Mateo 14

Yëla gut kie' Juan bënni rkiile nis bunach

(Mr 6:14-29; Lc 9:7-9)

1La dza'a na'z, Herodes bënni gnabe'e Galilea, byëën'de diidza kie' Jesús, 2len gudxe bënni wendxin kie': «Juan'a bënni'a pkiile nis bunach, chi bubaane lu yëla gut. Lena'a nape yëla wak xhën.»

3Koma zia'a Herodes gnabe'e ki lazëëne Juan len lagu'u'ke le' liidx'gia'a ni'a kieenu Herodías, nguul kie' bënni bë'che'e Filipo, 4koma Juan gudxe le': «Ti rala sua'leenu'nu nguul kie' bënni bë'chu'u.»

5Herodes gu'un'de gdëëd'de Juan san guudxi'de bunach, koma yugute'ke glaki'de ki Juan nake tue' bënni rue'e diidza ulaaz kie' Dios. 6San kati Herodes guli'i'de iz, bi nguul kieenu Herodías bya'a'bi lau'ke bënni'a nuliidze, Herodes bdaani'tzki'de ka bya'a'bi 7ati gxhi'lu'ne'e ki bi'ti'teez le gnaab'bi unëëdzje. 8Na' leebi, ka chi glu'u'yëla'nu'bi xhna'bi guudx'bi'ne Herodes:

—Re'en'da gdxiu' ikje Juan bënni rkiile nis bunach lu xhiiga.

9Herodes gzua'yechi'tzke; san le gxhi'lu'ne'e lau'ke bënni'a nuliidze, gnabe'e lui'ke'bi ley. 10Gnabe'e luchuuge ikje Juan lu liidx'gia'a; 11na' yajua'ke ley lu xhiiga len gulunëëdzje len bi'i nguul ni, ati leebi bui'bi'nu xhna'bi.

12Na' guladxiine bënni useed kie' Juan, guluzi'e le' len yajka'chi'ke le'; buudx'a yajtixhji'kde Jesús.

Jesús rnëëdzje le la'we zian'k bunach

(Mr 6:30-44; Lc 9:10-17; Jn 6:1-14)

13Kati Jesús gnëëz'de le guk kie' Juan, buze'e na' len tuuze gyiije lu barku tu latj ga nutunu zua'. San bunach'a gulak'be'i'de len gularooje ki yugu yëdz'a, na' gulagie'le'e nëëz yu len yajtzaag'ke Le'. 14Kati Jesús bëtje lu barku'a ble'i'de bunach zian ati buechilaadxe'e leke len buune bënni we'a zjake ladj'ke'a. 15Le chi za' ral bënni useed kie' gulabiige'e ga ze' len gle'ke Le':

—Chi gdzë' len latj ni nutunu nakua'. Busë'la bunach ni naar tzjake yëdz nakua' ga'la'z ni, ki tzajë'u'ke le la'we.

16Jesús bubi'e diidza:

—Ti run bayuudx ksë'la'ka'ne; gulunëëdzj lbi'ili le la'we.

17Leke gulubi'ke diidza:

—Ga'yu'z yët'xhtiil len chop'ba bël de'ba kietu.

18Jesús gudxe leke:

—Guldujua' ni.

19Na' gnabe'i'de bunach'a labë'ke lau'gixi. Gdëëd'a gde'le'e ga'yu' yët'xhtiil len chop'ba bël ni, byue' lu xhba len ben'la'aye ley, bxhuuxhje yët'xhtiil'a len bnëëdzje kieke bënni useed kie' naar lagis'ke kiegak bunach. 20Yugute' bunach'a gla'we tzka glëëlj'de; ati ye tzka buga'an ki yët'xhtiil'a len bël'a chin'nu bdë'ë guladza', 21ka ga'yu' mil'ke bënni gla'we, kiizi nguul len bi'dau'.

Jesús rze'e lu nis

(Mr 6:45-52; Jn 6:16-21)

22Gdëëd le ni, Jesús beene ga bënni useed kie' labeene lu barku naar lanëëre tzjake tzala'a nis, tzal'za Le' ruse'e bunach. 23Kati buudx buse'e bunach'a, greene gia'a yaje'leene diidza Dios. Kati chi kchul tuuze chi bga'ane, 24tzal'za barku chi ziaj gatzj'lau'i nis, len nis'a rbixh'rtul rajtzu'u barku'a koma rak'tzka bë' zga ga zjake'a. 25Ziil'bal'a Jesús rze'e lu nis'a ziije zga ga nakua'ke'a. 26Kati bënni useed kie' gulale'i'de Le' rze'e lu nis'a, tzka'ti'ga glaadxi'de guluskua'ke:

—¡Pxin'a!

27San Le' bliidze leke, rne':

—¡Dxiiz! ¡Needa'a: ti gaadxi'li!

28Na' Pedro gudxe Le':

—Xan, xhki li'a, gnabe'e giida ga zeu'a lu nis'a.

29—Jesús gudxe le': —Da.

Na' Pedro bëtje lu barku'a len gzulau'e rze'e lu nis'a zga ga ze' Jesús.

30San kati gnëëz'de rga'pa le' bë'a, guudxi'tzki'de len gzulau'e rëtje lu nis'a ati bisku'e:

—¡Xan, buslá neda!

31Na'teez Jesús gxhëëne ne'e Pedro len gudxe le':

—¡Ti bi nak'kz yëla rajle'du kiu'! ¿Bixhkia' ni ruuniz li'?

32Kati gulabeene lu barku, bubë'dxi bë'a. 33Na' bënni nakua'ke lu barku'a guluzechu xhiib'ke lau'e Jesús len gle'ke Le':

—¡Leel, Li' naku Xi'ine Dios!

Jesús ru'uune bënni we' ki yëdz Genesaret

(Mr 6:53-56)

34Jesús len bënni useed kie' guladëëde tzala'a nis len guladxiine yëdz Genesaret. 35Bënni yëdz'a gulumbe'ke Jesús ati gulagixhji'de yugu bunach ki gia'a yeego'a. Na' bunach guluche'ke bënni we' kieke ga zue' Jesús, 36ati tatayui'de Le' gnëëdzje lsenz lagaane zala luuxhi'z laari xhua kuudze'e, len yugute'ke bënni tagaane ley, tu'ueake.

Currently Selected:

Mateo 14: PZD

Highlight

Copy