Marcos 14

Roo tuu room nae saal naha fael not-noot Nai Jesus

(Mateus 26:1-5; Lucas 22:1-2; João 11:45-53)

1-2Idura faklau telo, ulu relijiaun Judeu ni tuu room nor mestri room enlaa lei Judeu ni hii nae saal oid fael not-noot Jesus la loet. Mahee room kase la loor dega, “Beed laed! Iit ba leob fael Ura hurhuur, deslaa leolbaan tuu seirgaa fedeis soub. Be fun la roo rini fun daraut tuu.”

Room kase manura, deslaa leolbaan ruu deis, roo Judeu room ni leolbaan tuu seirgaa bae room haah ‘Festa Paskua’ nor ‘Festa Paun ba fois Fermentu’. Nii leolbaan seirgaa, room anoin siil tempu muna, bae fee bei ala room sai ois rae Ejitu.#Ezodu 12:1-27

Hiin iid fii mina megi kiid bae fee tubu karun tustus la Nai Jesus

(Mateus 26:6-13; João 12:1-8)

3Jesus nii aldeia Betania molok leolbaan tuu ura raat. Jesus laa aa nii Simão ni uma, iid bae muna nei moras lepra.

Arfiil Ura aa bael, hiin iid maa asour Jesus. Ura oid botir iid fun ois haut. Nii botir too ni lala, nei mina megi ke tubu karu tus-tus.#14:3:Mina megi too ni tubu, man badae iid manaan oos ni toon iid ni lala. Eskritura Gregu hlai dega, mina too ni tubu ‘denari’ 300. Mina too ni gala ‘nardos’. Muna roo fun mina too oid ai haa megi kiid. Botir too, roo bahat ois haut. Botir too ni tubu meit karu. Eskritura Gregu hlai dega, botir too fun ois haut iid gala ‘alabastros’. Lee meit ni Lucas 7:37-38. Toom maa, ura dae rahu telo botir too ni mata. I ura fii mina megi too la Jesus ni ulu, oid anai la Jesus man roo tuu kiid.

4Mahee nei meit artuub selu aa bael namaa nii idura. Arfiil room fei hiin too fun manura, room bruis, i kase la loor dega, “Mambae fee hiin ura haak saugate telo mina megi kiid bae fee tubu karun tus-tus uri?! 5Kode faklau ura seo lea mina megi uri. I ni osa too nee la roo kiak room. Mina megi uri, tubu karun tustus faklau badae kiid bae fee manaan oos nii toon iid ni lala.” I room bruis hiin too tus-tus.

6Mahee Jesus ataan, “Iim ba leob bruis hiin too. Fois laa. Au aksolok deslaa ura fois soub mina megi ma Au. 7Roo kiak room hii hela futu manhati nor iim. Manura iim leob tulun room nii leolbaan saba lea. Mahee ba agi deis, Au ba futu soub nor iim.#Deuteronomio 15:11 8Deslaa Au mori ba agi soub. I hiin uri nafai fii mina la Au too, ura prepara muun la Au eta lolo, idura man ura fois enene mina megi la Au maet isi. Ura fun naam kode kiid. 9Anoin kod-koed! Arfiil roo nee sai Nai Maromak ni Novidadi Kode nii mundu tema, room meit hii tuir enlaa hiin too ni hahalok kode ura. I manura roo hailagaa hii anoin enlaa ura.”

Judas anoin klao naha seo Nai Jesus

(Mateus 26:14-16; Lucas 22:3-6)

10Idura faklau telo, Jesus ni eskolanti iid ois room ubu saguul-resi-ruu too, gala Judas Iskariotes. Ura sai ois Simão ni uma, laa nae ulu relijiaun Judeu ni tuu room, oid nee Jesus la room ni lima. Arfiil raat la nii room, Judas tafaar la room enlaa ura ni akar. 11Arfiil room fliik Judas kase manura, room aksolok tus-tus. I room kase mate soub dega, “Se o akar nee Jesus la aem, aem hii nee oos.” Judas sai oid nae saal oid nee Jesus la room ni lima.

Nai Jesus aa futu nor ni eskolanti room nii festa Paskua

(Mateus 26:17-25; Lucas 22:7-14,21-23; João 13:21-30)

12Nii leolbaan tuu primeiru natoon roo Judeu room ‘Festa Paun ba fois Fermentu’, room meit loet biub mlae man sakrifisiu kiid oid fun festa Paskua. Manura Jesus ni eskolanti room maa tuuk la Ura, “Am-Nai! Iit Tuu akar aem laa prepara festa Paskua nii bae?”

13I Jesus ruu ni eskolanti ubu ruu dega, “Iim ubu ruu laa muun nii sidadi. Iim hii eot maen iid bae fee oid eer nii uur rae iid nii ura ni kabaas. Iim toom lea ura laa. 14Arfiil ura tafae nii uum iid, iim toom lea. I iim tafaar la uum ubu manuri, ‘Am-nai! Aem-Mestri tuuk hati kiid, la Ura oid fun festa Paskua nor ni eskolanti room.’ 15I artuub ura hii atuud la iim kuartu tuu kiid nii uum andar lau. Artuub ura adia telo hati too soub. Hela lea iim ubu ruu laa tui namaa.”

16Toom maa, room ubu ruu laa nii sidadi too. Nii la-ura room eot naam hailagaa tuir naam bae fee Jesus tafaar soub la room. I room meit prepara festa Paskua nii idura. Toom maa room ubu ruu suli siil la Jesus room.

17Arfiil leolmata naha mou, Jesus nor ni eskolanti ubu saguul-resi-ruu laa nii la-ura. 18I room medei oid aa futu. Arfiil room hii aa bael, Jesus kase, “Iim fliik maa! Artuub iid ois iim bae fee aa futu nor Au, ura fee hii nee Au la roo selu ni lima.”#Salmos 41:10

19Fliik manura, room hua-lala muit tus-tus. I room iid-iid tuuk la Jesus, “Am-Nai. Baloos au, too?”

20Jesus ataan, “Ois iim ubu saguul-resi-ruu, nei artuub iid bae fee deum paun nii maok futu nor Au, ura fee hii nee Au la room. 21Anoin kod-koed! Au, Roo Ana. Au tenki maet didi tuir sabiid fee hlai enene nii Nai Maromak ni Livru Sagradu. Mahee iim tenki kuidaud! Artuub iid nee Au la roo selu, ura didi fee hii sium mededa! Kode resi la roo ura balikan mori!”

Nai Jesus nee sai dega, paun nor nau-uvas man sinaal iid oid anoin Ura

(Mateus 26:26-30; Lucas 22:14-20; Korintu 1 11:23-25)

22Arfiil room hii aa bael, Jesus huu paun hua kiid, oid agradese la Nai Maromak. I Ura heul paun too, oid hae la ni eskolanti room. Ura dega, “Paun uri, Au eta lolo. Sium, oid aa la.”

23Faklau telo, Jesus huu siil nau-uvas kopu kiid. Ura nee agradese deis la Nai Maromak. I Ura nee kopu ura la ni eskolanti room eun, i room meit eun ois kopu ura. 24I Jesus dega, “Nau-uvas uri Au lara. Lara kiduri hii hakal oid salva roo rini. Lara uri, atuud dega, aliansa bae fee Nai Maromak fun soub nor Ni artuub too, agora fun meit soub.#Ezodu 24:8; Jeremias 31:31-34

25Fliik kod-koed! Ois hoda uri, Au ba eun deis nau-uvas soub. Raat leolbaan bae Au medei futu nii Nai Maromak ni reun, man Au hina eun siil.”

26Idura faklau telo, room kanta iid oid anai Nai Maromak. Toom maa room sai oid laa raelau Oliveira.

Nai Jesus nee sai muun dega Pedro hii nega Ura

(Mateus 26:31-35; Lucas 22:31-34; João 13:36-38)

27Arfiil nii saal fusu, Jesus tafaar enene la room dega, “Orsiid, iim haigaa hii flaer fois bael Au mesa. Idura tuir roo hlai soub nii Nai Maromak ni Livru Sagradu. Nii Livru Sagradu kidura Nai Maromak dega,

‘Au hii loet telo biub ata,

i biub seirgaa hii flaer baskari.’#Zacarias 13:7

28Au hii maet didi. Mahee arfiil Au mori siil, Au laa muun iim nii provinsia Galileia.”#Mateus 28:16

29Fliik manura, Pedro kase asour enene Jesus, oid dega, “Am-Nai! Fedu room hailagaa flaer fois bael Iit Tuu, mahee au tais. Au hii ba fois Iit Tuu.”

30Jesus ataan, “Pedro! Anoin kod-koed! Orsiid hoda, molok maun foin haet ruu, o hii nega au haet teul, dega, ke o ba taad Au.”

31Mahee Pedro ataan nor teor-hua makaas dega, “Tais, Am-Nai! Fedu au tenki maet futu nor Iit Tuu, au hii ba nega Iit Tuu!”

Jesus ni eskolanti seirgaa meit kase manura.

Nai Jesus fun orasaun nii Getsemani

(Mateus 26:36-46; Lucas 22:39-46)

32Faklau telo, Jesus nor eskolanti room lolai manhati raat nii hati kiid bae fee gala Getsemani, nii raelau Oliveira ni sua. Jesus tafaar la room dega, “Iim medei laed nii uri. Au hii laa fun orasaun nii la-ura.”

33Jesus oid lea fee Pedro, Tiago nor João laa futu nor ura. Ois oras idura, Ura ni hua-lala muit i triste tus-tus. 34Ura tafaar la room, “Au hua-lala muit tus-tus! Au senti naha maet lea. Iim medei oid gnaan nii uri, i neo mori.”

35-36Toom maa Jesus faak kaet-keen la ahe. Ura diku la rae oid fun orasaun dega, “Au Ama. Se Au Ama goloo, Au balikan sium terus uri raat maet manuri. Au taad Au Ama leob fun naam meit. Manura, se leob, Au Ama asai telo terus uri ois Au. Mahee ba leob tuir Au akar, tuir lea Au Ama ni akar.”

37Faklau telo, Jesus suli siil la Ni eskolanti ubu teul too, mahee room boe hae bael. I Ura gluur room, oid dega la Simão Pedro, “Simão!#14:37:Biblia Gregu hlai dega, ‘Simão’. Idura Pedro ni gala selu. O boe, ka? Au nii la-ura oras iid lea, i iim ba leob gnaan kaet-keen ka?! 38Blee laab! Neo mori mata mori. Iim akar fun didi naam doloo, mahee iim eta lolo fee fraku. Des manura, iim tenki fun orasaun la arfiil iim eot kook, iim ba mou.”#Korintu 1 10:13

39Faklau telo, Jesus laa fun orasaun haet iid deis. Ura tuuk siil la Nai Maromak, se leob, Ura balikan sium terus idura raat maet manura. 40I Jesus maa siil fei Ni eskolanti ubu teul too. Mahee room boe hae bael, deslaa room mata hae tus-tus. I Ura gluur room, mahee room ba taad sabiid fee room naha ataan la Ura.

41Toom maa, Jesus fois bael room, oid laa fun orasaun la haet teul. Faklau telo, Ura maa gluur room. Ura dega, “Iim hii boe, ka? Blee laab! Tempu raat soub! Au Roo Ana. Agora, roo maa fael Au, oid nee la roo klao room lima. 42Mrii Laab! Fei Kook! Roo iid naha nee Au la room, maa soub. Maa iit laa asour room!”

Roo fael Nai Jesus

(Mateus 26:47-56; Lucas 22:47-53; João 18:3-12)

43Arfiil Jesus hii kase bael, Judas maa nor roo rini. Ura fee roo iid ois eskolanti ubu saguul-resi-ruu. Room maa oid ai dona nor baed lau oid fael Jesus. Room fun tuir orde ois roo Judeu ni tuu room. Room idura fee, ulu relijiaun Judeu ni tuu room, mestri room enlaa lei Judeu ni, nor mai tuu teor ubu room. 44Molo room maa, Judas nee telo sinaal la room, dega, “Iim fei kod-koed! Artuub iid au laa muma too, Ura fee idura. Iim fael enene ura i oid laa!”

45Arfiil Judas raat laa, ura meit laa enene nii Jesus oid dega, “Mestri!” I Judas meit muma Ura. 46Fei Judas fun manura, roo rini faak laa ahe oid fael Jesus. 47Mahee roo iid mrii fedeis Jesus too leus baed lau, oid taar telo artuub iid ni teliga. Artuub idura, ulu relijiaun Judeu ni tuu ni ata.

48Jesus tafaar la roo seir maa fael Ura too, dega, “Iim anoin Au uri fnao-klao, ka? Manura fee iim maa fael Au oid ai dona nor baed lau? 49Leolbaan-leolbaan Au noir bael iim nii Nai Maromak ni Uum Kreda Tuu ni kintal, mahee artuub iid ba maa fael Au. Agora, maa fael soub Au la! Deslaa ura, roo hlai enene fes muna nii Nai Maromak ni Livru Sagradu.”#Lucas 19:47; 21:37

50Nii momentu la-ura, Jesus ni eskolanti room meit flaer baskari fois bael Jesus mesa.

51Nii la-ura meit, nei maen ulkoil iid toom nii Jesus ni hoho. Ura biil lolo nor lea hena eha kiid. I roo seirgaa meit naha fael ura, 52mahee room fael lea fee ni hena. I ura flaer tetmree lea, deslaa ura matau mate.

Room oid Nai Jesus la asour roo Tribunal Relijiaun Judeu ni

(Mateus 26:57-68; Lucas 22:54-55; 22:63-71; João 18:13-14; 18:19-24)

53Faklau telo, room oid Jesus la nii nai luli relijiaun Judeu ni xefi ni uma. Nii uum idura, roo tuu relijiaun Judeu ni room libur loor soub. Room seirgaa fee: nai luli tuu room ois relijiaun Judeu ni, mai tuu teor ubu room nor mestri room enlaa lei Judeu ni.

54Arfiil room fael Jesus oid laa, Pedro toom not-not ois room hoho, raat nii nai luli relijiaun Judeu ni xefi ni uma. Ura meit tafae la kintal lala, i laa iir aef futu nor roo ronda seirgaa nii la idura.

55Nii uum lala, nai luli tuu room ois relijiaun Judeu nor roo ois Tribunal Relijiaun Judeu ni libur loor. Room haigaa nae Jesus ni sala oid amou Ura, deslaa room naha nee kastigu maet Ura. Mahee room nae ba eot Jesus ni sala. 56Room meit haah roo rini maa sai sasin falsu. Mahee roo seir nee sasin falsu seirgaa, teor-hua ba aloor.

57I roo seir mrii oid nee sasin falsu enlaa Jesus dega, 58“Aem fliik artuub iduri dega, ‘Au hii fun rahu telo Nai Maromak ni Uum Kreda Tuu bae fee roo fun oid lima. I nii leolbaan teul, Au hii fun siil Uum Kreda Tuu selu, mahee ba fun oid roo lima.’ ”#João 2:19 59Mahee roo sasin room ni teor-hua seirgaa ba aloor.

60I nai luli relijiaun Judeu ni xefi mrii nii roo rini ni ahe, oid tuuk la Jesus, “Roo rini nee sala la O. Manbae fee O noto lea?”

61Jesus ba ataan teor-hua kiid. I nai luli relijiaun Judeu ni xefi tuuk loi la Ura, “O uri fee Kristu didi, Nai Maromak ni Ana bae fee Ura promete fes muna too?”

62Jesus ataan, “Dloo didi. Au fee Uri. Iim haigaa hii fei Au, Roo Ana, medei nii Nai Maromak ni lima doloo. Ura fee nei kbiit tus-tus. Faklau telo, Au hii duu ois lalehan maa nor sbai.”#Daniel 7:13

63Arfiil nai luli relijiaun Judeu ni xefi fliik Jesus kase manura, ura bruis tus-tus, i saas telo ni hena. I ura kase makaas la room dega, “Iit balikan des sai sasin soub! 64Iim fliik nor iim teliga rasik, Jesus didi fee dega, Ura fee Nai Maromak ni Ana. Teor hua ura man kase klao enlaa Nai Maromak.#14:64 Tuir lei relijiaun Judeu ni, seen fee tloo lolo megees nor Nai Maromak, artuub idura tenki loet telo. Agora iim naha teis mansaba?”

Room hailagaa teis dega, “Artuub iduri sala didi! Ura tenki sium kastigu maet!”#Levitiku 24:16

65I roo seir laa luu aba la Jesus. Room taa telo Ura ni mata, i room tou Ura oid tuuk dega, “Se O fee Maromak ni gugu nor lama, O kase la. Seen fee tou O?” Toom maa, room nee orde la roo ronda seirgaa ois Uum Kreda Tuu naha maa oid Jesus. I roo ronda seirgaa meit dae Ura.

Pedro nega haet teul dega ba taad Nai Jesus

(Mateus 26:69-75; Lucas 22:56-62; João 18:15-18, 25-27)

66-67Nii tempu kidura, Pedro iir bael aef nii kintal lala. I nai luli relijiaun Judeu ni xefi ni ata hiin iid, laa hihir kod-koed Pedro ni ahe, oid dega, “O meit futu nor Jesus, roo Nazaré too. Dloo, ka tais?”

68Mahee Pedro ataan i nega, “Tais! Manbae fee o tuuk manura?! Au ba taad Ura.” Toom maa Pedro laa mrii telo nii salmata tuu ni ahe. [Natoon nii oras idura, maun meit foni.]#14:68:Eskritura Gregu seir hlai nor seir ba hlai teor-hua ura.

69Faklau telo, ata hiin too eot siil Pedro. Hiin too tafaar la roo seir nii kintal lala too, dega, “Maen uri, ois Jesus ni artuub didi!”

70Pedro nega des, dega, “Au ba taad Roo idura didi!”

Ba agi, roo seir bae fee mrii nii la-ura tafaar la Pedro dega, “Hee! O Jesus ni artuub didi! Aem taad iit roo Galileia.”

71Mahee Pedro nega des loi, dega, “Maromak nee kastigu la au se au kase ba doloo. Au jura! Au ba taad Roo idura kiid!”

72Natoon ura kase manura, maun meit foin la haet ruu. I Pedro anoin siil Jesus ni teor-hua bae fee dega, “Molo maun foin haet ruu, o hii dega ke o ba taad Au haet teul.”

Anoin raat idura, Pedro sero nor hua-lala broe.

Currently Selected:

Marcos 14: BMGM

Highlight

Copy