Hechos 13

Bernabé len Saulo gulazulau'ke xhchin'ke yëdz yëdz

1Lu dxin'lau'i kieke bënni'a nayajle'ke le gzua Antioquía gulakua'ke bënni glui'ke diidza ulaaz kie' Dios len bënni tuseed'de diidza la'ay. Bënni ni nak'ke Bernabé, Simón (bënni'a te'e le' lekz'ka' Gasj), Lucio bënni yëdz Cirene, Menahem (bënni'a gxhën'leene Herodes bënni'a gnabe'e Galilea) len Saulo. 2Tu dza, tzal leke nakua'ke tayiijilaadxi'ke Dios len tuune gbas, le' Bë' La'ay kie' Dios gne': «Gulubiaj'ke kiizi Bernabé len Saulo naar luune dxin'a le neda nuliidz'ka'ne rala luune.»

3Na' buudx glui'leene diidza Dios len gluune gbas, guluxua'naa'ke leke len gulusë'le'e leke.

Tagixhjë'ke Diidza La'ay kie' Dios lu yëdz Chipre

4Le' Bë' La'ay kie' Dios psë'le'e leke yëdz Seleucia, len ni' gulabeene barku len yajake Chipre yu le de gatzj'lau'i nis xhën. 5Kati guladxiine Salamina gulazulau'ke tagixhjë'ke xhtiidze'e Dios lu yu'u useed kieke bënni Judea. Lekz'ka' Juan ziaj'leene leke, naar gak'leene leke.

6Gdu yu ni guladëëde len guladxiine Pafos, ga yajxaka'ke tue' bënni Judea le' Barjesús len nake bënni udza', len rzi'ye'e rne' ki rue'e diidza ulaaz kie' Dios. 7Len bënni udza' ni nadzaage Sergio Pablo bënni rnabe', len bënni ni nayajni'i'de. Bënni rnabe' ni psë'le'e nu tzajliidz leke Bernabé len Saulo, koma re'en'de gzenaage xhtiidze'e Dios. 8San bënni udza' ni, bënni le' lekz'ka' Elimas lu diidza griego, gdabaage'e, len gu'un'de gzaage'e ki bënni rnabe' ni ti tzajle'e. 9Na' Saulo, bënni te'e le' lekz'ka' Pablo, le' Bë' La'ay kie' Dios nudze'iz'de le', len byue' le' si'na'ra 10len gudxe le':

—¡Bënni gxhi'ye', bënni xhe'e, xi'ine bënni xëwi len ti rle'i'du dxia'a yugute' le nak tzawi! ¿Bixhkia' ti rzuadxiu' runditj'du nëëz dxia'a kie' Xan'ru? 11Na'a Xan'ru ksaka'zi'e li': len uchul lau'u, len tir gle'i'du yeni ki gbiidz zian dza.

Len na'teez kchul lau'e Elimas, len rgiilje nu yuche' le' len sën ne'e koma guke lau'chul. 12Kati ble'i'de le ni, bënni rnabe' ni gyajle'e, len rubaan'de ka nak xhtiidze'e Xan'ru.

Tagixhjë'ke xhtiidze'e Dios yëdz Antioquía ki yu Pisidia

13Pablo len bënni lze'e gulubeene barku len yajake yëdz Perge, lu yu ki Panfilia; ati Juan pka'ane leke len bëëje Jerusalén. 14Guluze'e yëdz Perge yajake Antioquía lu yu ki Pisidia. Ni', tu dza kati tu'ueak'laadxi'ke bënni Judea gulayaazie lu yu'u useed len gulabë'ke. 15Len gdëëd glul'e xhba kie' Dios, len gich le guluzooje bënni glui'ke diidza ulaaz kie' Dios, bënni nakua'ke lau'i yu'u useed ni gudxe leke:

—Bë'cha'a, xhki ba nua'li diidza le ktip'laadxi'ke bunach ni, gunn gneeli na'a.

16Na' Pablo gzui'de len pchise ne'e ki lakua'ke dxiiz, len gne':

—Guluzenaag lbi'ili bënni Israel len lekz'ka' lbi'ili bënni yëdz yubl len raadxi'li'ne Dios. 17Dios kieke bënni yëdz Israel grëe' xuuz'xhtau'ru guul; len beene ga gulayan'tzke kati ni nak'ke bënni zitu lu yu Egipto, len chi nak ka', len yëla wak kie' bubiije leke lu yëdz'a. 18Dios pxikje ka gulazu'gulabëëze ka chua' iz lu yu biidx, 19len buznit'lau'e gaadx yëdz xhën lu yu Canaán, naar gnëëdzje xhyu'ke kieke xuuz'xhtau'ru guul. 20Le ni pche' ka tap gayua' chi'un iz.

»Gdëëd ni bzue' bënni tuchuug'be'e kieke len lusláke leke, ga bdxin'te dza gzue' Samuel bënni be'e diidza ulaaz kie' Dios. 21Na' leke gulunaabe tue' bënni rnabe', ati Dios, bzue' chua' iz le' Saúl bënni xi'ine Quis, len nake dia'dza kie' Benjamin. 22Gdëëd ni, Dios bugue' xhlatje Saúl len bzue' David ki gnabe'e, len Dios gne': “Le' David bënni xi'ine Jesé ryaazlaadxa'ne len nëëz'da ki le' guune le neda ryaazlaadxa'a.” 23Bënni xi'in'xhzue' David ni guke Jesús, bënni Dios psë'le'e ki usle' yëdz Israel, ka Le' pxënelaadxi'ke. 24Zia'al giide Jesús, Juan gdixhji'de gdu yëdz Israel, len gudxe leke ki rala lubi'i'laadxi'ke len rala ludiile nis. 25Ati kati chi zala ga'la gdxin yëla gut kie' Juan, gne': “Keg needa'a bënni'a lbi'ili rbëëz'li'ne; san kuudza'a ze'e bënni ti nak'kza bach kseedxa xhtui lëële'.”

26»Bë'cha'a bënni xi'in'xhzue' Abraham, len lbi'ili bënni yëdz zitu len raadxi'li'ne Dios: diidza ki yëla ruslá ni naki kieeru. 27Koma bënni gulakua'ke Jerusalén, len bënni tunabe'i'de leke ti gulazi'ke Jesús, len ti gulayajni'i'de le guluzooje bënni glui'ke diidza ulaaz kie' Dios le tul'e tza tza Tu'ueak'laadxi'ke Bënni Judea; ati kati guluspaage'e xhgia' Jesús, larakz leke glun'ke le chi nayoj'kz zia'a rala gak. 28Len zala ti budzëël xhtu'le'e ki ludëëd'de le', gulunaab'de Pilato ki gnabe'e ludëëd'de Le'. 29Chi nak ka', kati chi gluune kie' dera le nayoj kie' lu Diidza La'ay, guluzëtje le' lu yaag kruuz len gulagu'u'ke le' lu ba. 30San Dios buspaane le' lu yëla gut. 31Ati zian dza, Jesús yajlui'lau'e len bënni'a guladzaage le' tzal gyu'e nëëz gze'e Galilea len bdxin'tie' Jerusalén; ati na'a leke nakua'ke tujxaka'lau'ke nia'a kie' Jesús lau'ke bënni bunach.

32»Ati na'a netu rgixhji'i'tu lbi'ili diidza kub dxia'a ni: Ki Diidza'a lea pxënelaadxi'ke Dios kieke xuuz'xhtau'ru guul, 33chi beene len ro'u bënni xi'in'xhzua'ke. Le ni beene kati buspaane Jesús lu yëla gut, ka na' nayoj lu salmo burop: “Li' naku Xi'ina; na'dza naka Xuuzu.” 34Dios chik'z nagixhjë'e ki uspaane le' lu yëla gut naar ti gak'ditji'kz xhpeele'e, kati gne' lu Diidza La'ay: “Yugute' diidza dxia'a lea pxënalaadxe'e David neda guuna” 35Lena'a rna lekz'ka' lu ye tu salmo: “Ti gnëëdzju latj gak'ditji'kz xhpeele'e bënni wendxin kiu'” 36Na'a, le nak'te David beene xhchin'ke bënni laadze kati gzue', ka Dios gnabe'i'de le', chi nak ka' gutie', len yajtzaage xuuz'xhne'e, len xhpeele'e guk'ditji. 37San xhpeele'e bënni'a Dios buspaane lu yëla gut ti guk'ditji'kz. 38-39Ka' nak bë'cha'a, lbi'ili rala gnëëzi'li ki nia'a kie' Jesús ni, runn rzi'li yëla rzi'xhën ki xhtu'la'li. Lu ne'e le', yugute'ke bënni tayajle'ke tazi'ke yëla rzi'xhën ki yugute', le ti gulazaki'de lazi'ke kati gnabe'i leke xhba kie' Moisés. 40Gulgui'laadxi kuin'li, naar ku gak kieeli le guluzooje bënni glui'ke diidza ulaaz kie' Dios:

41“Guluyu', lbi'ili bënni tibi ryaazlaadxi'li

gulubaani len gulunit'lau;

koma dza zuaali na'a,

guuna le ti nak'kz bach tzajle'li

ka nak nu glaab'tza kieeli.”»

42Kati Pablo len bënni lze'e gulurooje lu yu'u useed, bunach ni glatayui'de leke tzjake yubl dza Tu'ueak'laadxi'ke Bënni Judea len lui'leen'ke leke diidza ki le ni. 43Kati gdëëd guludzaage lu yu'u useed ni, zian'ke bënni Judea len ye la'ke bënni zia'a yajta'l'ke leke, yajak'leene Pablo len Bernabé. Ati leke glui'leen'ke leke diidza ki lakua'ke tzutzu lu yëla rak'len kie' Dios.

44Bueikj seman'a dza Tu'ueak'laadxi'ke Bënni Judea, gdu yëdz'kz guludzaage naar luzenaage xhtiidze'e Xan'ru. 45San kati bënni Judea gulale'i'de tzka'ti'ga bunach'a, guluxhe'i'de leke len gulazulau'e tudabaaga'ke Pablo len gulutzag'yuudxe le' diidza. 46Na' Pablo len Bernabé, si'na gulakua'ke len gulubi'i'ke diidza:

—Ben bayuudx zia'a lbi'ili nak'li bënni Judea kixhji'tu xhtiidze'e Dios; san xhki ti ryaazlaadxi'li len ti rnëëzi'li kuin'li bach si'li yëla naban tzalzu, uyaj'tu len bënni ti nak'ke bënni yëdz zitu. 47Koma ka' gnabe'i'de netu Xan'ru, len gne':

“Nuzua' li' ki gaku gi' ki yugute' yëdz,

naar tzajtixhjë'u yëla ruslá kia'

gdu gabi'i yëdz'lyu”.

48Kati gulayëën'de le ni, bënni'a ti nak'ke bënni Judea guludziiji'tzki'de len gulazulau'ke tanáke ki xhtiidze'e Xan'ru nak tzawi; len gulayajle'ke yugute'ke bënni'a chi nak kieke lazi'ke yëla naban tzalzu. 49Len xhtiidze'e Xan'ru budu gxhua yugu yëdz ki yu ni. 50San bënni Judea glui'leen'ke'nu diidza la'knu nguul blou len tayiijilaadxi'nu'ne Dios, len bënni nakua'ke lau'i yëdz'a, len gulagu'u'yële'e leke ki lazulau'e lulaage Pablo len Bernabé, naar lubiije leke ki yëdz ni. 51Na' leke gulabiibe bexhtë le nua' ni'a'ke koma ti gulazi'ke leke, len gulaza'ke ki yëdz Iconio. 52San bënni'a tayajle'ke Xan'ru tudziiji'tzki'de len nudze'iz'de leke le' Bë' La'ay kie' Dios.

Currently Selected:

Hechos 13: PZD

Highlight

Copy