Mak 11
11
Yeso Lang ta Yerushalima
1Myan ima ru nggas ti Yerushalima hu Betafaji hu Betani ta ɓwai i nggas ti Anggash i Yitati Mbar, unai Yeso ro apil ta saa ti som koltifai amesi. 2Lakus ni, “Lang hun ta ashwa ani ta wei yuti. Ti mulang ta amu, hu wa wisi si no' al i njaki nin ta, ima wa' ɗeng tuu langi. Hu hwet ya hu yes ti nati. 3Na ɗeng lulu, ‘Ami kin hu masti mai ya?’ Hu nyus, ‘A Deembai ma ɓweti, ma wa muhum ti kyel ndai.’ ”
4Unai si wa, si wis al njakii mano' ta fo i fisel ta fo i wur nin, si hwet ya. 5Unai ɗufal ima si mangra ta kyeli si nyus, “Ami hu masi ya? Ami kin hu hwet ti al njaki ya ya?” 6Si lakus aɗeng ima Yeso lak, unai somi si honus si wis. 7Myan ima si yes ti al njakii ta kyel i Yeso, si wash arom ames ta si njakii hai, ɗak Yeso ɗu ta te amun i hai. 8Unai ɗufal hyang sin wash ti arom ames, shini sin wash ti rai yitat ima si nggyal ta ya, ta fisel. 9Ɗufal ima si ta wei hu i takfai sin taanja, sin nyai,
“Mbaitat i DeeƁwe!”
“Disyo' tasi ima ma yes ti asum i Deembai!”#11:9 Ɗing huni hwak: Nak 118:25; Nak 118:26.
10“Maɗesi u te si kaitat ima ma yes ta kyel i demukan Devid!”
“Mbaitat mbai ta fit!”
11Unai lang ta Yerushalima, wa lang ta Wur i DeeƁwe, ɗing kyel tarara si ɗamam hai shak. Lang ta kyeli wa Betani hu Hure Mulang Apili, ɓurti ango ti mas.
Yeso Sapa Wur i DeeƁwe Ya
12Wasan tamwen si te honti Betani, hwem ti hanus Yeso. 13Ɗing yit ti makambong nin ta maleng, yit ti mwal fwet. Unai hat wa ashang u wisut ti fe. Myan ima ruta, wisut ti ɗama kwa a mwal kyek, ɓurti a myan i makambong kwa. 14Unai lak yiti ni, “Kan ɗeng hum wis ti macwa na kyel amesh kwa.” Som koltifai amesi sin hal ti aɗeng ima ma laki.
15Ti muru ames ta Yerushalima, Yeso lang ta Wur i DeeƁwe, fur ngga som i juwili ta juwiliyai ta kyeli, hatat ti tebur i som i mashen i cef, hu ɗam i mute amun i som juwil ti gurgutaha ya. 16Unai shahus woor ta Wur i DeeƁwe. 17Ɗak kofusti yis nyai, “Si worong nyai,
“ ‘Si wa lai ti wur amen
ii wur i fwal ti DeeƁwe i ɗufal shak,’#11:17 Ɗing huni hwak: Ish 56:7.
hun hu hat ti ii ton i asher.”#11:17 Ɗing huni hwak: Irm 7:11.
18Mbayai i kocokak hu som kofiti si anggut hai, si hal mai, ɗak si fur far ti fisel i for sus ya. Si myanat ti Yeso fo, ɓurti shak ɗufal sima shok na fwai ti kofiti ames.
19Myan ima ango ti mas, Yeso hu som koltifai amesi si lang ya ta wi i mashwai.
Yit ti Makambong Ti Shok
20Si tes wa tamwen, si ɗing yit ti makambongi ti shokut ta sisyari. 21Pita mbe' ɗak lak Yeso ni, “A makofiti, ɗingai! Yit ti makambong tima ha ti'ut ra andi, ti shokut!”
22Yeso matussi ni, “Fahun mulut si DeeƁwe hai. 23I ma laksu mwawei. Maɗufal ma wa lak ti anggash moti nyai, ‘Ɓwish shi ndak ta yiir.’ Na yis ti mulut apil kwa, fa mwawei nyai aɗeng ima laki ma wa mufur, ma wa mas ta ngga' ima laki. 24Ɓurti andi, i ma laksu, shak aɗeng ima hu fwal ta DeeƁwe, fahun mwawei nyai hu mat, ma wa mute ii mamu. 25Myan ima hu te mangra fwal ti DeeƁwe, na hu ti ɗama si ɗeng hai, shuhun yusi ya, ɓa Deemu i kyel ta fit u shuhu mafwashi amu ya.” 26Na hu shu ɗufal mafwashi ames ya kwa, andi Deemukan i kyel ta fit hwak ma wa shwaisu mafwashi amu ya kwa.
Lul ta si Andok i Yeso
27Si hum muru ta Yerushalima, Yeso yis ati ta taya i Wur i DeeƁwe, unai mbayai i kocokak hu som kofiti si anggut hai hu kaya si yes kyel ames. 28Si lul nyai, “A ti nggi andoki hama masti ɗamam mii ya? Awe fa andok i masti mai ya?”
29Unai Yeso nyus, “I wa masu lul andek. Na hu matuni, i wa laksu ti andoki ima kin i masti ɗamam mii. 30Batisma i Jwon yes ii ta fit, ahun ii ta kyel i ɗufal ya? Lak hunati!”
31Unai si ɓeti ɓatasin nyai, “Na ka ni mat, ‘ii ta fit,’ ma wa lul sikan fo, ‘A ɓurti mi hu fa mwawei si yis hai kwa ya?’ 32Na ka ni, ‘Mat ii ta kyel i ɗufal.’ ”#11:32 Mai ma kofi nyai si mbit findeli kwa, ɓurti si shang aɗeng ima si wa laki kwa. Si myanat ti ɗufal fo, ɓurti ɗufal shak si fa mwawei nyai, Jwon a mashit i DeeƁwe i mwawei.
33Unai si matussi si ni, “Ni shangi kwa.”
Yeso nyus, “Andi yin hwak i wa laksu ti kyel ima i mat andok i masti ɗamam mii ta kwa.”
Currently Selected:
Mak 11: AlisIRonNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and © The Nigeria Bible Translation Trust 2018
