Hechos 14

Tagixhjë'ke xhtiidze'e Dios lu yëdz Iconio

1Lu yëdz Iconio, Pablo dzaage Bernabé gulayaazie lu yu'u useed kieke bënni Judea, len glui'ke diidza ati bënni zian gulayajle'ke, ley bënni Judea ley bënni ti nak'ke bënni Judea. 2Ati bënni Judea bënni'a ti tayajle'ke gulagu'u'yële'e bënni ti nak'ke bënni Judea naar ludabaaga'ke bënni bë'chi'ru tayajle'ke. 3San bënni gbaaz kie' Xan'ru zian dza gulaga'ane ni', len guluxhënilaadxi'ke Xan'ru len gulakua'ke si'na glui'ke xhtiidze'e Dios; len Xan'ru rlui'e ki zua'leene leke, len rui'e leke yëla wak ki gunn lun'ke le runn'be' yëla wak xhën. 4Ati bunach ki yëdz'a gularooje chop'l, la'ke yajta'ke bënni Judea'a len la'ke yajta'ke bënni gbaaz kie' Xan'ru. 5Na'ar ley bënni Judea ley bënni'a ti nak'ke bënni Judea glun'ke diidza dzaag len bënni tunabe'ke naar lusaka'zi'ke leke len lulaadxi'ke leke giaj. 6San kati gulanëëz'de, Pablo len Bernabé gulaxhunj'ke len yajake Listra len Derbe, yëdz ki Licaonia, len lekz'ka' lu yëdz nakua' kuiti'le'i, 7ga lekz'ka' gulagixhjë'e diidza kub dxia'a kie' Xan'ru.

Tulaadxi'ke le' giaj Pablo lu yëdz Listra

8Lu yëdz Listra gzue' tue' bënni ti rak se'e. Ti gza'kze, koma kati guulj'ze ti guk se'e. Bënni ni rë'e 9rzenaage le rne' Pablo, ati Pablo byue' le' len guk'be'i'de ki rajle'e ki gunn ueake. 10Na' pchise chi'e len gudxe le':

—¡Gyas len gzui!

Bënni ni tu kxiti'ze gzui'de, len gzulau'e rze'e. 11Kati gulale'i'de le Pablo beene, bunach'a gulazulau'ke tuskua'ke lu diidza kieke bënni yëdz Licaonia:

—¡Dios'a nu'ueaki'kde bunach len nakua'ke len ro'u!

12Len gulanake ki Bernabé nake dios Zeus, len Pablo nake dios Hermes, koma Pablo nake bënni rue'e diidza. 13Le' pxuuz kie' Zeus, bënni'a zua gdou' kie' ga ra'az'ru lu yëdz'a, nuche'e'ba beedx len nu'e yaj zdan; len le' len bunach'a gle'en'de ludëëd'de'ba beedx ni len layiijilaadxi'ke leke. 14San kati Bernabé len Pablo gulak'be'i'de, guluchëëza'ke xha'ke len gulane'ke ladj bunach len guluskua'ke:

15—Bënni bunach, ¿bixhkia' run'li le ni? Netu nak'tu bunach ka lbi'ili. Lena'a'kza za'tu ki kixhji'tu lbi'ili diidza kub dxia'a, naar jka'an'li le ni le gat'ga zua ga run, len ubi'i'laadxi'li len Dios ban, Le' beene lu xhba, len yëdz'lyu, len nis xhën len yugute' nu nakua' tu tu latj ni. 16Zala iz le chi guladëëd Dios be'e leke latj ki tu tu bunach lagie'la'ke xhnëëz ki kieke, 17lu yëla rak'len kie' ti psan'kze glui'de ro'u nuxh nake Le'; koma Le'a rsë'le'e kieeli nis giaj len ruune ga ruzi'li zxhëni le raaz'li, len Le' runne yajlí le ria'aj'raag'li naar udziiji'li.

18Ati zala gle'ke ki leke, kann gulazaki'de guluzage'e leke ki ku ludëëd'de'ba beedx'a lau'ke.

19Tzal'za guladxiine la'ke bënni Judea ki Antioquía len ki Iconio, len gulun'gan'de bunach'a; na' gululaadxi'ke giaj Pablo len glaki'de ki chi natie' len gla'i'je le' ra yëdz't. 20San kati bënni'a tayajle'ke Xan'ru guludzaage kuiti ga de' Pablo, le' gyase len buaazie lu yëdz'a; len dza yubl'a yajake dzaage Bernabé zga yëdz Derbe.

21Buudx gulagixhjë'e diidza kub dxia'a ni lu yëdz Derbe ati bënni zian gulayajle'ke, ye'wake Listra, len Iconio len Antioquía. 22Lu yëdz ni gulutipe'laadxi'ke bënni'a chi nayajle'ke, len gle'ke leke ki lakua'ke tzutzu lu yëla rajle' kieke, len ki run bayuudx ktzaag'ru yëla rsaka'zi' naar waaz'ru lu yëla rnabe' kie' Dios. 23Lekz'ka' gulukua'ke bënni guul tuzeajni'i'de tu tu gdou', len buudx gluune gbas len glui'leene diidza Dios gulagu'u'ke leke lu ne'e Xan'ru.

Pablo len Bernabé tudxiine yëdz Antioquía ki yu Siria

24Buudx guladëëde lu yu ki Pisidia, guladxiine lu yu ki Panfilia. 25Gulagixhjë'e xhtiidze'e Xan'ru lu yëdz Perge, len chi nak ka' yajake yëdz Atalía; 26ni' gulugie'le'e nëëz lu barku naar ludxiine Antioquía, yëdz'a ga guluzua'ke leke lu yëla rak'len kie' Dios ki luune dxin'a lea buudx gluune'a. 27Kati guladxiine Antioquía, gulutzaage bënni gdou' len gulagixhji'de leke yugute' le Dios beene len leke, len ka beene Xan'ru be'e leke latj lekz'ka' bënni ti nak'ke bënni Judea layajle'ke. 28Ati Pablo len Bernabé zian dza gulaga'an'leene bënni'a tayajle'ke Xan'ru.

Currently Selected:

Hechos 14: PZD

Highlight

Copy