Marcos 3
3
Jesús ru'uune tue' bënni re'i'de dza tu'ueak'laadxi'ke bënni Judea
(Mt 12:9-14; Lc 6:6-11)
1Jesús gyaazie le yubl lu yu'u useed; ati ni' zue' tue' bënni nat'zi tu ne'e. 2Len tauyuudxe Jesús naar lale'i'de xhki uune le' dza tu'ueak'laadxi'ke bënni Judea, naar gunn ludxia'ke le' xhgia'. 3Na' Jesús gudxe bënni'a nat'zi ne'e:
—Gzui len gze' gatzj'lau'i ni.
4Chi nak ka bnaab'de bënni'a ye la'ke'a:
—¿Bixh de lsenz gun'ru dza ru'ueak'laadxi'ru: le nak dxia'a u le ku nak? ¿Usláaru tu yëla naban u gnit'lau'ru ley?
San leke ti gulane'. 5Jesús rdza'a'tzka ikje byue' bënni'a nakua'ke'a, ati ben'yechi le' tzka nak tzutzu laadxi'dau'ke, len gudxe bënni'a nat'zi ne'e:
—Bli no'u.
Bënni'a blie' ley, len bueak'te ne'a. 6Guluroj'ze na' bënni fariseo gulazulau'ke tun'ke diidza len bënni da'ke Herodes nakxh luune ludëëd'de Jesús.
Zian bunach nakua'k ra nis xhën
7Jesús ziije len bënni useed kie' ra nis xhën len zian bunach ki yëdz Galilea zjake kuudze'e. 8Bënni zian ki yu Judea, ki Jerusalén, ki Idumea, len ki tzala'a yeego Jordán len ki yu Tiro len Sidón, dujyu'ke le' kati gulanëëz'de yëla wak xhën le ruune. 9Lena'a Jesús bzue' lu naa'ke bënni useed kie' lukëëze kie' tu barku, naar bunach ti lu'ki lutzutzje Le'. 10Koma bënni zian chi buune ati yugute'ke bënni we'a tabia'niidi'de Le' naar lagaane Le'.
11Len kati bë' xëwi tale'i le' tuzechu'xhiibi lau'e len tuskua':
—¡Li' naku Le' Xi'ine Dios!
12Ati Jesús gdil'leene ley ki ti lui' diidza kie' ga rë' bunach.
Jesús rbëe' chin'nu'ke bënni lak'ke gbaaz kie'
(Mt 10:1-4; Lc 6:12-16)
13Gdëëd'a Jesús greene tu gia'a len bliidze bënni'a gyaazlaadxe'e, kati chi guludzaage, 14grëe' ladj'ke'a chin'nu'ke naar tzjak'leene le' len naar ksë'le'e leke lagixhjë'ke diidza ni. Bënni ni be'e lake bënni gbaaz kie', 15len bnëëdzje kieke yëla rnabe' naar lubiije bë' xëwi. 16Bënni ni nak'ke bënni chin'nu'ke grëe': Simón bënni'a bzue' le' Pedro; 17Santiago len Juan bënni xi'ine Zebedeo, bënni bzue' kieke Boanerges (le re'e'ni gna, «Xi'in Gziu'»); 18Andrés, Felipe, Bartolomé, Mateo, Tomás, Santiago bënni xi'ine Alfeo; Tadeo, Simón bënni'a nadxi'i'de yëdz kie', 19len Judas Iscariote, bënni ni bdëëde Jesús lu naa'ke bunach.
Tuspaage'e xhgia' Jesús
(Mt 12:22-32; Lc 11:14-23; 12:10)
20Gdëëd le ni Jesús gyaazie tu yu'u len ti benn'kz bi ga'we len bënni useed kie', koma yubl guludzaag'tzka bunach zian. 21Kati bënni dia'dza kie' Jesús gulanëëz'de, yajxi'ke le' koma tanáke ki tir zua dxia'a kie'.
22Lekz'ka' la'ke bënni useed xhba kie' Dios bënni guludxiine yajake Jerusalén tanáke: «Beelzebú, bënni xaani bë' xëwi nake bënni rnëëdzje kie' bënni ni yëla wak ki ubiije bë' xëwi'a.»
23Jesús bliidze len gudxe leke diidza le run lsaki'i: «¿Nakxh guune Bënni Xëwi ubiije larakz Bënni Xëwi? 24Tu yëdz xhën le naroj chop'l len tadil ti runn sua tzutzu; 25len nu'ti'teez bënni dzë'ë'ke tuuz yu'u len tadil'e ti runn lakua'ke tzutzu. 26Lekz'ka' xhki Bënni Xëwi grooje chop'l len til'e len larakz leeze, ti gun sue' tzutzu; ni buudx kie'.
27»Nutunu gunn tzaaz liidxe bënni naal len kuan le de kie', de ki guuge'e le' zia'a naar gunn kuaane le de kie'.
28»Le nak'te rea' lbi'ili ki Dios uzi'xhëëne bunach ki yugute' xhtu'la'ke, len diidza ku nak le lui'ke: 29san bënni bi gne' kie' Bë' La'ay kie' Dios ti si'kze yëla rzi'xhën len tzalzu gbaage'e xhgia'.»
30Le ni gne' Jesús koma leke gulakuaara'ke tanáke ki Le' yu'e bë' xëwi.
Xhne'e len bënni bë'che'e Jesús
(Mt 12:46-50; Lc 8:19-21)
31Tzal'za bdxin'nu xhne'e len bënni bë'che'e Jesús san rayu'uz gulaga'ane, len gluune ga gululiidze Jesús. 32Bunach nakua'k kuiti le'e Jesús gle'ke Le':
—Xhno'u len bënni bë'chu'u nakua'ke rayu'u, len te'en'de lale'i'de li'.
33Le bubi'e kieke diidza:
—¿Nuxh rak xhna'a len bënni bë'cha'a?
34Chi nak ka byue' bunach nakua'k kuiti le'e, len gne':
—Bënni ni nak'ke xhna'a len bënni bë'cha'a. 35Koma nu'ti'teez nu run le ryaazlaadxe'e Dios, rak bënni bë'cha'a, nguul zaana len xhna'a.
Currently Selected:
Marcos 3: PZD
Highlight
Share
Copy
Want to have your highlights saved across all your devices? Sign up or sign in
© Sociedad Biblica de México AC
