Hechos 12
12
Tudëëd'de Santiago len tagu'e liidx'gia Pedro
1Dza ni', Herodes bënni rnabe' gzulau'e rbialaadxe'e la'ke bënni gdou' kie' Xan'ru 2Len gnabe'e ludëëd'de le' Santiago bënni bë'che'e Juan len gia'tuchi; 3len kati ble'i'de ki le ni guladzag'laadxi'ke bënni Judea, beene ga gulazëëne Pedro. Le ni guk dza'a kati ta'we yët'xhtiil'a lea ti yu'u le rzaaxh ley. 4Buudx gulazëëne le', Herodes glu'e le' liidx'gia, ga gulun'chi'ke le' tap kë'ke bënni rajake gdil. Tu tu kë' ueaj nakua'ke tap'ke bënni len nuune tëëd lni Pascua ni gzue' le' lau'ke bënni yëdz. 5Na' Pedro yu'e liidx'gia, len nun'chi'tzka'ke le', san bënni gdou' kie' Xan'ru tunaabe kie' Pedro, lau'e Dios gdu'te ikj'laadxi'dau'ke.
Tue' gbaaz la'ay kie' Xan'ru rubiije liidx'gia Pedro
6Chi'dzë'ël'a, ka kxhë'z kati Herodes nuune ubiije le' len gzue' le lau'ke bënni yëdz, Pedro de' rasie' ladj'ke chope' bënni rajake gdil, len nuuga'ke le' du gia, tzal'za ye la'ke bënni'a rajake gdil nakua'ke tui'laadxi'ke ga ra'a'ru liidx'gia'a. 7Ka zua ka' blui'lau'e tue' gbaaz la'ay kie' Xan'ru, len liidx'gia ni budu gyu'u yeni. Le' gbaaz la'ay ni gdaane kuiti le'e Pedro, buspaane le' len gudxe le': «¡Gyas'te!» Na'teez, guluweedx du gia naaga' ne'e Pedro, 8len gbaaz la'ay ni gudxe le': «Buuga' le'u, len buda' lëëlu'.» Ati Pedro bzenaage, len gbaaz la'ay ni gne': «Bueak xhou', len dia'leen neda.»
9Pedro ziaj'leene gbaaz la'ay'a, san ti rak'be'i'de xhki nak'kz lea ruune gbaaz la'ay ni, beeni le' ki nak le rlui'z'de le' Dios 10San guladëëde ga nakua'ke tu kë'ke bënni'a tun'chi'ke le', len chi nak ka' ga nakua'ke bënni burop kë'a, len kati guladxiine ga ra'a'ru lu liidx'gia'a le chi zua ra nëëz'kz, kuin'zi liidx'gia ni byaalj. Gularooje len guk tuchi'i dzë'ë'ke nëëz, le' gbaaz la'ay ni pka'ane le' tuuze.
11Len kati Pedro bunni'de gne': «Na'a rak'be'i'da ki leel Xan'ru psë'le'e gbaaz la'ay kie' usle' neda lu ne'e Herodes len ki yugute' le te'en'de lusaka'ke neda bënni Judea.»
12Tzal rza' le ni ikj'laadxi'dau'e Pedro, gyiije liidx'nu María, xhne'e Juan, bënni le' lekz'ka' Marcos, len ni' bunach zian nudzaag'ke tui'leene diidza Dios 13Bliidze leke ze' rayu'u, len tuubi bi nguul kuidi leebi Rode broj'bi yajyu'bi nuxha'. 14Kati bumbe'bi chi'e Pedro, tzka yëla rudziiji kieebi, ti psaalj'bi yu'a, ati ziuubz'bi bune'bi nu'yu'u rgixhjë'bi ki Pedro ze' rayu'u. 15Na' gle'ke'bi:
—¡Chi rchëxh ikju!
San lebi si'na zuaabi rnaabi ki bliibi. Leke tanáke:
—Keg le'e, gbaaz la'ay kie'a.
16Tzal'za Pedro ni ze' rayu'u rliidze leke. Ati kati gulusaalje gulale'i'de le', len glaadxi'tzki'de. 17Ati le', ben ni'a ne'e naar tir lakua'ke ruzbë', len gdixhji'de leke ka beene Xan'ru bubiije le' liidx'gia. Len gne':
—Gulkixhji'de Santiago len yugu bënni bë'chi'ru.
Chi nak ka' brooje len ziije ga yubl.
18Kati gyeni, bënni rajake gdil gulakgani'de, koma ti nëëzi'kde gaxh gne'e Pedro. 19Herodes gnabe'e lugiilje le', ati kati ti budzëële, pchuug'be'e kieke len gnabe'e ludëëd'de leke. Gdëëd ni, Herodes brooje yëdz Judea len yajsue' yëdz Cesarea.
Herodes ratie'
20Herodes nadze'i'de bënni yëdz Tiro len Sidón, ati leke gluune diidza tzjake lau'e. Len gulazaki'de glui'leene diidza Blasto, tue' bënni wendxin blou kie' Herodes, len guluzua'ke lu ne'e gnaabe kë' xhbei kieke, koma bënni Tiro len Sidón ni yugute' le nayaadzji'kde rajxi'ke lu yëdz kie' bënni rnabe' ni. 21Herodes bliidze leke tzjake tu dza, ati nakue' laari le takue' bënni tunabe'ke, len grë'e xhlatje ga rbeki'xhbei'de len be'leene leke diidza. 22Bunach'a gulazulau'ke tuskua'ke len tanáke: «¡Keg'kz bunach'a rue'e diidza, dios'kza rue'e diidza!» 23Na'teez, tue' gbaaz la'ay kie' Dios beene ga Herodes gui'i'de koma ti be'e yëla bala'an Dios, len gutie' glaag'ba le' bzuuga.
24Tzal'za diidza la'ay kie' Dios ziaj'tekz rxhua, len tagixhjë'ke ley gdu gabi'i.
25Kati Bernabé len Saulo buudx xhchin'ke Jerusalén, guluza'ke len guluche'ke Juan, bënni le' lekz'ka' Marcos.
Currently Selected:
Hechos 12: PZD
Highlight
Share
Copy
Want to have your highlights saved across all your devices? Sign up or sign in
© Sociedad Biblica de México AC
