Mak 14
14
Si Fyal Yeso Mbar ta Betani
1Kat mukon apil ɓa si mas Got i Pissihai hu Got i Folok Ma kaciwa' yisti, unai mbayai i kocokak hu som kofiti si anggut hai, sin far ti ngga' ima ɓa si ka' Yeso si furus ya. 2Si ni, “Ɗat ɓa ka masi mwen ti got kwa, ɓurti ɗufal si wa muluk fit ti ɓin.” 3Yeso yis ta Betani ta wur i Siman nggeter nin, yis cwai ti cwa ta, unai mbor nin ti yes ti foti shigira ti mbar mafyongi maɗesi macef fwet, ima si lai ii nardi. Unai ti ɓu shigirai ya ti shu Yeso mbari ta hai.
4Shini som ima si ta kyeli, si mas futut, sin har ti ɗiyai ames nyai, “Ami kinti rafat ti mbar macef mai ya ya? 5Mbar mai kol cef i ro i wil andek! Naɗin si fa som i jyel cefi hee!” Si lakut ɓin ti njeng.
6Yeso nyus, “Hon hun yut! Ami kin hu buruk sut ya? Aɗeng ima ti masuni a maɗesi. 7Ngang hu ma tikul hu som i jyel, na hun ɓweti masus maɗesi, hu wa wis sus. Yin, i wa mute tikul hu hun ngang kwa. 8Ti mas mai kiga' si njeng amet. Ti shu mbar mafyongi mai hwer, ɓa ti ɗak tun yes mwen lai amen. 9I laksu mwawei, shak kyel ima si wa lak ti Muro Maɗesi na naya, si wa lak ti findel i mbor moti ɓurti si mbe' tut.”
10Unai Judas Iskaryot, andek ta saa ti mulang apili, wa kyel i mbayai i kocokak, ɓa u cu han i Yeso ta ra yusti. 11Si pipel na mulwat ti hal ti aɗeng ima lak, si ni si wa fa sus cef. Yis Judas far fisel ima ɓa u fa Yeso ta ra i mbayaiyi.
Cwa i Ango i Deembai
12Mwen ti bya' ti Got i Folok ima Ma kaciwa' Yisti, a myan ima si mana masti kuna i Pissihai ti al marai, som koltifai asussi si nyus, “Ha ɓweti ka ɗaka ti kyel i cwai ti Got i Pissihaiyi aleya?”
13Unai ro som koltifai amesi apilal, yis laksus nyai, “Lang hun ta ashwai, maɗufal nin ima mati shweret i ham, ma wa wisu. Hu kolfai asussi. 14Lak hun mawur ima lang tai huni, ‘Makofiti lul nyai, “Ahom i mat ti mwalmwati mii leya? I ɓweti ɓa i cu cwa i got i Pissihai ta hu som koltifai amen.” ’ 15Yis ma wa kofsu ti ahom ta wur i fit nin, ima ti si ɗak ti ya. Hu kin kan cwai ta kyeli.”
16Unai som koltifai amesi si luk fit, si lang ta ashwai, si wa si wisus ta ngga' ima Yeso lakus ta. Si kin cwa i Pissihai ta.
17Myan ima ango ti mas, Yeso ru hu mulang apili. 18Sin cwai ti cwa ndai, unai Yeso ni, “I ma laksu mwawei, andek na saa yuti, ma wa cwai ti kwinik amen.”
19Si rafat mulwat ya, ti andek-andek sin nyai sus, “Ahun ayin waak?”
20Matussi ni, “Andek na saa ti mulang apil mii, ima ni cwai na kwang andek. 21Al i Maɗufal mayus wa muhumkyel fota ngga' ima si worong ta hai yusti. Mwe si maɗufal ima cu han i Al i Maɗufal! Ma wa ɓin sus ɗat naɗin si alus kwa.”
22Sin ɗiri cwai ti cwa ndai, Yeso zan folok, palang ɗak nggyalti fa fe i ro ames, ni, “Mat hun hu cu, mai a lo' amen.”
23Ɗak zan cunjoi palang, fas ni, wo hun ta cunjoi wi, shak asui.
24Lakus ni, “Mai a wash amen i dakwa, ima si shuya ɓurti ɗufal shak, ɓa si shus mafwashi ya. 25I ma laksu mwawei, i wa muhum woti ham i manggɓu' kwa, na myan ima kaitat i DeeƁwe yes tawe, ɗak i wo mamwai.”
26Takfai tima si lak ador, si lang ya si wa Anggash i Yitat i Mbar.
Yeso Lak Ɓwinggil i Pita
27Yeso lakus ni, “Shak asui hu wa fwaran, ɓurti si worong nyai,
“ ‘I wa pati maɗing ti tutwai,
tutwaiyi si wa matɓasan.’#14:27 Ɗing huni hwak: Zak 13:7.
28“Takfai tima i luk fit ta mot wi, i yu wa mutong ta Galili ka shwai ta.”
29Pita nyus, “Na shak si fwar, yin, i wa mufur kwa.”
30Unai Yeso matussi ni, “I ma laksa mwawei, ti fo' moti kwai, ha wa ɓwinggil nyai shangun kwa sa ataat, ɗak korong tutol sa pilal.” 31Pita hum laki gbak-gbak nyai, “Na sin wa forsun ya hu ha gbaak, i wa munggwya i shangsa kwa.” Shak anggumi si lak andi hwak.
Yeso Fwal DeeƁwe ta Gatsemani
32Si wa ta kyel nin ima si lai ii Gatsemani, unai Yeso lak som koltifai amesi ni, “Tehun amun nanati, ɓa i wa i fwal DeeƁwe.” 33Si rang hu Pita, hu Jemis, hu Jwon, ta kyeli, ɓo tirim fwet lo' ames motus. 34Unai nyus, “I hal ti tirim fwet na mulut amen fota ɓa i motun. Tehun nati ti shingat.”
35Her ta wei vaat, fur ta fisha yis fwal ti DeeƁwe nyai, “Naɗin yis wa mas, naɗin ha zanun myan mai ya. 36Abba, a Dee, ɗamam shak a ma mas ta kyel yati. Zana na cunjo mai ya. A ɓweti amen kwa, a ɓweti ama.”
37Ɗak hum kyel ta kyel i fe i ro ames wisus sin yus raki. Lul ta Pita ni, “Siman, hu ndok hu ɗing kyel akul hu yin kwa haa? 38Tehun ti shingat hu fwal DeeƁwe, ka hu fur ta amba wi. Rin ma ɓweti, lo' nggwes.” 39Unai muhumkyel ta kyel i fwal ti DeeƁwe, yis fwali fota ngga' ima ɗin yis masi ta ti bya'. 40Myan ima humkyel, wisus sin ɗarak, ɓurti arak ka'us fwet. Unai si far aɗeng ima ɓa si lakus wet.
41Humkyel mataat, nyus, “Hu yu raki mwashi hun lafos haa? Ndok andi! Myan si mas. Ɗing huni, si fa Al i Maɗufal ta ra i som i mafwashi. 42Luk hun kan fit! Ka wa! Ma cwai ti han amen mai yes!”
Si ka' Yeso
43Fo abet yis ɗiri findel, Judas andek ta saa ti mulang apili, pwakus hai. Male' i ɗufal ima si ti ɗam i ɓwol hu awal hu yalal. A mbayai i kocokak hu som kofiti si anggut hai, hu mbayai i mashwa si rohus.
44Mwashi, ma cwai ti kwiniki si ɓeti ngga' ima si wa ka'sus ta.
“I ma i wa i to'us too' i myatat, a yis hu wa ka'i.” 45Ti yes ames wa kyel i Yeso, Judas to' too' i myatat, ni, “A makofiti!” 46Unai ɗufali si ka' Yeso, si no'us ya. 47Andek ta saa ti som koltifai amesi ima si mangrai ta nggas, re' awal ya, tel ti mwal i mamuro i mbai i makocok ya, mwali ti ndakut.
48Yeso nyus, “Yin a kpok i masher ani? A kpak hu yes ti awal ta yalali ɓa hu ka'un haa? 49Ngang kama tikul, yin kofiti ta taya i Wur i DeeƁwe, hu ka'un kwa. A kanggang Worong i DeeƁwe u hya.” 50Unai som koltifai asussi si matɓas ti andek-andek.
51Al zalang nin, yis yus a dulusi, a mogo je mati, yis koltifai ti Yeso. Myan ima si ni gbuk ɓa si ka'us, 52catus mogoi i ra, titalus ambwiriti.
Si kol Yeso ta Wei i Mbayai
53Nanati si wa ti Yeso ta wur i mbai i makocok, shak mbayai i kocokak, hu kaya, hu som kofiti si anggut hai si suɓut ta kyel ames. 54Pita yis koltifai amesi na takfai, wa ta taya i wur i makunggul i makocoki. Te amun ta saa ti som i ɗing ti kyel, yis hal ti man.
55Mbai i kocokaki hu som i tot ti ɓur shak, si far findel i laki si Yeso hai, ɓa si ka'us si for ya, si wisi kwa. 56Hyang si lakus fyarat hai, ɗak fo ames wa andek kwa.
57Unai shini si luk fit si lakus fyarat hai, nyai, 58“Ni halus yis nyai, ‘I wa nggul ti Wur i DeeƁwe ima maɗufal ta' mai ya, takfai i mukon ataat, i hum ta'i ta, fota a maɗufal ta' kwa.’ ” 59Shak ta andi fo ames wa i mandeki kwa.
60Unai makunggul i makocoki luk fit mangra lul ta Yeso ni, “Ha hati aɗeng i laki si findelal ima ɗufal mii si laki na hai yati kwani?” 61Yeso tes mbaa, shen kwa.
Unai makunggul i makocoki humus luli, “Ha a Kristi, Al i DeeƁwe Maɗesi haa?”
62Yeso ni, “Ayin. Hu wa ɗing ti Al i Maɗufal yis amun ta ra i ucwa i Mambaitat shak, yis yes ta ri' wi.”
63Unai makunggul i makocoki gwyak arom ames ya saa ti futut, yis nyai, “Anggi findeli ka ɓweti ka hali hwak ya? 64Hal hun findel i ale' ima masi si DeeƁwe hai mai! Hu ɗingi atini ya?”
Shak asussi si lefus ɓuri ya, ɓa si forus. 65Shini si fur twafansus lyau hai, ɗak si no'us shishat ya, sin pahan sus sin nyai, “Laka nin findel i mashit!” Unai som i ɗing ti marei si zanus ya, si ndashus.
Pita Ɓwinggil Yeso
66Myan ani, Pita yis ta kikyel ti taya i wuri, unai yamwan nin yere ti makunggul i makocoki ti yes ta kyeli. 67Myan ima ti ɗing Pita yis hal ti man, ti shokus fo.
Ti ni, “Ha hwak hama akul hu Manazaret mai, Yeso!”
68Unai ɓwinggil ni, “Yin i shang aɗeng ima shima laki kwa fweng.” Unai lang ya ta fukwap, ɗak korong tutol.
69Myan ima yerei ti hum ɗing sus, ti hum lak ti som ima si mangrai ta kyeli tini, “Maɗufal mai ma andek ta saa yusti.” 70Hum mɓwinggili.
Takfai ti myan ndyong, som ima sima mangrai ta nggas ti kyeli, si lak Pita si ni, “A kpak ha andek ta saa asussi, ɓurti ha a ma Galili.”
71Unai fur se' ti haisus, yis shiɗat nyai, “I shang maɗufal ima hu findel i hai mai kwa!”
72Fo abet korong hum tutolat mapil. Unai Pita mbe' findel ima Yeso lakus.
“Ha wa mɓwinggil sun sa ataat, ɗak korong tutol saa apil.” Unai ɓak ti kawa.
Currently Selected:
Mak 14: AlisIRonNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and © The Nigeria Bible Translation Trust 2018
