Matyu 18

Mambai ta Kaitat i Kyel Fit

1Tasi myan mii, fe i ro i Yeso si yes kyel ames, si lulus si ni, “Awe mii mambai ta kaitat i kyel fit ya?”

2Unai lai al al nin kinus te mangra ta saa yusti. 3Nyus, “I laksu mwawei, na hu shen, hu te fota fe muyayi kwa, hu wa mulang ta kaitat i kyel fit kwa. 4Shak maɗufal ima zan haisus a ɗama kwa, fota al al mai, a yis mii mambai ta kaitat i kyel fit.

5“Shak maɗufal ima mat al al fota mai ɓursun, matun ayin. 6Na ɗeng kin andek na saa ti fe muyayi mii, ima si fa mwawei si yin hai, u mas mafwashi, mati mbwesh, si no'us afung i nuk ta la, si hwitus ya ta yiir wi.

7“Mwe ti naya ɓurti ɗamam i kinti ɗufal bukat! Musut i ɗamam mii, a kpang si yes. Shak ta andi, mwe tasi maɗufal ima yestus! 8Na ra ama ahun asai ama ma kinsa masti mafwashi, lefa ya ha hwiti ya. Ma ya wa mute hai ti mbwesh, ha lang ta mupwet ti ra andek, ahun a gundung, hu ima ɓa ha lang ti ra apil ta sisai apilali, ta wur i man i myan hu myan. 9Na shit asa ti kinsa masti mafwashi, re'a ya ha hwiti ya. Ma ya wa mute hai ti mbwesh ha lang ta mupwet ti shit andek, hu ima ha lang ti shishat apil ta wur i man.

Kaani Si Tutwi tima Ti Fot

10“Kol huni loo, ka hu ndok hu kom andek ya na saa ti muyayi mii kwa. Ɓurti andi i ma laksu, som lu' ima si ɗingsus ngang si ta wei i Deen ima mata fit.#18:10 Shini kaadahai si ti 11 Al i maɗufal yes ɓa u bum ɗufal ima si fot.

12“Hu ɗingi atini ya? Na maɗufal yis ti tutwai ames ndik andek, ɗak andek ti fotut. Ma wa honti hure karfu' tau karfu'i ta ajin i manggash, u wa u far andek tima ti fotuti kwa haa? 13Na wisut, i laksu mwawei, ma wa pipelat na mulut ti tutwi andek tima ti fotut andi, u ɓin hure karfu' tau karfu'i ima wa' si fot ani. 14A andi hwak, Deemu i kyel fit ɓwet ɓa andek na saa ti muyayi mii u fot kwa.

Nusa ima Masa Mafwashi

15“Na nusa masa mafwashi, ɓwa ha wisus ha lakus mafwashi ames ya, ha hu yis hun apil. Na hala, ha humtus kyel ndai. 16Na nggwes i hali, zana ɗeng andek, ahun ɗufal apil hu wa tikul, ɓa ‘si ɗak ti findel ima si hali, ta fo i ɗufal apil ahun a ataat, ima si ɗingi.’#18:16 Ɗing huni hwak: Muh 19:15. 17Na nggwes i halsu, hu lak suɓut i som koltifai, na nggwes i halsus hwak, zan hu yus fota maɗufal ima shang DeeƁwe kwa, ahun a ma mati cef i wufen.

18“I ma laksu mwawei, shak aɗeng ima ha no' na naya si wa no'i ta fit, aɗeng ima ha hwet ya na naya, si wa hweti ya ta fit.

19“I ma muhum laksu i hai nyai, na ɗufal apil na naya si ɓwet si ɗama andek hai ima si fwal, Deen i kyel ta fit ma wa masusi. 20Ɓurti andi, shak kyel ima ɗufal apil ahun a ataat si shwai ta ti asum amen, i mata saa yusti.”

Kaani Si Maro Mawa' Gu'ti Ashur

21Unai Pita yes kyel Yeso lulus ni, “A Deembai, a sa awen nusun ma wa masun mafwashi i shusiya ya? A sa pyoron haa?”

22Yeso matussi ni, “I ma laksa, a sa pyoron kwa, a hure pyoron sa pyoron.

23“Ɓurti andi, kaitat i kyel fit ma fota makai ima ma ɓweti mbe' ti sufat ames, ima mata ra i som i ro ames. 24Myan ima lang ambe'i, unai si kolus maɗufal nin ima mat wufer i cef mahyangi, ima ma wa mot kaciwa' tal. 25Ngga' ima ma wa ndok ti tali kwa, mawur ames ni ɓa si zan maɗufali ta mbor asussi ta fei, shak ta aɗeng ima mii amesi, si juwil ya si talus wufer ames.

26“Maroi fur ta mabel yusti fwal ni, ‘Ka'a mulut ti yin, i wa talsa shak aɗeng ima mii ama.’ 27Mawur ames ɗing shum asussi, honus wuferi, nyus ɓa u wis.

28“Shak ta andi, myan ima maroi lang ya, wa wis mwes i ro ima matus al wufer i dinari. Wa ka'us ta la jwet nyus, ‘Talana wufer amen ima mata kyel yati mwashi, ima ɓweti!’

29“Mwes i roi fur ta mabel yusti fwalus ni, ‘Ka'a mulut ti yin, i wa talsa shak aɗeng ima mii ama.’

30“Shak ta andi nggwes, zanus hwiti ta wur i shitam, yes myan ima ma wa tal ti wuferi. 31Myan ima myayus i ro si ɗing aɗeng ima ma wa, aɗengi rafatus mulut ya, si wa si lak mawur ames shak aɗeng ima ma wa.

32“Unai mawuri lai maroi ta wi nyus, ‘Ha a masukwa! Yin i hona shak wufer amen, ɓurti ha fwalun. 33Ɗat ha hwak ha ɗing shum i mya i ro, fota ngga' ima i ɗing shum ama ta kwa haa?’ 34Aɗengi cu mawur amesi ta mulut fwet, kin ɓa si fas shum ndere yes myan ima ma wa tal ti wuferi.

35“Angga' ima Deen i kyel fit ma wa masi ti hun ta mai ti andek-andek, na hu shu shunu mafwashani ames ya ta mulut kwa.”

Currently Selected:

Matyu 18: AlisIRonNT

Highlight

Copy