Marcos 13
13
Jesús rgixhjë'e ki ulukin'je gdou'
(Mt 24:1-2; Lc 21:5-6)
1Kati Jesús burooje gdou'a, tue' bënni useed kie' gudxe Le':
—¡Bënni useed byu'tzka giaj'a len yu'u sib ni!
2Jesús bubi'e diidza:
—¿Ba rle'i'du yu'u sib ni? San ti jga'an tu giaj lau'i ye tu giaj. Gdu ka nak jgin'j.
Le lunn'be' ki chi za' ga'la dza tzu'u lu'uudx ki yëdz'lyu
(Mt 24:3-28; Lc 21:7-24; 17:22-24)
3Chi nak ka yajake Gia'a ki Olivos le zua ga'la ra gdou'. Jesús grë'e ati Pedro, Santiago, Juan len Andrés kiizi gulunaab'de Le' 4¿Batxh gak le ni? ¿Nakxh gak gak'be'i'tu ki chi za' ga'la lakgak le ni?
5Jesús bubi'e kieke diidza: «Gulun'chi'i kuin'li naar nutunu siye'i lbi'ili. 6Koma uladxiine bënni zian luune lsaki'i neda len lanáke: “Neda naka Le' Cristo” len bunach zian lazi'ye'i'de.
7»Len kati gyëëni'li rak gdil ni u ni' ti gungaadxi kuin'li, le ni de ki lakgak; san ti rdxiini dza tzu'u lu'uudx ki yëdz'lyu. 8Koma tu yëdz xhën len ye tu yëdz xhën uladil, len tu yëdz gun gdil len ye tu yëdz. Gaaz ladëëd ka utit xhën, len uyu'u yëla rdun. Le ni nak le jkie'la'z lau'i yëla rsaka'zi' xhën'te.
9»Gulun'chi'i kuin'li; koma uludëëde lbi'ili lau'ke bënni tunabe'ke len ulagiine lbi'ili lu yu'u useed. Len nia'a kia' uludayë'li'de lbi'ili tziaj'li lau'ke bënni rnabe'e yëdz xhën len lau'ke bënni rnabe'; naar gunn tzajxaka'lau'li kia' lau'ke. 10Koma zia'al dza tzu'u lu'uudx ki yëdz'lyu, yugute' yëdz xhën rala lanëëzi diidza kub dxia'a. 11Len ti suáli bagi'i bixh rala gnaali kati ludëëde lbi'ili lau'ke bënni tunabe'ke. Kati gdxin dza'a gnaali le Dios gzeajni'i'de lbi'ili gnaali. Koma keg lbi'ili'a gneeli, Bë' La'ay kie' Dios gui'e diidza. 12Bunach uludëëde bënni bë'chi'ke lu naa'ke bënni ludëëd'de leke, xuuz'ke ludëëde bënni xi'in'ke; len bënni xi'in'ke uludabaaga'ke len ludëëd'de xuuz'ke 13Gdu'te yëdz'lyu lalei'de lbi'ili nia'a kia'; san bënni sue' tzutzu kati gdxin lu'uudx ki, bënni'a yule'.
14»Kati gle'i'li rak le zgut'a ga ti rala gle'i'li —bënni rul'e rala tzajni'i'de—, na' bënni nakua'ke Judea rala laxhunj'ke gia'a; 15bënni ze' ikju'ul, ti wëtje bi tzajliije kie'; 16len bënni yu'e dxin gixi ti wëëde liidxe dujxi'e laari rxua kuudze'e. 17¡Kati gdxin dza ni bayechi lak'knu nguul'a zek'nu zi'i len nguul'a tugaadxi'nu'bi bi'i kiek'nu! 18Gulunaab'de Dios ki le ni ti lak beu' bë'gi', 19Koma yëla rsaka'zi' xhën'te tzu'u'tzka le gat'ga ryui'ini'kz glaal de yëdz'lyu, len gat'gar tzu'u na' tëëd'a 20Len xhki Dios ti gze'che'e dza'a, nutunu bënni yule'; san lu yëla nadxi'i kie' len bënni'a le' grë'e uze'che'e dza'a.
21»Xhki nu gie' lbi'ili; “Guluyu'tzka, ni zue' Cristo”, u “Guluyu'tzka, ni' zue'”, ti tzajle'li. 22Koma udujak'ke bënni zian bënni tuune lsaki'i nak'ke Le' Cristo len bënni tuune lsaki'i nak'ke bënni tui'ke diidza ulaaz kie' Dios; len uluune le tunn'be' len yëla wak xhën, naar lazi'ye'ke, len lekz'ka' lazi'ye'ik'de bënni'a Dios chi grëe' 23¡Gulun'chi'i kuin'li! Yugute' le ni chik'z gdixhji'da lbi'ili zia'at.
Dza kati wëëde Xi'ine Bënni
(Mt 24:29-35,42,44; Lc 21:25-36)
24»Dza'a kati chi gdëëd yëla rsaka'zi'a, uchul lau'i gbiidz, beu' tir gzeni, 25bëëlj dxiaaba lu xhba ulëxhj'ba len lekz'ka' yugute' le tunabe' yewayuba ulaxhiiz. 26Na'ar gle'i'li'ne Xi'ine Bënni wëëde lu buaj len yëla wak xhën'te len yëla ba. 27Le' ksë'le'e gbaaz La'ay kie' len gdu gabi'i yëdz'lyu utzaage bënni'a grëe', ga zelau rdxin yëdz'lyu len rdxin'te ga zelau yewayuba.
28»Guluseed ki yaag higuera: Kati rula xhuuzi'i yulu len chi tula' xhlaagi'i, rak'be'i'li ki chi zua gdxin beu' ba. 29Lekz'ka' gak, kati gle'i'li ki chi tak yugute' le ni, gnëëzi'li ki Xi'ine Bënni chi zua wëëde. 30Le nak'te rea' lbi'ili ki ti tëëdi dia'dza ni xhki ti lak yugute' le ni. 31Xhba len yëdz'lyu uladëëdi, san xhtiidza'a ti tëëdi.
32»San nutunu nëëzi bixh dza len batxh'tek gak le ni, keg gbaaz la'ay len keg Xi'ine. Tuuze Xuuz'ru nëëz'de.
33»Lena'a gulsua si'na len gulgui'laadxi, koma ti nëëzi'li batxh gdxin dza'a. 34Rala gun'li ka beene tue' bënni, kati chi rala grooje ye tu yëdz, pka'ane bënni wendxin kie' lun'chi'ke liidxe. Ki kieke pka'ane dxin luune len gnabe'i'de tue' bënni gui'laadxe'e ra puert. 35Gulgui'laadxi, koma ti nëëzi'li batxh wëëde bënni xaani yu'u, xhki wëëde na' za' ral, laadxi'yeel, ziil'bal u ziil bayën; 36Ka gna ka zue' ka wëëde len udzëël'de lbi'ili ras'li. 37Le rea' lbi'ili lekz'ka' re'ka'ne yugute'ke; ¡Gulsua si'na!»
Currently Selected:
Marcos 13: PZD
Highlight
Share
Copy
Want to have your highlights saved across all your devices? Sign up or sign in
© Sociedad Biblica de México AC
