Marcos 4
4
Diidza run lsaki'i kie' bënni raaze
(Mt 13:1-9; Lc 8:4-8)
1Yubl ka Jesús gzulau'e rseed'de ra nis ki Galilea. Guladuub'tzka bunach lena'a Jesús greene lu barku le yu'u lu nis'a len grë'e, tzal'za bunach'a gulaga'an ra nis'a. 2Len diidza run lsaki'i gzulau'e rseed'de leke.
Ki gne': 3«Guluzenaag le ni: Tue' bënni brooje guuz. 4Len tzal raaze, lati xhsei ni glëxhj la nëëz ati guladxima bua' tazuuba len glaag'ba ley. 5Lati glëxhj ladj giaj ga ti rë' zxhëni yu; xhsei ni bë'u'te koma yu ni ti nak yu ga're'; 6san kati broj gbiidz bzeegi ley ati gbiidx koma ti rë' lui. 7Ye lati xhsei ni glëxhj ladj yëtzi len kati yëtzi ni gxhën blu'li'i ley ati tir gxhën len ti gbia. 8Ati ye lati glëxhj lu yu dxia'a len gulaxhën, len nane'i gbia, la' gbia chi'urua' xhsei tu dxigu, ye la' gbia tson'lalj tu dxigu, len ye la' gbia tu'gayua' xhsei tu dxigu.»
9Chi nak ka' Jesús gne': «Tzka'li zua naag'li guluzenaag»
Bixhkia' ruune lsaki'i diidza
(Mt 13:10-17; Lc 8:9-10)
10Gdëëd le ni, kati Jesús bga'ane tuuze, bënni nakua'ke ga'la ga zue' len chin'nu'ke bënni useed kie' gulunaab'de le' bixh re'e'ni gna' diidza run lsaki'i ni. 11Bubi'e kieke diidza: «Dios rlui'de lbi'ili le naga'chi' ki yëla rnabe' kie'; san bënni nakua'ke rayu'ul rui'leen'ka'ne diidza len diidza run lsaki'i, 12naar gakati luyue' ti lale'i'de, len gakati layëën'de ti layajni'i'de, naar ti lubi'i'laadxi'ke len Dios ati Le' ti si'xhëëne leke.»
Jesús ruseedx'la'a'ne diidza run lsaki'i kie' bënni raaze
(Mt 13:18-23; Lc 8:11-15)
13Gudxe leke: «Xhki ti rajni'i'li lbi'ili diidza run lsaki'i ni ¿Nakxh gun tzajni'i'li ye la' diidza run lsaki'i? 14Bënni raaze nake ka bënni rgixhjë'e xhtiidze'e Dios. 15Nakua'ke bënni nak'ke ka xhsei le bëxhj la nëëz: tayëën'de xhtiidze'e Dios san ru'uudx tayëën'de xhtiidze'e Dios, riide bënni xëwi len rgue' diidza'a naduuz lu laadxi'dau'ke. 16Ye lake nak'ke ka xhsei le naduuz ladj giaj, tayëën'de xhtiidze'e Dios len tazi'e gdu laadxi'ke, 17ati rak kieke ka rak ki xhsei lea ti nun zi' lui, ti takua'ke tzutzu; lena'a, kati tutzaage bagi'i u tulaag'ke leke nia'a ki xhtiidze'e Dios, tanitie' yëla rajle' kieke. 18Ye lake nak'ke ka xhsei le rduuz ladj yëtzi; tayëën'de xhtiidze'e Dios, 19san rzua'tzka leke bagi'i nakxh luune dumi lu yëla naban zuaaru na'a, ati yëla nadxi'i kieke dumi rzi'ye'i leke len te'en'de yugute' ga'ta'tzka kieke. Yugute' le ni ryaaz leke len rlu'li'i xhtiidze'e Dios ati ti rlui' lau'i le tayajle'ke. 20Ati ye lake tayëën'de xhtiidze'e Dios len tazi'e ley ati tului'ke le tayajle'ke ka tu xhsei le naduuz lu yu dxia'a. Bënni ni rak kieke ka xhsei le gbia chi'urua' xhsei, ye la' tson'lalj yu chi xhsei len ye la' gbia tu'gayua' xhsei tu dxigu.»
Diidza run lsaki'i ki gi'
(Lc 8:16-18)
21Lekz'ka' gudxe leke: «¿Naru rkie'la'ru tu gi' len rgu'u'ru xhani gi'in u xhani ga ras'ru? Ti nak ka, tu gi' rzuaaru ley ga nak xhtza' naar gunn yeni. 22Lekz'ka', gat'ga de le rak baga'chi'z ku gnëëz, len gat'ga de le naga'chi' ku gdxin glui' lau'i. 23Tzka'li zua naag'li guluzenaag.»
24Lekz'ka' gudxe leke: «Dxia'a guluzenaag. Xhguunz lea gri'xhi'li len guik'li'ne bënni yubl xhguunz'a gri'xhi'de Dios unne kieeli; len uxën're tzka gunne kieeli. 25Bënni'a de kie', uzi're zxhëni; len bënni'a ti de kie', zala lati'du'z le de kie' ulaguáke.»
Diidza run lsaki'i ka rxhën xhsei le raaz'ru
26Jesús lekz'ka' gne': «Yëla rnabe' kie' Dios rak ki ka rak kie' tue' bënni raaze xhsei lu yu: 27lagadeez kie' xhki rasie' u rna'ze, xhki nak te'dza u nak chi'dzë'ël, xhsei'a rë'u'kz len rxhën zala le' ti rak'be'i'de nakxh rak le ni. 28Koma kuin'zi rxhën le rduuz lu yu: zia'a xhyaazi rlen chi nak ka deu ki ati chi nak'r ka' rbia xhsei. 29Len kati xhsei'a chi naal, ruzi'e ley, koma chi nak bach lape.»
Diidza run lsaki'i ki xhsei mostaza
(Mt 13:31-32; Lc 13:18-19)
30Lekz'ka' gne' Jesús: «¿Bixh run lsaki'i yëla rnabe' kie' Dios, len bixh gunn guuna ley lsaki'i? 31Nak ka tu xhsei mostaza le rduuz lu yu. Xhsei ni nak'r le we'en'du'tit ka yugute' xhsei le dzë'ë yëdz'lyu, 32san kati chi naduuz, rxhën'r ka ye la' gixi le naduuz'k lu li'aj, len xhuuza'ne'i taxhën'tzka ati runn tuma na' liidx'kba bginn.»
Ka bguune dxin Jesús diidza run lsaki'i
(Mt 13:34-35)
33Jesús rseed'de leke xhtiidze'e Dios len diidza run lsaki'i, ka leke gunn tzajni'i'kde. 34San tibi rgixhjë'e xhki ti nak len diidza run lsaki'i, ati bënni useed kie' ga yubl ruseedx'la'a'ne kieke diidza'a.
Jesús rbeki'dxie' bë' bduunu
(Mt 8:23-27; Lc 8:22-25)
35Larakz dza'a kati chi za' ral, Jesús gudxe bënni useed kie':
—Tziaj'ru tzala'a nis.
36Na' guluka'ane bunach'a len guluche'e Jesús lu barku ga chik'z yu'e, lekz'ka' zjak'leen Le' ye la' barku. 37Tzal'za gyas tu bë' bduunu xhën ati nis'a rbixh'rtul rajdin lu barku len run ga rdza' nis le'i. 38Jesús de' rasie' xhbëëdxi'i barku len nukuuge tu laari. Guluspaane le' len gle'ke le':
—¡Bënni useed! ¿Naru tibi ruuni Li' re'e'ni gat'ru?
39Jesús gyase len gnabe'i'de bë' ati gudxe nis xhën:
—¡Gzua'dxi! ¡bubë'dxi!
Ati bë'a psan len grë'dxiida. 40Gdëëd ni Jesús gudxe bënni useed kie':
—¿Bixhkia' raadxi'li? ¿Naru ti rajle'i'li?
41Ati leke glaadxi'tzki'de len tunaabi lza'a'ke:
—¿Nuxhkz nake bënni ni, rnabe'i'de bë' len nis xhën ati tuzenaagi le'?
Currently Selected:
Marcos 4: PZD
Highlight
Share
Copy
Want to have your highlights saved across all your devices? Sign up or sign in
© Sociedad Biblica de México AC
