Yezhanq 7
7
Yezsuz Mwz Yezluqsaxlaengx Jin Jeng
1Gvaq ndauj ux yaq, Yezsuz goj naengzgaj yuq ndaw mbanj Zazliqliq, dix bae longq bae longq. Dix ruxndeq puj saeq puj Yaeuhtaiq daz kaj dix. Baenzzaqnaeh dix zoq mboq zawx mwz ndaw mbanj Yaeuhdaq. 2Zaekgaj taeng jeng puj Yaeuhtaiq Jeng Ndowj Zangjpungh naeh.#7:2 Zwz puj jeq puj Yixsowhleh yuq ndaw doanghmowz ndowj siqsip jij bi, paenqdix yuq ndaw zangjpungh ndowj, doaklaeng paenqdix ndaej maz ndaw chaenh ndowj, paenqdix zoq jin Jeng Ndowj Zangjpungh naeh, jin jeng naeh hoak gaenq hawj hoakri laek lumz jeh yuq ndaw doanghmowz ndowj zangjpungh naeh. Lez Sw Liqvaeq 23:33-36, 39-43, Sw Fahlih Daih Ngih 16:13-15. 3Le nongx zaiz Yezsuz daj dix hax: "Mawz baenz ni inxnaeh mwz ndaw mbanj Yaeuhdaq, hoakzaqnaeh hawj cohsaenz mawz goj leztaen najgaengx mawz mah! 4Gawz zawx hawj zwh hoakri leuz bae dih bae dih, mboq miz gawz lupliamx hoak saeh. Jixzawh mawz naengz hoak sowh saeh naeh, zoq baenz aeu hoakri hawj dij goanz dawj fax leztaen mawz zawh gawz singjringh." 5Le nongx zaiz dix hoakzaqnaeh hax, zoq zawh hax daengz gaj le nongx zaiz dix naengz mboq sinq dixzawh Jizduz. 6Yezsuz zoq daj paenqdix hax: "Zwz gux naengz mboq taeng. Gaj doiq su maz hax, lej zwzrawz gojndaej. 7Dij goanz dihndin mboq rux hwnq su mah. Gaj paenqdix hwnq gux, unj gux hax sowh gaenq paenqdix hoak naeh zawh gaenq mbowq. 8Gaenqsu mwz jin'jeng ndeh, zwz gux naengz mboq taeng, baenzzaqnaeh gannaeh gux mboq mwz jin'jeng naeh." 9Yezsuz hax gaenqnaeh yaq, naengzgaj yuq ndaw Zazliqliq ndowj.
10Gaj le nongx zaiz dix mwz jin'jeng yaq, dix goj zaemh mwz Yezluqsaxlaengx chaenh jin'jeng, mboq zawh daeq doqnaj doqta goanzlai mwz, zawh lupliamx mwz. 11Le vaenz jin'jeng naeh, puj saeq puj Yaeuhtaiq cha Yezsuz, hax: "Goanz gaengnaeh yuq rawz mux?" 12Goanzlai laemh dix nyauznyauz, mbangj goanz hax: "Dix zawh puj ndae." Mbangj goanz hax: "Mboq zawh, dix zawh yai goanzlai naeuj." 13Paenqdix mbu puj saeq puj Yaeuhtaiq, baenzzaqnaeh mboq miz gawz yuq doqnaj doqta goanzlai laemh dix. 14Jin'jeng jin ndaej mbengj ux yaq, Yezsuz mwz rownz dij Sen zau daenh. 15Puj saeq Yaeuhtaiq sawz taeuq hax: "Goanz naeh mboq sanz ndaej hawj lauxswz zau, dix baenzzaqrawz ruxndeq ndaw Sw Dij Sen lai baenzzaqnaeh mux?" 16Yezsuz zoq hoakzaqnaeh yaeng paenqdix: "Sowh gaenq gux zau naeh mboq zawh gaenq hoakri gux, zawh gaenq laux nemz gux daeuj naeh. 17Jixzawh gawz venq biak sowh gaenq dij Sen yaix hoak naeh, gawz zoq ruxndeq sowh gaenq gux zau naeh zawh daeq dij Sen daeuj, rux zawh gux haeggaj pinh hoakri gux hax. 18Sowh dij goanz haeggaj pinh hoakri hax naeh, zawh cholaeng najta hoakri. Gaj sowh dij goanz miz dij goanz nemz daeuj naeh mboq zawh cholaeng najta hoakri, zawh cholaeng najta laux nemz dix daeuj naeh, mizgaj sowh goanz naeh zux hax zaeh, zaw dix zux mboq miz gaenqndog. 19Moahciz aeu fahlih hawj su, gaj gaenqsu mboq miz saek goanz biak daengz buq fahlih dix. Gaenqsu baenzzaqrawz daz kaj gux mux?" 20Goanzlai yaeng: "Gawz daz kaj mawz ah! Mawz lau zoah dij pi mwz ndang mbezmboqleq?" 21Yezsuz yaeng: "Gux hoak diauq ux, gaenqsu ej sawz. 22Daeq zwzpujjeq maz, fahlih Moahciz zau su hoak diauq zauh heh naeh. Laemh zaeh maz, gaenqsu goj ruxndeq, diauq zauh heh naeh mboq zawh daeq zwz Moahciz naeh zauh, haeuz zauh deg zwz puj jeq rownz raeuz maz. Baenzzaqnaeh, hax le hax zawh Vaenz Cednoiq, gaj gaenqsu goj saeh lug zaiz su hoak diauq zauh heh naeh.#7:22 Zwzpujjeq, dij Sen hawj Yaqboahlazhanq daj puj zaiz ndaw rownz dix heh naeg dij noag, hoakzaqnaeh zawh aeu mai hoak dij goanz dij Sen. Daeklaeng, dix hawj Moahciz aeu gaenq naeh laiz nyaengx ndaw sw, dix saengq puj Yixsowhleh hoak gaenq naeh. Lez Sw Zwz nduq 17:10-14; Sw Liqvaeq 12:3. 23Gaenqsu cholaeng biak fahlih Moahciz daengz zawh Vaenz Cednoiq gaenqsu goj saeh daenh hoak diauq zauh heh naeh, haenx, gux yuq Vaenz Cednoiq hawj daengz ndang goanz ux ndae, gaenqsu zoq jih dwk gux max? 24Hax gaenq rawz zawh ndae, gaenq rawz zawh ndog, mboq baenz lez baihnog, hax dix zawh gaenq ndae, raj hax dix zawh gaenq ndog, baenz lez dix zawh hoj raj mboq hoj."
Goanz Naeh Zawh Jizduz Wx
25Dij goanz ndaw Yezluqsaxlaengx miz dij goanz hax: "Goanz naeh mboq zawh goanz puj saeq Yaeuhtaiq raeuz daz kaj naeh mawx? 26Mawz lez, dix yuq doqnaj doqta goanzlai zau daenh, puj saeq raeuz goj mboq daeuj hax dix gaemz rawz maznoax. Lau puj saeq ruxndeq dix zawh Jizduz zaeh max? 27Gaj raeuz ruxndeq goanz naeh zawh daeq rawz maz, gaj Jizduz daeuj zwzrawz, lej mboq miz gawz ruxndeq dix daeq rawz maz neh." 28Zwz naeh, Yezsuz yuq gumhhongh Rownz dij Sen zau daenh, dix caqsiq hax: "Gaenqsu ruxnaj gux, goj ruxndeq gux daeq rawz maz. Gux mboq zawh pinh hoakri gux haeggaj daeuj, zawh miz laux ux nemz gux daeuj. Laux nemz gux daeuj naeh zawh dij Sen jing, gaj gaenqsu mboq ruxndeq zaw dix. 29Gaj hoakri gux ruxndeq zaw dix, baenzzaqrawz mah? Gux zawh daeq zawj dix daeuj, goj zawh dix nemz gux daeuj." 30Yezsuz hoanx naeh hax, mbangjgoanz zoq jih taeuq daz gaep dix, gaj zwz dix naengz mboq taeng, zoq gawz goj mboq chaeg. 31Gaj dih goanzlai naeh miz goanz lai taeuq sinq dix zawh Jizduz, paenqdix goanz lej hax mwz doq goanz: "Goanz naeh hoak sowh saeh saenh yaengh saenh lai baenzzaqnaeh, dix toj zawh Jizduz mboqyaq, jixmboqzawh mboq miz gawz rux hoak sowh saeh saenh yaengh saenh lai baenzzaqnaeh."
Miz Dij Goanz Daz Maz Gaep Yezsuz
32Dij goanz Fahliqsaiq ruxnyinz goanzlai hoakzaqnaeh laemh Yezsuz, paenq goanz gvanx puj mbud dij Sen naeh daj dij goanz Fahliqsaiq zoq nemz sowh puj dawz du rownz dij Sen naeh mwz gaep Yezsuz. 33Yaq Yezsuz zoq hax: "Gux daj su zaemh yuq mboq miz jij gau yah, gux dauh mwz zawj laux nemz gux daeuj naeh. 34Mwznaj gaenqsu cha gux, gaj cha mboq taen. Dih gux yuq naeh, gaenqsu mwz mboq baenz." 35Puj saeq puj Yaeuhtaiq goanz lej hax mwz doq goanz: "Goanz naeh daz mwz rawz hawj raeuz cha mboq taen dix mux? Lau dix daz ni inxnaeh bae goh ndai sowh dih miz puj Yaeuhtaiq ndowj naeh, zau sowh puj goak kauq Cizlah naeh maj? 36Dix hax ‘Mwznaj gaenqsu cha gux, gaj cha mboq taen. Dih gux yuq naeh, gaenqsu mwz mboq baenz.’ Gaemz kauq naeh zawh hax gaeng mux?"
Sowh Naemx Hawj Dij Goanz Ndaej Aen mingh Naeh
37Jeng Ndowj Zangjpungh vaenz doaklaeng naeh, zoq zawh vaenz zungqyauq nyeuz daengzle naeh, Yezsuz in, caqsiq hax: "Gawz yaegnaemx, gawz zoq maz zawj gux ndut ndeh. 38Daj ndaw Sw Dij Sen laemh sowh puj sinq gux naeh dungzlumj: ‘Mwznaj ka dah miz sowh naemx hawj aen mingh naeh daeq ndaw zaw dix lae daeuj uad'uad.’"#Saxzazliqyaq 14:8; Yixsaiqyaq 44:3; 55:1; Yixcizjeh 47. 39Yezsuz hax gaemz kauq naeh zawh hax sowh puj sinq dix naeh mwznaj rux ndaej Minghkoan dij Sen. Gaj zwz naeh Dez ndaw fax naengzbaeq hawj Yezsuz miz najta, baenzzaqnaeh Dez ndaw fax naengzbaeq aeu Minghkoan dix hawj puj sinq Yezsuz naeh.
Goanzlai Cholaeng Yezsuz Dungzjinj
40Goanzlai ruxnyinz gaemz kauq naeh yaq, mbangj goanz zoq hax: "Goanz naeh zawh goanz puj zawxkauq dij Sen gaengnaeh zaeh." 41Goj miz goanz hax: "Dix zawh Jizduz." Gaj miz dij goanz hax: "Jizduz hoakzaqrawz zawh daeq mbanj Zazliqliq maz ah? 42Ndaw Sw Dij Sen mboq zawh hoakzaqnaeh hax mawx: ‘Jizduz zawh luglan Daqvaeq, zawh daeq longq Bozliqhaenh dih goakrownz Daqvaeq naeh maz.’" 43Goanzlai cholaeng Yezsuz hoakzaqnaeh dungzjinj. 44Paenqdix miz dij goanz daz gaep Yezsuz, gaj mboq miz gawz chaeg.
Puj saeq Puj Yaeuhtaiq Mboq Sinq Yezsuz
45Sowh goanz gvanx puj mbud dij Sen naeh daj dij goanz Fahliqsaiq leztaen sowh puj dawz baegdu rownz dij Sen naeh dauh maz, paenqdix zoq cham sowh puj dawzdu naeh: "Gaenqsu baenzzaqrawz mboq zowz dix maz mawj?" 46Pujdawzdu yaeng: "Mboq sanz ndaej biak gawz hoakzaq dix naeh laemh!" 47Dij goanz Fahliqsaiq hax sowh puj dawzdu naeh: "Gaenqsu goj zoah dix yai maj? 48Puj saeq daj dij goanz Fahliqsaiq miz saek goanz sinq dix wx?" 49Yaq puj Fahliqsaiq daeuq daj sowh puj dawzdu naeh hax: "Gux haxdoq su, paenq goanzlai yuq haenz Yezsuzbiak naeh, paenqdix mboq ruxndeq fahlih, paenqdix toj zoah dij Sen fah mboqyaq." 50Puj Fahliqsaiq miz goanz ux rongx hoak Nihgozdowhmuq, zoq zawh goanz koax daekgoanq mwz taen Yezsuz naeh, goanz naeh daj puj Fahliqsaiq hax: 51"Paeg saeh gawz gojndae, naengz mboq ndaej biak baeg ndiang dix hax, naengz mboq ruxndeq dix ndaej mboq ndaej hoak zaeh, nganq fahlih maz hax, raeuz rux hax dix hoak loang gaeng maj?" 52Puj Fahliqsaiq yaeng: "Mawz goj zawh daeq ndaw mbanj Zazliqliq maz wx? Mawz caqsiq lez Sw Dij Sen zoq ruxndeq Zazliqliq mboq rux miz puj zawxkauq dij Sen."
[Sw Dij Sen sowh bwnz ndowj nyeuz naeh mboq miz 7:53 – 8:11.]
Yah Daj Puj zaiz Zaemhnoanz Zoah Daenh Jenj Zoah Naeh
53[[Yaq dangq goanz dangq dauh mwz rownz,
Currently Selected:
Yezhanq 7: ZHN
Highlight
Share
Copy
Want to have your highlights saved across all your devices? Sign up or sign in
© 2023, Peace Publishing Co. All rights reserved.
