Loahmax 2

Dij Sen Mboq Howj Gawz Nyeuz

1Sowh dij goanz pyaemj daenh naeh, gaenqmawz ah! Mawz pyaemj daenh gaenqnaeh gaenqnaeh, gaj hoakri mawz goj hoak gaenqnaeh gaenqnaeh. Mawz pyaemj daenh, mawz goj zawh pyaemj hoakri naeujngaz! Baenzzaqnaeh jixzawh gaenqmawz pyaemj daenh, daengz mawz zawh gawz, sowh gaenq mawz hoak loang naeh mawz goj dih aeu ngej bae rawz mboq miz. 2Gaenqraeuz ruxndeq, gawz hoak loang, dij Sen toj rux saenxpanq mboqyaq. Dix saenxpanq dij goanz zawh hohdih. 3Mawz naeh ah! Mawz pyaemj daenh gaenqnaeh gaenqnaeh, gaj hoakri mawz goj daj daenh dungzlumj hoak gaenqnaeh gaenqnaeh, mawz faeklaih mawz rux gowx gvaq dij Sen saenxpanq maj? 4Dij Sen doiq mawz zawkau taeuq, dix yangq mawz, dix gaemx mawz ndowj taeuq, gaj mawz aeu nyaengxzaw mbyah? Mawz mboq ruxndeq dix doiq mawz ndae zawh lingz mawz gaix maj? 5Zaw mawz haxnyaeb, mboq venq gaix, hawj dij Sen gaj laeng gaj rikdwk mawz lai. Vaenz dij Sen rik dwk chaenxfah dij goanz naeh, dix hawj daengzle leztaen dix saenxpanq piang yaengh piang, taeng vaenz naeh mawz zoah naek mboqyaq.

6Gannaeh gawz hoakzaqrawz hoak, vaenz gaengnaeh dij Sen zoq hoakzaqrawz doiq dix. 7Gawz ceu sowh najta dij Sen aeu hawj naeh, ceu hawj dij Sen haenh, ceu sowh gaenq miz daengznauq naeh, yaq cho le gaenqnaeh kaem'zaw hoak saeh ndae mwznaj, dij Sen zoq aeu aen mingh daengznauq naeh hawj dix. 8Gaj sowh dij goanz nwh gaj gaenq hoakri, sowh dij goanz mboq biak kauq jing dij Sen, gajfa biak kauq ndog naeh, dij Sen toj rikdwk paenqdix, chaenxfah paenqdix mboqyaq. 9Dix hawj sowh dij goanz hoak mbowq naeh miz aen nanq, yuqraix. Zawh puj Yaeuhtaiq daekgoanq, yaq taeng dij goanz puj yowngh ndai.#2:9 Inxnaeh ndaw sw hax: puj Cizlah. Inxnaeh puj Cizlah zoq zawh hax sowh dij goanz mboq zawh puj Yaeuhtaiq naeh. 10Gaj dix haenh sowh dij goanz hoak saeh ndae naeh, hawj paenqdix miz najta, hawj paenqdix ndaej yuqvangq, zawh puj Yaeuhtaiq daekgoanq, yaq taeng dij goanz puj yowngh ndai. 11Dij Sen mboq rux howj gawz nyeuz.

12-13Baenzzaqrawz hax dij Sen mboq rux howj gawz nyeuz mah? Yuq doqnaj dij Sen, mboq zawh hax ndaej biak nyinz fahlih dij Sen ej zawh sowh goanz gaemz hax mboq miz naeh, sowh puj hoak sowh gaenq fahlih dij Sen yaix hoak naeh zux ndaej hoak sowh goanz gaemz hax mboq miz naeh. Baenzzaqnaeh, sowh puj mboq ndaej biak nyinz fahlih dij Sen naeh, paenqdix hoak loang paenqdix rux zoah lown, gaj mboq zawh lown dawj fahlih dij Sen. Sowh puj ndaej biak nyinz fahlih dij Sen naeh, paenqdix hoak loang paenqdix zoq rux zoah aeu fahlih dij Sen saenxpanq. 14Sowh dij goanz mboq zawh puj Yaeuhtaiq naeh daengz paenqdix mboq miz fahlih dij Sen, gaj jixzawh paenqdix nganq sowh gaenq hoakri nwh naeh, hoak sowh saeh fahlih dij Sen yaix hoak naeh, zaw paenqdix zoq zawh fahlih hoakri, paenqdix zoq daj miz fahlih dungzlumj. 15Sowh gaenq paenqdix hoak naeh, ndaw zaw paenqdix ruxndeq gaenq rawz hoj, gaenqrawz mboq hoj, chungh le gaenq naeh zoq ruxndeq ndaw zaw paenqdix miz fahlih. 16Vaenz saenxpanq naeh, dij Sen hoakzaq sowh kauqfaengz gux laemh naeh hawj Yezsuz Jizduz saenxpanq daengzle sowh gaenq ndaw zaw dij goanz nwh naeh daj sowh gaenq dij goanz hoak naeh, daengz daenh mboq ruxndeq paenqdix ndaej nwh gaeng, ndaej hoak gaeng, dij Sen goj naengz saenxpanq.

Ndaw Zaw Hoak Puj Yaeuhtaiq Zux Zawh Puj Yaeuhtaiq Zaeh

17Gux daj puj Yaeuhtaiq hax, mawz hoak goanz puj Yaeuhtaiq ux, mawz hax mawz maengx fahlih, mawz hax mawz ndaej hoak dij goanz dij Sen zoq miz naj nyeuz daenh. 18Mawz hax mawz ndaej biak fahlih zau, baenzzaqnaeh mawz ruxndeq hoakzaqrawz hoak kaeujzaw dij Sen, goj ruxndeq gaenqrawz hoj gaenqrawz mboq hoj. 19Mawz hax hoakri zawh puj lingz loh, lingz loh puj ta'mbud, mawz hax hoakri zawh gaenqrungh, yangz sowh dij goanz yuq dih ndaem naeh. 20Mawz chungh ndaw fahlih ruxndeq gaenq dij Sen daj ruxndeq kauq jing dij Sen, mawz hax mawz zawh swzfuz puj uaj, zawh lauxswz engliak. 21Mawz zau daenh, mawz mboq zau hoakri maj? Mawz koanx dwk daenh mboq jinx hoaklaek, gaj hoakri mawz ej hoaklaek maj? 22Mawz hax hoak po hoak mez mboq jinx naengh puj ndai, gaj hoakri mawz ej bae naengh puj ndai maj? Mawz ywjhwnq sowh gaenq daenh aeu hoak dij sen mbud naeh, gaj hoakri mawz ej mwz laek sowh za'hoq ndaw meuh naeh maj? 23Mawz aeu fahlih hoak gaenq miznaj, gaj hoakri mawz ej mboq biak fahlih, hoak loang fahlih hawj daenh lezmboqqix dij Sen maj? 24Daj ndaw Sw Dij Sen hax naeh dungzlumj: "Cholaeng gaenqsu, puj yowngh ndai hax dij Sen, luanqhax-luanqbae."#Yixcizjeh 36:22.

25Jixzawh mawz biak fahlih bae hoak, mawz hoak diauq zauh heh naeh doiq mawz zoq miz luq. Gaj jixzawh mawz mboq biak fahlih bae hoak, mawz hoak diauq zauh heh naeh doiq mawz zoq mboq miz gaeng luq. 26Baenzzaqnaeh, jixzawh goanz ux dix mboq hoak diauq zauh heh naeh, gaj dix biak sowh gaenq fahlih yaix naeh bae hoak, daengz dix mboq hoak diauq zauh heh naeh, goj suanq dix haeuz hoak diauq zauh heh naeh haeuz zawh puj Yaeuhtaiq, zoq zawh hax, suanq dix zawh sowh dij goanz dij Sen lowg hoak dij goanz dix naeh. 27Dix mboq hoak diauq zauh heh naeh gaj dix biak fahlih bae hoak, mwznaj dix gauq mawz, unj mawz hoak diauq zauh heh naeh daj miz sowh fahlih laiz nyaengx ndaw sw naeh, gaj mawz mboq biak fahlih. 28Gux haxdoq mawz, goanz ux zawh mboq zawh puj Yaeuhtaiq mboq zawh lez baihnog, heh mboq heh goj mboq zawh lez boajnowx. 29Mizgaj sowh dij goanz ndaw zaw hoak puj Yaeuhtaiq naeh zux zawh puj Yaeuhtaiq zaeh. Goj mizgaj sowh dij goanz ndaw zaw hoak diauq zauh heh naeh zux zawh hoak diauq zauh heh naeh zaeh. Sowh dij goanz naeh zawh maengx Minghkoan dij Sen, mboq zawh maengx sowh fahlih laiz nyaengx ndaw sw naeh. Sowh dij goanz naeh ndaej haenh, gaj mboq zawh dij goanz haenh dix, zawh dij Sen haenh dix.

Currently Selected:

Loahmax 2: ZHN

Highlight

Copy