Lucas 17
17
Banaadx le nuche' gbixh'ru lu dula
(Mt 18:6-7,21-22; Mr 9:42)
1Jesús gudxe bënni useed kie': «Ulakua'tekz le grixh le' bënni lu dula; san ¡bayechi nake bënni guune ga gbixe lu dula bënni yubl! 2Wak'l kie' dxia'a luuge'e yeene tu giaj gich len luzal'e le' lu nis xhën, ka guune ga labixe lu dula bënni'du ni. 3¡Gulun'chi'i kuin'li!
»Xhki bënni bë'chu'u ruune dula, gdil'leene; ati xhki ktze'e ka këëze, gxhi'xhëëne. 4Zala guune dula lau'u gaadx lzu tu dza, ati gaadx lzu ka gie' li': “tir gun'kza ka'”, gxhi'xhëëne.»
Yëla wak le nap yëla rajle'
5Bënni gbaaz kie' Xan'ru gulunaab'de le':
—Pxhën yëla rajle' kietu
6Xan'ru bubi'e diidza:
—Nar'la yëla rajle' kieeli nak ka tzka nak tu xhsei mostaza, gunn gie'li yaag ni; “Bleikj kuinu len yajzua kuinu lu nis xhën” len uzenaagi lbi'ili.
Le rala guune bënni wendxin
7»Xhki lbi'ili zue' tue' bënni wendxin kieeli len kati rule'e gyiije gixi buudx bga'ane'ba beedx u buudx ben'chi'e'ba beedx, ¿Ba re'li'ne: “Gdëëd, gri'i gaagu”? 8Ti nak ka', len re'li'ne: “Ben xhtzë' kia' len sua'kuasu ko'u lindu'a, na' uudx'a gunn gia'aj gaagu li'.” 9Len keg rnëëdzje yëla dexhken kie' bënni wendxin kie'a le beene lea gnabe'i'de le'. 10Lekz'ka' lbi'ili, kati chi uudx gun'li lea gnabe'i'de lbi'ili Dios, rala gnaali: “Nak'tu bënni wendxin ti zaki'i, koma le rala'z gun'tu ben'tu.”
Jesús ru'uune chi'ke bënni te'i'de we' nuudzu
11Tzal yu'e nëëz ziije Jerusalén, gdëëde Jesús ladj Samaria len Galilea. 12Len kati bdxiine tu yëdz'du, gularooje zajtzaag'ke le' chi'ke bënni te'i'de we' nuudzu, bënni ni zitu'z gulakua'ke 13Len guluskua'ke:
—¡Jesús, Bënni Useed, buechilaadxi'i netu!
14Kati Jesús ble'i'de leke, gudxe leke:
—Gultziaj lau'ke pxuuz blou.
Len tzal zjake, buroj leke baya' ni. 15Tue' bënni ni, kati ble'i'de chi bueake, bubi'e len zidzj këëdzu rgu'u'tzke ba Dios, 16Len bzechu'xhiibe lau'e Jesús len bzechu lyu't ikje rue'e yëla dexhken. Bënni ni nake bënni Samaria. 17Jesús gne':
—¿Naru keg chi'ke bënni'a buroj leke baya' ni? ¿Gaxh nakua'ke bënni'a ye ga'ke'a? 18¿Bixhkia' tuuze bënni zitu ni bubi'e rgu'e ba Dios?
19Len gudxe bënni ni:
—Gzui len buaj; koma yëla rajle' kiu' ben ga ueaku.
Nakxh gdxin yëla rnabe' kie' Dios
(Mt 24:23-28,36-41)
20Bënni fariseo gulunaab'de Jesús batxh gdxin yëla rnabe' kie' Dios, len le' bubi'e diidza:
—Yëla rnabe' kie' Dios ti nak bach gle'i ley gdu yëdz'lyu. 21Ti lanáke: “Ni zua”, u “Ni' zua”; koma yëla rnabe' kie' Dios chi zua len lbi'ili.
22Len gudxe bënni useed kie':
—Udxin dza kati lbi'ili gie'eni'li suáli zala tu dza'z len Xi'ine Bënni len ti gunn 23La'ke lanáke: “Ni zue'”, u “Ni' zue'”; san ti tziaj'li, len lekz'ka' ti tziaj'leenk'li'ne. 24Koma ka rak kati rep'yës le rgu'u yeni lu xhba le rgie'la' yeego len rëxhj'te gia'al, ka gak kati le' Xi'ine Bënni wëëde. 25San zia'a run bayuudx ktzaag'tzke len ti layaazlaadxi'ke le' bënni nakua'ke dza zuaaru na'a 26Ka guk dza kati gzue' Noé, lekz'ka' gak dza kati le' Xi'ine Bënni wëëde. 27Bunach glia'aj gla'we len gulutzag'naa'ke, nakati bdxin'r dza Noé gyaazie lu arka len bdxin giaj ziil ati yugute'ke glatie'. 28Lekz'ka' guk dza kati gzue' Lot: bunach glia'aj gla'we, gla'awe len gluti'e, glaaze len gluune yu'u; 29San kati Lot brooje lu yëdz Sodoma, glëxhj gi' lu xhba len yugute'ke glatie'. 30Ka gak dza kati le' Xi'ine Bënni wëëde.
31»Kati gdxin dza'a, bënni ze' ikju'ul len le de kie' dzë'ë nu'yu'ul, ti wëtje tzajliije ley; len bënni yu'e dxin gixi ti wëëde liidxe. 32Gultzajnei'nu nguul kie' Lot. 33Koma bënni re'en'de usle' yëla naban kie', unitie' ley; san bënni gun'gu'un'de yëla naban kie', usle' ley.
34»Rea' lbi'ili ki chi'dzë'ël'a, kieke chope' bënni dzë'ë'kë tasie', tue' yude'le'e ati tue' jga'ane. 35Ki chopk'nu nguul dzë'ë'nu wetu, tuunu yude'la'nu ati tuunu jga'an'nu.» 36Kieke chop'ke bënni dzë'ë'ke dxin gixi; tue' yude'le'e ati tue' jga'ane.
37Na'ar gulunaab'de le'
—¿Xan, gaxh lak le ni?
Len le' bubi'e kieke diidza:
—Ga de' bënni nat'a, na' luduub'ba laab.
Currently Selected:
Lucas 17: PZD
Highlight
Share
Copy
Want to have your highlights saved across all your devices? Sign up or sign in
© Sociedad Biblica de México AC
