠ᤹ ᤁᤠᤰ ᤔᤧᤛᤩᤧ ᤔᤧᤒᤣ. ᤜᤧᤰᤁᤩᤠᤱ ᤏᤠᤘᤠᤃᤧᤴ ᤆᤀᤡ᤺ᤳ ᤏᤧᤛ᤻ᤛᤧᤀᤠᤱᤎᤥ ᤁᤠᤰ ᤐᤠ᤺ᤴᤜᤠ᤹ ᤒᤠ ᤜᤧᤰᤁᤣᤀᤣ ᤏᤧᤖᤥ॥”
5ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤋᤖ᤺ᤱᤍᤡᤱ ᤋᤠᤱᤛᤠᤰᤐᤧᤴ ᤏᤢ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤐᤣᤗᤡᤃᤧᤴ ᤁᤢᤒᤠ᤺ᤴᤈᤠᤰᤗᤠᤶᤒᤠ ᤏᤠᤘᤠᤃᤧᤴ ᤆᤀᤡ᤺ᤳ ᤏᤧᤛ᤻ᤛᤢᤒᤠ ᤐᤠ᤺ᤴᤏᤡᤴ ᤂᤧᤱᤜᤠ᤹ᤖᤧ ᤏᤡᤏᤡᤒᤠᤀᤣ ᤏᤡᤱᤘᤠ᤹ ᤔᤧᤓᤣ᤺ᤳᤇᤢᤖᤥ॥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤆᤫᤠ᤺ᤳᤗᤠᤶ ᤗ᤺ᤳᤋᤢᤀᤠᤱ ᤆᤫᤠ᤺ᤳᤋᤡᤸᤗᤧᤀᤣ ᤆᤥᤃᤢ. 6ᤜᤧᤰᤁᤩᤠᤱ ᤒᤠ ᤂᤧᤴ ᤆᤫᤠ᤺ᤳᤗᤠᤶᤒᤠ ᤀᤢᤴᤇᤣ᤺ᤴᤛᤔᤠ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤜᤢᤔᤧᤀᤠᤱ ᤔᤧᤃᤧᤖᤥ॥ 7ᤁᤖ ᤒᤠ ᤂᤧᤴ ᤐᤣᤗᤡᤃᤧᤴ ᤐᤠ᤺ᤴᤈᤠᤰᤁᤡᤸᤗᤧ ᤀᤠᤸᤗᤥᤒᤠ ᤋᤠᤱᤛᤠᤰᤐᤧᤴ ᤏᤢ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤔᤡᤗᤠᤶᤒᤠ ᤔᤧᤱᤔᤠ ᤑᤠ᤹ᤀᤠᤱ ᤋᤠᤱᤄᤢᤀᤠᤱ ᤘᤠ᤹ᤖᤥ॥ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤡᤱᤎᤠᤱ ᤔᤧᤶᤒᤡᤔᤏᤠ ᤔᤏᤠᤜᤠ᤹ ᤂᤠᤛᤧᤴ ᤕᤧᤴᤏᤥ ᤔᤧᤶᤔᤧᤱᤛᤡᤱᤅᤣ ᤌᤠᤖᤡᤰ ᤋᤠᤱᤛᤠᤰᤐᤧᤴ ᤏᤢ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤒᤠ ᤕᤠ᤺ᤰᤋᤧᤀᤠᤱ ᤏᤧᤖᤥ॥
8ᤁᤖ ᤀᤠᤔᤡ᤺ᤶ ᤀᤠᤴᤈᤢᤶᤛᤣ. ᤗᤳᤇᤠ ᤐᤠ᤺ᤴᤎᤡᤰ ᤏᤡᤱᤘᤠ᤹ ᤔᤧᤓᤣ᤺ᤳᤇᤧᤶᤔᤡᤴᤏᤧ᤹ᤀᤥ—ᤍᤠᤱᤒᤠᤸᤗᤧ ᤁᤢᤗᤠᤃᤡ ᤌᤡᤰ ᤕᤧᤴᤏᤡᤴ ᤋᤱᤒᤣ ᤜᤧᤴᤇᤡᤱ (᥇.᥆᥆᥆) ᤁᤢᤀᤡᤛᤡᤰ ᤏᤢ ᤜᤧᤴᤇᤡᤱ ᤋᤱᤒᤣᤴ ᤌᤡᤰᤕᤧᤴ ᤁᤢᤀᤡᤛᤡᤰ ᤐᤥᤱᤗᤥ॥ 9ᤁᤢᤓᤠ ᤔᤏᤠᤜᤠ᤹ᤖᤧ ᤔᤧᤀᤡ᤺ᤳᤋᤢᤒᤠ ᤁᤢᤀᤡᤛᤡᤰ ᤍᤠᤱᤒᤠᤸᤗᤧ ᤁᤢᤏᤢ᤺ᤱᤔᤠ ᤕᤢᤔᤠ ᤔᤠᤱᤜᤧᤰᤁᤡᤴ ᤁᤧᤵᤔᤠ ᤔᤧᤛᤢ᤺ᤏᤧᤴᤗᤥ. ᤁᤖ ᤂᤢᤏᤧ᤹ ᤏᤠᤛᤡ ᤌ᤺ᤳᤋᤢᤖ ᤂᤡᤏᤡ᤹ ᤁᤧᤜᤠᤱᤄᤡᤖ ᤘᤠ᤹ᤖᤥ॥ ᤂᤡᤏᤡ᤹ ᤗᤠᤕᤥᤗᤠᤶ ᤁᤧᤜᤡᤴᤍᤡᤀᤠᤱ ᤀᤠᤳᤋᤡᤴᤜᤠ᤹ᤀᤠᤱ ᤁᤧᤶᤔᤧᤃᤡᤴᤗ ᤁᤧᤗ᤹ᤒᤠ ᤂᤢᤏᤧ᤹ ᤏᤡᤱᤘᤠ᤹ ᤆᤥᤃᤢᤖᤥ॥ 10ᤁᤖ ᤍᤠᤱᤒᤠᤴ ᤏᤢ᤺ᤱ ᤕᤢᤒᤠ ᤕᤧᤴᤏᤡᤱᤃ ᤛᤧᤴᤍᤡᤰ ᤁᤧᤄᤢ᤺ᤶᤒᤠᤴ ᤂᤢ᤺ᤴᤇᤧ ᤋᤠᤒᤠ ᤁᤢᤀᤡᤛᤡᤰ ᤜᤰᤆᤄᤳ ᤐᤥᤱᤗᤥ॥ ᤕᤶᤒᤠ ᤀᤡᤰᤗᤠᤀᤥ ᤋᤖ᤺ᤱᤍᤡᤱ ᤋᤠᤱᤛᤠᤰᤐᤧᤴ ᤔᤠᤒᤣ᤺ᤰ. ᤜᤧᤰᤁᤩᤠᤱ ᤂᤧᤵᤔᤥ ᤁᤧᤒᤵᤐᤠᤜᤠ᤹ ᤁᤠᤰ ᤔᤡᤍᤡᤰᤁᤠᤱ ᤕᤥ᤺ᤶᤒᤣ᤺ᤰ. ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣᤰ ᤏᤢ ᤂᤧᤵᤔᤥ ᤁᤧᤘᤠ᤹ᤒᤠ ᤁᤠᤰ ᤐᤠ᤺ᤴᤜᤠ᤹ᤀᤠᤱ ᤔᤡ᤺ᤸᤗᤧ ᤂᤠᤵᤐᤢᤌᤩ᤺ᤱ ᤆᤥᤃᤢᤛᤡᤖᤥ॥
11ᤜᤧᤰᤁᤣᤗ᤹ᤖᤡᤰ ᤁᤠᤰ ᤐᤠ᤺ᤴᤜᤠ᤹ ᤔᤧᤰᤐᤠᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ᤃ ᤛᤣᤛᤣᤒᤠ ᤏᤢ ᤛᤠᤶᤕᤥᤒᤠ ᤜᤡᤱᤔᤴᤏᤥ ᤘᤠ᤹ᤔᤠ ᤐᤥᤱᤗᤥ॥ 12ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤧᤴᤏᤡᤴ ᤁᤧᤜᤠᤱᤄᤢᤶ. ᤜᤧᤰᤁᤩᤠᤱ ᤁᤢᤕᤧᤴᤏᤡᤴ ᤜᤠᤖᤠ ᤋᤠᤖ ᤁᤧᤗ᤹ᤒᤠ ᤏᤡᤱᤘᤠ᤹ ᤁᤧᤈᤥᤃᤢᤶ. ᤁᤖ ᤂᤧᤴ ᤕᤧᤴᤏᤥ ᤋᤖ᤺ᤱᤍᤡᤱ ᤋᤠᤱᤛᤠᤰᤐᤧᤴ ᤔᤡᤍᤡᤰᤁᤠᤱ ᤔᤧᤰ. ᤜᤧᤰᤁᤩᤠᤱ ᤂᤧᤵᤔᤥ ᤁᤧᤒᤵᤐᤠ ᤁᤠᤰ ᤐᤠ᤺ᤴᤜᤠ᤹ ᤕᤥ᤺ᤶᤒᤣ᤺ᤰᤗᤥ॥ 13ᤁᤖ ᤀᤠᤏᤡ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤠᤱᤜᤧᤰ ᤆᤥᤃᤢᤒᤠ ᤁᤢᤛᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤏᤢ ᤁᤢᤛᤱ ᤋᤖ᤺ᤱᤍᤡᤱ ᤋᤠᤱᤛᤠᤰᤐᤧᤴ ᤏᤡᤱᤛᤠᤱ ᤀᤠᤈᤥᤃᤢᤶᤔᤠᤱ ᤀᤠᤜᤠᤱᤄᤢᤶᤗ ᤀᤠᤘᤠ᤹ᤖᤥ॥ ᤂᤧᤵᤔᤥ ᤛᤠᤶᤕᤥᤒᤠ ᤔᤏᤠᤜᤠ᤹ᤖᤰ ᤔᤧᤘᤠ᤹ᤖᤥ॥
14ᤂᤧᤸᤗᤧᤆᤥᤃᤢᤸᤗᤧ ᤀᤠᤔᤡ᤺ᤶ ᤀᤠᤴᤈᤢᤶᤛᤣ. ᤁᤴ ᤐᤠ᤺ᤴᤜᤠ᤹ ᤏᤡᤱᤛᤠᤱ ᤁᤧᤈᤥᤃᤢᤶᤔᤠᤱ ᤁᤧᤜᤠᤱᤄᤢᤶᤒᤠᤸᤗᤧ ᤆᤥᤃᤢᤸᤗᤧ ᤛᤢᤳᤌᤥ ᤏᤢ ᤛᤣᤛᤣᤒᤠ ᤜᤡᤱᤔᤴᤏᤥ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤛᤏᤠᤖᤢᤱᤅᤥ ᤘᤠ᤹ᤔᤠ ᤂᤡᤏᤡ᤹ ᤛᤢᤰᤛᤢᤰ ᤏᤡᤱᤘᤠ᤹ ᤆᤥᤃᤧᤶᤔᤧ᤹ᤀᤥ॥
15ᤁᤧᤖᤧᤰ ᤔᤏᤠᤜᤠ᤹ᤖᤧ ᤛᤧᤴᤗᤵ ᤔᤧᤄᤥᤛᤢᤖ ᤑᤠ᤹ᤀᤠᤱ ᤍᤠᤱᤒᤠᤸᤗᤧ ᤏᤠᤛᤡ ᤌ᤺ᤳᤋᤢᤒᤠᤴ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹ᤀᤥ॥ ᤀᤠᤏᤡ᤹ ᤔᤡ᤺ᤶ ᤏᤢᤛᤠ᤹ ᤐᤠᤘᤗᤖᤧᤀᤠᤱ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤂᤥᤛᤢᤒᤠ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ᤗᤠᤶ ᤁᤴ ᤐᤠ᤺ᤴᤜᤠ᤹ ᤛᤠᤵᤋᤢᤀᤠᤱ ᤁᤧᤜᤠᤰᤋᤡᤀᤠᤱ ᤘᤕᤧᤖᤥ॥ 16ᤁᤴ ᤐᤠ᤺ᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥᤃ ᤐᤠᤘᤗᤖᤧ ᤒᤠ ᤀᤰᤂᤣᤗ᤹ᤖᤡᤰᤁᤣ ᤁᤢᤛᤰᤀᤡᤱᤄᤱᤜᤠ᤹ᤀᤥ ᤛᤠᤵᤋᤢᤀᤠᤱ ᤘᤕᤧ॥ ᤂᤢᤏᤧ᤹ ᤛᤠᤵᤋᤢᤒᤠ ᤁᤢᤓᤠ ᤐᤠ᤺ᤴᤜᤠ᤹ ᤁᤢᤛᤡᤱ ᤏᤡ᤺ᤵᤔᤠ ᤛᤠᤰᤗᤥ॥ ᤌᤣᤀᤠᤱ ᤔᤧᤸᤗᤧᤔᤏᤠᤒᤠ ᤏᤢ ᤜᤡᤸᤗᤡᤰᤗᤡᤰᤐᤠ ᤔᤏᤠᤜᤠ᤹ᤖᤧᤃ ᤂᤧᤴ ᤐᤠ᤺ᤴᤏᤡᤸᤗᤧ ᤁᤢᤒᤣᤴ ᤔᤧᤗᤧᤰᤂᤢᤀᤠᤱ ᤔᤧᤘᤠ᤹ᤖᤥ॥ ᤂᤧᤱᤜᤠ᤹ᤖᤧ ᤘᤣ᤹ ᤛᤠᤶᤕᤥᤛᤠᤵᤗᤠᤀᤥ ᤁᤧᤒᤵᤐᤠ ᤐᤠ᤺ᤴᤜᤠ᤹ᤖᤧ ᤁᤢᤒᤣᤴᤏᤠᤱ ᤒᤠ ᤜᤧᤰᤁᤣᤗ᤹ᤖᤡᤰᤁᤣ ᤔᤧᤗᤧᤰᤂᤢᤀᤠᤱ ᤔᤧᤘᤠ᤹॥ ᤜᤧᤰᤁᤣ ᤔᤧᤈᤥᤃᤢᤒᤠᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤔᤧᤰᤔᤠᤴ ᤀᤠᤒᤠᤅᤣ ᤔᤧᤍᤠᤖᤢᤖᤥ॥
17ᤂᤧᤸᤗᤧᤆᤥᤃᤢᤸᤗᤧ ᤀᤠᤔᤡ᤺ᤶ ᤀᤠᤴᤈᤢᤶᤛᤣ. ᤂᤡᤏᤡ᤹ᤃ ᤁᤴ ᤐᤠ᤺ᤴᤜᤠ᤹ ᤏᤡᤱᤘᤠ᤹ ᤁᤧᤄᤥᤛᤢᤶᤔᤠᤱ ᤁᤧᤘᤕᤡᤒᤠᤸᤗᤧ ᤆᤥᤃᤢᤸᤗᤧ ᤛᤡᤱᤛᤡᤱ ᤕᤧᤰᤕᤧᤰ ᤗ᤹ᤖᤧᤶᤔᤧ᤹ᤀᤥ॥ ᤜᤧᤰᤁᤣ᤺ᤸᤗᤧ ᤑᤧᤴᤐᤠᤴ ᤁᤧᤈᤥ᤺ᤰᤐᤠᤜᤠ᤹ᤖᤧ ᤂᤢᤏᤡ᤹ ᤀᤡᤱᤗᤧᤰᤁᤣ ᤐᤠ᤺ᤴᤏᤡᤸᤗᤧ ᤂᤡᤏᤡ᤹ ᤁᤧᤔᤧᤴᤓᤥ᤺ᤳᤋᤡᤴᤗ ᤜᤧᤰᤁᤩᤠᤱ ᤂᤡᤏᤡ᤹ ᤁᤧᤎᤢᤶᤒᤠ ᤏᤛᤠ᤺ᤴᤗᤠᤶ ᤁᤧᤴᤈᤥ᤺ᤴᤍᤡᤴᤗᤖᤥ॥ 18ᤁᤖ ᤀᤠᤏᤡ᤹ ᤍᤠᤱᤒᤠ ᤏᤢ ᤛᤧᤴᤗᤵᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤀᤠᤒᤡᤒᤠ ᤏᤧᤜᤡᤏᤡᤱᤘᤠ᤹ᤀᤥ ᤏᤢ ᤁᤢᤗᤢᤱᤃᤢᤶᤔᤥ ᤐᤥᤖᤧᤶᤔᤧ᤹ᤀᤥ॥ ᤀᤠᤸᤗᤥ ᤏᤢ ᤛᤍᤠᤍᤡᤱ ᤍᤠᤱᤒᤠᤸᤗᤧ ᤁᤢᤔᤡᤔᤡᤍᤡᤱ ᤐᤥᤱᤗᤖᤥ᥄ ᤀᤠᤔᤧᤴ॥
Currently Selected:
᥈ ᤐᤋᤪᤢᤛ 3: LIFOTNT
Highlight
Share
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.
