Mak 15

Yeso ta Wei i Pailet

1Tamwen wititit, mbai i kocokak, hu kaya, hu som kofiti si anggut hai, hu som i totti puɓwar shak si ɓeti. Unai si no' Yeso, si langtus ya, si kol Pailet, makunggul i Rom.

2Pailet lulus nyus, “A ha a makai i som Ju haa?”

Yeso matussi ni, “Hei, ta ngga' ima ha lak ta.”

3Unai mbai i kocokaki lak ɗamam mufwashani hyang si yis hai. 4Pailet hum lulsus nyai, “Hati aɗeng i laki hai findelal mai kwa haa? Hala male' i findelal mafwashi ima si laki na hai yati!”

5Yeso tes mbaa, aɗengi fa Pailet shok na fo. 6Myan i Got i Pissihai, Pailet mana wak ti maɗufal ima ma mano' ii ra, ima ɗufal si lul. 7Ta myan ani, maɗufal nin ma asum Barabas ai yis ta mano' wi hu shini, ɓurti for ti maɗufal, myan ima sin ɓyaranganya. 8Ɗufal si yes ta kyel i Pailet, ɓa u masus aɗeng ima mana masusi.

9Unai matussi ni, “Hu ma ɓweti i waku makai i som Ju i ra haa?” 10Shangi a ɓur ti nadon kin mbayai i kocokaki si fa Yeso ta ra yusti. 11Mbayai i kocokaki si shuk ɗufal ɓa si lul si wakus Barabas i ra, ii foi Yeso.

12Unai Pailet lulus ni, “Ami hu ɓweti i masi ti maɗufal ima hu layani ii makai i som Ju ya?”

13Si cu i fo sin nyai, “Nggwak hun yus si shanggam hai!”

14Pailet lulus ni, “A ɓur ti mi ya? Mas a mafwashi i mi ya?” Si cu i fo shak ti ambas sin nyai, “Nggwak hun yus si shanggam hai!”

15Ɓurti Pailet ma ɓweti u ɗak ti ɗufal mulwat, catus Barabas ii ra. Takfai tima ndash Yeso, fa ɓa si wa si nggwakus tasi shanggam hai.

Som i Ɓwol si Gbaf Yeso ya

16Unai som i ɓwoli si watus ta taya i makocoki, ɗak si lai anggum i som i ɓwoli shak ta kyel andek. 17Si kinus ndi ti fagin ti kaitat nin mujuwi, ɗak si nggi' rurwan i maren nin si kinusi ta hai. 18Unai si gbafus ya, sin nyai, “Mukon asa ti herta, a makai i som Ju.” 19Si ka' nggwakansus ti yal ta hai, sin twafansus lyau hai, ɗak si cinggir sin to' sus fota to' i ngye. 20Takfai tima si gbafus ya si zan fagin mujuwi i yi ya, si ti'us arom ames. Unai si langtus ya ɓa si nggwakus.

Si Nggwak Yeso ta si Shanggam hai

21Unai maɗufal nin ta Sairin, ma asum Siman, dees i Alekzanda hu Rufas, yis yus yes ta ya. Si kinus kpak ɓa u ha' Shanggami. 22Si wa ti Yeso ta kyel nin ima si lai i Golgota, (nyai a Kyel i Kyas i hai). 23Unai si ti'us ham i manggɓu' ima si fut hu mur#15:23 Mur mai a manda ima dya' hanat ya na lo'., ɗak nggwes i mati. 24Ɗak si nggwakus tasi shanggam hai. Si kar arom amesi, si hwi aben si aromi hai, ɓa si ɗing aɗeng ima si wa wisi ti andek-andek.

25A si shitam karfu' ti mwen, si nggwakus tasi shanggam hai. 26Si worong aɗeng ima kin si nggwakus tasi shanggam hai nyai, A MAKAI I JU. 27Si nggwak kpokak i masher apil ta, hu yis, andek ta ra i ucwa ames andek ta ra i ukutyal ames. 28(Mai fur ɓa Worong i DeeƁwe u hya, ima ni, “Si mbe'us ta saa ti som mufwashi.”) 29Som ima si musata sin laksus findel i gbya' hai, sin kinggit ti hihai ames nyai, “Gbaak! Ha ima ha ni ha wa nggul ti Wur i DeeƁwe ya, ha ta' ta takfai ti mukon ataat, 30ɗora ya ta si shanggam hai, ha bum hai sa ma!”

31Andi hwak mbayai i kocokaki hu som kofiti si anggut hai, si musasus ta saa ti ɗiyai ames, sin nyai, “Bum shini, ɗak bum haisus kwa! 32Ɓa Kristi mai, makai i Isar'ila, u ɗorkyel tasi shanggam hai mwashi. Na ni ɗingi andi, ɗak ni fa mwawei.” Mwa pilal ima si nggwakus tikuli, si sya'us hwak.

Mot i Yeso

33Sai ren, unai maɓing vo ashwai ya shak, wa shitam ataat ti ango. 34Ta shitam ataati, Yeso kawa ti la munjengi ni, “Eloi, Eloi lama sabak tana?” Ma nyai, “A DeeƁwe amen, a DeeƁwe amen, ami kin ha mas gbya' ti yin ya?”#15:34 Ɗing huni hwak: Nak 22:1.

35Myan ima shini sin mangrai ta kyeli, si hali andi, si ni, “Hal huni, ma lai ti Iliya.”

36Unai andek ames tital wa jop soso ta ham macani wi, ti' tasi cwang nin hai, ti' Yesoi ɓa u wo. Yis nyai, “Hon hun yus! Ka ɗingi ahun Iliya ma wa yes u ɗortus ya.”

37Unai Yeso kawa ti njeng, ɗak dul lafos i dala.

38Fo abet, fagir mbai ima mata Wur i DeeƁwe matkar apil, ta fit yes kikyel. 39Mbai i som ɓwol nin ta Rom, ima ma mangra ta wei i Yeso, hal kawa ames, ɗak ɗing ngga' ima mot ta, unai ni, “A mwawei maɗufal mai a Al i DeeƁwe!”

40Arof shini sin ɗing ti ɗamami ta maleng. A hu Uryam ta Magdala, hu Uryam nasus ti Jemis mavaati hu Joses, hu Usalomi. 41Arof mii, a sin ai sin koltifai asussi, myan ima yis ta ashwa i Galili sin ɗisus cwa. Arof hyang ima ai sin wayan Yerushalima tikul, sin ta kyeli.

Lai i Yeso

42Mwashi a ango ti Mwen ti Ɗak ti ɗamam ta, a mwen tima ɓa wasan Mwen ti Lafos. 43Maɗufal nin ta Arimatya, ma asum Josep, ma andek ta saa ti kaya ima ɗufal si fayansus ngye. Ai yis shwaiti yes i kaitat i DeeƁwe ti haisus. Wa kyel i Pailet kaciwa' myanat, lul funat i Yeso.

44Pailet shok na fo myan ima hali Yeso tuu motus. Unai lai mbai i som i ɓwoli ɓa u lul a hun Yeso tuu yash ti mot ɗak. 45Myan ima hal findeli ta fo i mbai i som ɓwoli, unai fa Josep funati. 46Josep yes ti lukul i lai, ɗor ti funati ya, nggi' ta lukuli wi, kin ta fiyai ima si yong ta afung wi. Ɗak kin si tuk mbai i mafung ta fo i fiyaiyi. 47Uryam ta Magdala hu Uryam nati Joses, si ɗing kyel ima si kinus ta.

Currently Selected:

Mak 15: AlisIRonNT

Highlight

Copy