Loahmax 5

Cholaeng Yezsuz Jizduz Gaenqraeuz Ndaej Yuq Ndaw Dij Sen Faengz

1Taeng'hax gaenqraeuz cholaeng sinq Zaeuj raeuz Yezsuz Jizduz ej ndaej rongx hoak sowh goanz gaemz hax mboq miz naeh, venjnaeh, gaenqraeuz haeuz cho'mbaiq dix daj dij Sen dungzndae eh. 2Gaenqraeuz goj cho'mbaiq dix, cholaeng sinq dix, ndaej ndonj mwz doqnaj dij Sen, dix yumq doiq raeuz ndae, hawj raeuz in ndaej vwnx. Gaenqraeuz goj ruxndeq mwznaj gaenqraeuz toj ndaej sowh najta dij Sen aeu hawj raeuz naeh mboqyaq, baenzzaqnaeh gaenqraeuz faengz nyauznyauz. 3Mboq zawh faengz laeng gaj le gaenqnaeh, gaenqraeuz jinkaem zwzrawz, gaenqraeuz goj faengz laeng jinkaem. Baenzzaqrawz hoakzaqnaeh hax mah? Gaenqraeuz ruxndeq, gaenqraeuz jinkaem gaenqraeuz zux gaj laeng gaj rux gaemx, 4gaenqraeuz gaj laeng gaj rux gaemx, gaenqraeuz zoq sowh kaem rawz goj jin ndaej, gaenqraeuz sowh kaem rawz goj jin ndaej, gaenqraeuz zoq miz gaenq ngwz. 5Gaenq gaenqraeuz ngwz naeh toj mboq rux bowhbowh ngwz. Baenzzaqrawz hoakzaqnaeh hax mah? Dij Sen haeuz aeu minghkoan dix hawj raeuz, minghkoan dix hawj raeuz ruxndeq dix nwh raeuz taeuq. 6Zwz gaenqraeuz naengz dih maengx mboq miz naeh, Jizduz haeuz nganqzauq sowh gau dij Sen dingq naeh how puj hoak loang raeuz tai. 7Damz mboq miz gawz rux how sowh puj biak fahlih haenlaez-haenlih naeh tai. Sowh puj zaw ndae naeh mbangjzwz naengz rux miz dij goanz how dix tai. 8Gaj zwz raeuz naengz zawh puj hoak loang naeh, dij Sen haeuz hawj Jizduz how raeuz tai. Dix hoakzaqnaeh hoak hawj raeuz ruxndeq dix nwh raeuz baenzzaqrawz. 9Taeng'hax Jizduz tai, lowd dix hawj raeuz ndaej hoak sowh goanz gaemz hax mboq miz naeh, venjnaeh, dix hoakrawz mboq jeuq raeuz hawj raeuz mboq zoah dij Sen rik dwk, chaenxfah mux? 10Baenzzaqrawz hoakzaqnaeh hax mah? Taeng'hax zwz raeuz daj dij Sen hoak dangqbaih naeh, dij Sen naengz hawj lug zaiz dix how raeuz tai, hawj raeuz daeuq daj dix dungzndae, haenx, gannaeh raeuz haeuz daj dix dungzndae yaq, dix hoakrawz mboq cholaeng lug zaiz dix daeuq zaeu ej jeuq raeuz mux? 11Mboq zawh gaj gaenqnaeh, zaeuj raeuz Yezsuz Jizduz hawj gaenqraeuz daj dij Sen dungzndae yaq, goj hawj gaenqraeuz nwh ndaej dij Sen zoq faengz.

Aeu Yaqdangz Daj Yezsuz Dungzbij

12Cholaeng goanz doag hoak loang, dij goanz dihndin zoq rux hoak loang, cholaeng dij goanz hoak loang, dij goanz zoq rux tai. Cholaeng gaj goanz gaj hoak loang, gaj goanz gaj rux tai. 13Zwz naengz mboq miz fahlih naeh, dij goanz dihndin haeuz hoak loang, gaj zwz naengz mboq miz fahlih naeh, dij Sen zoq mboq mai sowh gaenq dij goanz hoak loang naeh. 14Gaj daeq Yaqdangz daeuj taeng Moahciz, dij goanz gawz goj miz vaenz tai, daengz sowh puj mboq zawh daj Yaqdangz hoak loang dungzlumj naeh, goj zaemh miz vaenz tai. Yaqdangz lumj Yezsuz goanz daeuj doaklaeng dix naeh. 15Gaj gaenq Yaqdangz hoak loang naeh mboq ndeu gaenq dij Sen yumq doiq dij goanz ndae naeh. Taeng'hax cholaeng goanz ux hoak loang, rux hawj daengzle miz vaenz tai, haenx, gaenq dij Sen doiq dij goanz ndae daengzhwx naeh daj sowh gaenq ndae dij Sen yuq ndaw Yezsuz Jizduz how goanzlai hoak naeh, mboq gajfa dwx nyeuz lai mawx? 16Yaqdangz hoak loang hawj raeuz baenz zaq ux, dij Sen yumq doiq raeuz ndae aeu Yezsuz hawj raeuz haeggaj hawj raeuz baenz zaq ux. Cholaeng goanz doag Yaqdangz, dij goanz dihndin zoah saenxpanq, dij Sen hax paenqdix hoak loang. Gaj zwz raeuz naengz miz gaenq hoakloang lai taeuq naeh, dij Sen yumq doiq raeuz ndae aeu Yezsuz hawj raeuz, hawj raeuz ndaej hoak sowh goanz gaemz hax mboq miz naeh! 17Taeng'hax goanz doag Yaqdangz hoak loang, rux hawj dij goanz dihndin daengzle miz vaenz tai, haenx, Yezsuz Jizduz how dij goanz tai, sowh dij goanz cholaeng dix ndaej gaenq ndae yaengh ndae yaq ndaej hoak sowh goanz gaemz hax mboq miz naeh mboq gajfa ndaej aen mingh daengznauq naeh mawx? 18Hoakzaqnaeh lez maz, cholaeng Yaqdangz mbaed gaengnaeh hoak loang, dij goanz dihndin daengzle zoq zoah saenxpanq, dij Sen hax paenqdix hoak loang; dungzlumj, cholaeng Yezsuz mbaed gaengnaeh hoak ndae, hawj dij goanz dihndin ndaej yuq ndaw zaw dij Sen rongx hoak sowh goanz gaemz hax mboq miz naeh baenz, ndaej aen mingh baenz!

19Cholaeng Yaqdangz mboq biak kauq dij Sen, goanzlai zoq baenz puj hoak loang; dungzlumj, cholaeng Yezsuz biak kauq dij Sen, goanzlai zoq baenz sowh goanz gaemz hax mboq miz naeh. 20Dij Sen hawj miz fahlih, zawh hawj sowh gaenq dij goanz hoak loang naeh meq maz lai, gaj gaenq hoakloang meq maz lai, sowh gaenq dij Sen yumq yangq dij goanz naeh zoq gaj laeng gaj miz lai. 21Dij goanz gaj goanz gaj miz gaenq ndog rangh ndang, gaj goanz gaj miz vaenz tai, gaj dij Sen yumq doiq dij goanz ndae daengzhwx, hawj dij goanz yuq ndaw zaw dix hoak sowh goanz gaemz hax mboq miz naeh, hawj dij goanz cho'mbaiq Zaeuj raeuz Yezsuz Jizduz ndaej aen mingh daengznauq naeh.

Currently Selected:

Loahmax 5: ZHN

Highlight

Copy