Mak 8

Yeso Cut ti Ɗufal Nggal Ɓaras

1Si mukonan ani, male' i ɗufal si suɓut, si ti cwa i cwai kwa. Yeso lai som koltifai amesi yes kyel ames nyus, 2“I ɗing ti shum i ɗufal mii, ɓurti mukon ataat mai sin na kyel amen, kaciwa' ɗama i cwai. 3Na i ti'us ya ɓa si wa wur ti hwem, si wa fwaran na fisel, ɓurti shini na saa yusti, si ti maleng.”

4Som i koltifai amesi si matussi si ni, “Awe ma wa wisti folok ima ɓa si cu, na ya nati ya?”

5Yeso lulus ni, “A folok awen hu mati ya?” Si matussi si ni, “A pyoron.”

6Lak ɗufali ɓa si te amun ta fisha, zan foloki, palang DeeƁwe, nggyal, fa som koltifai ames ɓa si kaar ɗufali, si masi andi. 7Si mati al gushe nin ndyong, hum palang ti DeeƁwe ɓur sus hwak, ɗak lak som koltifai ames ɓa si kar hwak. 8Ɗufal si cu si kaf, ta takfai som koltifai amessi si har puɓus ima si kat ta cetat pyoron kyalak. 9A arya nggal ɓaras si ta kyeli. Ɗak ti'us ya, 10langus ta kwang i ham hu som koltifai amesi, wis ta' ti Dalmanuta.

11Farisiyawa si yes si fur masti Yeso lulal, ɓa si mbahus, si nyus ɓa u masus ɗamam i shok na fo ima ɓa u kof andok ames. 12Unai dul lafos munggyongi ɗak nyus, “Ami kin ɗufal i mwashi si far ti ɗing ti ɗamam i shok na fo ya? Ima laksu mwawei, i wa kofti ɗufal i mwashi mi ɗama i shok na fo kwa.” 13Unai honus, hum mulang ta kwang i ham, pis fiti.

Yisti i Farisiyawa hu i Herod

14Som i koltifai si nitima si yes ti folok kwa, a andek je si mati ta kwang i hami. 15Unai dulus mwal ni, “Kam huni, mbe' hun ti yisti#8:15 yisti A ɗama ima na si shu tasi han hai, ma wa kini u hu' ya. Ma fota hong. i Farisiyawa hu Herod.”

16Si at si mai hai shak asussi, ɗak si ni, “Lak mai, a ɓurti kama ti folok kwa.”

17Yeso shang aɗeng ima si laki, unai lulus ni, “Ami kin hu findel si folok hai ya? Huma ɗingi a hun hu shangi kwa ya? A hun hu njeng na hai waak? 18Hu mati shishat hu ti ɗing ti kyel kwa, hu ti mwal hu ti hal ti findel kwa haa? Hu mbe', 19myan ima i nggyal folok hara ɓurti ɗufal nggal hara haa? A cetat awen hu har puɓus ima kata ya?” Si matussi nyai, “Hure mulang apil.”

20“Myan ima i nggyal folok pyoron ɓurti ɗufal nggal ɓaras, a cetat awen i puɓusi hu har ya?” Si matussi nyai, “A Pyoron.” 21Lakus ni, “Hu shangi kwa yes mwash haa?”

Yeso Fa Manzyau i Betsaida Cala

22Myan ima si ru Betsaida, shini ɗufali si kolus manzyau nin, si fwal Yeso ɓa u ngge'us. 23Unai Yeso ka' ra i manzyauwi langtus ya ta ashwai. Tuf lyau ta shishat i maɗufali, ɗak kinus ra hai, Yeso lulus ni, “Ha ma ɗing ti ɗamanin haa?”

24Manzyauwi ɗing kyel ta fit ɗak ni, “I ma ɗing ti ɗufal sin fota yitat ima si nggaari.”

25Yeso hum kinti ra ta shishat i manzyauwi, unai shishati si matɓuya, si ɗing kyel, si ɗing ɗamam ndere. 26Yeso tukus wa wur yis nyai sus, “Ka ha lang ta ashwa kwa.”

Findel i Pita si Yeso Hai

27Yeso hu som koltifai ames si wa ta ashwa i nggas ti Kaisarya Filipi. Sin ɗiri ta fisel lulus ni, “Ɗufal si nyai yin aweya?” 28Si matussi si ni, “Shini si nyai, ha a Jwon Mabatisma, anggumi si ni, ha a Iliya, shini hwak si ni, ha a mashit i DeeƁwe nin.” 29Lulus ni, “Hun hee, hu nyai yin aweya?” Pita matussi ni, “Ha, a Kristi.”

30Yeso dulus mwal kan si lak ɗeng ɗama si yis hai kwa.

Yeso Lak Musut i Mot ima ma wa Masi

31Unai fur kofsus ti nyai, a kanggang yis, Al i Maɗufal u wo shum si ɗamam hyang. Kaya hu mbayai i kocok hu som kofiti si anggut hai si tus wa munggwya, a kpak si forus ya. Shak ta andi, takfai ti mukon ataat ma wa muluk fit hwak. 32Lakus findel mai rasman ta wei i ɗufal hyang, unai Pita dulus hyer tus ya si ɓwai ɗak lakus ɓin.

33Myan ima Yeso hat tifai ɗing som koltifai amesi, lak Pita ti ɓin nyus, “Herana ya ha Shatan! Ha hama mbe' ti a ɗamam i DeeƁwe kwa, a ɗamam i ɗufal kek.”

34Unai lai ɗufali hu som koltifai amesi yes kyel ames ɗak nyus, “Na ɗeng yis ɓweti u kolfai asuni, a kanggang u ɓwinggil hai asus, u ha' shanggam ames u koltifai asuni. 35Shak maɗufal ima wis mupwet asus, ma wa duni. Shak maɗufal ima dun mupwet asus ɓursun, ma wa wisi. 36Ami ma wa ɗat na maɗufali wis naya shak, ɗak dun mupwet ames ya? 37A hun ami maɗufal ma wa fai ii fo i mupwet ya? 38Na ɗeng yis shusho amen hu findel amen, na saa ti ɗufal ima sima arak i zuruk hu mafwashi mai, Al i Maɗufal ma wa shusho si yis hai hwak, myan ima ma wa yes ti mbaitat i dees hu som lu' ames masapai.”

Currently Selected:

Mak 8: AlisIRonNT

Highlight

Copy