Matyu 17

Mushen i Yeso

1Takfai ti mukonan taan, Yeso ha' Pita, hu Jemis, hu Jwon ima a nusus i Jemis, si ɗu ta hai anggash masyai nin tikul. 2Ta kyeli, mute ti Yeso ti shenut ta wei yusti. Shishat ames si cinjang fota muka' i ɓwe, arom ames si pipel syak fota kweneng. 3Sin ta ndai, fo abet Mosis hu Iliya si pwak ya ta wei yusti, sin findel hu Yeso.

4Unai Pita lak Yeso ni, “A Deembai, mute amukan nati ɗat. Na ha ɓwet, i wa mas sikan manjiling ataat, andek ɓursa, andek ɓurti Mosis, andek ɓurti Iliya.”

5Myan ima Pita yis ɗiri findel, unai ɓwar yes vos ya shak asussi, ɗak la nin ta ɓwari tini, “Mai a Al amen ima i ɓwetus, ima jakak ti yis fwet. Hal hun yus.”

6Myan ima fe i ro ames si hal mai, myanat ka'us si fwar ta fisha. 7Unai Yeso yes ngge'us nyus, “Luk hun fit, ka hu mwen kwa.” 8Myan ima si zan hai fit, si ɗing ɗeng kwa, a Yeso je si ɗingus.

9Si te muɗorkyel tasi anggashi, Yeso dulus mwal ni, “Ka hu lak ɗeng, aɗeng ima hu ɗingi kwa, na Al i Maɗufal luk fit ta fiyai tawe.” 10Fe i ro ames si lulus, “Ami kin som kofiti si anggut hai si ni a kanggang Iliya u tong yes tawe ya?”

11Yeso matussi ni, “A awei, Iliya ma wa yes ɓa u tas ɗamam ta shak si wa ndyas. 12Yin ima laksu Iliya tuu yes, a sin kyek si shangus kwa. Shak ta andi, si masti shak aɗeng ima si ɗingi ɗatus. Ta fisel mwandeki Al i Maɗufal ma wa woti shum ta ra ames.” 13Unai fe i ro ames si shangi nyai ma findel tasi hai Jwon Mabatisma.

Al ma Rin Mafwashi Wis Cala

14Myan ima si ru ta kyel i suɓut i ɗufal, maɗufal nin yes shu i mafwaran ta wei yusti. 15Ni, “A Deembai, gu'a al amen ashur, mati mwatan i maɓyar mati woti shum fwet. Tyai u fur ta man wi hu ham hwak. 16I kolus ta kyel i fe i ro ama, si mbai wet.”

17Yeso matussi ni, “Hun waya mii, ima hu fa mwawei kwa, som i masti mafwashi! I wa mute akul hu hun wa nggi myani ya? I wa ka'ti mulut ti hun wa nggi myani ya? Yehun ti ali nati.” 18Yeso lak rin mafwashii ɓin, lang ya ta lo' i ali, ali wis cala tasi myan ani.

19Unai fe i roi si yes kyel i Yeso myan ima ɗufal ti si wis, si nyus, “Ami kin ni shang re'i ya kwa ya?” 20Yeso matussi ni, “Ɓurti hu mati fati mulut amu mayus ndyong. I ma laksu mwawei, na hun ti fati mulut foyi fota ma'al i gadina, hu wa lak ti anggash mai, hu ni, ‘Hera ya nati, ha wa ta te'i’ ma wa muher ya. Ɗama ma wa pwansu kwa. 21Musuti mai laang ya kaciwa' fwal hu ka'ti fo ya tasi cwa kwa.”

22Sin ɗiri ta Galili, Yeso lakus ni, “Si wa fati Al i Maɗufal ta ra i ɗufal, 23si wa forsus. Takfai ti mukon ataat, ma wa muluk fit ta fiyai mushet.” Fe i ro ames si tirim fwet.

Cef i Wufen i Wur i DeeƁwe

24Myan ima Yeso hu fe i ro ames si ru ta Kapanahum, som i mat ti drakma apil cef i wufen i Wur i DeeƁwe si yes kyel i Pita si lulus, si ni, “Makofiti amu mai, tal cef ima a kpang si fa ta Wur i DeeƁwe kwani?”

25Pita matussi ni, “Ma talani.”

Myan ima Pita lang ta wur, Yeso tong findel ni, “A Siman, ha ɗing ami nasi findel mai ya? Kaya i naya si matan ti cef i wufen ii ta kyel i fe ames, ahun ii ta kyel i mwalmwat ya?”

26Pita matussi ni, “Ii ta kyel i mwalmwat.”

Yeso lakus ni, “Kof ndai fe ames si tal kwa ndai. 27Shak ta andi, ka si mas futut ti kan, ɓwa ha hwiti shekek ta yiir wi ha ka' gushe. Shak tima ha tong ka'i, myan ima ha ɓu fo i gushei ya, ha wa wis ti cef ta fo amet. Ha zan ha wa ha talus, ama ta ameni.”

Currently Selected:

Matyu 17: AlisIRonNT

Highlight

Copy