YouVersion Logo
Search Icon

Mak 16

16
Muluk Fit i Yeso Ta Mot Wi
1Myan ima Mwen ti Lafos ti lang ta, Uryam ta Magdala, hu Uryam nati Jemis, hu Usalomi, si yes ti mabuf i yitat mafyongi, ɓa si fyal funat ames si. 2A mwen ti bya', tamwen ti muɗu i ɓwe si wa fiyaiyi. 3Sin luli ti ɗiyai ames nyai, “Awe ma wa tuk sikan afungi ya ta fo i fiyaiyi ya?”
4Si ha' hai fit, si ɗingi maɗeng tuu tuk mbai mafungi ya ta ɓwai. 5Sin mulang ta fiyaiyi ndai, si ɗing zalang nin ti arom mapeli, yis amun ta ɓwai ra i ucwa, unai myanat ka'us.
6Yis nyus, “Ka hu mwen kwa! Hu ma far ti a Yeso i Nazaret ima si nggwakus ta si shanggam hai. Mana kwa. Tuu luk fit ta mot wi! Ɗing hun kyel ima si kin funat ames na. 7Ɓu hu lak som koltifai amesi hu Pita, nyai, ‘Mayus wa mutong ta Galili. A ta te'i hu wa ɗingsus ta, fota ngga' ima ai laku ta.’ ”
8Unai si langus tawi sin ɗaro, si rangya ti titalal ta fiyaiyi wi, ɓurti myanat si tes cakat.
Kofti hai i Yeso ta ɗufal wi hu muhumkyel i Yeso ta fit
9Myan ima Yeso luk fit tamwen wititit, mwen ti bya', pwak Uryam ta Magdala hai ti bya'. Ayit tima ai ngga hut rin mafwashi pyoron ya andi. 10Yit ti wa ti lak som ima ai sin tikul hu yis ani, ti wisus sin shaat sin kawayai.
11Myan ima si hali nyai Yeso ma mushet, hu Uryam ti ɗingus hwak, si nggwes i fati mwawei.
12Takfai ti andi, ɗufal apil shini ta saa ti som koltifai ames, sin wa foti ashwa nin, Yeso pwakus hai, si ɗingus tes akat. 13Si hum kyel si lak anggumi, si nggwes i fati mwawei hwak.
14Ta takfai, Yeso pwak ya ta kyel i hure mulang andek ani myan ima sin cwai ti cwa. Lakus ɓin ti musut i munggwya i fati mulut hu njeng na hai i munggwya i fati mwawei si som ima si ɗingus takfai ti muluk fit ames.
15Yeso lakus ni, “Ɓu ta naya shak, hu mba Muro Maɗesi amen wa kyel i ramam shak. 16Shak maɗufal ima fa mwawei si masus batisma, a yis ma wa mupwet. Maɗufal ima nggwes i fati mwawei a yis si wa totsus ɓur. 17Ɗamam i shok na fo mii sin koltifai ti som ima si fa mwawei. Ti asum amen si wa nggati rin mafwashi ya, si wa findel ti alisas akat-akat. 18Si wa zan ti ɗamafwashi ti ra, na si wo manda i mot ma wa masus ɗama kwa, si wa kinti som ima si ti mwatanan ra hai, si wis cala.”
19Takfai tima Deembai Yeso mbit laksus findelal mii, DeeƁwe ha'us ya wa fit, wa te amun ta ra i ucwa ames. 20Unai som koltifai amesi si wa sin mba ti Muro Maɗesi ames ta kikyal shak. Deembai yis wis sus ti, yis kinti ɗamam i shok na fwai sin koltifai ti findel ames.

Currently Selected:

Mak 16: AlisIRonNT

Highlight

Share

Copy

None

Want to have your highlights saved across all your devices? Sign up or sign in