Mak 13

Matkof i Ɗamam i Dala

1Yeso yis mulangya ta Wur i DeeƁwe ndai, andek ta saa ti som koltifai amesi nyus, “A makofiti, ɗinga musut i mbai ta' ima si masi ti mafyai mai, hu ta' maɗesi mai kwai.”

2Yeso humus ti kyel ni, “Ha ɗing mbayai i ta'a' mii haa? Som manggwya si wa honti afung nin ta hai nin kwa, si wa ɓasanti ya.”

3Yeso yis amun ta hai Anggash i Yitat i Mbar si fit, kyel ima ɗing Wur i DeeƁwe ta, Pita, hu Jemis, hu Jwon, hu Andru si lulus ii mufot. 4Si ni, “Laka nin ti, a tami ɗamam mii si wa mas ya? Ami ma wa kofi nyai ɗamam mii shak si nggas i hya ya?”

5Yeso lakus ni, “Shingat hun, kan ɗeng dangu kwa. 6Hyang si wa yes ti asum amen. Sin nyai, ‘Ayin ayis,’ ɗak si dang ɗufal hyang ya. 7Myan ima hu hal ɓwol hu mangga' i ɓwol nati, hu te'i, kan hu mwen kwa. A kanggang ɗamam si te andi, shak ta andi, dala i naya ti ti yes kwa. 8Ɓin ti wa muluk fit ta' hu ta' hai, ti luk fit kaitat hu kaitat hai. Fisha ma wa muro ta kikyal akat-akat, si mas hwem hwak. Mii shak a mahalal i shum.

9“A kpak hu te ti shingat i haisu, si wa kolsu ta wei i kaya, si ndash shu ta mare i DeeƁwe. Si wa kolsu ta wei i som i kunggul hu kaya ɓur ti hun a som koltifai amen. Mai ma wa mute i fisel tima hu lakus Muro Maɗesi amen. 10A kpak Muro Maɗesi mai u tong ta shak ramam i naya wi ti bya'. 11Myan ima si ka'u si watu ta fo ɓurti, ka hu tirim ti aɗeng ima hu wa laki kwa. Lak hun aɗeng ima DeeƁwe kinui ta mulwat tasi myani, ɓurti a hun hu wa findel kwa, a Rin Masapai. 12Maɗufal ma wa cwai ti han i nususi ɓa si for ya, dee ma wa cwai ti han i al ames. Fe si wa zan ti wei ti hu dees, ɓa si fwarus ya. 13Ɗufal shak si wa ɗanggwya tu ɓur sun, yis ima ka' agung wa dala ma wa mupwet.

14“Hu wa ɗing ti ‘ɗamam i male' ima si kwal mufur’#13:14 Ɗing huni hwak: Dan 9:27; Dan 11:31; Dan 12:11. sin mangra ta kikyal ima a ames kwa. Myan ima hu ɗingi andi, ma ambe' u shangi. Na hati mute ta ta' ti Judya, titala ha lang ta ɗanggash! 15Maɗufal ima mata si hai i mahom ames, kan ɗor ya u lang ta wur wa zan ti ɗama kwa.#13:15 Ta Isar'ila, wurai ames tasi haiyi ma tandalang, si wash ɗam ta, si lafos ta hwak. 16Maɗufal ima mata yang, kan humkyel ta wur ɓa u zan mogo kwa. 17Mweni ti wa mute ti shum fwet, ta si arof ima si ti harai hu ima si ti kalajwau!

18“Fwal hun DeeƁwe ka ɗamam mii si fur ti fu kwa. 19Ta si myan ima DeeƁwe mas naya yes mukonan mii, ti si mas shum mafwashi nin fota mai kwa. Takfai ti mai, shum nin ma wa muhum mute fota mai kwa fweng. 20Naɗin wa' Deembai dya' mukonan mii ya kwa, naɗin ɗeng u pwet kwa. Dya' mukonan mii ya, a ɓurti som ima benus. 21Tasi myan ani, na ɗeng ni hu, ‘Ɗing huni, Kristi mai!’ A hun ‘Ɗing huni, unai ta te'i!’ Ka hu fa mwawei kwa. 22Ɓurti som ima si nyai sin a Kristi, hu som i shit i fyarat si wa mulangya. Si wa masti ɗamam i kofiti, hu ɗamam i shok na fwai, ɓa si dang ta ima DeeƁwe benusi hwak, na yis wa matwis. 23I laku ya hwer, ɓurti ɓa hu te ti shingat.

24“Tasi mukonan ani, takfai ti shum mahyangi,

“ ‘Ɓwe ti yut wa kikyawat,

ture hwak u fa kweneng kwa.

25Ɓyar si wa ndakan ta fit,

mbayai i ɗamam ta fit si wa gicik hwak.’#13:25 Ɗing huni hwak: Ish 13:10; Ish 34:4.

26“A tasi myan ani, si wa ɗing ti Al i Maɗufal yis mupwak ya ta ri' wi, ti mbaitat ames ta cinjangati. 27Ma wa ro ti som lu' ames ɓa si suɓut som ima benus ta kikyal shak, ta anggwe' i naya wa anggwe' i fit.

28“Mwashi, wis hun shangi mai tasi yit ti makambong. Na ti ɓak ra, ti sa mwal mumwai, hu shangi fu ti kat ndyong ndai. 29Angga'i nai hwak, na hu ɗing ɗamam mii sin mufur, hu shangi myan si kat vaat, mana fo i kwap. 30I ma laksu mwawei, waya moti ti wa mulang ta kwa, na ɗamam mii shak si fur fisha tawe. 31Fit hu fisha si wa mumbit, findel amen ma wa mumbit kwa.

Ɗeng Shang Mweni hu Myani Kwa

32“Ɗeng shang mweni hu myani kwa. Som lu' i DeeƁwe hu Al i DeeƁwe shak si shang myani kwa, a DeeƁwe je shangi. 33Tehun mweret! Tehun ti shingat! Hu shang myan ima ɗamam mii si wa mufur kwa. 34Ma fota maɗufal ima ma wa ɗa'at. Ma wa honti wur ames ta ra i yarai ames shak, u kaarus roha i masi ti andek-andek. Ma wa lak ti maɗing ti kwapi ɓa u ɗingi ndere.

35“Ɓurti andi, tehun ti shingat, ɓurti hu shang myan ima mawuri ma wa muhumkyel kwa. A myan ima korong tutol, ahun a tamwen, ahun a tango, ahun a sai fo' ɗak. 36Kan hum kyel kaciwa' shangi amu, u wisu hun yu ɗarak kwa. 37Aɗeng ima i laksu, i lak ti ɗufal shak, ‘Tehun ti shingat!’ ”

Currently Selected:

Mak 13: AlisIRonNT

Highlight

Copy