Lucas 18
18
Diidza run lsaki'i kieenu nguul uzeeb len bënni rchuug'be'
1Jesús blaabe kieke tu diidza run lsaki'i naar kseed'de leke ki rala lui'leen'tekze diidza Dios len ti tzajxa'kik'de. 2Gudxe leke: «Gzue' lu tu yëdz tue' bënni rchuug'be' ti raadxi'de Dios, len ti ruune baal bunach. 3Larakz yëdz'a gzua'nu tuunu nguul uzeeb len yajyu'nu'ne bënni rchuug'be' naar kueki'xhbei'de kieenu len bënni'a ti rle'i'de'nu dxia'a. 4Xhtzei'ti bënni rchuug'be' ni ti gu'un'de kueki'xhbei'de kieenu, ati gdëëd'a gudxe ikj'laadxi'dau'e: “Zala ti raadxi'kz'da'ne Dios, len ti run'kza'ne baal bunach, 5san nguul uzeeb ni ti rsan'nu rdupixhji'tikz'nu neda, kueki'xhbei'da kieenu, naar tir giid'tekz'nu kpixhji'nu neda.”»
6Len Xan'ru gne': «Guluyu'tzka lea gne' bënni rchuug'be' xhe'a. 7¿Naru Dios ti kueki'xhbei'de kieke bënni rëy kie', bënni'a tuliidze le' te'dza len reel? ¿Naru uka'ane leke ka'az? 8Rgixhji'da lbi'ili ki ti tzei'de kueki'xhbei'de kieke. San kati wëëde le' Xi'ine Bënni, ¿Naru udzëëlir'de yëla rajle' lu yëdz'lyu ni?»
Diidza run lsaki'i kie' fariseo len bënni rkiixhje laaz'sua'ke ki Roma
9Jesús blaabe ye tu diidza run lsaki'i, kieke la'ke bënni ruuni leke nak'tzka'ke bënni dxia'a, len ti tayaazlaadxi'ke ye la' bunach: 10«Chop'ke bënni yajake gdou' yaje'leen'ke diidza Dios: tue' nake bënni fariseo len ye tue' nake bënni rkiixhje laaz'sua'ke ki Roma 11bënni fariseo zui'de rui'leene diidza Dios len gne' ki: “Dios, runna li' yëla dexhken koma neda ti naka ka nakgak ye la' bunach, nak'ke bënni gban, bënni xhe'e, bënni tagitzje' xhba ki utzag'na' len ti naka ka nake bënni'a rkiixhje laaz'sua'ke ki Roma. 12Neda ruuna gbas chop lzu tu seman len yugute' le de kia' rbiija ley chi len runna kiu' tu kë'.” 13Ati bënni'a rkiixhje laaz'sua'ke ki Roma zitu'z gze' len ti ruwaaxhji'kz'de kchis lau'e gyue' xhba san rga'pe'e ra'lchu'e len rne': “¡Dios buechilaadxi'i neda, koma neda naka bënni dula!” 14Rea' lbi'ili ki bënni ni chi nu'ueake dxia'a budxiine liidxe san bënni fariseo ti ben ka kie'. Koma bënni rnëëzi kuine xhën uluxhëxhje' laadxe'e len bënni nëxhj'laadxi uluune le' xhën.»
Jesús run'la'aye'bi bi'dau'
(Mt 19:13-15; Mr 10:13-16)
15Lekz'ka' tuche'ke'bi bi'dau' lau'e Jesús naar kxua ne'e lek'bi; len kati bënni useed kie' gulale'i'de gulazulau'ke tadil'leene bënni ni 16Na' Jesús bliidze leke len gne':
—Gulgui'bi latj bi'dau'a dujak'bi ga zua' ti gzaagak'li'bi, koma yëla rnabe' kie' Dios nak kieke bënni nak'ke ka nak'kbi bi'dau'. 17Le nak'te rea' lbi'ili ki bënni ti si'e yëla rnabe' kie' Dios ka rzi'bi ley tuubi bi'dau', ti tzaazie lu yëla rnabe' kie' Dios.
Tue' bënni de'tzka xhdumie' rui'leene diidza Jesús
(Mt 19:16-30; Mr 10:17-31)
18Tue' bënni blou bnaab'de Jesús:
—Bënni useed tzawi, ¿Bixh rala guuna naar gde'li'da yëla naban tzalzu?
19Jesús bubi'e kie' diidza:
—¿Bixhkia' reu' neda bënni tzawi? Tuuze Dios nake tzawi. 20Chi nëëz'du xhba kie' Dios: “Ti kitzju' xhba ki utzag'na', ti gdëëd'du bunach, ti kuaanu, ti kiilju xhtiidze'e bënni bë'chi' lzo'u, be'ke bala'an xuuz xhno'u.”
21Bënni ni gudxe le':
—Kuidi'iz'da zura le ni ruuna.
22Kati Jesús byëën'de le ni, bubi'e kie' diidza:
Ni ryaadzj'r kiu' tu le guunu: beti'i dera le de kiu' len bnëëdzj kieke bënni yechi. Ka gunn ga'ta kiu' yëla tzawi ki yewayuba. Chi nak ka sa'leenu neda.
23Ati kati bënni ni byëën'de le ni, gzua'yeche'e koma rë'tzka xhdumie' 24Kati Jesús guk'be'i'de kie' gne':
¡Baniig nak'tzka kieke bënni de'tzka xhdumi'ke layaazie lu yëla rnabe' kie' Dios! 25Udëëdr'ba weez tuuba kameyo lu naagi yëtzi, ka tue' bënni rë'tzka xhdumie' tzaazie lu yëla rnabe' kie' Dios.
26Bënni gulayëën'de le' gulunaabe:
—¿Ati nuxh bënni gunn yule'?
27Jesús bubi'e kieke diidza:
—Le nak baniig kieke bunach ti nak baniig kie' Dios.
28Pedro gudxe le':
—Xan, netu nuka'an'tu yugute' le de kietu len za'leen'tu li'.
29Le' bubi'e kieke diidza:
Le nak'te rea' lbi'ili ki nu'ti'teez bënni, bënni nuka'ane liidxe u nguul kie' u bënni bë'che'e u xuuz'xhne'e u bi kie' nia'a ki yëla rnabe' kie' Dios, 30uzi're zxhëni lu yëla naban ni, len dza zia'a za' uzi'e yëla naban tzalzu.
Jesús rgixhjë'e bunn lzu ki yëla gut kie'
(Mt 20:17-19; Mr 10:32-34)
31Jesús bliidze kiizi chin'nu'ke bënni useed kie' len gudxe leke: «Na'a tziaj'ru Jerusalén, ga lak yugute' le guluzooje kie' le' Xi'ine Bënni, bënni glui'ke diidza ulaaz kie' Dios. 32Koma uludëëde le' lu naa'ke bënni zitu, lutitj'de le', lutzag'yuudxe le' diidza len luchiije le' xhëëna. 33Ulagiine le' len uludëëd'de le'; san na' gak tson dza ubaane lu yëla gut.»
34Leke tibi gulayajni'i'kz'de le ni, len ti nëëzi'kde bixhkz diidza rui'leene leke koma nakgak diidza ti runn layajni'i'de.
Jesús ru'uune tue' bënni lau'chul Jericó
(Mt 20:29-34; Mr 10:46-52)
35Kati Jesús chi zua gdxiine yëdz Jericó, tue' bënni lau'chul rë'e kuiti nëëz rnaabe lunëëdzje kie' dumi, 36kati byëën'de tadëëd'tzka bunach, bnaab'de leke bixha rak. 37Gle'ke le' ki Jesús ki Nazaret rdëëde ni', 38len le' bisku'e:
—¡Jesús, Xi'ine David, buechilaadxi'i neda!
39Bënni zjake lau'le tadil'leene le' naar tir guune ruzbë', san le' rchis'r chi'e:
—¡Xi'ine David, buechilaadxi'i neda!
40Jesús glëëze len gnabe'e tzajxi'ke le'. Kati bdxiine ga'la, bnaab'de le':
41—¿Bixh re'en'du guuna kiu'?
Bënni lau'chul ni bubi'e diidza.
—Xan, re'en'da ule'i'da.
42Jesús re' le':
—¡Bule'i! Yëla rajle' kiu' chi ben ga ueaku.
43Na'teez bënni lau'chul ni bule'i'de len gyaj'leene Jesús rgu'e ba Dios. Len yugute'ke bënni gulale'i'de le ni, lekz'ka' gulagu'e ba Dios.
Currently Selected:
Lucas 18: PZD
Highlight
Share
Copy
Want to have your highlights saved across all your devices? Sign up or sign in
© Sociedad Biblica de México AC
