Mak 10
10
For ti Kunggo
1Yeso hon kyeli hat wa ta ta' ti Judya ɗak pis ta fit Ɗara i Jodan. Suɓut i ɗufal si hum yes kyel ames, fota ngga' ima mana masi, ɗak kofus ti.
2Farisiyawa shini si yes ɓa si mba hus, si lulus nyai, “Anggut ni a kiga' maɗufal u for mbor asus kunggo ya haa?”
3Matussi ni, “Ami Mosis ni ɓa hu masi ya?”
4Si ni, “Mosis ni a kiga' ɓa maɗufal u worongut kaada i for ti kunggo ya, u wakut i ra.”
5Yeso matussi ni, “A ɓurti njeng na hai amu, Mosis worongu anggut moti. 6Tasi bya', ‘DeeƁwe masus marei hu mumbori.’#10:6 Ɗing huni hwak: Bya 1:27. 7‘A ɓurti andi, maɗufal ma wa honti dees hu nasus, u te andek hu mbor asus, 8andi sin apili si wa mute ii lo' andek.’#10:8 Ɗing huni hwak: Bya 2:24. Si wa muhum mute apil kwa, si wa mute lo' andek.
9“Ɓurti andi, aɗeng ima DeeƁwe no', kan maɗufal hwet ya kwa.”
10Myan ima sin ta wur hwak, som koltifai amesi si lulus mangga' i findel mai. 11Matussi ni, “Na ɗeng for mbor asus kunggo ya ɗak kunggo uɗeng ta, mas arak i zuruk wa kyel mbor asus ti bya' hai. 12Na ayit ti for re amet kunggo ya, ɗak ti kunggo ɗeng, ti mas arak i zuruk.”
Fe Muyayi hu Yeso
13Mwenin ndai, ɗufal sin kolti Yeso fe muyayi ɓa u kinus maɗesi, unai som koltifai amesi sin yus shai. 14Myan ima Yeso ɗing mai, mas futut. Lakus ni, “Hon hun fe muyayi si yes na kyel amen, ka hu shahus kwa, a ɗufal fota fe mii si wa mulang ta kaitat i DeeƁwe. 15I ma laksu mwawei, maɗufal ima mat kaitat i DeeƁwe fota fe muyayi mii kwa, ma wa mulang ta kwa.”
16Unai zan fe muyayi shini ta fajin ames, kinus ra hai yis kinsus maɗesi.
Zalang Masufat
17Yeso hatus wa ndai, maɗufal nin yes kyel ames ti tital, fur si fwaran ames hai nyus, “A makofiti maɗesi, ami te a kpak ɓa i masi i wis mupwet i myan hu myan ya?”
18Yeso matussi ni, “Ami kin ha laiyun ii mamaɗesi ya? A DeeƁwe je a mamaɗesi. 19Ha shang anggut, ‘Ka ha for ɗeng kwa, ka ha mas arak i zuruk kwa, ka ha shir kwa, ka ha lak fyarat si ɗeng hai kwa, ka ha dang ɗeng ha matus ɗama ya kwa, Faha dya hu nasa ngye.’#10:19 Ɗing huni hwak: Mul 20:12; Muh 5:16-20. ” 20Zalangi matussi ni, “A makofiti, ɗamam mii shak, i masan sus yin ɗiri ii wosong.”
21Yeso ɗingus fo, ɓwetus, ɗak nyus, “A ɗama andek kat. Ɓwa ha juwil ɗamam ama ya shak, ha fa som jyel, ɓa ha wis sufat ma hyangi ta fit. Takfai ti mai, ɗak ha yes ha kolfai asuni.”
22Myan ima zalangi hal findel mai, lo' ames wis ya, lang ya ta kyeli ti rafat i mulut, ɓurti mati sufat fwet.
23Yeso ɗing kyel tarara, unai lak som koltifai amesi ni, “Mati shum fwet ɓa masufat u lang ta kaitat i DeeƁwe!” 24Som koltifai amesi si shok na fwai si hai findel ima lak mai. Unai Yeso hum laksus nyai, “A fe, mati shum fwet ɓa si lang ta kaitat i DeeƁwe! 25Ɓin mbwesh ɓa rukumi u lang ta swai i twen, hu ima masufat u lang ta kaitat i DeeƁwe.”
26Findeli hum kinti som koltifai amesi si hum shok na fwai fwet, sin lak ti ɗiyai ames nyai, “Awe ma wa mupwet ndai ya?”
27Yeso ɗingus fo ɗak ni, “Ta kyel i maɗufal ma wa mas kwa, ma wa mas ta kyel i DeeƁwe. Shak ɗamam a ma mas ta kyel i DeeƁwe.”
28Pita nyus, “Ni hon ɗamam shak ɓa ni kolfai asai!”
29Yeso matussi ni, “I ma laksu mwawei, shak maɗufal ima ma wa honti wur ames, hu shunus muryai ta murwafi, hu nasus, hu dees, hu fe, hu yangang ɓur sun, hu muro maɗesi amen, 30aɗeng ima ma wa wisi nasi myan mai, ɓin sa ndik andek, hu wurai, hu shunus muryai hu murwafi, hu nasus, hu fe, hu yangang, hu shum hwak. Ta dala, si wa wis ti mupwet i myan hu myan ta naya tima ti yes. 31Hyang ima si mii bya' si wa mute i dala, i dala si wa mute i bya'.”
Yeso Hum Findel si Mangga' i Mot ames
32Sin hat muɗuya wa Yerushalima, Yeso yis ta wei ames, som koltifai amesi si shok na fwai, som ima si tifai si mwen. Unai hum ha' ti mulang apili ɓwai andek, ɗak lakus aɗeng ima ma wa wis sus. 33Ni, “Ka ma muɗuya wa Yerushalima, si wa cwai ti han i yin, Al i Maɗufal, ta ra i mbayai i kocokak hu som kofiti si anggut hai. Si wa lef sun ɓur i mot, si faiya ta ra i som ima a Ju kwa. 34Si musas sun si tufus lyau hai, si ndashun si forun. Takfai i mukon ataat i wa muhumkyel ti mupwet.”
Fwal i Yakubu hu Jwon
35Unai Jemis hu Jwon, fe i Zebedi si yes kyel ames si nyus, “A makofiti, ni ɓweti ha mas nin shak aɗeng ima ni lul.”
36Unai lulus ni, “Ami hu ɓweti ɓa i masui ya?”
37Si matussi si ni, “Mwen ti kaitat ama, hona ni wis ngye i mute ta kyel ama, andek ta ra i ucwa, andek ta ra i ukutyal ama.”
38Yeso ni, “Hu shang aɗeng ima hu luli kwa. Hu wa woti cunjo ti shum tima i wa woi ahun si masu batisma ti batisma ima si wa masun batisma ti haa?”
39Si matussi si ni, “Hei, ni wa masi.” Unai Yeso nyus, “Hu wa woi ta cunjo ti shum si masu batisma ti musut i batisma ima si masuni ti haa? 40Shak ta andi, yin i ndok i fu kyel mute amun ta ra i ucwa hu ra i ukutyal kwa. DeeƁwe tuu ɗak ti kyel ta ɓurti sin ima ben.”
41Myan ima som koltifai amesi si hal findel mai, si mas futut ti Jemis hu Jwon. 42Yeso laiyus shak ta kyel andek lakus ni, “Hu shangi nyai som ima ka ɗingsus fota a kaya i ramam Deembai ɓinus. Si ɓyat ɓa si kof haisus a som i mbaitat tasi ɗufal hai. 43Hun hu wa mute andi kwa. Maɗufal ima ma ɓweti mute i mbai na saa asu u te i ma wa muro amu. 44Maɗufal ima ma ɓweti mute i bya', a kpak u te i yere i shak. 45Ɓurti Al i Maɗufal yes na naya ɓa si wis a mbaitat kwa, ɓa u te ii yere, u fa mupwet ames, ɓa u dum ɗufal hyang.”
Manzyau wis Ɗing ti Kyel
46Yeso hu som koltifai amesi si yes Yeriko. Myan ima sin honti ashwai, male' i ɗufal sin tifai. Unai manzyau nin ma asum Batimayus (al i Timayus ndai), yis mute ta fo i fisel yis fwal. 47Myan ima hali a Yeso i Nazaret yis musa ta, unai cu i fo, “Yeso, Al i Devid ɗinga shum asuni!”
48Ɗufal hyang si lakus ɓin, ɓa u te mbaa, hum cwai i fo ti ambas nyai, “A Al i Devid, ɗinga shum asun ni!”
49Yeso kat mangra ɗak ni, “Lai hun yus,” Unai si lai manzyauwi, “Jakaka! Luka fit, malai sa.” 50Unai hwiti mogo ames ya ta ɓwai, ni jaɓwak pis ta fit ɗak wa kyel i Yeso.
51Yeso lulus ni, “Ami ha ɓweti i masai ya?” Manzyauwi nyus, “A makofiti, i ɓweti ɗing ti kyel.”
52Unai Yeso nyus, “Ha ya wa, fati mulut asa ti fa cala.” Fo abet ɗing kyel, kolfai ti Yeso ta fisel.
Currently Selected:
Mak 10: AlisIRonNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and © The Nigeria Bible Translation Trust 2018
