Marcos 12

Nai Jesus lela-teor iid enlaa roo serbius nii marao uvas

(Mateus 21:33-46; Lucas 20:9-19)

1Faklau telo, Jesus kase manhati nor nai luli tuu room ois relijiaun Judeu ni, mestri room enlaa lei Judeu ni, nor mai tuu teor ubu room. Ura dega, “Au tuir la iim nor lela-teor iid manuri: Leolbaan iid, marao ubu kiid la dae marao oid tan ai uvas. I ura fun luut hleu i fun meit tanki iid oid saam uvas hua la asai ni era. Ura meit fun sarleol oe manaru kiid oid bali uvas too. Toom maa ura nee marao too la roo aluga. Room kontratu hae uvas era nor marao ubu. Meit telo marao ubu too laa telo rae roo.#Isaías 5:1-2

2Raat soub nii tempu fou uvas, marao ubu, ruu artuub iid la tuuk ura ni uvas era. 3Mahee ura hina raat, room seir aluga marao too, fael i dae ura. I room ruu ura suli nor lima mamu.

4Toom maa marao ubu ruu des artuub iid laa. Mahee roo bae fee aluga marao too, fael artuub ura i dae ura ni ulu hatu raat huga. Room trata ura i toeh sai ois la ura. 5Toom maa marao ubu ruu des roo selu laa. Mahee room loet telo ura. Room leob fun mansaba meit, marao ubu ruu didi ni artuub laa. Mahee roo seir aluga marao too, dae seir nor loet seir. 6Agora hela fee roo ubu kiid, marao ubu ni ana mane. Ni ana mesa kiid lea i ura doim tus-tus. Deslaa ba nei des saal selu, i ura ruu ni ana rasik fee laa. Ura anoin manuri, ‘Au ana rasik uri, room hii sium kod-koed i hii fliik la ura.’

7Toom maa, ura ruu ni ana rasik fee laa. Mahee arfiil room seir aluga la marao too eot aan too laa, room kase la loor dega, ‘Iim maa fei laed! Tat mane ruu ni ana rasik fee maa uri. Se ada airuu, tat mane maet, ni ana uri fee hii eot meit ni soi hailagaa. Maa iit loet telo ura, la iit fee eot ni soi too.’ 8Manura room fael, i loet telo ura. Toom maa room soek sai telo ura ni maet isi her mrao hoho.”

9Toom maa Jesus tuuk la roo tuu room, “Tuir iim anoin marao ubu too hii fun sabiid la room seir aluga la marao too? Tuir Au anoin, marao ubu hii laa nii mrao too, i hii loet telo meit room. Toom maa, ura nee siil ni marao too la roo selu fee aluga.

10Iit haigaa lee telo soub nii Nai Maromak ni Teor-hua dega,

‘Nei haut iid bae fee badae room soek telo soub.

Mahee agora, haut idura sai siil man haut ina kiid la haut sel-selu.

11Nai Maromak fee loi haut too.

Des manura, iit kauk ulu, idura kode tus-tus.’ ”#Salmos 118:22-23

12Fliik manura, roo tuu room taad soub, dega, Jesus kase enlaa room faklau ois lela-teor. Room idura man fee roo seir fois mata la marao too. Des manura room komesa nae saal oid fael Ura. Mahee room ba brani, deslaa roo rini fee hii akar fliik Jesus ni noir. Manura room meit laa i fois bael Ura.

Roo kook laa Nai Jesus enlaa seul impostu

(Mateus 22:15-22; Lucas 20:20-26)

13Faklau telo ura, roo Judeu ni tuu room ruu roo Farizeu seir nor artuub seir ois Erodes ni partidu laa asour Jesus nor anoin klao oid kook se Ura kase saal. 14Raat la Jesus, room dega, “Mestri! Aem haigaa taad Iit Tuu ni hua-lala moo, i ba sokar teor duu-sae. I Iit-Tuu ba fei la roo loba ka tuu, mahee fei la roo hua-lala. Iit Tuu nee sai Nai Maromak ni akar nor doloo. Agora aem naha tuuk naam iid. Tuir iit lei relijiaun Judeu, iit leob seul oos impostu la estadu Roma ni daot tuu,#12:14:Roo Roma ni daot tuu, room haah ‘Sezar’. ka tais?”

15Mahee Jesus taad telo soub room hua-lala tada too, room tuuk manura, naha fun Jesus kase teor-hua seir asour estadu Roma. Jesus meit ataan nor teor-hua makaas dega, “Manbae fee iim kook Au enlaa idura? Nee laed oos buti kiid maa Au fei kook!”

16I room nee oos buti kiid la Jesus i Ura fei oos ura. Ura tuuk la room, “Retratu uri, seen ahe? Gala uri, seen ni?”

Room ataan, “Idura, Sezar, estadu Roma ni daot tuu!”

17I Jesus dega loi la room, “Se manura, iim nee la estadu naam bae fee estadu ni, i iim nee la Nai Maromak naam bae fee Nai Maromak ni.”

Fliik Ura ataan manura, room haigaa kauk ulu, deslaa Ura kase too doloo. Manura room naha amou Jesus meit, baa eot.

Roo maet leob mori siil ka tais? Nii lalehan, roo kaben ka tais?

(Mateus 22:23-33; Lucas 20:27-40)

18Idura faklau telo, grupu relijiaun selu la kook loi Jesus. Room idura ois grupu Saduseu. Room noir dega, roo bae fee maet soub, ba leob mori siil. Nii leolbaan kiduri, roo Saduseu seir maa kook Jesus. Room kase nor Jesus dega,#Apostlu room ni Istori 23:8 19“Mestri! Iit tata Moises hlai bael teor-hua sergia ma iit: Se maen iid maet fois bael ni hina, mahee aan ba nei, maen too ni kau kaben siil nor hiin haul too, la oid nee jerasaun la ni bou.#Deuteronomio 25:5-6 20Moises noir didi manura. Mahee aem naha tuuk manuri: Nei maen ubu liim-nai-rua, room gaa bou nor kau. Bou tuu fee kaben mun, ura maet aan ba nei. 21Toom maa ni kau kiid toom ura too, kaben siil nor hiin haul too. Ba agi ura meit maet, ana ba nei. Manura meit nor ni kau numur teul. Ura kaben nor hiin haul too, mahee ura maet, ana meit ba nei. 22Manura manhati raat ni kau ioo meit mate i ba nei ana. Toom maa, hiin haul ura meit mate.

23Agora, aem naha tuuk manuri: hiin too kaben nor maen ubu liim-nai-rua. Arfiil mundu uri remata i Nai Maromak fun mori siil roo mate seirgaa, hiin too kaben doloo nor maen iid bae?”

24Jesus ataan, “Se iim tuuk manura, atuud ke iim ba taad Nai Maromak ni Teor-hua nii Livru Sagradu. I iim meit ba taad Ura ni kbiit. Manura iim sala soub!

25Fliik kod-koed! Maet haigaa bae fee Nai Maromak fun mori siil, room ba kaben soub. Manura meit nor Nai Maromak ni anju room her lalehan ba kaben. 26Agora, Au meit nee sai enlaa roo maet leob mori siil ka. Iit tata Moises hlai enlaa aef leo nii ai-fuu bada kiid, mahee aef baa aa ai too. Iim anoin istori kidura ka tais? Arfiil aef leo nii ai-fuu kidura, Nai Maromak tafaar la Moises dega, ‘Au fee o tata Abraão ni Nai Maromak, Au fee o tata Isac ni Nai Maromak, Au fee o tata Jacó ni Nai Maromak. Room haigaa adora manhati Au raat nafai.’#Ezodu 3:6 27Se iit lee manura, iit taad iit tata room maet agi soub. Mahee deslaa Nai Maromak dega Ura sai room ni Nai Maromak, manura iit taad dega room mori siil soub. Roo maet ba leob adora Nai Maromak, mahee roo mori lea. Se iim fiar manhati fun roo mate ba mori siil, iim saal didi.”

Nai Maromak ni Lei bae fee tuu faklau

(Mateus 22:34-40; Lucas 10:25-28)

28Nii la-ura, mestri room enlaa lei Judeu ni ubu kiid fliik Jesus kase bael nor roo grupu relijiaun Saduseu room. Mestri too fliik Jesus ataan nor doloo enlaa sabiid fee room tuuk. Toom maa ura tuuk la Jesus, “Am-Nai! Au naha tuuk manuri: iit lei relijiaun nei orde rini tustus. Ois Nai Maromak ni Lei seirgaa bae fee tata Moises lii bael maa iit, iid bae fee tuu faklau?”

29Jesus ataan, “Nai Maromak ni Lei tuu faklau nii Livru Sagradu fee iduri:

‘Roo nii Israel tema! Iim fliik kod-koed maa!

Nai uri, fee iit Nai Maromak didi!

Banei deis maromak selu, Nai Maromak mesa lea!

30Manura, iim tenki doim Nai Maromak faklau naam haigaa nor iim hua-lala tema,

iim tenki nee iim mori tema la Ura,

iim tenki anoin manhati Ura,

i akaas lolo oid fun tuir Ni akar.’#Deuteronomio 6:4-5

31I Nai Maromak ni Lei ruu dega manuri:

O doim roo selu, man o doim o eta lolo rasik.’

Nai Maromak ni Lei ruu uri fee tuu faklau. Ba nei deis Nai Maromak ni Lei selu bae fee tuu reis Ura ni Lei ruu uri.”#Levitiku 19:18

32I mestri room enlaa lei Judeu ni ura kase deis la Jesus, dega, “Mestri dega doloo didi! Nai Maromak too iid lea. Ba nei deis Maromak selu.#Deuteronomio 4:35 33I des manura, iit tenki doim Ura faklau naam haigaa nor iit hua-lala tema, iit tenki doim Ura nor iit matenek tema, i akaas lolo oid tuir Ura ni akar. I iit meit doim roo selu man iit doim iit eta lolo rasik. Doim iid manura kode faklau duke iit loet animaal oid asae la Nai Maromak nor nee oferta la Ura.”#Oséias 6:6

34Jesus fliik ura ataan teor-hua seirgaa nor kode, Jesus meit anoin dega, mestri idura, taad didi Nai Maromak ni Teor-hua. I Jesus dega, “O naha fedeis sai soub artuub iid nii Maromak ni reun.”

Faklau telo, ba nei deis artuub iid brani tuuk teor-hua la Jesus.#Lucas 10:25-28

Kristu ura, daot David ni jerasaun, mahee Ura meit daot David ni dato

(Mateus 22:41-46; Lucas 20:41-44)

35Faklau telo, Jesus hii noir bael roo nii Nai Maromak ni Uum Kreda Tuu ni kintal. Ura tuuk la room, dega, “Tuir iim anoin, dega mansaba? Mestri room enlaa lei Judeu ni noir enlaa Kristu iid bae fee Nai Maromak loi fes muna faklau. Room noir dega, Kristu too daot David ni jerasaun lea, mahee idura badei hei. 36Deslaa fes muna Nai Maromak ni Espiritu Santu uza daot David oid hlai manuri:

‘Nai Maromak tafaar soub la au Nai, dega,

“Maa mdei nii Au lima doloo, nii roo tuu ni hati.

Au hii fun o inimigu room haihuu la o.’ ”#Salmos 110:1

37Ois idura iit taad, dega, daot David rasik haah Kristu, ‘au Nai’. Idura dega, se roo dega Kristu too daot David ni jerasaun lea, badei hei. Deslaa Kristu meit daot David ni dato.” Arfiil Jesus kase man nafai too, roo rini fee akar fliik la Ura.

Nai Jesus dega kuidaud nor mestri room enlaa lei Judeu ni

(Mateus 23:1-36; Lucas 20:45-47)

38Toom maa Ura nee sai la room dega, “Iim neo mori nor mestri room enlaa lei Judeu ni. Room akar lolai laa-maa nii basaar nor batina manaru, la roo oid fei room, i laa kase nor room man roo tuu kiid. 39Arfiil room laa nii uum kreda ka laa festa, room laa mdei nii ahe, nii hati bae fee kode faklau, la roo haigaa oid fei room. 40Mahee iim neo mori! Deslaa room hlaet hiin haul room, oid hau meit room uma. Mahee nii roo rini ni ahe, room fun eko arohan manaru oid taa room hahalok klao too. Manura roo leob dega room idura mori doloo. Mahee Nai Maromak hii nee kastigu meded faklau la room.”

Hiin haul kiak iid nee oferta tuu reis roo soi room

(Lucas 21:1-4)

41Faklau telo ura, Jesus mdei fedeis bael kaisa oferta nii Uum Kreda Tuu ni kintal, i Ura fei roo la fois oferta la kaisa. Ura fei roo soi rini la fois oos tuu la kaisa too. 42Nei meit hiin haul kiak iid bae fee maa ataam oos doit ruu la kaisa lala. Oos too tubu loba faklau.

43Toom maa Jesus haah ni eskolanti room oid dega, “Iim fei kook hiin haul kiak too. Ura nee oos doit ruu lea, mahee ura nee rini reis roo hailagaa. 44Roo selu nee oferta ois room osa resi. Mahee hiin haul kiak uri, nee telo meit ura ni osa la Nai Maromak.

Currently Selected:

Marcos 12: BMGM

Highlight

Copy