Marcos 2

Jesús rzi'xhëëne len ru'uune tue' bënni nat'zie'

(Mt 9:1-8; Lc 5:17-26)

1Guladëëd la' dza, Jesús buaazie Cafarnaúm. Len kati gnëëz ki le' nadxiine yu'a, 2tzka'ti'ga bunach zian guladzaag tir glaki'de ra puert'a; ati le' rgixhji'de leke xhtiidze'e Dios. 3Na' tap'ke bënni guluche'ke lau'e tue' bënni nat'zie'. 4San rë'tzka bunach zian len ti benn ladxin'leene le' ga ze' Jesús, gulaguáke lati xhei yu'a ga zue' Jesús len zga na'l guluzëtje da'a ga xhua bënni'a nat'zie'. 5Kati Jesús ble'i'de yëla rajle' kieke, gudxe bënni we' ni:

—Xi'ina, chi gxhi'xhëëna xhtu'lu'u.

6La'ke bënni useed xhba kie' Dios rë'ke na', gle'ke ikj'laadxi'dau'ke: 7«¿Nakxh ruune ruwaaxhj'de rne' ki? Diidza ku nak rui'e lau'e Dios. Tuuze Dios rzi'xhëëne dula.» 8Ati Jesús guk'be'i'ti'de le rza' ikj'laadxi'dau'ke, len bnaab'de leke:

—¿Bixhkia' rza' ki ikj'laadxi'dau'li? 9¿Bixh'l diidza nak'r weez gie'ru'ne bënni'a nat'zie': “Chi gxhi'xhëëna xhtu'lu'u”, u gie'ru'ne: “Gyas, gde'la' xhto'u len gze'i”? 10San glui'da lbi'ili ki Xi'ine Bënni nape yëla rnabe' yëdz'lyu ni si'xhëëne dula.

Na' re' bënni'a nat'zie':

11—Li' rea', gyas, butuub xhto'u len buaj liidxu.

12Na'teez bënni we' ni gyase len lau'ke yugute' bunach butuube xhte'e ati burooje na'. Nia'a ki le ni, yugute'ke gulubaan'de len glui'ke ba Dios, tanáke:

—Gat'ga rle'i'kz'tu le guk na'dza.

Jesús bliidze Leví

(Mt 9:9-13; Lc 5:27-32)

13Gdëëd'a Jesús gyiije yubl ra nis xhën; bunach tabiiga'ke ga ze', len Le' rseed'de leke. 14Kati gdëëde'a ble'i'de Leví bënni xi'ine Alfeo rë'e latj ga tukiixhje laaz'sua'ke ki Roma. Jesús gudxe le':

—Dia'leen neda.

Leví gyase, len ziaj'leene Jesús.

15Kati Jesús rë'e liidxe Leví ra'we len zian'ke bënni tukiixhje laaz'sua'ke ki Roma ati ye la'ke bunach ze xhtiidza'ke tuune le ku nak rë'leen'ke Jesús len bënni useed kie', koma zian'ke bënni rajak'leene Jesús. 16La'ke bënni useed xhba kie' Dios, len nak'ke bënni fariseo, kati gulale'i'de ki Jesús ra'we len yugute'ke bënni'a, gulunaab'de bënni useed kie':

—¿Bixhkia' bënni'a rseed'de lbi'ili ra'we len bënni tukiixhje laaz'sua'ke ki Roma len lekz'ka' len bënni dula?

17Jesús byëën'de leke len gudxe leke:

—Bënni nakua'ke dxia'a tibi nayaadzji'kde, bënni'a te'i'de nayaadzji'kde nu un le'ke. Neda ti za'a zduliidz'ka'ne bënni tuune le dxia'a, za'a zduliidz'ka'ne bënni dula.

Tunaab'de Jesús ki gbas

(Mt 9:14-17; Lc 5:33-39)

18Tu lzu bënni useed kie' Juan bënni pkiile nis bunach tuune gbas len bënni fariseo len ye la'ke bunach yajake ga ze' Jesús len gulunaab'de le':

—Bënni useed kie' Juan len lekz'ka' bënni useed kieke fariseo tuune gbas: ¿Bixhkia' bënni useed kiu' li' ti tuune gbas?

19Jesús bubi'e kieke diidza:

—¿Naru gunn luune gbas bënni nakua'ke lni ki utzag'na', tzal bënni'a rtzag'ne'e zue' len le'ke? Ti gunn luune gbas tzal bënni'a rtzag'ne'e zue' len leke. 20San udxin dza kati'a bënni rtzag'ne'e tir sue' len le'ke; kati gdxin dza'a ulun'ke gbas.

21»Nutunu bënni ru'uune tu laari teeb len tu laari kub koma laari kub'a ru'bë' len rchëëza laari teeb'a, ati laari'a rudu'kz r'rëëza. 22Lekz'ka' ti taga'a'ke nup uva kub lu bëëga gid teeb, koma nup uva kub'a gunn ga larëëza bëëga gid teeb'a, len grop'te lak'ditji, Lena'a rala ka'aru nup uva kub lu bëëga gid kub.

Bënni useed kie' Jesús talje deu dza tu'ueak'laadxi'ke bënni Judea

(Mt 12:1-8; Lc 6:1-5)

23Dza tu'ueak'laadxi'ke bënni Judea, Jesús rde' ladj layeel ga naduuz, ka guladëëd'ze na' bënni useed kie' gulazulau'e talje deu ki xhua'xhtiil. 24Bënni fariseo gulunaab'de le':

—¿Bixhkia' bënni useed kiu' tuune le ti de lsenz gak dza tu'ueak'laadxi'ke bënni Judea?

25San le' gudxe leke:

—¿Naru gat'ga rul'i'li le beene tu lyas David len bënni lze'e kati guladëëde bagi'i len guladuune? 26Kati Abiatar nake pxuuz blou, David gyaazie liidxe Dios len gda'we yët'xhtiil le chi nak La'ay lau'e Dios, yët'xhtiil'a le deez lsenz la'we pxuuz ati lekz'ka' bnëëdzje kieke bënni zjak'leene le'.

27Jesús lekz'ka' re' leke:

Dios beene dza tu'ueak'laadxi'ke bënni Judea nia'a kie' bunach, keg bënni gyu'e nia'a ki dza tu'ueak'laadxi'ke bënni Judea 28Lena'a Xi'ine Bënni nape yëla rnabe' lekz'ka' ki dza tu'ueak'laadxi'ke bënni Judea.

Currently Selected:

Marcos 2: PZD

Highlight

Copy