Mateo 15

Le run leke bëzj bunach

(Mr 7:1-23)

1Guladxiine ki Jerusalén lake bënni fariseo len bënni useed xhba kie' Dios ati gulabiige'e ga ze' Jesús len gulunaab'de Le':

2—¿Bixhkia' bënni useed kiu' ti tuune ka guluzleeb'de ro'u xuuz'xhtau'ru guul? ¿Bixhkia' ti tagiibe naa'ke kati ta'we?

3Jesús bnaab'de leke:

—¿Ati lbi'ili bixhkia' ti rzeenag'li le rna xhba kie' Dios ati run'li le chi naleebi'li run'li? 4Koma Dios gne': “Be'ke bala'an xuuz'xhno'u”, ati “bënni'a gdxie' dë' xuuz'xhne'e si'e yëla gut.” 5San lbi'ili rnaali ki tue' bënni gunn gie'e xuuz'xhne'e: “Ti gunn gak'leena li', koma yugute' le de kia' chi nudëëda lau'e Dios”; 6len nu'ti'teez nu gna' ki, tir dayë'li'de gak'leene xuuz'xhne'e. Ka nak, lbi'ili chi pka'an'li tzala'al xhtiidze'e Dios naar tziaj'leen'li len lea chi naleebi'li'a. 7¡Nak'li ka bënni nuda' blo'u! Gna'kze ka Isaías bënni be'e diidza ulaaz kie' Dios kati gne' kieeli:

8“Yëdz ni tun'ze lua' tui'ke neda bala'an,

san laadxi'dau'ke ga yubl rda.

9Gat'ga dekz run tayiijilaadxi'ke neda,

le tuseed'de nak le tayaazlaadxi'ke bunach.”

10Na' Jesús bliidze bunach'a ati gudxe leke:

—Guluzenaag len gultzajni'i: 11Keg le ryaaz nule'e'le bënni run le' bëzj, diidza r'roj rue'e lena'a run le' bëzj.

12Na' bënni useed kie' Jesús gulabiige'e ga ze' len gulunaab'de Le':

—¿Guk'be'i'du ki ti gyaaz leke bënni fariseo diidza gnou'a?

13Jesús bubi'e diidza:

—Bi'ti'teez yaag le ti guuze Xuuza zue' yewayuba, lu luit galje ley. 14Gulgui'ke latj, nak'ke bënni lau chul ati tuche'ke ye tue' bënni lau chul. Ati xhki tue' bënni lau chul rche' ye tue' bënni lau chul, grop'te'ke labixe lu yeru'yu.

15Na' Pedro bnaab'de Jesús:

—Pseedx'la'an kietu le gnou'a:

16Jesús gudxe leke:

—¿Naru lekz'ka' lbi'ili ti rajni'i'li diidza ni? 17¿Ti rajni'i'li ki yugute' le ryaaz rue'e bënni rajchë' le'e, chi nak ka rudëëd? 18San le r'roj rue'e bënni za' ki laadxi'dau'e, ati lea run le' bëzj. 19Koma lu laadxi'dau'e bënni r'roj yugute' le ku nak, yëla rdëëdi bunach, yëla rgitzj xhba ki utzag'na', yëla rajtzu'u'leen nu ku zua'leen, yëla gban, yëla rzi'ye' len yëla rtzaag'yuudx diidza. 20Yugute' le ni nak le tun le bëzj bënni; san xhki ti kiibe ne'e kati zia'a ga'we, ti run le bëzj.

Yëla rajle' kieenu nguul'a ti nak'nu nguul Judea

(Mr 7:24-30)

21Jesús buze'e na' len gyiije gia'a yeego ki Tiro len Sidón. 22Ati tuunu nguul ki gia'a yeego'a ki Canaán, gbiiga'nu ga ze' len biskua'nu:

—¡Xan, Xi'ine David, buechilaadxi'i neda! ¡Bi kia' yu'u lebi bë' xëwi ati rsaka'dë'tzka lebi!

23Jesús ti bubi'e diidza. Na' bënni useed kie' gulabiige'e ga ze' len glatayui'de Le':

—Bulaag'nu nguul'a, koma za'tekz'nu ruskua'nu kuudzu'ru.

24Jesús gudxe leke:

—Dios psë'le'e neda ga nakua'zba bëku'xhiila nanitk'ba ki yëdz Israel.

25San nguul ni yajzechu xhiib'nu lau'e Jesús len guudx'nu'ne:

—¡Xan, guk'leen neda!

Ati Jesús gudxe'nu:

26Ti nak dxia'a nu kua yët'xhtiil'a rala laag'bi bi kie' tue' bënni ati lunëëdzje ley kiek'ba bëku'.

27Lenu bubi'i'nu diidza:

—Ka nak, Xan, san nak'te bëku' taag'ba bixhj yët'xhtiil le rëxhj xhani ga ta'we bënni xama.

28Na' Jesús gudxe'nu:

—¡Nguul, xhën'te nak yëla rajle' kiu'! Gak lea rnaabu'a.

Len na'teez bueak'bi bi kieenu'a.

Jesús ru'uune zian'ke bënni te'i'de

29Jesús gze'e na' ati bdxiine ra nis xhën ki Galilea; na' greene tu gia'a'du ati na' grë'e. 30Bunach zian guladzaag'tzka ga ze'a. Guluche'ke bënni natzj, bënni lau'chul, bënni'a ti zua tzala'a naa'ke, bënni ti rak lui'e diidza, len zian'ke bënni te'i'de, yajua'ke leke xhni'e Jesús ati Le' buune leke. 31Bunach gulubaani'tzki'de kati gulale'i'de ki bënni'a ti rak lui'ke diidza, tui'ke diidza, bënni'a zua'z tzala'a naa'ke, tu'ueake, bënni natzj taza'ke len bënni lau'chul, tale'i'de. Na' gulazulau'ke tagu'u'ke ba Dios ki yëdz Israel.

Jesús rnëëdzje le la'we zian'k bunach

(Mr 8:1-10)

32Jesús bliidze bënni useed kie' len gudxe leke:

—Ruduli'ik'da'ne bunach ni koma chi guk tson dza nakua'leene neda len tibi de la'we. Ti re'en'da yusë'la'ka'ne liidx'ke xhki ti tau'de, ku layu'u'beide na' dzë'ë'ke nëëz.

33Na' bënni useed kie' gle'ke Le':

—Bunach zian nakua'ke ni, ¿Nakxh'kz gun'tu gdzëëli'tu le la'we latj ni ga nutunu nakua'?

34Jesús bnaab'de leke:

—¿Balxh yët'xhtiil de kieeli?

—Gaadx yët'xhtiil len lati'iz'ba bël'du —Gulanake bënni useed kie'.

35Na' Jesús gnabe'i'de ki bunach'a labë'ke lyu, 36gde'le'e gaadx yët'xhtiil len bël'du'a ati buudx be'e yëla dexhken Dios, bxhuuxhje ley len bnëëdzje len bënni useed kie' ati leke gulagis'ke kieke bunach'a. 37Yugute'ke gla'we tzka glëëlj'de, len tzka le buga'an gaadx bdë'ë guladza'. 38Bënni gla'we nak'ke tap mil'ke bënni, kiizi nguul len bi'dau'. 39Buudx'a Jesús buse'e bunach'a, greene lu barku len gyiije gia'a yeego ki Magadán.

Currently Selected:

Mateo 15: PZD

Highlight

Copy